Einhver heilög Anna

 

Einhver réttlát Anna, sem lifir á heilagleika skoðana sinna, hefur verið að gera því skóna í athugasemdum við síðustu færslu, að ég hefði látið illa ef menn hefðu rætt um að hella svínaúrgangi á lóð samkunduhúss gyðinga. Þetta er alrangt hjá þessari Önnu. Ég hafði skrifað um viðbrögð mín við þeirri ógeðfelldu aðgerð, sem ég sá stungið upp á hjá einhverri kynsystur Önnu á Íslandi. Svona gubbu- og subbuaðgerðir virðist greinilega sameina marga trúaða og þá sem hafa svissað trúnni út fyrir öfgakenndar stjórnmálastefnur. Gyðingar hafa reyndar alltaf fengið sinn skerf af því hegðunarmynstri yfir sig- og ekki útiloka ég að þeir hafi gert sig seka um eitthvað álíka athæfi. Þeir voru að minnsta kosti ávallt sakaðir um að hafa pissað á sakramentin í kirkjunni hér fyrr á öldum.

Nei, réttláta Anna, áður en Imam Tamimi og hans fjölmörgu sóknarbörn fóru að heimta og grenja, hafði þessi bloggari stungið upp á Mosku í Mosfellssveit:

Ég reit eitt sinn í Moggann, n.t. árið 1994 (14. des.): „Það er ekki nóg að yrkja landið, fólkið verður einnig að fegra. Ég fagna þeim degi, að moska rís í Mosfellssveit eða sýnagóga á Selfossi og að bænir á Alþingi verði ekki aðeins kristnar".

Þegar ég skrifaði þetta, datt mér ekki í hug að múslímar myndu fá eða fara fram á ókeypis lóð. En miðað við að sjálfstæð rannsóknafyrirtæki eru með hús ríkisins undir starfssemi sína fyrir skít á priki, er kannski ekki óeðlilegt að múslímar fái lóð fyrir lítið.

Úrgangi og svartagallsrausi Önnu Réttlátu hellir hún ekki hér á bloggið án þess að það gusist framan í hana sjálfa.

Myndin hér að ofan (eftir Jerry Bergman) birtist í bók eftir mig árið 2005. Myndin var tekin árið 1982 og sýnir veggjarkrot, „Jøder ud af Danmark"  gegnt samkunduhúsi gyðinga í Krystalgade í Kaupmannahöfn. Þegar þetta var krotað af VINSTRIMÖNNUM, er þeir fóru hamförum um borgina í mótmælagöngu, þar sem þeir helltu m.a. líka svínablóði á félagsheimili og skrifstofur safnaðar gyðinga í Kaupmannahöfn. Ég er fyrir löngu búinn að sjá í gegnum fínar kenndir vinstrimanna. Gef lítið fyrir þær. Hatur styrkir þann rumpulýð, en svo lekur heligslepjan af honum þess á milli.

Gleymið ekki að mótmæla

Heimtuðu og fengu klósett sem ekki móðgar Allah

 

 

Það er þjónað undir rassinn á herrum heimsins þessa dagana.  Hollenska morgunblaðið De Telegraaf hefur eftir fréttamanni sínum í Lundúnum að klósettin á Ólympíuleikunum þar í borg árið 2012 verði öll "Moslim-proof".

Það þýðir, að þegar múslímar fara á klóið, snúa þeir ekki í átt að Mekka. Bænir eru ekki þolanlegar í miðjum hægðum.

Ég sem hélt að Guð væri ekki með nefið niður í hvers manns koppi, en alltaf skjátlast mér.  Allt bænahjal mitt á litlakoti og fögur ásjóna mín snýr beint til Svíþjóðar og Rússlands þegar ég aðskil vötnin eins og Móses, og "når jeg laver pølser" gretti ég mig í átt að Bretlandi og Bandaríkjunum. Ekki hafa þessi ríki mótmælt.

