Maðurinn sem þeir vildu að væri gyðingur

Sláum því strax fast. Mark Felt var ekki gyðingur. En þegar hann lá undir grun um að hafa verið heimildamaður í Watergate-málinu, virtist það greinilega skipta sumt fólk í Bandaríkjunum og víðar miklu máli, að hann væri gyðingur. Það átti að sýni að eðli hans eins og einhvers Shylock í Feneyjum sem krafðist punds af kjöti úr síðu hins gjaldþrota herra.

Þegar grunur beindist að Felt í fyrsta skipti árið 1972, spurði Nixon Haldemann: "er hann kaþólikki?". Þegar Haldeman sagði Nixon að Felt væri gyðingur, svaraði Nixon. "Setti FBI gyðing í málið?" Og Haldeman svaraði, "Ja, það gæti skýrt málið". 

Fordómar gegn kaþólskum og gyðingum var greinilega líka eiginleiki hjá hinum siðblinda Nixon.

En siðblinduna og skítlegt eðli, sem var eins og hrákinn sem spýtt var í gyðinginn Shylock í Feneyjum var að finna víðar. Postuli nokkur, sem hafði sinn daglega dálk í Mogganum í áratugi hafði sömu kenndir og Nixon og t.d. einn kennari minn í menntaskóla, sem skal þó ekki nefndur á nafn:

Rev. Billy Graham: "The [Jewish] stranglehold has got to be broken, or the country's going to go down the drain."

President Nixon: "You believe that?"

Graham: "Yes, sir."

Nixon: "So do I. I can't ever say that, but I believe it."

Graham: "No, but if you get elected a second time, then we might be able to do something."

 

Þetta samtal er nú að finna á einum af mörgum spólum frá ferli Nixons í Hvíta húsinu.

Hvað fór á milli íslenskra leiðtoga og eistneskra hér um árið, þegar þeir unnu saman að því að koma í veg fyrir að morðingi gyðinga sem bjó í vellystingum á Íslandi yrði sóttur til saka? Af því ættum við kannski einhvern tíma að heyra upptökur.

Þegar Felt tilkynnti heiminum árið 2004, að hann væri uppljóstrarinn í Watergate hneykslinu, fór gyðingahatursmaskínan í gang aftur. Leit á netinu gefur til kynna að meintur gyðingdómur Felts sé mikið áhugamál ýmissa öfgaafla um allan heim.

„Deep Throat" látinn

Afríka er staurblind

 

 

Ráðstefna SÞ í Durban í Suður-Afríku árið 2001 átti að taka á vandamálum eins og kynþáttahatri, kynþáttamismunun, útlendingahræðslu og skyldu óþoli sem enn hrjáir mannkynið. Til mikillar furðu þróaðist ráðstefnan, sem var NGO (Non Governmental Organization) samkoma á vegum SÞ í samkomu gyðingahatara og þeirra sem hata Ísrael og sem telja Ísraelsríki og tilvist þess ógnun við sig og heimsfriðinn. Öll samtök sem hata Ísrael voru mætt og í mikilli hópæsingu skemmtu menn hvorum öðrum í 6 daga á heilmiklum leikvangi í Durban. Skindauðir leiðtogar á borð við Arafat og Castro voru helstu skemmtikraftarnir. Heimur réttláta fólksins, vinstri manna, glóbalista og ævintýrafólks sameinaðist í sameiginlegu hatri sínu gegn menningu okkar á Vesturlöndum í dýrkun sinni á gildum sem eflir mannfyrirlitningu, þótt ætlunin sé væntanlega önnur.

Í síðustu viku var haldin í Abuja, höfuðborg Nígeríu, forráðstefna fyrir næstu stóru heimsráðstefnu SÞ um kynþáttavandamál, sem á að halda í Genf í apríl á næsta ári. Ingibjörg Sólargeisli verður nú örugglega að fara þangað ef ég þekki hana rétt. En áður en hún gerir það, ætti hún kannski að lesa bloggið mitt, eða fara í frumheimildina UN Watch, sem örugglega mun vakta hana vel þegar hún er komin í Öryggisráðið - ráðið sem er samstíga í því að vera ekki samstíga - um annað en að hata Ísrael.

Alveg eins og árið 2001, þegar hatarar neðan úr grasrótinni, hryðjuverkaleiðtogar, íslamistar og alls kyns rugludallar sneru heimsráðstefnu um kynþáttavandamál í hatursráðstefnu, var ráðstefnan í Ajuba sammála um að Ísrael væri heimsins stærsti vandi og versti óvinur mannkyns. Þeir sem sátu í Ajuba komu fyrst og fremst frá Afríkuríkjum og tilgangurinn með þessari undurbúningsráðstefnu hafði einmitt verið að leggja áherslu á málefni Afríku. En Afríka virðist aðeins sammála um eitt: Að gyðingar, Ísrael og Zíonisminn séu helsti vandi Afríku og heimsins.

