"Segja frjálsa Íslendinga hafa borgað Icesave"

Slíka fyrirsögn erum við vonandi aldrei eftir að sjá í sögubókum framtíðarinnar. En alveg eins og sá hluti íslensku þjóðarinnar, sem er að fara yfir um vegna þess að hann vill ólmur borga skuld sem ekki er þjóðarinnar, virðist nú komið í ljós að frjálsir Egyptar hafi valið að taka á sig þrælaok og hafi reist pýramída í þjóðarátaki, allt fyrir ánágjuna. Eða svo segir ríkisfornleifafræðingur Egypta, Secretary General of the Egyptian Supreme Council of Antiquities, Zawi Hawass.

Ef ríkisfornleifafræðingur Egypta væri ekki almennt talinn vera fjölmiðlatrúður og illa gefinn, og að fornleifafræðingurinn sem vann með Hawass við rannsóknir á  „grafhýsinu" í Giza með beinum "frjálsra Egypta" hefði ekki verið Bandaríkjamaður sem vill halda rannsóknarleyfi sínu á Egyptalandi (sem Hawass úthlutar einn), hefði ég trúað þessu.

Þjóðarátakið sem Zahi Hawass (sjá http://www.drhawass.com/) talar um, telur hann sig meðal annars sjá í „að á vettvangi hafa fundist fornleifar sem benda til þess að verkamennirnir 10.000, sem reistu píramídana, hafi borðað 21 nautgripi og 23 kindur, sem bændur hafi sent þeim daglega". Ef þetta er rétt, hljóta bændurnir að hafa verið þrælarnir.  En ekki verður nú mikil veisla fyrir 10.000 frjálsa menn í erfiðisvinnu með kjötið af þessum skepnum, þó svo að kjötið hafi aðeins verið lítill hluti í dallinum í alþýðueldhúsunum við pýramídana.  

Supreme Faraó Hawass

Í sjónvarpsfréttum bætti Hawass því við, að það hefðu verið Egyptar sem byggðu pýramídana og að þeir hefðu verið frjálsir menn eins og þeir eru í dag.

Þarna stendur hnífurinn í kúnni. Ríkisfornleifafræðingur Egypta vill ekki heyra að "erlent vinnuafl" og þrælar hafi komið nálægt þessari mannvirkjagerð, og telur greinilega að fólk af sama meiði og Nútímaegyptar hafi byggt landið á tímum stóru Pýramídanna og byggt allt sem frjálsir menn. Hann telur að frjálsir Egyptar hafi unnið 3 mánaða tíma í senn og hafi svo verið leystir af af ólmum Samfylkingaregyptum sem vildu borga Faraói það sem Faraói bar. Hawass hefur bannað DNA rannsóknir, sem hann telur gagnslausar og út í hött. En þær gætu einmitt gefið okkur vissu um hvaðan þeir sem byggðu pýramídana og önnur mannvirki á Egyptalandi voru ættaðir.

Þessar skoðanir Hawass lýsa frekast hugarfari nútíma Egypta, sem hafa önnur lög, aðrar venjur og aðra trú en forverar þeirra í landinu. Þrælar og vantrúa útlendingar voru ekki samkvæmt nútímaegyptum færir um að byggja neitt að viti, kannski ekki frekar en nútíma Egyptar eða stjórnvöld í Egyptalandi, sem enn hefur ekki tekist að koma reglu á uppbyggingu í landi sínu. Þar er allt í argasta rusli.

Ég fá ekki séð, hvernig hægt er að afneita því að Fornegyptar hafi ekki getað stjórnað þrælum þannig að þeir lærðu handverkið, og enginn getur útilokað að handverkskunnáttan hafi ekki stundum komið með þeim sem þrælkaðir voru, meðan yfirstéttin sveiflaði svipunum og var sauðheimsk.

Vandamálið er að Egyptar nútímans eru ekki frjálsir menn, þeir halda bara að þeir séu það, og þess vegna sjáum við fornleifafræðing á Egyptalandi á 21. öld, sem er heltekinn af rómantík eins og menn á Vesturlöndum voru haldnir henni á þeirri 19. En þjóðernisrómantíkin lætur ekki hæða að sér.

Fyrir utan að vera talinn óferjandi í fræðunum, er Hawas þessi argasti gyðingahatari, eins og góðu fífli sæmir og leynir skyldleikinn sér við suma forkálfana í Samfylkingunni og VG sér heldur ekki þar.