Vinur minn var eitt sinn með mynd af Lénin og Stalín á klósettinu hjá sér. Ætli það hafi valdið Perestrojkunni og Glasnostinu.

Djöfulsins rugl er nú í þessum heimi. Sérklósett fyrir herrana. Hvað verður það næsta?

Myndin að ofan er frá sýningu í Beirut fyrr í ár, sem bar heitið "Eru 15 ár í felum í klósettunum ekki nóg?"og á að minna Líbana á borgarastríð þeirra. Listakonan, sem skóp þetta merkilega verk, heitir Nada Sehnaoul. Hún á greinilega framtíðina fyrir sér. Myndin af neðan er af manni af klerkastétt Shííta sem ekki virðist vera skemmt. Það gæti vel hugsast að hann keppi í uppstökki í London árið 2012. Þá er nú eins gott að klósettin snúi rétt og að svartagallið renni rétta leið niður í ána Thames.

 

Mosku hér og nú

 

Frétt hef ég að á Íslandi séu tæplega 400 múslímar, eða eru það 1000? Fyrr á árinu heyrði ég töluna 1500.  Ég held að ég hafi reyndar aldrei heyrt sömu töluna á múslímskum sálum í þau skipti sem þessi blessaði söfnuður múslíma á Íslandi var í fréttunum. Talnaglöggir geta þeir ekki verið, sem eru talsmenn Allah á Íslandi.

Ég hef einnig fylgst með viðbrögðum á bloggum nokkurra Íslendinga við kröfunni um gríðarstóra lóð fyrir mosku í Reykjavík. Þessir öðlingar ætla víst að æla svínaúrgangi ofan í grunn moskunnar eða eitthvað álíka. Það þykir mér nú einum of langt gengið. Er ekki kreppa og öll svínasúpa búin í landinu?

Um leið og ég syrgi það hvernig þeir fáu gyðingar sem búið hafa á Íslandi hafa falið sig í hornunum og auðmjúklega sætt sig við að á Íslandi væri ekki neitt almennilegt samkunduhús, já, og jafnvel gerst búddistar til að leita að guði,  fagna ég því að múslímar geti fengið mosku fyrir 12, 20, 400, nei 1000 meðlimi sína. Menn verða bara að passa sig að byggja ekki allt of stórt, því hitinn og rafmagn kostar og það borga ekki skattgreiðendur heldur Allah og þeir sem biðja til hans.

Jú, mosku hér og nú. Það styð ég!  Einhvers staðar verða öfgavinstrimennirnir líka að fara til að gera andlegar og líkamlegar æfingar eftir að þeir gátu ekki lengur beygt sig og bugtað í átt að Moskvu .... - borg.

En ef guðshúsið að tarna, verður notað sem boðunarstaður stríðs gegn annarri menningu og trú, eða þar sem hatur er lagt á þjóðir sem ekki beygja sig í átt að Mekka, tel ég enga ástæðu til þess að múslímar fái lóð. Þá geta þeir keypt hana og svo tekið afleiðingum íslenskra laga ef þeir vilja boða stríð og hatur gegn ákveðnum hópum. Það varðar við hegningarlög. Enga lóð ber að gefa fólki sem vill  fylgja öðrum lögum en þeim sem hið háa Alþingi í lýðræðisríkinu Íslandi hefur samþykkt.

Ef Imam Tamimi lofar, sver og sárt við leggur, að moska þessa afar misstóra hóps hans verði ekki vettvangur stríðsóps, vona ég að hann fái sem fyrst lóð sína og byggi mínarettu, bænaturn, sem er engu síðri en Hallgrímskirkja, kirkjan sem kennd er við guðsmanninn sem átti konu sem upplifaði bæði moskur og Barbaríið á eigin líkama. Ætli Gudda hefði viljað gefa grunn til Allah? Tjaah?

Þessi fallaga mynd, sem fylgir færslunni, er mér sagt að sé eimitt af Guðríði Símonardóttur þegar hún var upp á sitt besta í Barbaríinu. Njótið þangað til 1001 nætur eru liðnar og veruleikinn blasir við ykkur. Öllu gamni fylgir alvara.

