Mosku hér og nú

 

Frétt hef ég að á Íslandi séu tæplega 400 múslímar, eða eru það 1000? Fyrr á árinu heyrði ég töluna 1500.  Ég held að ég hafi reyndar aldrei heyrt sömu töluna á múslímskum sálum í þau skipti sem þessi blessaði söfnuður múslíma á Íslandi var í fréttunum. Talnaglöggir geta þeir ekki verið, sem eru talsmenn Allah á Íslandi.

Ég hef einnig fylgst með viðbrögðum á bloggum nokkurra Íslendinga við kröfunni um gríðarstóra lóð fyrir mosku í Reykjavík. Þessir öðlingar ætla víst að æla svínaúrgangi ofan í grunn moskunnar eða eitthvað álíka. Það þykir mér nú einum of langt gengið. Er ekki kreppa og öll svínasúpa búin í landinu?

Um leið og ég syrgi það hvernig þeir fáu gyðingar sem búið hafa á Íslandi hafa falið sig í hornunum og auðmjúklega sætt sig við að á Íslandi væri ekki neitt almennilegt samkunduhús, já, og jafnvel gerst búddistar til að leita að guði,  fagna ég því að múslímar geti fengið mosku fyrir 12, 20, 400, nei 1000 meðlimi sína. Menn verða bara að passa sig að byggja ekki allt of stórt, því hitinn og rafmagn kostar og það borga ekki skattgreiðendur heldur Allah og þeir sem biðja til hans.

Jú, mosku hér og nú. Það styð ég!  Einhvers staðar verða öfgavinstrimennirnir líka að fara til að gera andlegar og líkamlegar æfingar eftir að þeir gátu ekki lengur beygt sig og bugtað í átt að Moskvu .... - borg.

En ef guðshúsið að tarna, verður notað sem boðunarstaður stríðs gegn annarri menningu og trú, eða þar sem hatur er lagt á þjóðir sem ekki beygja sig í átt að Mekka, tel ég enga ástæðu til þess að múslímar fái lóð. Þá geta þeir keypt hana og svo tekið afleiðingum íslenskra laga ef þeir vilja boða stríð og hatur gegn ákveðnum hópum. Það varðar við hegningarlög. Enga lóð ber að gefa fólki sem vill  fylgja öðrum lögum en þeim sem hið háa Alþingi í lýðræðisríkinu Íslandi hefur samþykkt.

Ef Imam Tamimi lofar, sver og sárt við leggur, að moska þessa afar misstóra hóps hans verði ekki vettvangur stríðsóps, vona ég að hann fái sem fyrst lóð sína og byggi mínarettu, bænaturn, sem er engu síðri en Hallgrímskirkja, kirkjan sem kennd er við guðsmanninn sem átti konu sem upplifaði bæði moskur og Barbaríið á eigin líkama. Ætli Gudda hefði viljað gefa grunn til Allah? Tjaah?

Þessi fallaga mynd, sem fylgir færslunni, er mér sagt að sé eimitt af Guðríði Símonardóttur þegar hún var upp á sitt besta í Barbaríinu. Njótið þangað til 1001 nætur eru liðnar og veruleikinn blasir við ykkur. Öllu gamni fylgir alvara.

Ensjallah!

Mótmælablogg hefur göngu sína

 

Mótmælabloggið Mótmælum Durban II hefur hafið göngu sína.

Ég er umsjónarmaður þessa mótmælabloggs og tilheyrandi undirskriftalista og mæli eindregið með því að allir kynni sér hvað andlýðræðisleg öfl ætla sér að aðhafast á Durban II ráðstefnunni í Genf á næsta ári. 

Íslenskir diplómatar, sem stefna á setu í hinu óstarfhæfa Öryggisráði SÞ, taka þegar þátt í vitleysunni. Mótmælið með því að senda nafn ykkar, titil og bæ/stað á [e-mail] . Nöfn ykkar, sem ekki viljið endurtaka mistökin frá Durban I ráðstefnunni árið 2001, verða birt á hinu nýja mótmælabloggi. Einnig er hægt að mótmæla við þessa færslu. Þeir sem skrifa undir með réttu nafni geta stofnað til bloggvinatengsla og teljast jafnframt mótmælendur. Mótmælin verða send Mannréttindaráði Sameinuðu Þjóðanna og Utanríkisráðuneytinu.

