Myndir á sýningu

Ég fór á ferniseringu í dag. Eggert málari Pétursson opnaði sýningu á blómamyndum sínum á jarðhæð Nordatlantiske Brygge á Christianshavn í Kaupmannahöfn. Hann sýnir þar lyng svo litrík, að ég hef aldrei séð neitt eins blómlegt nema í garði móður minnar. Myndirnar voru svo kræsilegar, að mann langaði hálfpartinn að leggjast í berjalautir og sortulyng Eggerts, umvafinn íslenskum mó- og skógarplöntum, ljónslöppum og fíflum ... þangað til maður fann línolíulyktina, sem var enn megn af sumum myndunum. Sumar voru alveg frískar úr fabrikkunni. Þarna var ekki annar stíll hjá Eggert en á fyrri  blómamyndum hans og stundum fær maður á tilfinninguna að hann haldi mikið upp á Kjarval. En það var meiri litadýrð en áður. Sumar myndirnar minntu jafnvel á teppi frá Isfahan.  

Mannavalið á sýningunni var nú líka fjölbreytt flóra. Vinir vors og blóma, íslenskar og íturvaxnar grænlenskar blómarósir, íslenskir kúlturnjólar og Sveinn Einarsson fyrrverandi þjóðleikhússtjóri var þarna líka og gamall kennari minn í listasögu í MH, Halldór Björn Runólfsson. Eggert málari var einna litminnstur fyrir utan mann með sólgeraugu, áttpensarahatt og menningarvömb sem gekk þarna um og þefaði af myndunum. Þarna var líka mættur bókaútgefandi með þungan lykil da Vincis um hálsinn. En flest átti þetta fólk það sameiginlegt að að vera ættað úr afdölum á Íslandi, þar sem gróðinn getur aldrei orðið eins yfirgengilegur og í myndum Eggerts. En þetta er ekta íslenskur gróði hjá Eggert, ekki neinar útrásavíkingafalsanir.  

Sonur minn 6 ára sýndi ekki myndlist hinn minnsta áhuga frekar en fyrri daginn. Blóm hvaaaaað? Hann drakk í staðinn 4 glös af appelsíni og var með mannalæti við yngri snáða sem voru þarna líka með foreldrum sínum.

Svo þegar búið var að dásama fallegar myndir og velta því fyrir sér hvað þær myndu kosta og hvað þær pössuðu vel á veggnum heima, var haustsólin sleikt við kajann.  Þegar hún var byrjuð að stinga þægilega í húðina var hugsað til heimferðar. Hver kemur ekki þá ekki ríðandi í hlað á blökkum járnfák. Jú sjálfur sendiherrann. Sá sem var framlengdur fyrir afrek sín í ICESAVE málinu? Já, sá sem var framlengdur. En það var sko enginn framlengdur Trabant sem hann var á, heldur hápunktur þýsks ofurkapítalisma. Hann ók dólgslega og snarhemlaði fyrir framan íslenska sendiráðið og setti silfurgráa frúna af, og ók síðan drossíunni á sinn stað bak við pakkhúsið. Ég sleppti því að sjá sirkusinn sem fylgdi. Ég er ekki fyrir óþarfa framlengingar. Svavar hefur örugglega keypt mynd, ekki trúi ég öðru.  

Það er hægt að mæla með því að fara á Nordatlantens Brygge og sjá sýningu Eggerts, Blomsterlandet. Maður fær heimþrá og löngun til að fara í gönguferð út í íslenska náttúruna til að sannreyna hvort það sem hann er með á striganum sé þar í raun og veru. Það er engin kreppa í litum Eggerts.

Athugasemdir

[Jón Valur Jensson, 17.9.2009 kl. 02:06]

Eggert er snillingur. Takk fyrir líflega frásögn, doktor, nema hvað sleppa hefði mátt Svavari – raunar sleppa honum líka úr opinberri þjónustu fyrir löngu, eins og alþjóð veit.

[Vilhjálmur Örn Vilhjálmsson, 17.9.2009 kl. 06:49]

Þakka þér líka Jón Valur. Ef sá framlengdi á fína bílnum hefði náð því að koma þarna á sýninguna meðan ég var þar, hefði það líklega orðið til þess að lýsingin á fólkinu sem ég sá hefði orðið öðruvísi og myndirnar reynst fölari í minningunni. En einhvers staðar verða vondir að vera. Kannski málar Eggert ESB-mynd fulla af erlendum arfa og illgresi, kryddaða gervirósum, ryki úr nýsprengdri gorkúlu og hampplöntum undir stolinni gervilýsingu.

[Marta Gunnarsdóttir, 17.9.2009 kl. 21:48]

Skemmtileg lesning og örugglega skemmtileg sýning sem þú segir frá.

[Baugur,hrossaræktarfélag, 17.9.2009 kl. 22:00]

Engar allsberar tjellingar á myndunum?

[Hörður Finnbogason, 17.9.2009 kl. 22:28]

Berin eru ófrosin enn og ég hlakka til að fara nú um helgina í hestaréttir og anda að mér fersku fjallalofti og tína nokkur ber í munn.  Þakka þér fyrir skemmtilega frásögn..

[Vilhjálmur Örn Vilhjálmsson, 18.9.2009 kl. 08:27]

Marta, sýningin var falleg og skemmtileg, en salurinn, ég gleymdi að segja frá honum. Hann er hrein hörmung.

Baugur, engin ástæða fyrir þig að sjá sýninguna. Eggert var með öll ber nema rassber. Haltu bara áfram að horfa á vídeóin þín.

Hörður, öfund er ljót kennd, en ég öfunda þig af þessu, nema það rigni. Ég get aðeins farið út í Nettó og keypt mér frosin risabláber, full af mengun frá ESB.