Ekkert var t.d. rætt um þjóðarmorðin í Súdan, ekki svo mikið sem einu orði eytt á dráp á 200.000 manns í Darfúr, ekkert sagt um fjöldanauðganir. Ekki eitt einasta orð um 1 milljón manna sem eru á flótta undan þessu þjóðarmorði, sem stundað er í nafni Allah hins almáttuga.

Þegar Leon Saltiel fra UN Watch ætlaði að halda ræðu sína, var hann strax hindraður í að gera það af Súdan með liðveislu Alsírsmanna og Marokkana. Martin Uhomoibhi frá Nígeríu, sem var í forsæti ráðstefnunnar, bannaði þá Saltiel, sem er gyðingur, að nefna Súdan.

Í samþykkt ráðstefnunnar var hvergi minnst á árásir á flóttamenn og innflytjendur í Suður-Afríku. Árásir á útlenda borgara frá Zimbabwe og Mozambík eru daglegt brauð í Suður-Afríku hans Nelsons Mandela. Það var heldur hvergi minnst á morðin á u.b.b. 1000 flóttamönnum í Kenýa fyrr í ár. Það ætti að leiða hugann ykkar að honum Ramsesi. Ekki má víst tala mikið um hans vanda í Nígeríu.

Lokaorð ráðstefnunnar í Abuja var hvatning til þjóða til að taka ekki málfrelsið of alvarlega. Einnig reyndu Múslímaþjóðirnar að koma því í gegn að bann við guðlasti verði sett í alþjóðlög um mannréttindi. Samkvæmt því eiga alþjóðlegir mannréttindasáttmálar að vernda trúarbrögð í stað einstaklinga. Þegar trúarbrögð og hugsjónir eru tekin fram yfir einstaklinginn, leikur gamli góði fasisminn lausum hala.

Samþykktin frá ráðstefnunni í Abuja ræðst mikið á málfrelsi og á 19. grein Mannréttindasáttmála SÞ. Einnig er lögð mikil áhersla á Íslamófóbíu (Íslamhaturi) og stungið er upp á að trúarbrögðum verði gert mishátt undir höfði miðað við hve mikilvæg þau eru - en greinilegt er að samþykktin álítur að Íslam sé æðst og merkilegust trúarbragða. Auðvitað eru flestir drepnir í nafni þessara trúarbragða um þessar mundir. Fasisminn er ekki einkaréttur hægriöfgamanna. Vinstrimenn og íslamístar eru oft fyritaks fasistar.

Samkvæmt ráðstefnunni í Abuja í Afríku er augljóst að aumingja Palestínuþjóðin er allra þjóða mest ofsótt og svo mikið, að ekki var hægt að ræða um ofsóttar þjóðir í heimsálfunni Afríku, sem átti að fjalla um. Ráðstefnugestirnir voru svo sem heldur ekki að hafa fyrir því að líta út um gluggan og skoða fátælingana í Abuja eða ræða morðin sem múslímar fremja þar á götum úti á kristnum mönnum.

Afríka er blind, og ég tel mig vita hver hefur stungið úr henni augun í þetta sinn. Það eru vinstri sinnaðir vitleysingar á Vesturlöndum sem dansa stríðsdans með sínum nýju vopnabræðrum úr herbúðum öfga-Íslam, sem hægt og bítandi eru að verða versta plágan í Afríku. Það er létt að níðast á Afríku. Afríka er staurblind, en blindir menn búa víðar.

Nú verður réttláta fólkið á Íslandi væntanlega að fara að undirbúa sig, svo þeir geti tekið þátt í hópæsingunni í Genf, þar sem sjónskertir míní-messíasar geta sameinast í að lýsa áhyggjum sínum á högum Palestínuþjóðarinnar og öllu sem miður fer í heimi hér vegna þess að Ísrael er ríki gyðinga.

Hatrið blindar menn.

Biblían er fjári góð heimild

Fyrsta fræðigreinin sem ég skrifaði í miðaldafornleifafræði fjallaði um innsigli. Hana skrifaði ég að beiðni Kristjáns Eldjárns í Árbók hins íslenzka Fornleifafélags 1980.