Þeir sem hugsanlega vildu leggja málstaðnum lið og vilja skrifa gagnrýnin innlegg gegn Durban II ráðstefnunni, geta sent mér línu.

Þið, sem ekki viljið sætta ykkur við þá þróun að ráðstefna um baráttu gegn fordómum og kynþáttahatri sé notuð til að fordæma þjóðir og minnihluta, látið rödd ykkar hljóma.

Skrifið undir íslensk mótmæli gegn Durban II ráðstefnunni og hvetjið íslensk stjórnvöld að hætta við þátttöku í skrípaleiknum í Genf.

Farið á Durban2.blog.is

Merkisræða

 

 

Á fimmtudaginn var flutti danski stjórnmálamaðurinn Naser Khader merka ræðu í Genf. Þótt ræðan væri ekki á góðri ensku, er hún að mínu mati meistarastykki. Lesið hana hér  eða hér .

Naser Khader, sem er múslími og Palestínumaður, aðvarar okkur í ræðu sinni við þeirri vá sem nú stjórnar nær öllu í daglegu lífi milljóna múslíma um allan heim. Aðvörun hans held ég að sé öllum holl lesning.

Naser er flokksleiðtogi danska þingflokksins Liberal Alliance, (sem áður hét Ny Alliance). Hann tók danska þingið með stormi árið 2007. En síðan flokkurinn komst í Folketinget, hafa illa gerðir gripir í flokknum flúið úr honum, þar sem í ljós kom að leiðtoginn átti erfitt með að vera leiðtogi og var oft meiri lýðræðissinni en þeir sem voru með í að stofna flokkinn.

Ég hef verið að velta því fyrir mér að skrá mig í flokkinn hans Nasers, þó ég sé ekki gjaldgengur til þingkosninga í Danmörku. Líklega verður ekkert úr því. Mér leiðast flokkar. Naser Khader segir hins vegar það sem fáir Danir þora að segja eða heyra. Það sem hann sagði í Genfarborg var sannleikurinn.

Það er oft erfitt að heyra hann.

Nýjasti skrælinginn á Grænlandi

 

Ahmed Akkari var vart stiginn út úr þotunni á Grænlandi, að hann var orðinn frægasti maður þar í landi. Hann er einfaldlega búinn að skjóta öllum fyllibyttunum á grænlenska þinginu ref fyrir moskusuxarass.

Akkari er kominn til Grænlands til að kenna við barnaskólann í Narsaq/Narsap á Grænlandi. Það er lítið byggðarlag á SV-Grænlandi, á þeim slóðum sem íslenskir landnemar bjuggu fyrrum og þeir kölluðu Eystribyggð. Ekki má rugla því saman við Austurlönd.

Ahmed Akkari er frægur af endemum og það þarf ekki að undra að ekki séu allir Grænlendingar jafn hrifnir af komu hans og bæjaryfirvöld i Narsap sem réðu hann til kennslu. Sjálfur segist hann bara vera kominn til að kenna dönsku og ensku, en það er fortíð mannsins sem fær marga til að sjá rautt á Grænlandi.

Akkari kom barnungur með fjölskyldu sinni til Danmerkur frá Líbanon árið 1985. Fjölskyldan var send heim aftur þegar þar var orðið rólegt eftir borgarastyrjöldina. En það var gott að vera í Danmörku og þau komu aftur og fengu að lokum að setjast að. Akkari var yfirlýstur Dani á þeim árum sem hann sótti um ríkisfang í Danmörku. Hann sagðist ekki kunna arabísku og gæti því ekki snúið til Líbanon. Þegar hann fékk ríkisfang var það fyrsta sem hann gerði að hoppa út úr gervi sínu, og gerðist  öfgamúslími sem var reiprennandi í Kóraninum. Hann neitaði að taka í hönd skólastjórans sem afhenti honum prófskírteinið í menntó - vegna þess að hún var kona.

