Langt fjarri veruleikanum

 

Meðan svörtustu íslamistar leita aftur til miðalda, vilja Abu Dhabi menn fá allt það besta frá vestrænni menningu. Hvernig má þetta vera? 

Auði jarðarinnar er misskipt. Þar sem allt er á floti í olíu og þar sem menn eru ríkastir allra jarðarbúa, velja þeir auðvitað allt það sem hugann girnist úr vestrænni menningu, meðal annars baráttuna gegn hryðjuverkum. Þetta val er staðreynd, meðan fátækir og hrjáðir hjarðmenn Allah kenna vestrænni menningu um eymd sína og vilja brjóta okkur niður og myrða gyðingana og sprengja Ameríkanana.

Það fyndna er, að um leið og ríkustu arabaríkin sjúga til sín allt það "besta", dýrasta og hégómlegasta úr vestrænni menningu, styðja þeir samtímis við eymdarvælið og hatrið gegn vestrænum ríkjum. Eigendur Abu Dhabis styðja líka trúarofstæki fátækari trúbræðra sinna.

Nú kynnir Emírinn á Bessastöðum, að hann hafi milligöngu um að nokkrum íslenskum námsmönnum sé boðið í eyðimerkurvinina til að menntast á kostnað auðlegðar olíufurstanna og til að vera með í útópíuverkefninu við að reisa Masdarborg, sem ekki á að menga menga eins og aðrar borgir, ef allt gengur eftir.

Það er náttúrulega viðeigandi að útópisti eins og Ólafur Ragnar sé agent fyrir fasískt útópíuverkefni eins og Masdarborg í Abu Dabbi. En Ólafur Ragnar láðist að segja kandídötum sem vilja til Abu Dhabi , að Abu Dhabi er ein verst þrælakista hins siðmenntaða heims, þar sem réttur bláfátækra farandverkamanna er fótum troðið. Bak við mengunarlausa borg er mengaður hugsunarháttur.

Um leið og íslenskir stúdentar eiga að menntast í boði Abu Dhabi, „án þess að menga", taka þeir þátt í mengun mannkyns og þrælahaldi.

Skammastu þín Ólafur Ragnar Grímsson.

Hér er frétt um þrælahaldið í Dubai. Eins og allir vita nú, vill kona Ólafs að Ísland verði mini-Dubai. Hverjir eiga að verða þrælarnir í því ævintýri?

Sex til tíu námsstyrkir í Abu Dhabi í boði

Alsælar fyllibyttur

 

Brátt er von á hans hátign Tom Hanks til landsins til að leika afar ómerkilegt blaðamannahró, útvarpsblók og a fucking idiot frá New York, Eric "Vino" Weiner að nafni. Eric þessi hefur komist af þeirri merku niðurstöðu að Íslendingar séu alsælar fyllibyttur. Hefur hann skrifað um þetta og annað í bók. Fyrir bragðið er hann að verða gúrú fyrir fólk sem er fátækt og vill vera ánægt. Allir vilja lesa hvernig Íslendingar liggja í ræsinu um helgar til að vera happy í amstrinu. 

Ég hef lengi verið fátækur og hamingjusamur, en ekki þarf ég að æla niður Bankastræti og eftir Lækjargötunni til að halda gleði minni. En það virðast Íslendingar víst almennt gera, ef trúa skal Eric Weiner. Er þetta satt?

Hér getið þið líka séð fréttasnápinn á Colbert Nation.

 þessi mynd náðist af Eric Weiner við vettvangsrannsóknir í Reykjavík sl. haust

Eric þessi hefur greinilega þrætt bari og búllur Reykjavíkur, þar sem hann hefur hitt fyrir fólk á sama andlega stigi og hann sjálfur, sem keppst hefur við að segja honum frá því hve kátir Íslendingar eru, bara ef þeir fái að drekka sig dauða um helgar.

Þessi Weiner er víst einn versti andskoti sem hefur rekið á fjörur Íslands síðan þýski óþverrinn Didthmar Blefken sagðist hafa komið til Íslands og skrifaði um það mikla lygasögu.

Gaman væri að heyra frá einhverjum af þeim helgardrykkjumönnum, sem logið hafa Eric Vino Wiener fullan á knæpunum, þ.e.a.s. ef menn muna eitthvað eftir því sem þeir rugluðu um í ölæði sínu og vímu helgarinnar.

Það var ekki á allan andskotann bætandi, að fá þennan karakter á eftir okkur.  Margt vont kemur frá BNA, en sumt er einfaldlega djöfuls afleitt.

Þessu verður að svara. Nú ættu menn að geta selt gleðispíra til Bandaríkjanna. Ekki veitir þeim af slíkum drykk undir leiðindapúkanum Obama. Getur svo ekki einhver haft samband við útrýmingardeild Mafíunnar í New York?

