Spurning til forsætisráðherra

Jóhanna, er framtíð þjóðarinnar trúnaðarmál?

Jóhanna, opnaður þig nú, leystu frá skjóðunni, beraðu málbeinið og notaðu tunguna. Vertu dálítið frökk. Segðu okkur allt af létta í stað þess að vera í þjónustu erlendra stórvelda sem krefjast trúnaðar um leið og þau hlekkja okkur við staur. Þú ert ekki embættismaður í Hollandi, Bretlandseyjum, þú ert þjónn okkar, en ekki þeirra. Þú getur ekki sagt NEI við okkur (eða Egil Helga) eða vænt umboðsmenn meira en helmings Íslendinga á Alþingi um trúnaðarbrest. Þú ert ekki yfirmaður á ríkisstofnun sem ávítar starfsmenn sína fyrir gagnrýni. Þú er forsætisráðherra og ættir að geta tjáð þig öðruvísi en með hótunum við þína eigin þjóð þegar á móti blæs.

Við sitjum uppi með óstjórn. Ekki er þetta félagshyggjustjórn. Það vottar ekki fyrir neinu slíku á Íslandi, nema ef menn kalla setu forseta ASÍ í skúffufélagi á Tortólu félagshyggju.

Nei, vinstrimenn sem eru svekktir yfir trúbræðrum sínum í ríkisstjórn og öðrum stjórnunarstöðum, verða að gera sér grein fyrir því, að það er ný gerð af fasisma sem núverandi ríkisstjórn er heltekin af. Nú verður þjóðin nefnilega barin til hlýðni af manneskju sem virðist vera ólæknanlegur sósíófób. Það er ekki nóg að vera "openly gay", þegar maður er snigill sem hefur harðlæst kuðunginum. Það er engin ástæða að halda um pung þegar maður er ekki með neinn. 

Jóhanna er hrædd við að segja þjóð sinni allt af létta í einu vandasamasta máli sem þjóðin hefur komist í. Þess vegna er hún farin að hóta okkur, þá sjaldan að hún talar.

Forsætisráðherra landsins og ríkisstjórn hennar eru orðnir að landráðamönnum, því þeir ganga erinda erlendra ríkja, sem vilja hneppa saklausa þjóð í þrældóm. Ríkisstjórnin vinnur gegn þjóðinni vel vitandi að kröfur erlendra ríkja varða aðeins þá sem ollu fjármálakreppunni. Þeir einir eru sekir! Við höfum stjórn sem ætlar sér að skella skuldinni á þjóð sína, án þess að þjóðin hafi stofnað til skuldarinnar. Það er landráð. Heilvita maður setur ekki þjóð sína í vanda. En fasistar eiga það til. Það er þannig stjórn sem er á Íslandi nú.

Trúnaðarbrestur stjórnarandstöðu

Myndir á sýningu

Ég fór á ferniseringu í dag. Eggert málari Pétursson opnaði sýningu á blómamyndum sínum á jarðhæð Nordatlantiske Brygge á Christianshavn í Kaupmannahöfn. Hann sýnir þar lyng svo litrík, að ég hef aldrei séð neitt eins blómlegt nema í garði móður minnar. Myndirnar voru svo kræsilegar, að mann langaði hálfpartinn að leggjast í berjalautir og sortulyng Eggerts, umvafinn íslenskum mó- og skógarplöntum, ljónslöppum og fíflum ... þangað til maður fann línolíulyktina, sem var enn megn af sumum myndunum. Sumar voru alveg frískar úr fabrikkunni. Þarna var ekki annar stíll hjá Eggert en á fyrri  blómamyndum hans og stundum fær maður á tilfinninguna að hann haldi mikið upp á Kjarval. En það var meiri litadýrð en áður. Sumar myndirnar minntu jafnvel á teppi frá Isfahan.  

Mannavalið á sýningunni var nú líka fjölbreytt flóra. Vinir vors og blóma, íslenskar og íturvaxnar grænlenskar blómarósir, íslenskir kúlturnjólar og Sveinn Einarsson fyrrverandi þjóðleikhússtjóri var þarna líka og gamall kennari minn í listasögu í MH, Halldór Björn Runólfsson. Eggert málari var einna litminnstur fyrir utan mann með sólgeraugu, áttpensarahatt og menningarvömb sem gekk þarna um og þefaði af myndunum. Þarna var líka mættur bókaútgefandi með þungan lykil da Vincis um hálsinn. En flest átti þetta fólk það sameiginlegt að að vera ættað úr afdölum á Íslandi, þar sem gróðinn getur aldrei orðið eins yfirgengilegur og í myndum Eggerts. En þetta er ekta íslenskur gróði hjá Eggert, ekki neinar útrásavíkingafalsanir.  