Frægastur hefur Akkari orði fyrir aðild sína að Múhameðs-teikningamálinu. Líklega ber enginn maður eins mikla ábyrgð á því, hvernig fór í því máli. Drengur þessi reyndist ósannsögull í meira lagi og tókst að ljúga heim múslíma fullan og koma af stað vandamáli fyrir "land sitt", sem seint verður lagfært. Líklega var það hann sem fór með mynd frá svínahrínskeppni í Frakklandi til Múslímalanda og sagði myndina vera af dönskum spaugara sem var að gera grín af múslímapresti.

Ekki er það Múhameð frændi eða teikningar af honum eða trúarofstæki Akkaris, sem stundum hefur ranglega verið nefndur imam (múslímaprestur), sem virðist valda Grænlendingum mestum vanda. Í vefblaðinu Sermitsiak segja nokkuð margir lesendur skoðun sína á Akkari. Mér sýnist nú á skrifunum, að þeir sem helst eru mótfallnir komu Akkaris til Grænlands séu STÓR-Danir, sem sitja og láta sér leiðast á Grænlandi og geta nú hatast út í eitthvað annað en Grænlendingana. Margir telja líka til ofbeldismál sem Akkari var dæmdur fyrir þegar hann var í kennaranámi. Hann reif eyra 11 ára nemanda til blóðs og sparkaði í hann liggjandi. Hvað hafði hinn 11 ára drengur gert til að verðskulda þessa sturlun Akkaris? Í leik hafði drengurinn óvart rifið slæðu af höfði systur Akkaris, sem líka var nemi í skólanum. Slíkt er ófyrirgefanlegt og í ýmsum löndum Íslams er dauðarefsing við slíku.

 

Akkari kominn til Grænlands. Spilar hann líka í 5. deild þar?

 

Á síðustu árum hafa einhverjir múslímar ofsótt Grænlendinga (utangarðsfólk) sem býr í hverfinu Gellerup í vesturhluta Árósa. Ef menn leita af fréttum af þessu, sér maður að einhvers staðar í heiminum hefur frétt þessi skolast til og menn tala um að grænlenskir múslímar séu að flæma landa sína af öðrum trúarbrögðum úr hverfinu Gellerup.

Nú er að sjá hvernig grænlenski veturinn leggst í Akkari, hvort hann berji nokkurt aðra en sjálfan sig til hita, reki alla nágranna sína í burtu með leiðindum eða reisi ígloo-moskur í nágrenni Brattahlíðar. Í versta falli nota Grænlendingar piltinn sem akkeri.

Ég tel víst, að ég sé búinn að finna ferðaskrifstofuna sem gaf Akkari hugmyndina til að fara til Grænlands. Hún heitir Akbar Reisen (sjá myndina efst). Fróðir menn segja hins vegar, að Akkari sé kominn til Grænlands til þess eins að freista þess að fá líbanska konu sína og barn til Grænlands og þannig inn í Danmörku. En ströng lög í Danmörku gera það að verkum að Akkari getur ekki fengið konu sína til Danmörku. Ef það er ástæðan, styð ég Akkari. Þessi lög eru ómannúðleg.

Og vissuð þið að fyrstu Grænlendingarnir voru Rússar! Klikkið tvisvar á hið óborganlega grín um Boas & Co. sem má skoða á Sermitsiak.gl

 

 

Icelandic Plane, Danish Crash Pilot

 

Nyhedsavisen kom ekki í morgun. Íslenska tunnan brast og úr henni valt Morten Lund (sjá mynd).

Samúðaróskir mínar sendi ég starfsmönnum blaðsins sem missa vinnu sína og fjölmenna á kaffihúsum Kaupmannahafnar næstu dagana. 

Mestar áhyggjur hef ég af Pólverjunum, Litháunum og sígaununum sem báru út blaðið, eða hentu því út í runna þegar vel lá á þeim. Nú hafa þeir ekkert að gera. Betl mun aukast á götum Kaupmannahafnar. Smáinnbrotum væntanlega líka. Hvað á fólk annað að gera. Nyhedsavisen, sem stofnað var af Íslendingum, hefur ekki borgað fólkinu laun fyrir águstmánuð.

En stærsta innbrotið var nú líklegast útbrot íslenskra ævintýramanna, sem ætluðu að græða á blaðaútgáfu í samkeppni við stór dönsk dagblöð sem telja allt útlenskt vera hótun við sig. Íslendingarnir fengu ekki að kaupa Berlingske Tidende og svo fór sem fór.