Eyður Eiðs

 

Nýlega leyfði ég mér, eins og aðrir afglapar sem leyfa sér að hafa skoðun, að hafa skoðun á því að norskur sendiherra gæfi skýrslur um ræður forseta Íslands, sem umsvifalaust léku út í fjölmiðla á Norðurlöndunum.

Nú, nokkrum mánuðum síðar, kemur svo Eiður Guðnason, sem ég var alveg búinn að steingleyma, fram á sjónarsviðið eins og skrattinn úr sauðaleggnum og segist vita allt um málið.

Það sem hann skrifar í Morgunblaðið er þó ekki mergjað né merkilegt.

„Sá sem þetta skrifar hefur ekki lesið frásögn norska sendiherrans, sem kveikti þessa umræðu í fjölmiðlum. Hann hefur hinsvegar lesið frásögn annars sendiherra af þessum hádegisverðarfundi. Sú frásögn staðfestir, að norski sendiherrann og norska dagblaðið Klassekampen fóru rétt með um það, sem fram fór á þessum fundi".

Þetta er nú kjarni þess sem Eiður Guðnason fyrrv. fréttamaður og sendiherra hefur til málanna að leggja, þegar hann ásakar forseta Íslands um að fara með ósannindi.

Eiður Guðnason er greinilega ekki sagnfræðingur, svo mikið er ljóst. Sagnfræðingur myndi spyrja hvernig Eiður veit að það sem hann hefur lesið í skýrslu ónafngreinds sendiherra hafi ekki byggt á, eða verið undir áhrifum frá því, sem norski sendiherrann eða samstarfsmenn hennar hafi lekið í fjölmiðla.

Eiður Guðnason verður að gefa upp heimildamann sinn og dagsetningu skýrslu hans, ef hann vill vera tekinn trúarlegur.

Nóg er nú samt um vantrú þjóðarinnar á forseta vorum, sem gasprar og blaðrar út um víða völlu. Hann ætti barasta að byrja að blogga.

Véfréttamenn eru líka margir á Íslandi, en Eiður Guðnason verður að leysa frá skjóðunni, nema að hann vilji vera kallaður blaðurskjóða.

Þú átt leik, Eiður. Fylltu í eyðurnar. Engar hálfkveðnar vísur!

El Dictador

 

Það er furðulegt að sjá fólk á Íslandi, t.d. úr röðum vinstri grænna, lofsyngja þennan frumstæða einræðisherra. Við höfum séð ýmis dæmi þess.

Þingframbjóðandi VG, Hlynur Hallsson, skrifaði árið 2007 blogg sem hann kallaði Hugo Chaves er lang flottastur.   Ég skrifaði athugasemd við færslu Hlyns um óvild Chavez í garð gyðinga í Venesúela  og samvinnu hans við Muhameð Amajinidad í Íran, sem vill útrýma Ísrael. Hlynur fjarlægði athugasemd mína fljótlega. Líkt og Hugo Chavez fjarlægir gagnrýnendur sína. Þeir eru keyrðir út á flugvöll og sendir burt með fyrstu flugvél, ef þeir eru ekki einfaldlega drepnir.

Nýlega skrifaði ég um ofósknir gegn gyðingum í Venesúela, landi sem hýst hefur stríðsglæpamenn frá Eistlandi, líkt og Ísland. Það kallaði líka á ankannaleg viðbrögð Íslendinga á vinstri vængnum, sem virðast aðhyllast einræði.  

Áður hafði ég skrifað um ráðstefnu í Kaíró, þar sem íslenskir stuðningsmenn haturs gegn Ísrael og BNA voru mættir og lofsungu m.a. Hugo Chavez. Þetta er sama fólkið, sem hefur staðið og öskra fyrir framan Alþingishúsið í nokkurn tíma. Vill það fólk einræði?

Ég er hræddur um að ef Íslandi verður stýrt af fólki úr flokki sem lætur heillast af þóttafullum einræðisherrum, þá sé það sem Íslendingar fái, ef þeir kjósa VG og Samfylkinguna.  

Því má við bæta, að hrifning manna á Chavez er ekki aðeins bundinn við VG. Össur Skarphéðinsson hefur lýst Hugo sem litríkum karakter. Kannski gæti Össur hugsað sér að sitja á valdastóli þar sem eftir er, eins og Húgó? 

