Stórt gos á Íslandi

 

 

Sinalco er drykkur sem seint gleymist. Ekki finnst mér ég hafa séð þennan ágæta drykk í verslunum á Íslandi í nokkur ár. Þegar skólafélagar manns voru að sulla í sig Pepsi og Kóki, eða Pólói, var ég harður áhangandi Sinalcósins.  Limonade Gazeuse stóð stundum á flöskunum og það hljómaði miklu betur en Reg. Trade Mark.

Ég drakk aðeins þennan drykk í flöskum, aldrei úr plasti eða dós. Ég giska á að ég hafi í æsku minni drukkið um það bil 1000 Sinalco flöskur.

Þessi ágæti sítrusdrykkur er ættaður frá Þýskalandi var upphaflega settur á markaðinn sem hollustudrykkur árið 1902. Þetta mun vera einn elsti gosdrykkur í Evrópu, sem enn er drukkinn, og mun nú vera seldur í tæplega 50 mismunandi löndum.

Þegar ég kom fyrst til Frankfurt í Þýskalandi árið 1971 með foreldrum mínum, var ánægjulegt að geta séð að "alíslenskur" drykkur eins og Sínalcóið væri til í Þýskalandi líka. Þar fékk ég einnig í fyrsta skipti gosdrykk sem ég hef aðeins drukkið þrisvar síðar á lífsleiðinni. Afri Cola heitir hann. Hann er víst enn hægt að fá í Þýskalandi. Ég man ekki bragðið.

Nýlega, þegar ég hef verið í Þýskalandi til að grufla í sagnfræðinni, hef ég alltaf gleymt að fá mér Sinalco. Nú er ég þyrstur.

Ef einhverjir sakna Sinalcosins (Sine alcohole) eru þeir velkomnir að  deila með mér minningum af einu stærsta gosi Íslandssögunnar.

Myndin efst er af höfundi bloggsins á 5. aldursári að þamba Sinalcoflösku.

Athugasemdir

[Björgvin S. Ármannsson, 7.7.2008 kl. 09:50]

Ég man vel eftir Sinalcoinu, sá það svo fyrir örfáum árum í verslunum hér heima en þá var það í áldósum og stemningin var ekki sú sama við drykkjuna.

[Anna Karlsdóttir, 7.7.2008 kl. 11:22]

Ég á margar minningar um Sinalco, en helst þær að foreldrar mínir vildu einungis bjóða upp á þennan eðaldrykk í barnaafmælum á þeim forsendum að hann litaði ekki teppin (ætli þau hafi ekki verið nægilega skræpótt hvort eð var).

Ég hef saknað Sinalco og hvar sem ég hef verið í Evrópu hef ég leitað hann uppi. Flöskurnar voru mjög flottar. Ég smakkaði drykkinn fyrir nokkrum árum síðan einhvers staðar, kannski í Þýskalandi, man það ekki. Þá fannst mér hann vera orðinn dekkri og öðruvísi á bragði. Kannski var þetta eins og þegar maður kemur á stað, orðinn eldri og verður hissa yfir að hann sé ekki stærri, því í minningunni var hann það. 

[Gulli litli, 7.7.2008 kl. 12:19]

Sinalco, Spur cola, Vallas, Miranda, ......,......,........,.......

[Vilhjálmur Örn Vilhjálmsson, 7.7.2008 kl. 13:49]

Anna, mér finnst liturinn á Sinalcóinu vera annar í dag, þegar ég skoða þýskar auglýsingar. Voru foreldrar þínir með "Axminster teppi, annað ekki"?

Björgvin, gos úr dós og plasti, er ekki gos. Ég hef ekki misst af neinu þar. Sinalco verður að vera á gömlu flöskunum, sem voru listaverk eins og litla Coca Cola flaskan.

Gulli, Miranda var komið hér í verslanir í Danmörku nýlega, enn allt, allt, allt öðruvísi en það sem ég man eftir. Jolly Cola var líka selt á tíma í Reykjavík. Áður en Danir fóru að drekka Kók eins og Íslendingar var Jollyið mjög hátt skrifað hér. Spur Cola þótt mér vont, nema með Malta. Sætar og svalandi minningar.

Canada Dry var líka mega góður drykkur! Fyrir nokkrum árum drakk ég hann oft sykurskertan á Englandi.

[Gunnar Rögnvaldsson, 7.7.2008 kl. 14:05]

Takk fyrir þessa góðu áminningu Vilhjálmur. Þetta var einnig einn af uppáhalds drykkjum mínum ásamt Jolly Cola þegar ég var lítill. Sinalco var svo svalandi og einnig gott út í Malt :)

Þökk sé skilvirkni hins innra markaðs ESB þá er þessi drykkur nú ófáanlegur alls staðar nema heima hjá sér ("innri markaður" þýðir innra með sér, þ.e. innvortis markaður)

Ef marka má hina hröðu útbreiðslu tegunda (þ.e. vörutegunda) í ESB þá munum við kanski sjá Sinalco í verslunum fyrir utan Þýskaland árið 2408. Það hefur nefnilega tekið sænska Präst ostinn um 200 til 400 ár að synda þessa 10 kílómetra yfir sundið. En ekkert jafnast jú á við innvortis markaði, nema ef væri útvortis markaðir því Präst ostur fæst í Ame . . gulp. . Ameríku (það fer um mann hrollur)

Bestu kveðjur

[Gunnar Rögnvaldsson, 7.7.2008 kl. 14:20]

Ég vil einnig minna neytendur á að sökum hagræðingar í innvortis mörkuðum okkar þá er eftirfarandi markaðsfyrirkomulag að mestu orðið að staðli hjá okkur í ESB:

Ef það fært Kók í verslun þá fæst ekki Pepsi

Ef það fært Haribo þá fæst ekki neitt annað

Ef það fæst ís frá X þá fæst ekki ís frá Y

(sökum hagræðingar höfum við einungis tvo stafi í stafrófinu, X og Y)

Svona höfum við hagrætt vöruúrvali í verslunum í ESB. Núna þurfa neytendur því aðeins og vita hvort þeir eru á leiðinni í mat eða úr mat.