Ævintýrafjárfestirinn og virtual hetjan Morten Lund er greininga vitlausari en ég hélt, nema að hann sé að leika sér með peninga annarra. Þegar hann tók við meirihlutanum á Nyhedsavisen, tapaði blaðið um 1 milljón DKK á dag.  Hann á nú "meirihlutann", ef hann er einhvers staðar að finna. Hann er þó enn vel tengdur Fróni, giftur íslenskri konu, Hlín Mogensdóttur. Lund hefur áður sett fyrirtæki á hausinn, t.d. Mediekompagniet. Var tengdur Crash Pilots og annarri ævintýramennsku, en græddi á því að setja peninga sína (og annarra) í Skype-bréf.

Nú hefur greinilega saxast á auðinn og Nyhedsavisen, sem átti að vera byrjunin á heimsveldi í fjölmiðlun, hefur verið lokað - er bankerot eins og Danir kalla þessa íþrótt, sem heitir að fara á hausinn á Íslandi.

Ekki nema von að Neo-klassíski "serial entrepreneurinn" Lund, sem líka er prófessor í Reykjavik samkvæmt Wikipedíu, sé spældur á myndinni, en börnin hans sem líka gretta sig á myndinni eru hálfíslensk og ekki er það ónýtt. Eins og Lund, sem ekki er sleipur í ensku, skrifar á vefsíðu sinni:"Kids makes Life good".Það á líka við börn sem ekki eiga foreldra, sem eru eins virtual og Morten Lund og Nyhedsavisen. Til að sjá hvernig málin stóðu hjá Nyhedsavisen fyrir rétt rúmum mánuði, lesið þetta. Hvað ætli Lund kenni í Reykjavík? Töfra og loftkastala?

Stoðir (sem hét reynda áður FL group), átti líka í Nyhedsavisen og verða nú að afskrifa heilmikið eins og pólsku blaðburðamennirnir sem Morten Lund hefur snuðað um laun. Stoðir eru víst orðnar af aumum rekavið, en eiga veð í öllum eignum Morten Lunds.  Morten hlýtur að þurfa að flytja í raðhús eða 2ja herbergja íbúð en Stoðarfólk á örugglega enn fyrir utanlandsferð.

Útgáfu Nyhedsavisen hætt

Afríka er staurblind

 

 

Ráðstefna SÞ í Durban í Suður-Afríku árið 2001 átti að taka á vandamálum eins og kynþáttahatri, kynþáttamismunun, útlendingahræðslu og skyldu óþoli sem enn hrjáir mannkynið. Til mikillar furðu þróaðist ráðstefnan, sem var NGO (Non Governmental Organization) samkoma á vegum SÞ í samkomu gyðingahatara og þeirra sem hata Ísrael og sem telja Ísraelsríki og tilvist þess ógnun við sig og heimsfriðinn. Öll samtök sem hata Ísrael voru mætt og í mikilli hópæsingu skemmtu menn hvorum öðrum í 6 daga á heilmiklum leikvangi í Durban. Skindauðir leiðtogar á borð við Arafat og Castro voru helstu skemmtikraftarnir. Heimur réttláta fólksins, vinstri manna, glóbalista og ævintýrafólks sameinaðist í sameiginlegu hatri sínu gegn menningu okkar á Vesturlöndum í dýrkun sinni á gildum sem eflir mannfyrirlitningu, þótt ætlunin sé væntanlega önnur.

Í síðustu viku var haldin í Abuja, höfuðborg Nígeríu, forráðstefna fyrir næstu stóru heimsráðstefnu SÞ um kynþáttavandamál, sem á að halda í Genf í apríl á næsta ári. Ingibjörg Sólargeisli verður nú örugglega að fara þangað ef ég þekki hana rétt. En áður en hún gerir það, ætti hún kannski að lesa bloggið mitt, eða fara í frumheimildina UN Watch, sem örugglega mun vakta hana vel þegar hún er komin í Öryggisráðið - ráðið sem er samstíga í því að vera ekki samstíga - um annað en að hata Ísrael.