Ég hef ekki misst áhugann á innsiglafræðinni og les yfirleitt allt sem ég sé um forn innsigli, í hvaða landi sem er. Þetta voru undirskriftir manna og eru mjög merkilegir gripir og geta sagt mikla sögu ef maður kann að lesa á þau.

Nýlega hafa fundist við fornleifauppgröft í Jerúsalem innsiglismyndir á leir. Ein þeirra tilheyrði Gedalía ben Pashur, þ.e. Gedalíu syni Pashurs. Maður þessi nefndur í Jeremíasarbók, 38:1. Í sama kafla hjá Jeremíasi spámanni er nefndur til sögunnar Yehuchal ben Shelemayahu. Svo vel vill til, að innsigli hans (sjá mynd hér að ofan) fannst ekki langt frá innsigli Gedalíu árið 2005. Báðir voru þessir menn uppi fyrir 2600 árum og voru ráðherrar í stjórn konungs sem hét Zedekiah. 

Zedkías, sem upphaflega hét Mattaníahu (eðe Mattanías), var merkur kóngur fyrir margt. Spámaðurinn Jeremías var einmitt rágjafi hans. Upphaflega var Zedekía smákóngur gyðinga undir Nebúkadnessar Babýloníukonungi. En fljótt urðu þeir miklir fjandmenn og voru ráð Jeremíasar og ef til vill innsigliseigendanna góð. Herir Nebúkadnessars réðust á Jerúsalemborg 589 fyrir byrjun okkar tímatals og eftir 18 mánaða umsátur gjöreyddi hann og herforingi hans borginni. Zedekías flýði með sonum sínum en var tekinn höndum. Hann þurfti að horfa upp á syni sína drepna áður en augun voru stungin úr honum og hann færður í hlekkjum til Babýloníu.

Fyrir utan innsigli Gedalíu og Jehuchals, fannst í fyrra innsiglisstimpill Temechs fjölskyldunnar, sem voru musterisþjónar í fyrsta musterinu í Jerúsalem áður en villimenn frá Babýloníu eyðulögðu það og ætt Temechs var hneppt í þrældóm í Babýloníu.

Nú er við sama uppgröftinn í Jerúsalem búið að finna innsigli tveggja manna og einnar ættar, sem voru við hirð Zedekíasar konungs. Íslenskir fornleifafræðingar eru á meðan að leita að fjársjóðum Musterisriddara fyrir ítalska ævintýramenn.

Mikið hefði ég nú gaman að heyra frá eins og einum af þessum reiðu ungu andtrúarfasistum, sem afneita biblíunni sem húmbukki og hindurvitnum og eru með skítkast á trúað og siðmenntað fólk.

Þess má geta að faðir Dorritar Moussaieff forsetafrúar okkar, hann Shlomo, á eitt stærsta og merkilegast safn innsigla fornra gyðingakonunga og embættismanna. Er ekki kominn tími til að sýna eitthvað af því á Íslandi? Út hafa komið bækur um biblíuinnsigli Shlomos. Ég gæti vel tekið það að mér að sjá um slíka sýningu á Þjóðminjasafninu eða í Þjóðmenningarhúsi. Ég rakst nýverið á þetta blogg, sem er eins konar nútímainnsigli fyrir Moussaieff fjölskylduna.

 

Bók um innsigli Shlomo ben Rehavia Mousahef. Faðir Shlomos, Rehavia, henti Shlomo út 11 ára gömlum, þar sem snáðinn neitaði að fara með bænirnar sínar. Hann sagðist ekki vera trúaður. Í nokkur ár bjó hann í hellum og safnaði og rændi fornminjum. Eitt sinn var hann rekinn úr skóla fyrir að hafa rænt forna gröf. Nú mun hann vera hinn mesti trúmaður.

Stuðningsmenn Obama eiga skoðanabræður á Íslandi

 

Þótt Obama hafi farið til Berlínar og sagst vera súkkulaðibolla, líkt og þegar J.F. Kennedy sagðist vera "ein Berliner", er hann enn óskrifað blað fyrir mér. Hann segir eitt og annað, og æsti til dæmis ærlega vinstri menn og áhangendur hryðjuverkaliðs, þegar hann lýsti yfir stuðningi sínum við Ísrael um daginn. Ég er nú eftir að sjá þann stuðning í raun áður en ég trúi.

Líklega eru fylgismenn Obama fyrst og fremst heiðvirt fólk sem vill heilbrigðiskerfi fyrir alla og að blökkumenn í Bandaríkjunum þurfi ekki að fara verst út úr kreppunni, nú þegar margir þeirra áttu í fyrsta skipti ráð á því að kaupa sér hús.

En Obama á sér líka aðhlæjendur, sem ég vona að hann losi sig við hið fyrsta og fordæmi.