Ensjallah!

Mótmælablogg hefur göngu sína

 

Mótmælabloggið Mótmælum Durban II hefur hafið göngu sína.

Ég er umsjónarmaður þessa mótmælabloggs og tilheyrandi undirskriftalista og mæli eindregið með því að allir kynni sér hvað andlýðræðisleg öfl ætla sér að aðhafast á Durban II ráðstefnunni í Genf á næsta ári. 

Íslenskir diplómatar, sem stefna á setu í hinu óstarfhæfa Öryggisráði SÞ, taka þegar þátt í vitleysunni. Mótmælið með því að senda nafn ykkar, titil og bæ/stað á [e-mail] . Nöfn ykkar, sem ekki viljið endurtaka mistökin frá Durban I ráðstefnunni árið 2001, verða birt á hinu nýja mótmælabloggi. Einnig er hægt að mótmæla við þessa færslu. Þeir sem skrifa undir með réttu nafni geta stofnað til bloggvinatengsla og teljast jafnframt mótmælendur. Mótmælin verða send Mannréttindaráði Sameinuðu Þjóðanna og Utanríkisráðuneytinu.

Þeir sem hugsanlega vildu leggja málstaðnum lið og vilja skrifa gagnrýnin innlegg gegn Durban II ráðstefnunni, geta sent mér línu.

Þið, sem ekki viljið sætta ykkur við þá þróun að ráðstefna um baráttu gegn fordómum og kynþáttahatri sé notuð til að fordæma þjóðir og minnihluta, látið rödd ykkar hljóma.

Skrifið undir íslensk mótmæli gegn Durban II ráðstefnunni og hvetjið íslensk stjórnvöld að hætta við þátttöku í skrípaleiknum í Genf.

Farið á Durban2.blog.is

Bókartíðindi frá landinu helga

 

Mig langar að kynna nýja bók sem kom út fyrir skömmu. Hún ber heitið Behind the Humanitarian Mask: The Nordic Countries, Israel and the Jews. Þetta er greinasafn sem m.a. fjallar um tvískinnung og áframhaldandi hatur gegn gyðingum á Norðurlöndunum eftir Síðari heimsstyrjöld. Ef einhver hefur talið sjálfum sér trú um, að sá ósómi hafi hætt eftir að Hitler skaut sig í Berlín árið 1945, er sá hinn sami haldinn veruleikafirru. Sem sagt, þetta er ekki jólabókin fyrir útópista eins og vinstrimenn, öfgamúslíma og nasista, sem þessa dagana virðast nokkuð samstíga í hatrinu.

Margar greinarnar í bókinni hafa verið birta áður í tímaritum, og síðan sumar þeirra voru skrifaðar hefur ástandið sem lýst er í greinunum ekki lagast.

Bókin er gefin út af Institute for Global Jewish Affairs

Bókina er hægt að kaupa á Netinu hér eða hér:

Merkisræða

 

 

Á fimmtudaginn var flutti danski stjórnmálamaðurinn Naser Khader merka ræðu í Genf. Þótt ræðan væri ekki á góðri ensku, er hún að mínu mati meistarastykki. Lesið hana hér  eða hér .

Naser Khader, sem er múslími og Palestínumaður, aðvarar okkur í ræðu sinni við þeirri vá sem nú stjórnar nær öllu í daglegu lífi milljóna múslíma um allan heim. Aðvörun hans held ég að sé öllum holl lesning.

Naser er flokksleiðtogi danska þingflokksins Liberal Alliance, (sem áður hét Ny Alliance). Hann tók danska þingið með stormi árið 2007. En síðan flokkurinn komst í Folketinget, hafa illa gerðir gripir í flokknum flúið úr honum, þar sem í ljós kom að leiðtoginn átti erfitt með að vera leiðtogi og var oft meiri lýðræðissinni en þeir sem voru með í að stofna flokkinn.