Hér í viðtali á egypskri sjónvarpsstöð segir hann okkur að Gyðingar stjórni heiminum og situr það í sögulegt samhengi, þegar hann er spurður nánar út í það. Hann lýsir gyðingum eins og ríkistjórn okkar lýsir þeim sem ekki vilja borga þrælaskuldina. Ég fæ ekki séð annað.

Segja frjálsa menn hafa reist píramídana

Jinky Express

Jinky, dóttir Bobby J. Fischers heitins, er kominn heim og farin aftur. Menn tóku úr stúlkunni sýni. Enginn fékk að sjá hana (viðbót: nema allir sem horfðu á RÚV eftir að þessi færsla var skrifuð). Gaman hefði verið að sjá hvort hún er orðin meira lík karli föður sínum en hún var árið 2004.

Ég skrifaði í byrjun síðasta árs fjölmargar færslur ásamt öðru góðhjörtuðu fólki sem vildi vernda hag dóttur skákmeistarans. Ég komst í sambandi við ýmsa kunnuga menn á Filippseyjum til að finna hvað vakti fyrir skákeistarunum Torre og lögfræðingi hans. Þar vildu menn sem minnst segja (nema fyrir peninga), en flestum þótti líklegt að græðgi Torres væri fremri kærleika í garð meints barns Fischers. Á Filippseyjum verður manni ekki mikið ágengt ef maður borgar ekki undir borðið fyrir greiða. Svo ég hafði ekki árangur sem erfiði.

Nú, þegar búið er að taka sýni úr Jinky litlu, hún komin og farin, kemur vonandi í ljós hvort hún er dóttir skrítna karlsins sem boðið var til Íslands fyrir ómælda duttlunga þjóðfélags sem var í skýjunum af eintómri sjálfsánægju og afneitun.

Eitt er þó víst, að þegar Jinky var hér í fyrsta sinn með móður sinni, vildi Fischer ekki einu sinni hafa þær í íbúð sinni. Þær voru látnar dúsa á gistiheimili að Brúnavegi 8, þar sem þær voru hræddar. Filippseysk kona í Reykjavík bauð þeim að búa hjá sér.

Annað er víst, en það er að íslenska kirkjan, þar sem sumir prestar halda að Jesús hafi fæðst í Palestínu, leyfir dýrlingadýrkun. Þar sem Fischer er jarðsettur austanfjalls, er verið að færa alls kyns skurðgoð og líkneski inn í kirkjuna til minningar um skákkónginn, sem holað var niður við stétt utarlega í kirkjugarði.

Andri Snær bannar mér að nota ljósmynd af sér

Í gær var mér bannað að nota ljósmynd. Ljósmynd af Andra Snæ Magnasyni, sem í upphafi prýddi síðustu færslu mín, hefur verið fjarlægð að ósk einhverra veflögregluaðila sem hafa haft samband við bloggumsjónarmenn www.mbl.is. 

Ég hef rætt við ljósmyndarann, sem reyndist eiga myndina, en ekki hafði hann haft samband við Morgunblaðið og heldur ekki rit það, gefið út af Iceland Express, sem keypt hefur myndina af honum (en ekki einkaréttinn). Ég fjarlægði myndina stax þegar mér barst erindið frá www.blog.is.

Greinilegt er að færsla mín hefur farið fyrir brjóstið á einhverjum. Þessum "einhverjum", sem eru búnir að skíta í leðurbuxurnar, og Andra Snæ til heiðurs birti ég nýja mynd af ekta þýskum náttúruverndarmanni sem ekki er ósvipaður Andra í Draumalandinu:

Ljósmyndin, sem ég mátti ekki nota, var þangað til rétt áðan notuð af Alfred Töpfer Stiftung. En hver gaf þeim leyfið. Samkvæmt starfsmanni sjóðsins, Gielke, var það Andri sjálfur er sendi þeim myndina og samkvæmt umsjónarmönnum blog.is var það Andri Snær sem vildi setja "lögbannið" á mig. Andri sendi hins vegar mynd í leyfisleysi til Alfred Toepfer Stiftung.

Alfred Toepfer Stiftung er nú búin að fjarlæga myndina af heimasíðu sinni, eftir að ég hafði samband og í ljós kom, að mynd sem mér er bannað að birta er ekki eign og copyright Andra.

Ef Andri Snær vill fá lögbann á gangrýnar raddir, getur hann tekið þátt í umræðunni á bloggi mínu. Hann er fjandakornið ritfær!

Ljósmyndin hér fyrir neðan sýnir að bönn og ritskoðun eru ekki ný bóla.