Alveg eins og árið 2001, þegar hatarar neðan úr grasrótinni, hryðjuverkaleiðtogar, íslamistar og alls kyns rugludallar sneru heimsráðstefnu um kynþáttavandamál í hatursráðstefnu, var ráðstefnan í Ajuba sammála um að Ísrael væri heimsins stærsti vandi og versti óvinur mannkyns. Þeir sem sátu í Ajuba komu fyrst og fremst frá Afríkuríkjum og tilgangurinn með þessari undurbúningsráðstefnu hafði einmitt verið að leggja áherslu á málefni Afríku. En Afríka virðist aðeins sammála um eitt: Að gyðingar, Ísrael og Zíonisminn séu helsti vandi Afríku og heimsins.

Ekkert var t.d. rætt um þjóðarmorðin í Súdan, ekki svo mikið sem einu orði eytt á dráp á 200.000 manns í Darfúr, ekkert sagt um fjöldanauðganir. Ekki eitt einasta orð um 1 milljón manna sem eru á flótta undan þessu þjóðarmorði, sem stundað er í nafni Allah hins almáttuga.

Þegar Leon Saltiel fra UN Watch ætlaði að halda ræðu sína, var hann strax hindraður í að gera það af Súdan með liðveislu Alsírsmanna og Marokkana. Martin Uhomoibhi frá Nígeríu, sem var í forsæti ráðstefnunnar, bannaði þá Saltiel, sem er gyðingur, að nefna Súdan.

Í samþykkt ráðstefnunnar var hvergi minnst á árásir á flóttamenn og innflytjendur í Suður-Afríku. Árásir á útlenda borgara frá Zimbabwe og Mozambík eru daglegt brauð í Suður-Afríku hans Nelsons Mandela. Það var heldur hvergi minnst á morðin á u.b.b. 1000 flóttamönnum í Kenýa fyrr í ár. Það ætti að leiða hugann ykkar að honum Ramsesi. Ekki má víst tala mikið um hans vanda í Nígeríu.

Lokaorð ráðstefnunnar í Abuja var hvatning til þjóða til að taka ekki málfrelsið of alvarlega. Einnig reyndu Múslímaþjóðirnar að koma því í gegn að bann við guðlasti verði sett í alþjóðlög um mannréttindi. Samkvæmt því eiga alþjóðlegir mannréttindasáttmálar að vernda trúarbrögð í stað einstaklinga. Þegar trúarbrögð og hugsjónir eru tekin fram yfir einstaklinginn, leikur gamli góði fasisminn lausum hala.

Samþykktin frá ráðstefnunni í Abuja ræðst mikið á málfrelsi og á 19. grein Mannréttindasáttmála SÞ. Einnig er lögð mikil áhersla á Íslamófóbíu (Íslamhaturi) og stungið er upp á að trúarbrögðum verði gert mishátt undir höfði miðað við hve mikilvæg þau eru - en greinilegt er að samþykktin álítur að Íslam sé æðst og merkilegust trúarbragða. Auðvitað eru flestir drepnir í nafni þessara trúarbragða um þessar mundir. Fasisminn er ekki einkaréttur hægriöfgamanna. Vinstrimenn og íslamístar eru oft fyritaks fasistar.

Samkvæmt ráðstefnunni í Abuja í Afríku er augljóst að aumingja Palestínuþjóðin er allra þjóða mest ofsótt og svo mikið, að ekki var hægt að ræða um ofsóttar þjóðir í heimsálfunni Afríku, sem átti að fjalla um. Ráðstefnugestirnir voru svo sem heldur ekki að hafa fyrir því að líta út um gluggan og skoða fátælingana í Abuja eða ræða morðin sem múslímar fremja þar á götum úti á kristnum mönnum.

Afríka er blind, og ég tel mig vita hver hefur stungið úr henni augun í þetta sinn. Það eru vinstri sinnaðir vitleysingar á Vesturlöndum sem dansa stríðsdans með sínum nýju vopnabræðrum úr herbúðum öfga-Íslam, sem hægt og bítandi eru að verða versta plágan í Afríku. Það er létt að níðast á Afríku. Afríka er staurblind, en blindir menn búa víðar.

Nú verður réttláta fólkið á Íslandi væntanlega að fara að undirbúa sig, svo þeir geti tekið þátt í hópæsingunni í Genf, þar sem sjónskertir míní-messíasar geta sameinast í að lýsa áhyggjum sínum á högum Palestínuþjóðarinnar og öllu sem miður fer í heimi hér vegna þess að Ísrael er ríki gyðinga.