Ég hef verið að velta því fyrir mér að skrá mig í flokkinn hans Nasers, þó ég sé ekki gjaldgengur til þingkosninga í Danmörku. Líklega verður ekkert úr því. Mér leiðast flokkar. Naser Khader segir hins vegar það sem fáir Danir þora að segja eða heyra. Það sem hann sagði í Genfarborg var sannleikurinn.

Það er oft erfitt að heyra hann.

Rauðhausar

 

Alheimsmót rauðhærðra var nýlega haldið í bænum Breda í Hollandi. Þótt ca. 5% af skegghárum mínum séu fagurlega rauð (þau eru nú flest orðin grá, því rautt hár verður fyrst grátt), hefði ég ekki getað sótt þetta mót. Strangar reglu giltu fyrir þátttöku. Mér hefði verið kastað út. Ég byrjaði nefnilega ævina svarthærður, svo var ég á tímabili sköllóttur, síðar svona nokkurn veginn skolhærður, svo brúnhrokkinhærður, og loks hálfkollóttur og fúlskeggjaður- og svo komu nokkur rauð skegghár með í kaupbæti. Sumir tala um bad hairday. Ég hef átt við bad hairlife að stríða. En ég varð þó ekki rauðhærður, Guði sé lof.

Rauðausar eru minnihlutahópur. Þeir hafa haft um sárt að binda, allt síðan að Neanderthalsmenn voru upp á sitt besta. Myndin hér að ofan er túlkun einhvers fábjána á því hvernig Neanderthalsstúlka, sem fannst örend við Gibraltar hafi litið út. Eins og allir vita voru Neanderthalsmenn auðvitað ljóshærðir - heimskar blondínur.

Í flestum löndum heims eru rauðhærðir hæfilegar ofsóttir vegna háralitar síns. Þar sem háraliturinn er sjaldgæfur, fá rauðhausar það í hausinn, að forfaðir þeirra hafi verið útlendingur (vesturlandabúar, krossfarar, breskir dátar etc.). Þar sem dökkir menn finnast svo að segja ekki, var hægt að níðast á rauðhærðum eins og negrum. Munið þið ekki eftir að minnsta kosti einum rauðhaus í ykkar skóla sem var ofsóttur, barinn og niðurlægður fyrir að vera rauðhærður? 

Rauðhærðar konur líða undir því að vera taldar vergjarnar, og sumir menn eru haldnir þeim fetish að dást að rauðhærðum konum, sem sumar hverjar geta náttúrulega verið afar fallegar. Rauðhært fólk getur líka orðið mjög sterkt af öllum þessum mótgangi í lífinu og er oft mjög kaldhæðið. En rauðhært fólk getur fyrir enga muni viðurkennt að það verði gráhært og þótt hausinn sé silfurgrár, á það það til að tala um rauðu hárin sín.

Rautt hár er auðvitað einhvers konar sjúkdómur. Rautt hár er eiginlega erfðabreyting, sem ekki veldur dauða. Henni fylgir ljósfælni, mikið af freknum, svæsin svitalykt. Svo er talið, og ég tel það líka víst, að rauðhærðir þoli verr sársauka og finni frekar til sársauka en fólk með annan háralit. Ég hef sannreynt þetta. Rauð hár sem ég kippi stundum úr risastóru nefi mínu er miklu sársaukafyllra að kippa út en brúnum og svörtum hárum, sem líka vaxa villt og galið úr grön minni.

Rauðu hárin mín erfði ég frá föður mínum heitnum, sem var 110% rauðhærður, og það var mestur hluti móðurættar hans líka. Hann átti mjög erfitt með sig ef hann kenndi sér sársauka og eins og hjá flestum rauðhærðum var svitalyktin ein sér nægileg til að slá út hersveit.

Rauðhærður faðir minn við lestur 1939 eða 1940. Móðir hans dýrkaði rauða hárið hans.