Hugo Chavez lét breyta sólarganginum hér um árið. Hann seinkaði  klukkunni um hálftíma. Með því sagðist hann veita þegnum sínum réttlátari dreifingu sólargeislanna á ríka og fátæka. Hector Navarro, vísindaráðherra Venesúela, sagði fréttastofu Reuters að fátæk börn sem þurfa að fara á fætur fyrir sólarupprás til þess að reyna að afla einhverra tekna. Með því að seinka klukkunni um hálftíma vildi Hugo veita fátækum börnum tíma til að njóta geisla morgunsólarinnar. 

Nú bíð ég eftir seinkun klukkunnar á Íslandi. Hálftími er þó ekki nógur tími fyrir börn íslensku byltingarinnar.

Chávez getur verið forseti áfram

Slagur, slagur, slagur

 

Hvernig hefur Ingibjörg Sólrún axlað ábyrgð á bankahruninu?  Að hennar eigin sögn með því að slíta stjórnarsambandinu við Sjálfstæðisflokkinn. Það lét hún hafa eftir sér í gær.

Þetta er sú lágkúrulegasta skýring sem ég hef séð í íslenskum stjórnmálum og líkast til hefur Jón Baldvin Hannibalsson á réttu að standa um Ingibjörgu Sólrúnu.  Hrunið átti sér stað á hennar vakt. Ég man ekki betur en að Jón hafi aðvarað um hrun árið 2007. Samfylkingarskussar sem vilja varpa ábyrgðinni á Viðeyjarstjórn Davíðs Oddssonar og Jóns Baldvins Hannibalssonar (anno 1991-1995, á síðustu öld!) eiga við trúverðugleika- vandamál að stríða.

Eyðsla Ingibjargar í Öryggisráðsdæmið er líka haldbær rök fyrir veruleikafyrringu þessarar manneskju, sem ætti nú að setjast í helgan stein (ég sagði ekki orð um sendiherrastöðu).

Jóhanna segist ekki á höttunum á eftir formannsstöðu í Samfylkingunni. Það ættum við nú að taka rétt mátulega.

Ætli Jón Baldvin fái ekki bréf, þar sem hann verður beðinn um að hætta? Hætta að segja sannleikann?

Samfylkingin er greinilega allt of upptekin í innbyrðis valdabaráttu til að geta sinnt lausn brýnustu mála á Íslandi. Menn eru í staðinn í hörkuslag. Ágætt, því vinstri stjórn getur ekki leyst þau vandamál sem íslenska þjóðin á við að stríða.

A cooler version of Dubai

 

Dorrit Moussaieff greindi frá því nýlega, að hún sæi Ísland fyrir sér eins og einhvers konar Dubai norðursins. Auðvitað geri ég ráð fyrir því að Ólafur forseti hafi fylgt draumsýn Bessastaðavölvunnar, sem kuflklæddur emír með velmegunarvömb. Olían hefur þá verið vestfirskt þorskalýsi, nema að feiti andinn úr lampanum, el Os Sur, hafi fundið olíu austur af landinu.

Því miður Dorrit. Dubai er líka orðið dúbíus fyrirmynd. Allt er þar komið á kaldan klaka. Útlendingar sem störfuðu þar flýja nú undvörpum. New York Times greinir frá því að um 3000 yfirgefnar bifreiðar séu nú við flugvöllinn í Dubai. Þær tilheyrðu eitt sinn fólki sem vann í Dubai, en sem missti vinnuna vegna samdráttar. Verð á húsnæði hefur snarlækkað.  Frú Dorrit hefur líklega ekki dreymt hvernig þrælar Dubai norðursins myndu hafa það. Samkvæmt Human Rights Watch eru híbýli verkamanna í Dubai "less than human".

Það er ekkert lokkandi við Dubai lengur, ef þetta heldur svona áfram, þá verður Ísland brátt orðin fyrirmynd Dubai. Emírinn fer þá að tala um A warmer version of Iceland, og er það nokkuð nærri helvíti, held ég. Kona emírsins (myndin að ofan) tjáir sig ekki um drauma sína, né fjármál. Til þess að koma í veg fyrir það notar hún hentugan höfuðbúnað sem lengi hefur verið notaður í Dubai. Hann kemur í veg fyrir of ævintýralega drauma kvenna og sér til þess að hún heldur rækilega kjafti.

Garden Party Pooper

 

Nýlega lýsti hljómsveitarstjóri gleðihljómsveitarinnar Mezzaforte því yfir að hljómsveitin léki ekki í Ísrael.

Í íslenskum fréttum hljómaði þetta svo:

Eyþór Gunnarsson hljómborðsleikari sveitarinnar segir aldrei neitt annað hafa komið til greina en að afþakka boðið vegna hernaðaraðgerða Ísraela undanfarið. Hann segir Mezzofortemenn þó vera nokkuð bjartsýna á árið 2009 en sveitin hefur spilað á 20-50 tónleikum á ári undanfarið.