Sonur minn 6 ára sýndi ekki myndlist hinn minnsta áhuga frekar en fyrri daginn. Blóm hvaaaaað? Hann drakk í staðinn 4 glös af appelsíni og var með mannalæti við yngri snáða sem voru þarna líka með foreldrum sínum.

Svo þegar búið var að dásama fallegar myndir og velta því fyrir sér hvað þær myndu kosta og hvað þær pössuðu vel á veggnum heima, var haustsólin sleikt við kajann.  Þegar hún var byrjuð að stinga þægilega í húðina var hugsað til heimferðar. Hver kemur ekki þá ekki ríðandi í hlað á blökkum járnfák. Jú sjálfur sendiherrann. Sá sem var framlengdur fyrir afrek sín í ICESAVE málinu? Já, sá sem var framlengdur. En það var sko enginn framlengdur Trabant sem hann var á, heldur hápunktur þýsks ofurkapítalisma. Hann ók dólgslega og snarhemlaði fyrir framan íslenska sendiráðið og setti silfurgráa frúna af, og ók síðan drossíunni á sinn stað bak við pakkhúsið. Ég sleppti því að sjá sirkusinn sem fylgdi. Ég er ekki fyrir óþarfa framlengingar. Svavar hefur örugglega keypt mynd, ekki trúi ég öðru.  

Það er hægt að mæla með því að fara á Nordatlantens Brygge og sjá sýningu Eggerts, Blomsterlandet. Maður fær heimþrá og löngun til að fara í gönguferð út í íslenska náttúruna til að sannreyna hvort það sem hann er með á striganum sé þar í raun og veru. Það er engin kreppa í litum Eggerts.

KRANTAI

Nýlega fékk ég sent tímaritið Krantai 2009 (1), sem er litháískt menningartímarit. Því miður get ég ekki lesið þetta fallega tungumál, en maður sér þótt ólæs sé, að efnið er afar vandað.

Ekki er heldur við öðru að búast. Vinur minn, dr. Svetlana Steponaviciene bókmenntafræðingur, er í ritstjórn þessa heftis. Hún hefur þýtt ýmis íslensk ritverk yfir á rússnesku og litháísku, og hún er mörgum á Íslandi vel kunn. Svetlana er með grein í Krantai um hinn íslenskættaða Åge Meyer-Benediktssen, sem er þjóðhetja í Litháen. Ég hef skrifað um hann hér á blogginu og einnig hér, og á í handriti grein um ættir hans á Íslandi og í Danmörku, sem ég verð að koma frá mér.

Einnig er mikil minningargrein eftir Svetlönu um hinn merka fræðimann og vin hennar, Jörund Hilmarsson  (1946-1992), sem hún kallar á íslensku: Jörundar saga Hilmarssonar Lithaugalandsfara. Jörundur var einn helsti sérfræðingur heimsins í tokkarísku. Ég var mjög forvitinn er ég sá þetta tungumál nefnt í fyrsta sinn. Það var í tilkynningu um styrkveitingar frá íslenskum sjóð, sem ég sótti einnig um fé í. Ég reyndi að kynna mér hvers kyns þetta dularfulla tungumál var, en það tókst ekki fyrr en seint og síðar meir er ég ræddi þetta við góðan vin, sem vissi ýmislegt um þetta tungumál. Hér má lesa um tokkarísku.

Krantai um Frón. Krantai þýðir strendur. Þetta er vandað rit og góður reki, sem ég get því miður ekki nýtt mér frekar en tokkarísku, en ég er ekki í vafa um gæðin, því ég veit að Svetlana Steponaviciene hefur séð til þess að þau voru mikil. Hún er einn af þessum ekta Íslandsvinum.

Þess má geta að skrifaði nýlega um tyrkneskt tímarit, sem var helgað Íslandi að hluta til. Sjá hér.