Rembrandtinn á veggnum týndist í stríðinu

 

Með aldrinum hef ég lært að hemja fordóma mína gegn rauðhærðum, þó ég hafi vísvitandi og með erfðafræðilegum ástæðum haldið mig frá rauðhærðu kvenfólki á sokkabandsárunum. Ég ætlaði mér sko ekki að fjölga þessu litaafbrigði og valda komandi kynslóðum sársauka og svitalykt.

Rauðhært fólk þarf auðvitað ekki stuðning minn, en ég styð það samt í baráttu þess við frumstæðari lífverur. Rauðhært fólk fær vitaskuld ekki að gera athugasemd við þessa færslu.  Í lokin ein mynd af rauðhaus, sem líka er hommi og gyðingur. Já, sumir þurfa þola meira en aðrir.

Nýjasti skrælinginn á Grænlandi

 

Ahmed Akkari var vart stiginn út úr þotunni á Grænlandi, að hann var orðinn frægasti maður þar í landi. Hann er einfaldlega búinn að skjóta öllum fyllibyttunum á grænlenska þinginu ref fyrir moskusuxarass.

Akkari er kominn til Grænlands til að kenna við barnaskólann í Narsaq/Narsap á Grænlandi. Það er lítið byggðarlag á SV-Grænlandi, á þeim slóðum sem íslenskir landnemar bjuggu fyrrum og þeir kölluðu Eystribyggð. Ekki má rugla því saman við Austurlönd.

Ahmed Akkari er frægur af endemum og það þarf ekki að undra að ekki séu allir Grænlendingar jafn hrifnir af komu hans og bæjaryfirvöld i Narsap sem réðu hann til kennslu. Sjálfur segist hann bara vera kominn til að kenna dönsku og ensku, en það er fortíð mannsins sem fær marga til að sjá rautt á Grænlandi.

Akkari kom barnungur með fjölskyldu sinni til Danmerkur frá Líbanon árið 1985. Fjölskyldan var send heim aftur þegar þar var orðið rólegt eftir borgarastyrjöldina. En það var gott að vera í Danmörku og þau komu aftur og fengu að lokum að setjast að. Akkari var yfirlýstur Dani á þeim árum sem hann sótti um ríkisfang í Danmörku. Hann sagðist ekki kunna arabísku og gæti því ekki snúið til Líbanon. Þegar hann fékk ríkisfang var það fyrsta sem hann gerði að hoppa út úr gervi sínu, og gerðist  öfgamúslími sem var reiprennandi í Kóraninum. Hann neitaði að taka í hönd skólastjórans sem afhenti honum prófskírteinið í menntó - vegna þess að hún var kona.

Frægastur hefur Akkari orði fyrir aðild sína að Múhameðs-teikningamálinu. Líklega ber enginn maður eins mikla ábyrgð á því, hvernig fór í því máli. Drengur þessi reyndist ósannsögull í meira lagi og tókst að ljúga heim múslíma fullan og koma af stað vandamáli fyrir "land sitt", sem seint verður lagfært. Líklega var það hann sem fór með mynd frá svínahrínskeppni í Frakklandi til Múslímalanda og sagði myndina vera af dönskum spaugara sem var að gera grín af múslímapresti.

Ekki er það Múhameð frændi eða teikningar af honum eða trúarofstæki Akkaris, sem stundum hefur ranglega verið nefndur imam (múslímaprestur), sem virðist valda Grænlendingum mestum vanda. Í vefblaðinu Sermitsiak segja nokkuð margir lesendur skoðun sína á Akkari. Mér sýnist nú á skrifunum, að þeir sem helst eru mótfallnir komu Akkaris til Grænlands séu STÓR-Danir, sem sitja og láta sér leiðast á Grænlandi og geta nú hatast út í eitthvað annað en Grænlendingana. Margir telja líka til ofbeldismál sem Akkari var dæmdur fyrir þegar hann var í kennaranámi. Hann reif eyra 11 ára nemanda til blóðs og sparkaði í hann liggjandi. Hvað hafði hinn 11 ára drengur gert til að verðskulda þessa sturlun Akkaris? Í leik hafði drengurinn óvart rifið slæðu af höfði systur Akkaris, sem líka var nemi í skólanum. Slíkt er ófyrirgefanlegt og í ýmsum löndum Íslams er dauðarefsing við slíku.