 

Til hamingju með nasistaverðlaunin Andri Snær

Ljósmynd af Andra Snæ, sem í upphafi prýddi þessa færslu, hefur verið fjarlægð að ósk aðila sem hafa haft samband við www.mbl.is. Ég hef rætt við ljósmyndarann sem reyndist eiga myndina, en ekki hafði hann samband við Morgunblaðið og heldur ekki rit það, gefið út af Iceland Express, sem keypt hefur myndina af honum (en ekki einkaréttinn). Greinilegt er að færsla mín hefur farið fyrir brjóstið á einhverjum. Þessum "einhverjum", sem eru búnir að skíta í leðurbuxurnar, og Andra Snæ til heiðurs birti ég nú mynd af ekta þýskum náttúruverndarmanni sem er ekki ósvipaður Andra í Draumalandinu: Ljósmyndin er einnig notuð í leyfisleysi af Alfred Töpfer Stiftung.

 

Andri Snær hefur fengið KAIROS-verðlaunin frá Töpfer Stiftung i Hamborg. Er ekki óborganlegt að forystumaður landverndar á Íslandi þiggi bitling úr sjóð sem fjöldi manns hefur afþakkað verðlaunin frá?

Og vitið þið af hverju:

Alfred Töpfer(1894-1993) var illræmdur nasisti. Hann var félagi í SS. Hann var m.a. foringi í gagnnjósnadeild í París. Hann komst í álnir vegna starfa sinna fyrir SS. Starf hans var að ræna. Hann stórgræddi á stríðinu. Seldi meðal annars kalk til Lodz gettósins, sem notað var til að hella yfir líkhrúgurnar. Eftir stríð hafði hann í þjónustu sinni stríðsglæpamenn eins og  Edmund Veesenmeyer sem vann með Adolf Eichmann við morð á 400.000 ungverskum gyðingum. Hjá honum starfaði einnig Hans-Joachim Riecke, sem var viðriðin útrýmingu á rússneskum föngum.  Allt fram til 1970 studdi Töpfer nasistann Thies Christoffersen fjárhagslega, (Christoffersen bjó um tíma bjó í Danmörku), Christoffersen gaf síðar út ritið "Lygarnar Um Auschwitz" (Die Auschwitzlüge).

Til hamingju Andri Snær. Þú ert greinilega kominn í góðan félagsskap!

Það er ekki nema von að fanatísk umhverfisvernd minni mig stundum á nasisma.

Íslenska þjóðin og þeir sem fagna verðlaunum Andra Snæs, ætlar einfeldnin aldrei að yfirgefa ykkur?

Sjá frekari upplýsingar hér

Gleðileg nasistajól

Það eru ekki allar bókakápur eins fallegar og vel fótósjoppaðar og kápa Viggu forseta. Bókaútgáfan Skrudda auglýsir stíft endurútgáfu bókarinnar Berlínarblús. Raðmyndaauglýsing fyrir þessa skruddu á visir.is. er bæðir ljót og nasísk. Í auglýsingunni er hægt að sjá son fyrrverandi forseta lýðveldisins í SS-úníform, hakakrossfána Þriðja ríkisins og þýska örninn. Maður gæti haldið að það væri komið stríð. Þetta er frekar ósmekkleg og æsingsleg auglýsing. Kannski er þetta talið nauðsynlegt til að selja vöruna? Maður verður að vona að hin háaríska söluherferð á bókinni Berlínarblús beri árangur. Ég bíð þó með að kaupa hana þangað til að ég veit að hún inniheldur eitthvað verulega nýtt.

Maður leyfir sér einnig að vona að þessi endurbætta útgáfa Ágústs Guðmundssonar á bókinni Berlínarblús, sem fyrst kom út árið 1996, innihaldi t.d. leyfi frá Rigsarkivet (Þjóðskalasafninu) í Danmörku fyrir birtingu skjala, sem Ágúst birti í algeru leyfisleysi árið 1996. T.d. skjöl um mann, íslenskan nasista í Danmörku, sem ekki var látinn, þegar skjöl um hann birtust í bókinni. Slíkt er brot á dönskum lögum og er víst hægt að dæma menn í fangelsi fyrri það. Flest þau skjöl sem Ágúst birti úr Rigsarkivet fékk hann aldrei  leyfi til að birta. Hann fékk leyfi til að rannsaka þau (aktadgang), en ekki til að birta þau. Það er tvennt ólíkt í dönskum skjalalögum.