Átta ár síðan 9/11-ógnin byrjaði

Danir eru hrædd, lítil þjóð. Það er ef til vill hefð hjá Dönum að láta bugast, þegar þeim sýnist að þeir hafi mætt ofjarli sínum. Danir lögðust til dæmis flestir, og sérstaklega stjórnvöld þeirra, undir nasista eins og lóða tík. Þeir gerðu við þá sérsamninga og fóðruðu heri Þjóðverja með beikon og smjöri, svo nasistar gætu slátrað fleiri gyðingum. Þetta kalla Danir Samarbejdspolitik, og heimurinn hlær.

Nú, þegar Danir mæta trúarofstæki, sem líkist heimsyfirráðaáformum fasista á ýmsan hátt, er rófan líka kominn á milli afturfótanna. Danir vilja auðvitað ekki sjá 9/11 í sínu litla, huggulega landi. En þeir gera lítið til þess að koma í veg fyrir það.

Sú hræðsla, sem við sjáum nú um alla Evrópu, er eðlileg afleiðing þess fasisma sem við verðum vitni að. Það er einfaldlega ekkert eðlilegt við það, að heimssambönd einhverra trúarbragða taki sig til og hóti heiminum báli og brandi, ef hann beygir sig ekki og bukkar eftir þeirra höfði. Reynslunni (og of mörgum hryðjuverkum) ríkari, eru Evrópumenn hræddir. Sumir stinga aftur á móti höfðinu í sandinn og vilja meina að BNA og Ísrael standi á bak við allt illt. Það eru, og verða alltaf, til fífl.

Menn gátu, þangað til nýlega, teiknað guði sína og annarra og gert grín af trúarbrögðunum. Við höfðum náð svo langt, að vera ekki dæmd og útlæg gerð fyrir að hafa skoðun og sjálfstæða hugsun, eða fyrir að gera góðlátlegt grín að hlutunum. Er því furðulegt að menn setji bombu í túrban Múhameðs, þegar stærstu hryðjuverk síðari tíma voru framin í hans nafni? 

Sumir múslímar móðgast hreinlega við hvað sem er. Það er óhollt. Ef trú þeirra er hafin yfir gagnrýni, og notuð til að réttlæta ódæðisverk, er nema von að fólk í Evrópu sé hrætt og þreytt. Það er nefnilega mjög ó-evrópsk hefð í gangi. Menn börðust gegn þessari óevrópsku hefð, þegar þeir börðust gegn nasisma og kommúnisma, gervitrúarbrögðum, sem ekki leyfðu frjálsa hugsun.

Þjóðverjar eru nú farnir að sekta fólk fyrir að bera ísraelskan fána. Ég er viss um að dómur þeirra er hræðsluyfirlýsing. Ísraelska fánan má nefnilega ekki bera í nánd við við mótmæli múslíma. Það móðgar múslíma. Þýskir dómarar eru hræddir. Þjóðverjar þora hins vegar ekki  banna og sekta fyrir skilti með ýmsum ókræsilegum hatursboðsskap í mótmælagöngum múslíma.

Í Danmörku er stuðningshópum Ísraels unnt að halda opinbera fundi með mikilli lögregluvernd. Lögreglan getur þó ekki hindrað að fánar múslíma, Hizballa og Hamas sé veifað bak við lögreglumennina. En hér um árið var ráðist á mann í Kaupmannahöfn, vegna þess að hann var með lítinn ísraelskan fána í plastpoka, að koma af stuðningsfundi fyrir Ísrael. Árásamaðurinn var að koma af fundi Hizb ut Tahrir, sem lýst hefur yfir þeirri ósk sinni að myrða gyðinga, hvar sem í þá næst. 

Ég er orðinn þreyttur á múslímum sem mótmæla hverju sem er. Þeim væri nær að líta í eign barm og mótmæla sínu eigin óréttlæti. Ég óska þeim góðs gengis í þeirri baráttu. Þeir geta örugglega fengið nóg af vinum sínum á vinstri vængnum til að koma á lýðræði - án þess þó að ráðast á og eyðileggja eina lýðræðisríkið í Miðausturlöndum, Ísrael. 

Spurningin er: Er það það lýðræði, sem þessir nýju félagar í öfgunum eru að leita að? Ég leyfi mér að efast um það.

Myndin að ofan var tekin fyrir framan Tívolí fyrir 3 árum. Danir voru of hræddir við að sekta þá sem báru fána ólöglegra hryðjuverkasamtaka.

