Jólakók - be blessed and be happy

 

Hver kannast ekki við akfeita jólasveininn, sem drekkur kók í einum teyg? Hver man ekki eftir kókbílnum sem keyrði um sveitir og varð stærri og stærri sem árin liðu? Hver hefur ekki séð kóklestina, þetta unaðslega samgöngutæki sem svalar þorsta mannkyns og tendrar jólaljósin hvert sem hún fer, nema kannski í Darfúr?

Hver man ekki eftir fallega fólkinu, af öllum mögulegum og ómögulegum kynþáttum, sem söng á hæð (í Kaliforníu) á Ítalíu? Og allir sungu með: "I'd like to teach the world to sing". Milljón ropum síðar og með sætar minningar um rotnandi tennur og kókvömb, er fróðlegt að minnast þess að kókið hefur leikið mikilvægt hlutverk í utanríkisstefnu (sem sumir kalla heimsveldisstefnu) Bandaríkjamanna. Rússar áttu ekki drykk eins og Coca Cola, og því fór sem fór.

Kókið kom til Íslands árið 1942, um svipað leiti og Kaninn tók við af Bretum í hernáminu. Vildi Bandaríkjastjórn sýna sjálfri sér og heiminum, hve annt Íslendingum var um hersetuna, m.a. hvernig dátarnir svöluðu þorsta Íslendinga með kóki, þar sem þeir keyrðu um sveitir í jeppum og deildu út kóki á fólk í bæjum og til sveita. Allir teyguðu brátt kókið til sjós og lands.

Ætli þessi þjóðardrykkur Íslendinga sé ekki meira drukkinn af Íslendingum en blávatnið?

Með þessari kókminningu óska ég lesendum mínum gleðilegra jóla, og vona að Grýla, Leppalúði og Jólakötturinn fari ekki illa með ykkur. Ég er viss um að nokkrar þúsundir lítra af heimsveldisgosinu muni renna niður með steikinni ykkar um jólin og valda þembu og sýruátu á tönnum og í maga. Verið samt blessuð og sæl. 

Hér er gömul Pepsi-saga og Sinalco-saga

from Idaho to Iceland

Athugasemdir

[H.T. Bjarnason (IP-tala skráð) 20.12.2010 kl. 21:33]

Hæðin sem unga fólkið söng á var ekki í Kaliforníu, heldur fyrir utan Rómarborg á Ítalíu.

[H.T. Bjarnason (IP-tala skráð) 20.12.2010 kl. 21:34]

Gleymdi einu ... virkilega gaman að sjá þessar auglýsingar.

[Vilhjálmur Örn Vilhjálmsson, 20.12.2010 kl. 21:51]

Þú varst kannski með í kórnum H.T.? Ég gerði bara ráð fyrir því að þetta væri í US of A, þar sem fólkið var svo kanalegt, en ég sé að þú hefur rétt fyrir þér. Kókið og jólatréð grönduðu Rómarríki.

[Ragnhildur Kolka, 20.12.2010 kl. 22:26]

Held ég haldi mig bara við Malt og Appelsín. en kveðjan er góð eins og oft áður. Gleðileg jól.

[Vilhjálmur Örn Vilhjálmsson, 21.12.2010 kl. 12:01]

Ragnhildur, Gleðileg Jól og farsælt 2011, þakka fyrir mörg hnyttin svör árið 2010 og biðst ég afsökunar á seinaganginum í svörum.

[Vilhjálmur Örn Vilhjálmsson, 21.12.2010 kl. 12:53]

Fleiri skemmtilegar kókauglýsingar hér:

http://www.adbranch.com/timeframe/1930_1950/

[Faktor, 22.12.2010 kl. 10:53]

Bestu óskir um gleðilega jólahátíð, Vilhjálmur og bestu kveðjur úr Hæstakaupstaðnum, þar sem Leonhard Tang gerði m.a. tilraunir til að framleiða gosdrykki á Ísafirði :)

http://www.bb.is/Pages/106?NewsID=7223

http://safn.isafjordur.is/vidhengi/byggda/Safnvisir.pdf

[Óskar Sigurðsson, 22.12.2010 kl. 12:03]

Gleðilega hátíð Villi. Er Grýla Jóhanna Sig. Steingrímur Leppalúði og AGS jólakötturinn?

[Vilhjálmur Örn Vilhjálmsson, 22.12.2010 kl. 18:31]

Ég held nú ekki hátíðina heilaga, en reyni að slappa af, Óskar. Grýlu, Leppalúða og Jólaköttinn hefur ég heyrt Árna Björnsson tala um í kaffinu á Þjóðminjasafninu í gamla daga, en hitt fólkið get ég aðeins sagt eitt um: "Hef aldrei heyrt um þau getið".

[Vilhjálmur Örn Vilhjálmsson, 22.12.2010 kl. 18:34]

Gleðilega hátíð Áslaug. Ég verð að gera eitthvað við Benedictsen árið 2011. Hef því miður ekki komist vestur nýlega, þar sem ferðamönnum eins og mér er alltaf beint að Gullfossi og Geysi.

[Jón Steinar Ragnarsson, 25.12.2010 kl. 06:57]

Gleðileg Jól Villi minn og þakka þér allt gaman og alvöru á liðinni tíð.