Í takt við tímann er framboð Obamas með heimasíðu, http://my.barackobama.com, þar sem mönnum gefst kostur á að rita blogg og setja fram skoðanir sínar. Á þessum vefsíðum hefur líka safnast saman mikill ruslaralýður sem tekur Obama í gíslingu, gerir honum upp skoðanir eða telur hann hafa sama innrætið og það sjálft.  Lesa má grein um þetta fólk hér. Þessir einstaklingar þrífst á hatri á gyðingum og Ísraelsríki, samsæriskenningum um 9/11 og öðrum ósóma, þar sem einni þjóð og einum trúflokki er kennt um allar ófarir heimsins.  Slíkur lýður og slíkar skoðanir er svo sannarlega líka til á Íslandi og er Morgunblaðsbloggið misnotað til þess að setja þær fram. Það sem sameinar þetta auma fólk í BNA sem og á Íslandi, er að það skilur ekki og heldur ekki að takmörk séu fyrir því hvað menn geta skrifað í nafni ritfrelsis og lýðræðis. Oft er þetta fólk sem telur sig hafa einkarétt á hreinni hugsun og hærri gildum hér í lífinu en aðrir. En hin sorglega staðreynd er að skítkast, hatur og mannvonska er helsta vopn þeirra og heimilisfangið er forarpyttur vonleysisins og mannfyrirlitningarinnar.

Þegar gagnrýnendur gerðu  Myobama.com viðvart um hatursáróðurinn sem menn reyndu á hýsa þar, brugðust stjórnendur netsins og Obama fljótt við og fjarlægðu allt hatrið sem plantað hafði verið á vef forsetaframbjóðandans.

Nú stendur bara "Error", þar sem áður var sjúklegt skítkast og bloggin hafa verið fjarlægð, eða athugsemdir eins vinsaðar út, t.d. þessi " "Burn something else besides oil...start with the Zionists". Álíka hefur nú sést á Moggablogginu, en þar er mönnum fyrst og fremst úthýst ef þeir gagnrýna trúarbrögð sem lýsa gyðingum sem svínum og öpum. Blog.is gæti lært af Barack Obama. Menn geta nefnilega ekki alltaf stýrt penna sínum og bloggið hefur sent marga aftur á steinöld, eða sýnt að lítil þróun hefur orðið í sumum ættum síðan þá.

En það er gott að sjá að Barack Obama er á sömu skoðun og ég um að árásir rugludalla á Ísrael og gyðinga eiga ekki heima í hinum siðmenntaða heimi.

Remember the Focker

 

 

Munið þið eftir honum Greg (Gaylord) Focker, sem leikinn var af Ben Stiller í kvikmyndunum "Meet the Parents" og "Meet the Fockers"?

Samkvæmt opinberum kvikmyndagagnrýnendum í Íran og öðrum sérfræðingum er kvikmyndin Meet the Parents lúmskulegur gyðingaáróður Zíonista.

Hér getið þið fræðst um það: http://www.memritv.org/clip/en/1811.htm

Orðalagið og hatrið er nákvæmlega sama og hjá nasistum. Þvílík geðveiki.

Hvernig getur heilvita fólk á Vesturlöndum stutt Írana og ógnir stjórnarinnar í Teheran? Mér er það óskiljanlegt.

Nú aftur að Ben Stiller (fæddur 1965). Hann er sonur rauðhærða leikarans Jerry Stillers, sem t.d. leikur föður Constanza í Seinfeld þáttunum. Gaman væri að vita hvort menn hefðu álit á Seinfeld í Teheran.

Móðir Stiller er Anne Meara. Hún er líka rauðhærð, en af írskum ættum. Báðir foreldrar hennar voru frá þorpinu Toomevara í Tipperary sýslu á Írlandi.

Persónulega er ég á þeirri skoðun að kvikmyndin "Meet the Parents" sé harðsoðinn áróður fyrir IRA, Írska lýðveldisherinn.

 

Ben Stiller bregður sér í ýmis gervi. Hér er hann sem Írani, Íri og lengst til hægri nakinn gyðingur

Homo Catholicus

 

 

Bloggörninn Jón Valur, sem oft flýgur þangað sem við hin þorum ekki að fara, er í dag með færslu um gleði sína yfir komu páfans í Róm til Ástralíu. Ég samgleðst Jóni yfir því að Benedikt páfi sé nú í landi andfætlinga. Það er töluvert afrek, þegar miðaverð er orðið svona hátt. En ætli Vatíkanið hafi ekki enn ráð á því?