Með bestu kveðjum

Ímat Úrmat

Komissar & Yfirmaður Dreifingarliða í ESB

[Vilhjálmur Örn Vilhjálmsson, 7.7.2008 kl. 14:28]

Gunnar, heldurðu að Kanar kunni að fara sómasamlega með Prestinn sænska? Sænskir krata hljóta að setja einhverjar hömlur.

Annars er Dönum enn bannað að uppgötva "konung" sænskra osta, Västerbotten. Við fjölskyldan förum annars lagið til Málmeyjar til að ná okkur í byrgðir. Ég verð líka að panta ýmislegt matarkyns sérstaklega frá Hollandi og Ísrael til að halda mínum alþjóðlega standard, vegna þess að hér í landi eru menn svo gífurlega lítið nýjungagjarnir. 

Mikið er nú gaman að til er fólk með sama smekk og maður sjálfur í gosdrykkjum, ostum og efnahagsbandalögum.

[Gunnar Rögnvaldsson, 7.7.2008 kl. 14:42]

Já - fliss

Við gætum stofnað alþjóðlegann smyglhring. Smyglað t.d. Sinalco, Sviðum og Västerbotten fram hjá EuroStat og valdið markaðsöngþveiti í ESB - og svo jafnvel byrlað embættismönnum ESB útlendum mat og bognum agúrkum. Gereyðingarvopnið sem myndi svo slá þá alveg út væri TVÆR tegundir af sama mat í sömu verslun.

Vaú, þvílíkir möguleikarnir maður!

Hvilke muligheder!

[Anna Karlsdóttir, 7.7.2008 kl. 21:54]

krefjumst Sinalco!

Ég veit ekki hvaða tegund teppið var, það var bara skræpótt. 

[Sigvaldi Eggertsson (IP-tala skráð) 7.7.2008 kl. 23:31]

Blessaður Viljálmur.

Nú langar mig að kvarta yfir einu hjá þér! Ég hef tekið eftir því að þú nefnir sænsku borgina Malmö "Málmey" en Málmey er, ef að ég man rétt, eyja á Skagafirði.

Hið forna, norræna nafn borgarinnar var "Málmhaugar", væri ekki best að halda okkur við þau nöfn sem staðir hafa í íslenskunni.

Bestu kveðjur, haltu áfram að segja okkur til syndanna (við erum alltaf að vinna til þess) og síðbúnar hamingjuóskir í tilefni af afmæli Ísraelsríkis hér um daginn.

Sigvaldi Eggertsson

[Júlíus Valsson, 8.7.2008 kl. 00:18]

Hér er slóðin.

[Vilhjálmur Örn Vilhjálmsson, 8.7.2008 kl. 05:12]

Þakka þér Júlíus. Ég var búinn að skoða þetta en fæ ekki sama fílinginn og úr Sinalcói 7. áratugarins. Þetta virðist vera orðið dekkra sull. Þetta finnst mér hins vegar góð auglýsing.

[Vilhjálmur Örn Vilhjálmsson, 8.7.2008 kl. 05:24]

Þakka þér líka Sigvaldi. Rétt er þetta með Málmhauga, þótt ég viti ekki hvar þessir málmhaugar hafa verið. Líklega hafa þarna verið fornar grafir sem innihéldu mikið haugsilfur. Þetta er eins og með Arós á Jótlandi (Århus), sem eitt sinn átti sér skjaldamerki sem á voru tvær árar við hús. Nú vita Árósarbúar náttúrulega allir að þetta var Árós og aðeins einn. Því leiðrétti ég alltaf þá sem tala um Árósa í fleirtölu, því áin er nú ekki stór og ósinn var eitt sinn bæjarlækurinn sem rennur út í gömlu höfnina í bænum.

Næst þegar ég fer til Málmhauga, mun ég leiðrétta alla sem ég hitti, jafnvel segja þeim til syndanna, og skila svo góðri kveðju frá Sigvalda Eggertssyni.

[Vilhjálmur Örn Vilhjálmsson, 8.7.2008 kl. 05:26]

Ætli sé eitthvað um Sinalco á Íslandi í þessari góðu bók: 

[Vilhjálmur Örn Vilhjálmsson, 8.7.2008 kl. 05:53]

Hér er einnig hægt að lesa skemmtilega sögu Sinalcosins, og þar má sjá ósmekklegustu gosdrykkjaauglýsingu sem ég hef séð. Hún er fyrir Afri Cola sem ég greindi frá í gær. Þetta getur vart hafa aukið söluna og tekur úr mér allt þor til reyna við þennan drykk næst þegar ég flýti mér í gegnum Þýskaland.

[Erna Svala (IP-tala skráð) 8.7.2008 kl. 16:36]

Þú færð Sinalco í sumum Austur-Evrópulönunum ennþá, t.d. Serbíu