Hatrið blindar menn.

Hver vinnur ?

 

 

Íslenska landsliðið í handbolta keppir nú til úrslita þegar þetta er ritað. Það er annað hvort silfur eða gull í Beijing 2008, þótt að silfur sé nú líklegast. Landsliðað á hvortveggja skilið og fá það sem þeir verðskulda, "strákarnir okkar", alveg sama þótt að þeir verði burstaðir.

Hins vegar fá þeir sem sitja í fangabúðum í Kína hvorki silfur né gull. Hús 79 ára konu var rifið niður án skaðabóta svo íþróttahátíð mannsandans gæti farið fram í Beijing. Hún var sett í endurhæfingarbúðir vegna þess að hún ritaði nafn sitt á lista, þar sem hún óskaði eftir því að taka þátt í mótmálum. Gamla konan kemst ekki á verðlaunapall eins og strákarnir okkar.

Engir eðalmálmar og medalíur verða gefnir þeim sem mótmæla mannréttindabrotum í Kína. Engin silfurverðlaun fyrir það sem sitja í stofufangelsum eða þá sem ekki mega fara á Veraldavefinn. Engin verðlaun fyrir þá sem langar að hugsa frjálst í Kína. Það verður væntanlega heldur ekki silfur eða gull í kúlunum sem Kínverjar verða skotnir með í hnakkann um næstu helgi, þegar ógnarstjórnin í Beijing byrjar stórhreingerningar sínar eftir Ólympíuleikana.

Gull eða silfur til Íslands? Alveg sama, segir forseti Íslands, það verður þjóðhátíð um næstu helgi. Blóðrauðar veigar verða drukknar með grillkjötinu. Partý, partý.

En það verður engin þjóðhátíð í Tíbet eða veisla í kínverskum fangabúðunum um næstu helgi. Eru öll tárin sem felld hafa verið fyrir Tíbet á Íslandi til einskis? Brunnu kertin út um leið og samkenndin með hinum þjáða lýð í Kína?  Fá gulldraumar og silfuræði Íslendinga til að gleyma?  

Gull- eða silfurdrengirnir fá verðlaun sem eru blóði drifin. Mannrétttindabrot fengu stærstu gullpeninginn í Beijing. Silfur er svo sem ágætt. Heimsmarkaðsverð á gulli hefur líka lækkað svo mikið upp á síðkastið og mannréttindi eru víst einskis virði lengur.  15:10 það lítur illa út í hálfleik. Ætli sér kominn hálfleikur í Kína öfganna.

Til hamingju.

Margumtalaðar dagbækur

 

 

Hin mikla umræða um dagbækur Matthíasar varð til þess að ég settist niður og las nokkrar síður.

Ekki get ég fallist á að þetta séu góðar heimildir um sögu Íslands á seinni tímum eins og sumir menn telja. Þetta er fyrst og fremst túlkun Matthíasar á atburðum líðandi stundar, sem snúa að honum og nánasta hópi einhverra karlpunga sem hann hefur umgengist. Svo er þetta heimild um innræti og persónugerðs pólitísks skálds í dvergríki. Kannski líka góð heimild um að æðstu yfirmenn okkar hafi ekki alltaf verið neinir þokkapiltar, og að þeir hafi oft lagst mjög lágt þegar þeir voru til dæmis að velta fyrir sér sjúkrareikningum fyrrverandi forsetafrúar. En sýnir það ekki líka að þeir eru mannlegir eins og skáldin og við hin hinir dauðlegu borgarar og þorparar?

Guðmundur Magnússon  telur að Matthías ætti að hafa beðið menn að lesa sumt af þessu yfir, áður en það var birt. Yfirlestur á gögnum frægra manna, áður en þau er sett á skjalasöfn eða opinberuð, eru stundum nauðsynleg fjölskyldunnar vegna, en einnig vegna þeirra skítverka sem þeir kynnu að hafa framkvæmt og sem fjölskyldan og stjórnmálaflokkurinn vilja ekki að séu á vitorði allra. Ætli slík "ritskoðun" hafi nokkru sinn átt sér stað á Íslandi? Í ekta lýðræðisþjóðfélagi ætti það auðvitað ekki að vera nauðsynlegt.