Ég gladdist hins vegar meira yfir því í dag, að finna mynd af Henricusi, auðmjúkum hollenskum munki og presti sem bjó í gömlu rauðmáluðu húsi í nágrenni Karmelítaklaustursins í Hafnarfirði. Þar var hann með alifuglarækt. Líklega voru það Jófríðarstaðir, eða fyrrum Ófriðarstaðir, þar sem Henricus bjó, en nú er húsið ekki lengur til og búið er að byggja allt of mikið á svæðinu.

Af og til fékk faðir minn fugla sem Henricus slátraði, bæði kjúklinga og endur, sem ekki var hægt að fá í kæliborðinu úti í búð á 7. áratug síðustu aldar.

Ég man eftir Henricusi nokkuð eldri en hann er hér á myndinni, en andlitinu gleymi ég aldrei og mjög vinarlegu viðmóti mannsins. Það lýsti af honum gæska.

Þegar nunnurnar í Hafnafirði voru hollenskar, átti faðir minn lengi við þær smá viðskipti og einnig við Henricus. Ég man sérstaklega eftir tveimur nunnum sem maður mátti sjá. Þær voru í brúnum kuflum og með breið svört belti . Eina þeirra kallaði ég í minningunni systur Feldman, þar sem hún var með sama augnsjúkdóm og andlitsbyggingu og leikarinn Marty Feldman. 

Karmelítareglan varð til í Palestínu, en múslímar réðust á stofnklaustur reglu þeirra og myrtu alla munkana á 15. öld. Reglan breiddist víða. 

Kaþólikkar hafa staðfest helgi karmelítanunnunnar, Edith Stein / heilagrar Teresu Benedictu af Krossinum, sem var af gyðingaættum og var þess vegna myrt í Auschwitz. Hún var handsömuð í klaustri í Hollandi, ekki vegna trúar sinnar heldur vegna uppruna síns. Kaþólikkar telja hana hins vegar til píslavotta sinna. Hvað ætli Edith Teresa Benedicta hafi álitið þegar hún var með hinum gyðingunum í gasklefanum?

Nú eru víst aðeins pólskar nunnur í Hafnarfirði.

Ég glími við Guð

 

 

Fyrr í ár skrifaði ég um spurningu sem borist hafði Vísindavef HÍ um uppruna orðsins gyðingur. Spurningunni var beint til Guðrúnar Kvaran forstöðumanns Orðabókar Háskólans, sem svaraði svona.

Mér þótti svarið þvælukennt og ég hef leyft mér að gagnrýna það við Vísindavefinn. En það virðist verða glíma við Guð.

Í svari Guðrúnar Kvaran stóð m.a. mjög ruglingslegt og hlutlægt mat á eðli gyðinga, sem ég hef þegar gert athugasemd við vegna þess að það er sögufölsun í fjórum setningum. Svona ritaði Guðrún Kvaran:

"Neikvæða merkingin í júði á líklegast rætur að rekja til þess að gyðingar sem stunduðu viðskipti víða um heim á síðari öldum, þóttu erfiðir viðfangs, nískir okurkarlar og efnuðust oft vel. Þetta litu aðrir hornauga og farið var að nota jew, jøde, júði í neikvæðum tón um kaupsýslumenn af gyðingaættum. Hin neikvæða merking sem Jude fékk í Þýskalandi á árunum milli stríða og í síðari heimsstyrjöldinni er af öðrum toga og var tímabundin. Hún náði yfir allt fólk af gyðingaættum, ekki aðeins kaupsýslumenn."

Forstöðumaður orðabókarinnar skrifar einnig frekar óljóst á þennan veg:

"Bæði orðin júði og gyðingur koma fyrir í fornu máli. Gyðingur er eiginlega norræn ummyndun á latínu jūdaeus þannig að nafnið var tengt orðinu guð. Gyðingur merkti því í raun upphaflega sama og júði."

Það er einfaldlega ekki rétt hjá Guðrúnu Kvaran að gyðingur sé ummyndun af orðinu Judæus. Judæus er upphaflega leitt af hebreska orðinu Yehudi, heiti þegna konungsríkisins Júda (Malchut Jehuda). Gyðingur er hins vegar skylt orðinu Guð, líkt og gyðja. Orðið verður að teljast hafa verið nýyrði á 13. eða jafnvel 12. öld, sem líklega hefur orðið til þegar menn fóru að þýða kafla úr Biblíunni. Orðið er ekki ummyndun á orðinu judæus. Þessi skýring Guðrúnar er afar furðuleg. Judeaus, Yehudi og skyld heiti eru ekkert skyld orðinu Guð, hvorki í hebresku, latínu eða íslensku (vestnorrænu). Gyðingur er aftur á móti, svo ég endurtaki sjálfan mig nógu oft, tengt og dregið af orðinu Guð.

