Ungr var ek forðum

 

Minningar borgarskæruliðans:

Ungr var ek forðum. Líkt og unga fólkið á Norðurbrú. Þó ekki alveg eins vitlaus, enda var lögreglan sætari við okkur þá. Einn septemberdag í haustfrosti söfnuðumst við saman, herstöðvaandstæðingar, í Sundahöfn til að láta illa við herskip sem þar lágu við hafnarbakkann. Hétu þau Karlsruhe og Nipigon. Eiginlega var það ekki ætlunin að láta illa, heldur ætluðum við aðeins að syngja "Ísland úr NATO" og hlusta á Árna Björnsson halda ræðu inni í Lödu Sport, sem hann sat inni í.

Ég fór beint úr latínutíma í MH og var með þýðingar mínar á Gallastríðinu eftir Júlíus Cæsar í plastoka og Lívíus. Þarna voru líka nemar úr Iðnskólanum og MS, sem höfðu óspektir í huga. Sumir voru með kassa fullan af boltum, sem höfðu verið fylltir af rauðri og blárri málningu. Þeim átti að henda í herskipin. 

Nokkrar löggur voru mættar á staðinn, svo liðið hélt að það kæmist upp með óspektir. En viti menn, skyndilega opnaðist rennihurð á kornsílói og út kom varalið löggunnar, sem hafði beðið inni í kornsölunni eftir því að komast í slag við ungviðið. Þarna voru gamlir kallar með Bjarka Elíasson í fararbroddi og veifuðu þeir kylfum sínum dólgslega. Þá hófst auðvitað slagurinn. Hér er hægt að lesa um hann í túlkun Moggans.

Ég var auðvitað alltaf jafnheppinn og Óli K. Mag. tók þessa mynd af mér "að safna grjóti", og sagði eftir að hann gerði það. "Hvað ætli hann afi þinn segi þegar hann sér myndina af þér". Þetta tók úr mér allan þrótt. Ég var ekki handtekinn eins og sum skólasystkini mín.

Daginn eftir, og í nokkurn tíma á eftir, var ég uppnefndur borgarskæruliðinn. Það þótti mér mjög miður enda friðarsinni fram í fingurgómana.

 

Athugasemdir

[Greta Björg Úlfsdóttir, 5.3.2007 kl. 10:33]

Já, var virkilega ennþá verið að kenna latínu í MH 1979? Kenndi Teitur þér?

[Vilhjálmur Örn Vilhjálmsson, 5.3.2007 kl. 13:38]

Já Teitur Benediktsson sá góði maður, sem ég hef reyndar ekki séð síðan 1979 og er skömm frá því að segja. Við vorum þrír í Latínu 60 haustið 1979. Veit ég ekki hvar hinir eru niður komnir. En eins og Teitur sagði nokkrum sinnum: "Maður verður aldrei samur maður eftir að hafa verið í Latínu." Ég hef notið góðs af því.

[Greta Björg Úlfsdóttir, 7.3.2007 kl. 11:14]

Sama segi ég. Ég útskrifaðist vorið 1971, úr 4-A (þá var enn bekkjarkerfi við lýði), úr frönskudeild með latínu, eins og það var kallað. Held að ekki hafi verið haft það form á eftir það. Teitur var og er snillingur, ég sé hann einstaka sinnum á gangi í miðborginni, lætur ennþá lítið fyrir sér fara, spakur maður.