Nú var Matthías bara ritstjóri, svo hann hefur svo sem fullan rétt á því að setja sjálfan sig á útopnuna með þessum hætti í ellinni. Mín heimildagagnrýni segir mér hins vegar, að dagbókabrot Matthíasar hafi verið vel lesin yfir, og stundum læðist að mér sá grunur, án þess að ég geti sannað eitt eða neitt að skáldskapargáfa Matthíasar hafi stundum borið hann ofurliði þegar hann sat og skrifaði dagbókina. En þetta er bara getgáta. Þegar ekki verið að velta sér upp úr stjórnmálum er oft gaman að lesa dagbókina t.d. kaflann sem ber yfirskriftina Í lok Október - Eftirmáli (1998).

Ég hef sjálfur unnið við útgáfu dagbóka, flóttamanna og diplómata. Ég verð að segja, að þörf manna á birtingu dagbókabrota í lifanda lífi, geti bent til þess að ekki sé allt með felldu. En ekki segi ég að svo sé í tilfelli Matthíasar, enda er Matthías heiðvirður maður og ég þekki hann ekki af neinu misjöfnu. Þekki hann reyndar bara ekki neitt og ætti kannski ekki að vera að blanda mér í hans útgáfumál. Annar rithöfundur, Guðbergur Bergsson, hefur þetta að segja um menn sem opinbera sig á bloggum og væntanlega líka í dagbókum á Netinu: Blogg er viss tegund af blaðri, viss belgingur, sjálfshyggja á afar lágum nótum. Það er útbreiðsla eldhússins sem ríður hvarvetna húsum í skvaldurmenningu samtímans, kerlingaskvaldur í skólagengnum búningi "földu svuntunnar".

Mikið væri gaman að sjá origínalinn af þessum strjálu og oft á tíðum gloppóttu dagbókafærslum hans Matthíasar Johannessens. Voru þetta dagbækur eins og þessi að ofan, stílabækur, minnisbækur frá Shell, eða laus blöð á borðinu sem heftuð voru saman við tækifæri? Bíð ég svo eftir því að fá svör við því unz Matthías er búinn að setja þær á pdf skrár í náinni framtíð, svo þjóðin geti líka skoðað rithandasýni hans í allri skvaldurmenningunni.

Ólympíuleikana til Íslands 2020

 

 

Ég hef einu sinni rassberað forsetafrúna og vona að hún fyrirgefi mér það. En nú ætla ég að flengja hana vegna þess að ég er enn ekki búinn að fá fálkaorðu og vegna þess að ég er óforskammaður dóni.

The first lady of Iceland studdi nefnilega drauma einræðisríkisins Katars (Qatar) sem langaði að halda Ólympíuleikana árið 2016. Land, sem ekki viðurkennir tilvist annarra ríkja, getur auðvitað ekki haldið Ólympíuleikana, nema að það sé eins stórt og Kína.

En Dorrit var ekki í vafa. Hún vildi til Katar árið 2016. Nú hefur Katar hins vegar verið fært frá og bardaginn stendur héðan í frá á milli Chicago, Tokyo, Rio og Madrid. Megi besta og ríkasta borgin vinna, og íbúar hennar borga meira í skatta 20-30 ár á eftir.

Þessum stuðningi sínum við Katar lýsti Dorrit rækilega í Huffington Post, sem er vefrit sem rekið er af merkilegri konu, Aríönu Huffington (fæddri Stassiopoulos) sem líkist Dorrit mjög á yfirborðinu. 

Dorrit skrifaði m.a. I was born into one of the oldest Jewish families in Jerusalemand have been fortunate to have had many Arab and Israeli leaders among my closest personal friends in recent decades. In my capacity as the First Lady of Iceland, I have come to know Qatar even better and been privileged to enjoy cooperation and dialogue with the Royal Family and the educated and visionary leadership of the country.