Ýmislegt nýtt er komið út um Íslending í Noregi, sem er söguhetja í bók Ágústs. Maður þessi, Ólafur Pétursson, var valdur að dauða norðmanna og jafnvel fangelsun og fangabúðavist Íslendinga. Arnfinn Haga gaf árið 2007 út bókina Angiveren, sem fjallar um Ólaf, sem eftir "afrek" sín í Noregi, bjó á Íslandi og starfaði við endurskoðun. Væntanlega er það allt með í nýrri útgáfu Berlínarblúss. Bókin fjallar annars mest um Saklausa Sveitastráka, sem af ýmsum ástæðum urðu nasistar.

Mikið af villum var í fyrstu útgáfunni af Berlínarblús og hef ég hér á blogginu sýnt fram á nokkrar í tengslum við Jón Leifs og Halldór Laxness. En sá síðastnefndi var af einhverjum óskiljanlegum ástæðum með í bók Ágústs (þá líklega sem fórnarlamb) og Jón var nú ekki eiginlegur nasisti eins og maðurinn á forsíðu Bókarinnar. Ég skrifaði um það Berlínarboogie.

Þrátt fyrir galla er engin ástæða til að banna bókina, líkt og var í tísku í DDR og nú HÍ.  En sagnfræðingar verða þó að fylgja þeim reglum sem settar eru. Einnig í öðrum löndum. Þeim ber þó ekki að fylgja duttlungum einhverra prívatpersóna sem heimta lögbann.

Ekki er nóg með að bókaútgáfan Skrudda selji Berlínarblús með glóandi hakakrossi og undir ásjónu SS-liða. Útgáfan markaðssetur einnig skáldsögu Elíasar Snælands Jónssonar, Rúnagaldur, sem líka er mjög nasísk í allri hönnun.  

Heil jól lesendur góðir!

Veni Vidi Vici

Alltaf finnst eitthvað skemmtilegt í jörðinni. Í vor fannst forláta gullhringur vestan við Þingvallakirkju. Þetta kom í fréttum og í sumar var gripurinn kosinn gripur mánaðarins á vefsíðu Þjóðminjasafns Íslands. Þar, eins og í frétt Morgunblaðsins, var því haldið fram að þetta væri innsiglishringur og að á honum stæði F og I, og að þar væri jafnvel hægt að sjá kórónu og skjöld.

Ég var nýlega spurður um álit mitt á þessum grip. Ég var sammála því að hringurinn væri úr gulli og að steinninn væri blóðsteinn (heliotrop). Ég taldi af myndum að dæma, að gullkarat hans væri mjög lágt.

Ég er hins vegar ekki sammála sérfræðingi Seðlabankans um áletrun þá sem skorin er í stein hringsins. Sérfræðingurinn er oft fenginn til að tjá um sig um áletranir og myntir.

Í stein hringsins er skorið  A w og I sem ekki þýðir neitt annað en Alfa, Omega (með litlum staf) og Iesous, skrifað upp á grísku. Skammstöfun fyrir Jesús, Upphafið og Endinn.

Til að kóróna þetta, er það sem sérfræðingur Seðlabankans taldi vera kórónu, þrjú vöff. V V V, sem samkvæmt þessum fornleifafræðingi er skammstöfun fyrir Veni, Vidi, Vici. Þessi fleygu orð Cæsars hafa oft verið tengd Jesús, sem kom sá og sigraði.

 

Þjóðminjasafn Íslands sættir sig örugglega ekki við þessa túlkun, þar sem þar var ekki óskað eftir störfum mínum og skoðunum framvegis árið 1996. Það gildir væntanlega fyrir niðurstöður mínar og álit líka.

Innsiglishringur, er gripur mánaðarins í júlí 2009 kannski ekki, og ekki hringur Jesús. En næsta líklegt tel ég að hann sé frá 18. eða 19. öld. og gæti jafnvel verið frímúrara- eða regluhringur.

Leyfi ég mér að minna á önnur innsigli sem ég hef skrifað um. Sjá hér.

        w

Kona verður forseti

... en var það ástæðan fyrir því að Forlagið ákvað að "airbrusha" hana áttræða á kápumynd ævisögunnar.

Við höfum mismunandi álit á Viggu. Það batnar ekki né versnar úr þessu. Og ekki með mynd af konu sem greinilega neitar að verið sigruð af Elli kerlingu (og kannski er hún það ekki?). Kápumyndin gæti verið vísir að innihaldi bókarinnar, en vonandi er það ekki loftburstað og ofsniðið að aðstæðum.