Þessi bók hefur selst vel í Palestínu

Hryðjuverkahætta í Danmörku

נְבִיא Stiglitz

Er Stiglitz að verða að naví (spámanni) á Skerinu. Var það ekki svo, að þegar allt var komið á vonarvöl, þá fór Egill Helgason, Old Quick Silver, að náði í gamlan og klókan gyðing með Nóbelsgráðu til að bjarga landinu okkar. Þó fyrr hefði mátt vera. Sá gamli var skjallaður upp úr skónum á Íslandi. Enginn hefur beðið hann svo fallega síðan konan hans baðst hans.

Íslendinga hefur alltaf vantað almennilegt fólk. En eitthvað rámar mig í, að hatur manna á öðrum naví, naví Friedman, hafi frekar komið til af uppruna hans en fræðum... nei, kannski man ég rangt.

Ég vona bara að Stiglitz sé meðvitaður um að Íslendingar eru upp til hópa "absólutistar" og kreddukarlar, og að þeir munu halda að allt sem hann segir, sé heilagur sannleikur - vegna þess að þeir eru búnir að missa trú á stjórnmálamönnum. Íslendingar gera sér heldur ekki grein fyrir því að blaðamenn eru ekki spámenn.

Friðrik Þór & Spielberg eru þegar búnir að finna leikarann sem á að leika Stiglitz í stórmyndinni Saving Iceland: Ríkharð Þrífót.

Ég imhallalaði Egil Helgason

... og hann er ekki kosher, ... afsakið halal.

Múslímar sem leita, geta nú gert það án þess að vestrænir-gyðinglegir klámheilar rugli þá í ríminu.

Þeir leita á www.imhalal.com

Ég fór inn á imhalal, under cover (burked), og þóttist vera halal. Ég leitaði að myndum eins og ég geri oft: Halal babes, skrifaði ég. 

Ekki fékk ég aðvörun um að tölva mín myndi springa, eða að hendur mínar yrðu höggnar af. En ég fékk aðvörun:

Oops! Your search inquiry has a Haram level of 3 out of 3! I would like to advise you to change your search terms and try again.

Ég leitaði þá bara að orðinu babes, en fékk sömu aðvörun og fyrr.

Þá leitaði ég að orðinu (myndum af) Jew og Iceland og þá kom í bæði skiptin þetta svar:

Caution! The image search of imhalal.com is stil in it's early Beta(β) days and doesn't filter perfectly yet. We advise you to choose your search terms carefully.

Svo Imhalallaði ég sjálfan Egill Helgason, og hann kom í allri sinni dýrð eins og Allah. Egill er greinilega mjög halal og augljóslega ekki neitt babe. Það liggur í augum uppi, að ég get ekki notað www.imhalal.com

Að lokum leitaði ég að myndum af "prophet Mohammed". Hann er ekki eins þekktur og Egill samkvæmt Imhalal.com. En þessi mynd kom upp, við hvatningu til þess að menn kaupi ekki mat frá Danmörku. Danir hafa nefnilega séð mynd af spámanninum, en líklega aldrei mynd af Agli Helgasyni.

Ísland afgreitt Down Under

Ekki af ruglaðri yfirborðskerlingu frá 60 Mínútum í Ástralíu, heldur af því "mannavali" sem hún talaði við: Víkingar sem spóluðu í moldarflagi, miss Iceland sem ætlaði að fara að borða þang, og annar leikaraskapur. Aðalhetjan, Steini staur, var greinilega enn svekktur yfir því að hann fékk aldrei boðsmiða á Elton John í afmæli eins svindlaranna. Mikið hefur Steina nú hrakað síðan þetta var tekið upp.

Menn verða vara sig á því hvað þeir segja við útlendinga um landið sitt. Hvað ætli afkomendur afbrotamanna í Ástralíu haldi?

Var þetta ekki annars tekið upp fyrr í ár, um leið og ástralskur fjárglæframaður reyndi að kaupa hér billegt á brunaútsölu Moggans?

RÚV á bágt. Erindi beint til gráa Boga.

Eins og ég skrifaði í gær á fréttastofa RÚV stundum bágt. Geta fréttamenn Sjónvarpsins ekki sagt alla söguna, þannig að aðalatriðin eru með?

Í gær var greint frá því að Amadínijad í Íran ætlar sér að setja Ahmad Vahidi í embætti ráðherra. Greint var frá því, að maður þessi er eftirlýstur hryðjuverkamaður, sem stóð á bak við sprengjuárásir í Argentínu. Sjá fréttina hér.

En af hverju Argentína?, hljóta einhverjir að spyrja. Hvað hefur Argentína nokkru sinni gert Íran? Af hverju eru menn að hatast út í í Argentínu?