Það eru ýmsar villur í þessari málsgrein. Ég þekki nú margar gyðingaættir í Jerúsalem, sem hafa alið þar manninn lengur en Mosaef fjölskyldan. Þær voru komnar aftur til Jerúsalem löngu fyrir þann tíma að Moussaieffarnir voru að vefa ábreiður og klæði fyrir þjóðarmorðingjann Djengis Khan einhvers staðar í Uzbekistan á 12. öld, þegar trúbræður þeirra sættu ofsóknum annars staðar. 

Dorrit skrifar nú ágætlega miðað við að hún er lesblind. Kannski les Ólafur þetta yfir fyrir hana?

En af hverju mælir Dorrit einfaldlega ekki með Ólympíuleikum á Íslandi? Á hún kannski fleiri vini í arabaheiminum en á Fróni?

Danski veruleikaflóttinn og PET detectives

 

 

PET eða Politiets Efterretningstjeneste, leynilöggan í Danmörku, sem varð til á rústum lögregluyfirvalds sem á stríðsárunum gekk of erinda nasista og sendi t.d. gyðinga og aðra flóttamenn í greipar þýsku morðmaskínunnar, er nú aftur farin að senda mikilvæg skilaboð til danskra stjórnvalda til að þjónkast einhverju öðru yfirvaldi. Samkvæmt PET ættu yfirvöld að vanda málfar sitt. Þetta er ekki spurning um að kunna danska mál-, og setningafræði. PET vill að yfirvöld noti ekki ákveðin orð.

Hvaða orð skyldu það nú vera? Jú, danskir spæjarar vilja ekki að yfirvöld noti orð eins og "jihad", "íslamismi", "öfgamenn (fundmentailster)" eða "Mujahedin". Ekki má heldur tala um "ilsamíska hryðjuverkamenn" eða "heilaga stíðsmenn" (hellige krigere/holy warriors) en mælt er með því að aðeins sé talað um "hryðjuverkamenn".  Salafaismi og Wahabismi eru líka orð sem dönskum yfirvöldum er sagt að varast.

Ætli megi segja "Búh"?

Þetta eru nú ráð sem Anja Dalgaard-Nielsen (f. 1972)  yfirmaður deildar hjá PET sem sér um fyrirbyggjandi aðgerðir gegn hryðjuverkum mælir með. Þessi málhreinsun og sniðganga orða á að varna því að múslímskir borgarar í Danmörku finnist þeir liggja undir grun! Svo telur Anja, sem upphaflega var sérfræðingur í málefnum Þýskalands eftir 1992, áður en hún hellti sér út í hryðjur, að maður gefi öfgamönnum vind undir vængi með því að nota orðanotkun þeirra sjálfra. Allan þennan fróðleik mé lesa í 8 bls. skýrslu sem heitir: "Sprogbrug og Terrorbekæmpelse".  Ekki sérstaklega gáfulegt, eins og flest sem frá þessari ljósku hefur komið. Að mínu mati hefur hún stundum troðið upp í sjónvarpi og talað um hluti sem hún veit ekkert meira um en þeir sem fara á internetið í hálftíma og slá upp einhverju sem rætt er um.

Hinn frábæri fræðimaður Mehdi Mozzafari, Írani á flótta, sem stjórnar Center for Forskning i Islamisme og Radikaliceringsprocesser við Árósarháskóla segir þetta um skýrsluna: "Það er hætta á því að maður loki augunum fyrir veruleikanum, ef maður getur ekki kallað Osama bin Laden íslamistískan hryðjuverkamann. Það stenst ekki. Íslamisminn þróaðist jú út úr Íslam".

Ráðherrar dönsku ríkisstjórnarinnar neita að svara spurningum um skýrsluna. Danski þjóðarflokkurinn (Dansk Folkeparti), hefur mælt með því að skýrslan verði dregin til baka og bloggarar og leiðaraskrifarar nokkurra blaða kalla þetta tilburði hugsunarlögreglu. Radikale Venstre, flokkur sem einna mest stundaði samstarf við nasista fyrir 60 árum, telur hins vegar að þetta sé hið besta mál.

Eru Danir nú allt í einu orðnir hræddir við að kalla "en spade for en spade". Lesið skýrslu PET hér . Ef þið hlægið ykkur máttlaus við lestur hennar eins og ég gerði, látið mig vita. Ef þið eruð sammála henni, þá stingið bara höfðinu í sandinn og bíðið eftir fyllingu tímans.