נְבִיא Stiglitz

Er Stiglitz að verða að naví (spámanni) á Skerinu. Var það ekki svo, að þegar allt var komið á vonarvöl, þá fór Egill Helgason, Old Quick Silver, að náði í gamlan og klókan gyðing með Nóbelsgráðu til að bjarga landinu okkar. Þó fyrr hefði mátt vera. Sá gamli var skjallaður upp úr skónum á Íslandi. Enginn hefur beðið hann svo fallega síðan konan hans baðst hans.

Íslendinga hefur alltaf vantað almennilegt fólk. En eitthvað rámar mig í, að hatur manna á öðrum naví, naví Friedman, hafi frekar komið til af uppruna hans en fræðum... nei, kannski man ég rangt.

Ég vona bara að Stiglitz sé meðvitaður um að Íslendingar eru upp til hópa "absólutistar" og kreddukarlar, og að þeir munu halda að allt sem hann segir, sé heilagur sannleikur - vegna þess að þeir eru búnir að missa trú á stjórnmálamönnum. Íslendingar gera sér heldur ekki grein fyrir því að blaðamenn eru ekki spámenn.

Friðrik Þór & Spielberg eru þegar búnir að finna leikarann sem á að leika Stiglitz í stórmyndinni Saving Iceland: Ríkharð Þrífót.

Athugasemdir

[Kristján Sveinsson (IP-tala skráð) 9.9.2009 kl. 18:59]

Veistu, gamli minn, að ég vona nú að hann Stiglitz karlinn verði hér herzlich. Mér finnst hann nú samt tala eins og kaupfélagsstjóri svo ég er smeykur um að það blundi í honum framsóknarmaður.

Annars hef ég ekki áhyggjur af neinu því ég sótti mér spýtur hérna út í garð og er búinn að smíða mér þennan líka ljómandi fína hagfræðing sem mér fellur afar vel við. Það er vegna þess að hann þegir alltaf og verður ekki einu sinni uppstökkur þótt síminn hringi. Best gæti ég trúað að hann sé gyðingur eins og Stiglitz. Hann er í það minnsta dálítið grár um kollinn en sköllóttur er hann ekki, því það er vitað mál að vitlausustu hagfræðingarnir eru nauðasköllóttir. 

Hagfræðingurinn minn er sá gáfaðasti sem ég hef kynnst, enda með grámórautt reyfi á sínum harðviðarhausi. Og heitir Mauritz Güntze. Þú lítur nú endilega inn á okkur félagana ef þú átt leið um bæinn.

[Aðalbjörn Leifsson, 9.9.2009 kl. 19:24]

Er þetta spámaðurinn sem Mose talaði um að myndi koma og færa allt í lag??

Vona að ríkisstjórnin hamizt ekki gazalega í honum, þá verður Alla að mæta.

[Vilhjálmur Örn Vilhjálmsson, 10.9.2009 kl. 05:00]

Alli, ef hann fer að tala um körfulán frá Egyptalandi, væri það ekki útilokað. Þú verður að Fara o' athuga þa' maður.

Kristján, þú ert ekki hræddur um að þú hafir skapað hagfræðilegt monster í garðinum. Spákaupmann frá Deutsche Bank? Þú neglir hann fast ef hann fer að gera eitthvað. En mikið er það nú gott að þú fékkst þér ekki þýskan plastdverg í Blómaval. Mér er sagt að þeir vakni á nóttinni og séu sódómistar. Ég kem einhvern tíma við og lít á Moritz. Þar sem þú ert svo hagur á tré, er víst lítið mál að umskera hann. En þá er eins víst að Egill Helgason fari að snobba fyrir honum, og þá hefðir þú alveg eins geta fengið þér feitlaginn þýskan keramíkdverg í garðinn.

[Kristján Sveinsson (IP-tala skráð) 10.9.2009 kl. 08:38]

Ja, hver veit nema það leynist golem í Trjámanni hagfræðingi. Ég vona það eiginlega því ég er í fámennu en vel skipulögðu hatursmannafélagi garðdverga og ætla Mauritzi að taka hatrammlega á móti ef það kemur dvergur í garðinn. Ég veit að allar sögur sem sagðar eru um fúllífi garðdverga og viðurstyggð eru sannar.

Ein athyglisverðasta launverslun sem ég hef orðið vitni að var svartamarkaðsbrask með garðdverga á landamærum Póllands og Þýskalands. Það var spaugilegt mjög.

[Hólmfríður Pétursdóttir, 10.9.2009 kl. 13:43]

Svona bull með undirtón eins og þessar samræður eru ekki á allra færi. Þessar finnast mér skemmtilegar.

[Vilhjálmur Örn Vilhjálmsson, 18.9.2009 kl. 01:30]

Sæl Hólmfríður, svona samræður hafa allir karlar, þegar konur heyra ekki til. Konur hlusta bara ekki alltaf nógu vel. En karlar gera það nú heldur ekki... eins og íslenska hrunið sýnir mætavel. Kristján og ég erum félagar í félagi gegn garðdvergum. Maður verður að vera yfir 1.80 í því félagi, helst yfir 1,90. Það er nóg að maður fái kannski ESB yfir sig. Garðdvergar eru ekki til að bæta ástandið.