Fréttasnápar og -snípur RÚV, hér er upplýsing handa ykkur, sem þið mættuð tattúera á handlegginn: Það eru gyðingar Argentínu sem ráðist var á í Argentínu. Írönsk yfirvöld og öfgamúslímar um allan heim drepa gyðinga, eða hóta að gera það. En það telst til aukaatriða á Ríkisútvarpinu, því þar taka menn sífellt þátt í sögufölsun og fréttafölsun, þegar kemur að ofsóknum á hendur gyðingum.

18. júlí 1994 sprakk sprengja í félagsheimili gyðinga Asociación Mutual Israelita Argentina (AIMA) í Buenos Aires, 87 voru drepnir, ekki bara gyðingar. Um 100 manns slösuðust alvarlega.  

Hvað hefði tekið langan tíma að lesa þetta fyrir fréttaþulinn? 5-6 sekúndur? Í dag var hins vegar frétt í hádegisfréttum útvarpsins, þar sem sagt var frá presti í Noregi sem sussaði á fólk.

RÚV og fréttastjóranum Boga, finnst merkilegra að segja frá því að kona sem pökkuð er í svartar gardínur sé orðin ráðherra í morðveldinu Íran. Það er svona álíka og þegar Jóhanna varð ráðherra á Íslandi. Það var svart og það var ekki til bóta.

Snertið myndina til að sjá hana stærri.

Þarna sjáið þið argentínsk fórnarlömb hryðjuverka múslíma.

Gyðingabörnin í lestinni

 

RÚV á stundum bágt. Fréttaflutningurinn er yfirborðskenndur. Í sjónvarpsfréttum í gær sagði frá því að fólk, sem hafði verið börn fyrir stríð, minntist nú björgunar sinnar frá Tékklandi fyrir 70 árum, með því að ferðast með lest sömu leið og þá.

Það var ekki fyrr en í miðri frétt að sagt var að börnin hefðu flest verið gyðingar. Slíkir björgunarflutningar, Kindertransporte, höfðu reyndar farið fram frá Þýskalandi áður, en Winton tókst að hjálpa börnum frá Tékkóslóvakíu. Margir gyðingar og gyðingasamtök börðust fyrir því að koma börnum og unglingum úr landi, til Palestínu eða annarra landa, burt frá brjálæðingnum Hitler og öllum fylgifiskunum hans. Í Danmörku, Svíþjóð og Hollandi voru t.d. sumarbúðir fyrir þýsk gyðingabörn frá 1935, sem rekin voru af ... gyðingum.

Einnig gleymdist að segja frá því í fréttum í gær, að bjargvættur barnanna í Prag, Nicholas Winton, er sjálfur gyðingur. Fjölskylda hans kom frá Þýskalandi tveimur árum áður en hann fæddist og ættin hét í raun Wertheimer.

Þess ber að geta, að hin fína frændþjóð okkar, Svíar, áttu möguleika á því að bjarga 20.000 gyðingabörnum frá stríðshrjáðri Evrópu árið 1943. Þeir ákváðu að gera það ekki.

Það var ekki mikið samúð í þessum björgunum. Börnin frá Prag komust ekki til Lundúna, nema vegna þess að það tókst að finna fólk sem var viljugt að bera allan kostnað af dvöl þeirra. Svíum fannst t.d. of dýrt að borga undir 20.000 gyðingabörn. En þeir seldu járn til Þjóðverja.

Það hefðu getað verið miklu fleiri gyðingabörn í lestum og skipum á leiðinni í frelsið árið 1939. En það var nú einu sinni svo, að það voru fyrst og fremst gyðingar sjálfir sem báru þungan af því að hjálpa sinni þjóð. Aðrir vildu fá borgað fyrir það.

Ég sá um daginn viðtal við konu, sem fæddist i Teplice, sem var send sem barn til Bretlandseyja. Fyrir rúmu ári hélt önnur kona frá Teplice, sem ekki er gyðingur, myndlistasýningu á Íslandi. Ætli foreldrar hennar hafi hjálpað gyðingabörnum árið 1939?

Þar féll hann aftur af baki

og braut þjóðina og framtíð hennar á bak aftur...

 

Af er það sem áður var,

er  Ólafur var súperstar.

Hrossin gera Óla hrekk,

hann skrifar undir gúmmítékk.

Forsetinn staðfestir Icesave-lög