Höfundur ævisögunnar Páll Valsson, fæddur 1960, fáeinum mánuðum yngri en ég og samferða í MH á sínum tíma, virðist eldri en söguhetjan (dæmið sjálf). Aldurinn og sagan fara misjafnlega með fólk.

Jesú haldið í gíslingu nærri Kringlunni

Borgarleikhúsið er enn með látalæti og trúðshátt. Nú í leikriti sem kallast Jesús litli.  Samkvæmt leikskrá fæddist Jesús litli í Palestínu. Ef svo er, er Jesús litli líklega týndur, því hann fæddist ekki í Palestínu.

Það fer ýmsum sögum af því hvar hann fæddist hann Jesús, en ekki var það í Palestínu. Heitið Palæstina var fyrst notað formlega yfir það land sem Jesús fæddist í á 2. öld eftir Krists burð. Þá varð Provincia Judea að Syria Palaestina, og var sú breyting bara einn liður í kúgun Rómverja á Gyðingum.

Hvernig þetta „slys" með Palestínudrenginn Jesús er komið inn í leikrit í Borgarleikhúsinu get ég nú vel gert mér í hugarlund. Menn hamast mikið í þessu nafni.

En það er stórfurðulegt að höfundar leikritsins hafi ekki getað notið aðstoðar íslenskar þjóðkirkjupresta til að fá haldgóðar upplýsingar um hvar Jesús litli fæddist. Samkvæmt leikskrá aðstoðuðu prestar, prelátar og prestslærlingar eins og Auður Eir, Bernharður Guðmundsson og Davíð Þór Jónsson, ásamt fleirum, höfundana og leikara Jesúsar Litla.

Er það opinber stefna Þjóðkirkjunnar á Íslandi, að Jesús hafi fæðst í Palestínu? Ef svo er, þá var Jesús væntanlega ekki til. Og gleðjast nú Vantrúarmenn. Já, ef hann fæddist í "Palestínu", er hann líklega bara hluti af hatursfullum áróðri, öfgum og hryðjum eins og nafnið Palestína er oft á okkar dögum. Nú urðu Vantrúarmenn óglaðir, því þeir eru líka mikið fyrir Palestínu, en auðvitað ekki i nafni Aðalsteins ósýnilega og Múhammaðs PR-meistara hans.

Ég vona að Jesús litli komist aftur heim til sín úr þeirri gíslingu sem Borgarleikhúsið hefur tekið hann í í Palestínu. Síðast þegar ég vissi, var Jesús litli með dekkra hár en á meðfylgjandi mynd, en hann er enn með slöngukrullur (ekki slöngubyssu). Þeir sem gætu gefið upplýsingar um ferðir hans, ættu að hafa samband við Þjóðkirkjuna hið fyrsta. Þar var mér tjáð í dag, að ekki væri hægt að gefa einhlýtt svar við því hvar Jesús hefði fæðst. En hugsanlegt má telja að einhverjir prestar hafi þetta á hreinu og geti hjálpað Jesú (Jesúsi, Jesum) litla heim til sín.

Hafið endilega ekki samband við lögregluna. Hún sendir alla útlendinga frá Miðausturlöndum úr landi með fyrstu flugvél.

Sandlistakonan Kseniya Simonova

Hún lýsir list sinni og sjálfri sér best sjálf, hún Simonova frá Úkraínu. „Yndisleg stúlka", sögðu strákarnir sem voru með henni á róló. Hún vann samkeppni hæfileikafólks í heimalandi sínu í águstmánuði síðastliðnum. Sumir Úkraínumenn eru alveg eitraðir.

Ég spyr í fáfræði minni: Eru til svona listrænar konur á Íslandi? Nógur er nú sandurinn. Ímyndið ykkur Á Sprengisandi með Kseniyu Simonovu.

Svona list er tilvalin fyrir fólk sem vill koma í veg fyrir að prófessorar í Háskóla Íslands banni verkin manns. Þegar bönnin koma frá Háskólagestapóinu hristir maður bara sandkassann og segir:  „Hvaða mynd, Helga?"

Hún er mögnuð í sandkassanum hún Kseniya. Hún blæs ekki ryki í augu okkar.

Tvennir tónleikar á árinu

Ég hef farið á tvenna tónleika í ár. Menningarlegri en það er ég nú ekki. Ég hlusta á YouTube, kaupi tónlist á iTunes og sit í mínum eigin tónleikasal á fremsta bekk við hliðina á forsetanum - með poppkorn.