 

Akkari kominn til Grænlands. Spilar hann líka í 5. deild þar?

 

Á síðustu árum hafa einhverjir múslímar ofsótt Grænlendinga (utangarðsfólk) sem býr í hverfinu Gellerup í vesturhluta Árósa. Ef menn leita af fréttum af þessu, sér maður að einhvers staðar í heiminum hefur frétt þessi skolast til og menn tala um að grænlenskir múslímar séu að flæma landa sína af öðrum trúarbrögðum úr hverfinu Gellerup.

Nú er að sjá hvernig grænlenski veturinn leggst í Akkari, hvort hann berji nokkurt aðra en sjálfan sig til hita, reki alla nágranna sína í burtu með leiðindum eða reisi ígloo-moskur í nágrenni Brattahlíðar. Í versta falli nota Grænlendingar piltinn sem akkeri.

Ég tel víst, að ég sé búinn að finna ferðaskrifstofuna sem gaf Akkari hugmyndina til að fara til Grænlands. Hún heitir Akbar Reisen (sjá myndina efst). Fróðir menn segja hins vegar, að Akkari sé kominn til Grænlands til þess eins að freista þess að fá líbanska konu sína og barn til Grænlands og þannig inn í Danmörku. En ströng lög í Danmörku gera það að verkum að Akkari getur ekki fengið konu sína til Danmörku. Ef það er ástæðan, styð ég Akkari. Þessi lög eru ómannúðleg.

Og vissuð þið að fyrstu Grænlendingarnir voru Rússar! Klikkið tvisvar á hið óborganlega grín um Boas & Co. sem má skoða á Sermitsiak.gl

 

 

Autobahn Dänemark

 

660.520.000.000,00 íslenskar krónur, eða 40 milljarðar danskra króna mun brú frá Þýskalandi til Danmörku kosta. Löndin tvö eru nú búin að skrifa undir bindandi samning þess efnis, að það eigi að byggja brú yfir Fermern-sund.

Nú lágu Danir í því. Nei, rétt skal vera rétt: Nú létu Danir Þjóðverja aftur leika á sig.

Þessi verðmiði á brúnni stenst á engan hátt. Sammála um það eru eins ólíkir aðilar og Dansk Folkeparti, sérfræðingar hjá Copenhagen Business School og þýskir vísindamenn. Hinir 40 milljarðarnir, sem upp á munu vanta, verða borgaðir af dönskum skattgreiðendum um ófyrirsjáanlega framtíð. Jesper Rangvid hjá Copenhagen Business School hefur sagt að útreikningar danska samgönguráðuneytisins séu "i modstrid med al basal finansieringsteori". Ég ætla ekkert að þýða það. Í ráðuneytinu láta menn sér fátt um finnast. Hamagangurinn er svo mikill í því að byrja framkvæmdir að niðurstöður virtra þýskra vísindamanna, sem telja brúna verða vandamál fyrir lífríki Eystrasalts, eru virtar að vettugi.

Á sama tíma og menn tala um heimshitnun og als kyns vá vegna orkulynda, sem eru að ganga til þurrðar, er lagður hornsteinn að enn einni hraðbraut yfir lítið, fátækt land, svo Svíar og Þjóðverjar geti ekið fram og til baka með auðlyndir sínar á stórum trukkum. Danir verða líka lestaþjónar og vegavinnumenn í þetta skiptið.