Þessi rök mín bar ég undir Vísindavefinn, en menn þar á bæ vísa gangrýninni frá með þeim rökum að Guðrún Kvaran hafði notast við Íslenska Orðsifjabók Ásgeirs Blöndals Magnússonar frá 1989, sem upplýsir frekar óljóslega: "eiginl. norr. ummyndun á lat. judaeus og nafnið tengist orðinu guð." (Bls. 290).  Vísindavefurinn ábyrgist því niðurstöðu forstöðumanns Orðabókar HÍ.

Ég sé náttúrulega ekkert því til til fyristöðu að menn vitni næstum orðrétt í þann merka mann Ásgeir Blöndal Magnússon. En getur ekki hugsast að Ásgeir Blöndal hafi haft á röngu að standa? Hvernig getur orð með stofnmyndina guð verið ummyndun úr orðinu judæus á latínu, þegar stofn þess orð er ekki guð? Það er ekki ummyndun heldur orðskipti (transformation).

Orðið gyðingur var snilldarlegt nýyrði, sem fyrst kemur fyrir svo vitað sé, þegar Gyðinga Saga varð til rétt eftir miðbik 13. aldar. Brandur Jónsson, síðar biskup á Hólum var líklegast höfundurinn. Orðið gæti þó verið miklu eldra. Orðið gyðingur var örugglega búið til til þess að eiga við um "Guðs þjóð". Á þessum tíma var orðið judæus (Jude, Jew og önnur skyld orð) fyrir löngu búið að fá neikvæðan blæ í Evrópu, m.a. vegna meðferðar kirkjunnar á gyðingum. Brandur Jónsson, sem setti saman Gyðinga Sögu, þýddi t.d. einnig franska 12. aldar guðfræðinginn Philippus Gualterus yfir á íslensku, en Gualterus þessi var meðal annars þekktur fyrir rit sín gegn gyðingum. Ætli Brandur hafi þekkt þau níðrit og þótt þau leiðinleg og lagst í það að búa til orðið gyðingur, svona til málsbóta? Þar sem allt hljómar best á íslensku, hefur Gualterus verið endurskírður og er kallaður Valtýr frá Kastala.

En sjaldan er ein báran stök. Skoðið þetta svar Vísindavefsins, sem er hið mesta dómsdagsrugl sem ég hef séð á lífsleiðinni. Þarna er t.d. haldið fram:

"Hins vegar má fullyrða að allir Íslendingar eru komnir af Gyðingum ef grannt er skoðað. Til þess að átta sig á því má til dæmis lesa svör hér á Vísindavefnum um afkomendur Karlamagnúsar og Jóns Arasonar. Það þarf sem sé ekki að hafa verið uppi nema einn þokkalega kynsæll Íslendingur af Gyðingaættum fyrir 1500 eða svo til þess að við séum öll „Gyðingar" í þessum skilningi. Með því að þessir Íslendingar hafa sjálfsagt verið margir er líklegast að við séum öll komin af Gyðingum á marga vegu."

Hvert er verið að fara? Kannski getum við líka haldið fram að ef eitthvert skyldmenni Pauls Ramsesar hefði komið til Íslands vel fyrir 1500 værum við öll "svört" í "þessum skilningi". En hvað skilningi? Eigum við ekki að fara okkur hægt í þennan Vísindavef ef svörin þar eru sem hér segir. En ef Vísindavefurinn er óskeikull og heldur sem fastast í fyrrgreind svör, þá segi ég bara Shabat Shalom Ísgyðingarnir mínir.

Myndin efst sýnir gyðing stjórna bænahaldi við páskamáltíð gyðinga í Reykjavík fyrir nokkrum árum.

 

Rebbe Velvel sagt: Islender sind alle ein bissen meshuggene!

Ljóshærði drengurinn frá Haifa

 

Asaf Zur var ósköp venjulegur ísraelskur unglingsstrákur, langur sláni sem hafði áhuga á sjóbrettum, íþróttum, ferðalögum, partíum og stelpum. Hann var ljóshærður, sem er ekki algengasti háraliturinn í Ísrael. Vinir hans kölluðu hann þess vegna Blondi. Það var líf í þessum dreng.