Báðir tónleikarnir sem ég sótti voru frábærir. Fyrst segir af þeim síðari. Hann var í samkunduhúsi gyðinga í Kaupmannahöfn þann 25. október. Þar spilaði King of Kletzmer, klarínettumeistarinn Giora Feidman (f. 1936). 750 manns voru í samkunduhúsinu. Það var aldrei þessu vant troðfullt. Feidman, lék guðdómlega og hafði til liðs við sig tvo frábæra, þýska hljóðfæraleikara á kontrabassa og gítar og einn tyrkneskan trymbil, Murat Coskun, sem galdraði ótrúlegustu hljóð úr trommu sinni. Það var bæði heilagleiki og óbeisluð gleði á þessum tónleikum, sem stóð í yfir þrjá klukkutíma. Og í hléinu talaði Feidmann við alla og seldi geisladiska í fordyri samkunduhússins eins og götusali í Bessarabíu. Þetta var eftirminnilegt sunnudagskvöld.

 

Hinir tónleikarnir voru í aðalsýnagógunni í Reykjavík, Háskólabíói, þann 28. maí. Góður vinur bauð mér á Listahátíð. Frábær sæti á besta stað. Maður getur ekki sagt nei við því. Tvö flaggskip rússnesks tónlistalífs, hjónin Gennadíj Rosdestvenskíj (f. 1931) og Viktoría Postnikova (f. 1944) frömdu list sína. Mikla list, vel að merkja. Postnikova lék píanókonsert nr. 24 í C-moll eftir Mozart með kadensu eftir Brahms. Hún spilaði eins og flugmóðurskip rússneska flotans, sem siglir um höfin á góðum degi án þess að bifast í ölduróti. Hún hafði ekkert fyrir þessu og enn sú innlifun! .. það þyrfti 30 japanska píanóleikara, með grettur og krampa í öllum limum, til að fá sömu innlifun í konsert Mozarts. En Postnikova sat bara þarna og spilaði eins og í hún væri að syngja börnin sín í svefn, róleg og glæsileg. Grænleitur kjóll dívunnar var aðeins of þröngur og mikill hárhnúturinn á hnakkanum lyfti þungu andlitinu og augnlokum þessarar fjallmyndalegu konu.

Postnikova leikur Prokofjef undir stjórn Gennadíjs fyrir 39 árum í Moskvu

Kallinn hennar er saga út af fyrir sig, alveg eins útlítandi og pabbi hans, Nikolaj Anosov, sem var líka mikill stjórnandi í Sovétinu. Herðabreiðari mann en Gennadíj Rosdestvenskíj er vart hægt að finna. Hann skyggði nær á sinfóníuna, þótt hún væri í útvíkkaðri hátíðaútgáfu til að get leikið sinfóníu Sjostakovítsj nr. 7 í C dúr, Leníngrad sinfóníuna. Frábært, frábært og aftur frábært! Gennadíj var eins og sigursæll hersöfðingi í Rauða Hernum, sem sagði frá stríðinu með virðingu. Pákuleikari sinfóníunnar, Eggert Pálsson, var þarna í essinu sínu. Ég veit ekki hve mörgum fallbyssuskotum hann skaut út í salinn. Þau voru mörg. Salurinn var í rúst, en hlustendur voru í sjöunda himni, fórnarlömb hinnar stóru listar, sem er svo sjaldgæf á Íslandi. Flutningurinn var allt annar en hjá t.d. meistara Leonard Bernstein, sem Hollywoodaði Leningrad-sinfóníuna (heyr). Kapítalisminn eyðileggur margt.

Jónas Sen tjáði sig um tónleikana í einhverjum fjölmiðli fáeinum dögum síðar, þegar hann, og við hin dauðlegu fórnarlömb listanna, vorum nokkurn veginn búin að jafna okkur eftir sprengingar Eggerts, sem var skólabróðir minn og góður vinur í æsku. Jónas taldi öruggt að þetta hefði líklega verið besti konsert Sinfóníunnar frá upphafi. Ég get ekki sagt til um það, en ég er enn í bombusjokki.

Ég skrökva því reyndar, að ég hafi aðeins verið á tveimur tónleikum á árinu. Sonur minn, Ruben (7 ára), lék á morguntónleikum tónlistaskólans í heimabæ okkar í síðustu viku. Hann lék "Old McDonald had a Farm, í æ í æ ó" á harmónikku með mikilli innlifun. Algjör senuþjófur drengurinn.