Dálítill útreikningur: Brúin verður 10 km. löng. og kostar 40.000.000.000 kr. Hvað kostar þá metrinn? Hann kostar 4 milljónir danskra króna eða rúmlega 66 milljónir íslenskra króna. Brúarframkvæmdirnar eiga á að bera sig með notendagreiðslum. Ég er hræddur um að miðinn yfir brúna verði dýrari en flugmiði til Þýskalands, jafnvel þótt verð á flugi hækki. Almenningur mun varla nota þessa brú mikið.

Danmörk, sem oft er álitin sæta stelpan í ESB, á við ýmis alvarlegt vandamál að stríða. Hún er alveg agalega léleg í reikningi og vill láta stóra stráka taka sig, og það helst aftanfrá.

Icelandic Plane, Danish Crash Pilot

 

Nyhedsavisen kom ekki í morgun. Íslenska tunnan brast og úr henni valt Morten Lund (sjá mynd).

Samúðaróskir mínar sendi ég starfsmönnum blaðsins sem missa vinnu sína og fjölmenna á kaffihúsum Kaupmannahafnar næstu dagana. 

Mestar áhyggjur hef ég af Pólverjunum, Litháunum og sígaununum sem báru út blaðið, eða hentu því út í runna þegar vel lá á þeim. Nú hafa þeir ekkert að gera. Betl mun aukast á götum Kaupmannahafnar. Smáinnbrotum væntanlega líka. Hvað á fólk annað að gera. Nyhedsavisen, sem stofnað var af Íslendingum, hefur ekki borgað fólkinu laun fyrir águstmánuð.

En stærsta innbrotið var nú líklegast útbrot íslenskra ævintýramanna, sem ætluðu að græða á blaðaútgáfu í samkeppni við stór dönsk dagblöð sem telja allt útlenskt vera hótun við sig. Íslendingarnir fengu ekki að kaupa Berlingske Tidende og svo fór sem fór.

Ævintýrafjárfestirinn og virtual hetjan Morten Lund er greininga vitlausari en ég hélt, nema að hann sé að leika sér með peninga annarra. Þegar hann tók við meirihlutanum á Nyhedsavisen, tapaði blaðið um 1 milljón DKK á dag.  Hann á nú "meirihlutann", ef hann er einhvers staðar að finna. Hann er þó enn vel tengdur Fróni, giftur íslenskri konu, Hlín Mogensdóttur. Lund hefur áður sett fyrirtæki á hausinn, t.d. Mediekompagniet. Var tengdur Crash Pilots og annarri ævintýramennsku, en græddi á því að setja peninga sína (og annarra) í Skype-bréf.

Nú hefur greinilega saxast á auðinn og Nyhedsavisen, sem átti að vera byrjunin á heimsveldi í fjölmiðlun, hefur verið lokað - er bankerot eins og Danir kalla þessa íþrótt, sem heitir að fara á hausinn á Íslandi.

Ekki nema von að Neo-klassíski "serial entrepreneurinn" Lund, sem líka er prófessor í Reykjavik samkvæmt Wikipedíu, sé spældur á myndinni, en börnin hans sem líka gretta sig á myndinni eru hálfíslensk og ekki er það ónýtt. Eins og Lund, sem ekki er sleipur í ensku, skrifar á vefsíðu sinni:"Kids makes Life good".Það á líka við börn sem ekki eiga foreldra, sem eru eins virtual og Morten Lund og Nyhedsavisen. Til að sjá hvernig málin stóðu hjá Nyhedsavisen fyrir rétt rúmum mánuði, lesið þetta. Hvað ætli Lund kenni í Reykjavík? Töfra og loftkastala?

Stoðir (sem hét reynda áður FL group), átti líka í Nyhedsavisen og verða nú að afskrifa heilmikið eins og pólsku blaðburðamennirnir sem Morten Lund hefur snuðað um laun. Stoðir eru víst orðnar af aumum rekavið, en eiga veð í öllum eignum Morten Lunds.  Morten hlýtur að þurfa að flytja í raðhús eða 2ja herbergja íbúð en Stoðarfólk á örugglega enn fyrir utanlandsferð.

Útgáfu Nyhedsavisen hætt