5. mars árið 2003 rann blóð um hár Asafs, þar sem hann lá líflaus í braki strætisvagns í Haifa. Hann varð aðeins 17 ára. 17 aðrir voru myrtir í þessari fólskulegu árás á saklaust fólk. Því réð ein af þessum rómuðu frelsishetjum frá Palestínu, sem eiga fullt af stuðningsmönnum á Íslandi. Eftir sátu unnusta Asafs, móðir hans Lea, faðir hans Yossi, og bróðir hans Almog sem var aðeins var 7 ára þegar hann missti bróður sinn.

Þessi auma lýsing mín á lífi og örlögum Asaf Zur er hægt að endursegja um hundruð annarra fórnarlamba raggeitanna, sem drepa saklaust fólk, vegna þess að þessir hryðjuverkamenn vilja stofna ríki á ísraelskri jörð, þar sem þeir ætla sér að troða mannréttindum og lýðræði fótum líkt og venjan er í flestum ríkjum sem umlykja Ísrael.

Fjölskylda Asafs kemst aldrei yfir missinn. Faðir hans vill ekki að neinn gleymi syni sínum og ég leyfi mér að minna Íslendinga á Asaf með honum. Ef Asaf hefði lifað, hefði hann ferðast um heiminn að lokinni herskyldu eins og margir jafnaldrar hans frá Ísrael. Faðir Asafs langar til að Asafs verði minnst á eins mörgum stöðum og mögulegt er.

Pabbi Asafs biður alla sem vettlingi geta valdið um að prenta mynd af syni sínum og taka svo mynd af sér og/eða fjölskyldunni með myndina af Asaf; Líka að taka mynd af sér og myndinni hvar maður er staddur í heiminum, t.d. á Þingvöllum, Geysi og Gullfoss. Faðir Asafs vill gjarna fá myndirnar sendar og mun safna þeim öllum saman og birtir þær á minningarsíðu Asafs.

Þetta gæti allt eins hafa verið sonur ÞINN, og þinn og þinn.......

Hér er hægt að nálgast myndina af Asaf og upplýsingar um það sem gera skal og hér fyrir neðan skýrir faðir Asafs fyrir ykkur hvað þið getið gert.

 

Doktor Prime Minister

Anders Fogh Rasmussen forsætisráðherra Dana var nýlega á ferð í Ísrael. Þar var hann meðal annars sæmdur heiðursdoktorsnafnbót þann 28. maí sl. við háskólann í Haifa. Ráðherranum var boðið til Ísraels í tengslum við 60 ára afmæli Ísraelsríkis og titilinn og hattinn fékk hann fyrir störf sín að sviði umhverfismála og friðar.

Ekki veit ég hvort Fogh Rasmussen hefur stuðlað meir að umhverfismálum eða friði en aðrir. Ég tel að hann hefði getað fengið nafnbótina fyrir öllu merkilegra afrek. Árið 2005 baðst hann afsökunar fyrir hönd þjóðar sinnar og fyrri ríkistjórna á þeirri meðferð sem dönsk yfirvöld gáfu flóttafólki, gyðingum og öðrum, á 4. og 5. áratug síðustu aldar. Hann bað gyðinga afsökunar á því að gyðingar höfðu verið sendir í klær nasista fyrir tilstuðlan danskra yfirvalda. Rúmri viku áður en hann kom með þessa afsökun, hafði ráðuneyti hans beðið um bók mína Medaljens Bagside, og hjólaði ég stoltur með hana og afhenti hana á skrifstofu Anders Fogh Rasmussens. 

 

                             © Jerry Bergman, Copenhagen

Danir vilja helst ekki heyra um þennan dökka kapítula í sögu sinni og dvelja frekar við, og stæra sig af, björgun gyðinga til Svíþjóðar í október 1943, þó svo að sú björgun hafi nú fyrst og fremst verið möguleg vegna þess að æðstu Þjóðverjarnir í Danmörku ákváðu að líta í aðra átt og gera minna úr aðgerðinni gegn dönskum gyðingum en upphaflega stóð til. Það gerðu þeir til að bjarga eigin skinni, því þeim var ljóst að stríðlukkan hafði snúist gegn Þjóðverjum.

Í Ísrael hafa menn enn ekki fengist til að meðtaka, að það var ekki bara giftusamleg björgun gyðinga árið 1943 sem hægt er að skrifa á sameiginlega sögu gyðinga og Dana. Sú saga inniheldur marga ljóta kapítula. 

Anders Fogh Rasmussen hefur, mér vitandi, ekki gert neitt sérstakt á sviði umhverfismála fyrir utan langtímaáætlun fram til 2025. Áætlun ríkisstjórnar hans í umhverfismálum er yfirveguð og raunsæ. Stjórnarandstaðan í Danmörku, eins og stjórnarandstöður víða annars staðra, virðist hins vegar halda  að hægt sé að frysta norðurpólinn og stöðva alheimshitnun ef vinstri menn komast til valda. Málið er ekki svo einfalt. Hér áður fyrr var þó mjög oft kalt í Gúlaginu, þar sem vinstri menn réðu öllu.

Fogh Rasmussen er einnig meðal þeirra leiðtoga sem sent hefur herlið til Írak og Afganistan. Menn geta lengi rætt hvort það er til góðs eður ei. Sjálfur tel ég það manninum til sóma. Friður kemst ekki á í þessum löndum meðan hryðjuverk eru faðirvorið.

Afsökunarbeiðni Anders Fogh Rasmussens árið 2005 var nægileg ástæða til að gefa honum doktorsnafnbót og sakna ég þess afreks í jarteiknaskrá Anders Fogh Rasmussens sem Háskólinn í Hafia hefur gefið út. Það hefði verið fullnóg ástæða til að gefa honum ferkantaða hattinn.

 

Íslenskir gyðingar koma út úr fylgsnum sínum

 

Skrif mín um gyðingdóm, örlög gyðinga og Ísraelsríki eru um 20% af því sem ég skrifa hér á blogginu. Ekki neita ég því og ekki skammast ég mín fyrir það. Það sem ég skrifa virðist fara í taugarnar á mörgum, enda er stuðningurinn við Ísrael á Íslandi mjög lítill og þekking Íslendinga á sögu gyðinga almennt mjög ómerkileg. Hatur tengist vanþekkingu, og ég hef verið að reyna að benda mönnum á að öfgafullar skoðanir í garð Ísraels og gyðinga sé vanþekking og mjög oft líka lánaðir fordómar.

Að undanförnu hefur það gerst, að upp á yfirborðið koma íslenskir gyðingar, sem ég hafði ekki hugmynd um að væru til. Þeir gefa sig til kynna til að gangrýna mig og skrif mín, sem er ágætt, en taka svo líka eina atrennu gegn Ísraelsríki og réttlæta það með meintum gyðingagenum í sér.

Hjálmtýr Heiðdal kvikmyndagerðamaður afhjúpaði þannig að hann væri komin af faríseum af Musterishæð og einhver Mangnús IP tala skráð opinberaði í gær að hann væri af ætthvísl skráðra IPsteina (ekki er hann skyldur Einstein, svo mikið er víst). Fyrir nokkrum árum skrifaði maður ættaður af Skagaströnd í DV og réttlætti svæsnar skoðanir sína á Ísraelsmönnum með göfugu gyðingakyni sínu, og taldi sig líka, líklega vegna augljóss skyldleika við Krist, geta gangrýnt gyðinga sem á sínum tíma vildu koma stríðsglæpamanni á Íslandi fyrir dómara.

Óljós ættfræði þessarra þriggja nýgyðinga er notuð til að réttlæta skoðanir þeirra á Ísraelsríki og gyðingum og sem hluti af stuðningi þeirra við málstað Palestínumanna. Þrátt fyrir fáein gyðingagen, eru þessir heiðursmenn afar fráhverfir vitund og þekkingu á meintum uppruna sínum

Nú er hins komið er í ljós að H. Heiðdal er alls ekki kominn af Fiðlaranum á Þakinu heldur bakara af Holtsetalandi, sem var svo heppinn að ekkert gyðingablóð rann í æðum hans. Herra Berndsen ættaður frá Skagaströnd, sem ég skrifaði um í DV 12.7. 2001 vegna þess að hann taldi sig kosher gagnrýnanda Ísraels, var kominn af manni sem á unga aldri þegið te og brauð fyrir að kveikja á ljósum og ofnum gyðinga á hvíldardeginum,og var ekki frekar gyðingur en Egill Skallagrímsson. Berndsen skrifaði um "hina samhljóða rödd gegn ofsóknarbrjálæði Ísraelsmanna".

Nú bíð ég eftir að ættfræði Magnúsar með IP töluna og ljóta orðbragðið komi á hreint. Kannski er hann kominn af Marx bræðrum.

(Meintur) uppruni manna gefur þeim engan rétt til að leika dómara yfir  ætt og þjóð sem forfeður þeirra yfirgáfu í stað þess að styðja og hvetja, þó svo að hjarta þeirra slái fyrir aðrar þjóðir sem geta ekki hætt að lýsa yfir útrýmingu Ísraels.

Ég óska laungyðingum Íslands til hamingju með 60 ára afmæli þjóðríkis þeirra. Gagnrýni sakar ekki, en hún ætti ekki að vera drifin áfram af hatri.