„Við erum með umboðsskrifstofu í Þýskalandi og þetta boð kom í gegnum hana. Við spurðum nú ekkert nánar út í hvað þetta væri þar sem það kom aldrei til greina að þiggja boðið," segir Eyþór. Sjá hér

Ég hafði samband við Catherine Mayer umboðskonu hljómsveitarinnar í dag. Hún vissi ekki um þessa afstöðu hljómsveitarinnar og vissi ekki til þess að þeim hefði boðist tilboð frá Ísrael. Hún kom algjörlega af fjöllum. "I was not aware of this, var svar hennar við spurningu minni um hvort tilboð hefði komið til Mezzoforte um tónleikahald í Ísrael.

Ég hafði einnig samband við tvær helstu jazzhátíðir í Ísrael, eina í Tel Aviv, sem haldin verður nú í lok febrúar og aðra sem haldin verður í Eilat í ágúst. Þar á bæjum könnuðust menn ekki við að hafa boðið eða falast eftir Mezzoforte. Þeir könnuðust þó vel við hljómsveitina og vonuðust eftir því að hún léti ekki stjórnast af stjórnmálum í framtíðinni. „Hver veit, hljómsveitinni yrði kannski einhvern tíma boðið til Ísrael", sagði talsmaður hátíðarinnar í Eilat.

En hvaðan gæti Mezzoforte annars hafa fengið tilboð frá Ísrael?

Eyþór Gunnarsson getur kannski upplýst hvaða aðilar í Ísrael vildu fá Mezzoforte til að leika í Ísrael, fyrst yfirmaður umboðsfyrirtækis hljómsveitarinnar veit það ekki? En eins og Eyþór G. sagði, Við spurðum nú ekkert nánar út í hvað þetta væri.

Hekluþankar

Er nokkur gata á Íslandi sem kennd er við Heklu? Ekki man ég eftir neinni slíkri í Reykjavík og ég þekki ekki svo vel til á landsbyggðinni.

Ein stórborga Evrópu getur hins vegar státað af því að hafa hana Heklu okkar í tveimur götunöfnum. Það er borgin Amsterdam, þar sem margt forfeðra minna ól manninn.

Göturnar Hekelveld og Hekla bera báðar nafn okkar fræga eldfjalls, en á miðöldum trúðu menn því að fjallið væri gátt helvítis.

Flestir íbúa Amsterdam hafa þó ekki hugmynd um hvað nafn götunnar Hekelveld þýðir. Staðanafnafræðingar telja að liðurinn hekel í þessu götunafni í Amsterdam sé orðið á hollensku fyrir lín, og skilja því nafnið sem línakur. Hekel getur þó líka þýtt hatur og óvild og einnig hatari (skylt orðinu ækel á dönsku og heck á ensku).  Þeir þekkja væntanlega ekki nafn Heklu eins og það var skrifað í 17. aldar ritum sem gefin voru út í Hollandi: Heckelfeldt. Þegar á 16. öld var farið að skrifa nafn fjallsins á ónákvæmum, prentuðum kortum Heclafiel eða Helafiel og fjörður einn kallaður Hekelfort var settur á sum 16. aldar kort.

Vandamálið er hins vegar, að Hekelveld í Amsterdam var áður díki, og áður en hús voru reist út í dýjamóa á trjábolum, var þarna vatn og örugglega lítið um línakra. Nú er er búið að fylla upp í díkið og Hekelveld er gata, að mestu leiti komin undir síðari tíma uppfyllingu og götuna Nieuwezijds Voorburgwal milli hins fjölfarna túristahelvítisins við Damrak og rómantíkurinnar við Singel-díki í Amsterdam.   

Hekelveld á 19. öld

Ég spurði nýlega hollenskan staðarnafnasérfræðing, hvar línakurinn væri sem Hekelfeld fengi nafn sitt af. Fátt var um svör. Þegar ég benti honum á, að hið forðum þrönga síki nærri Hekelveldt hafi heitið Kattengat (kattarrassgat), nafn sem hollenskir sjómenn gáfu einnig innhafinu Kattetgat við Danmörku, fór hann að hugsa. Tvö götunöfn úr danska ríkinu á 17. öld, og elstu heimildir um þessi götunöfn eru líka frá þeim tíma. Ég er enn ekki búinn að heyra frá honum. Kattarskammir og -rassar þeirra voru hér áður fyrr teng djöfulskap líkt og Hekla.

Strætið Hekelveld hefur lengi verið þekkt fyrir öldurhús og hórmang á síðari tímum og þegar ég fór um þessar slóðir síðast, sat ígulstór nakin kona í glugga einum í þessu "íslenska" stræti, svört sem Hekluhraun. Hún vinkaði vingjarnlega til karlkyns vegfarenda. Var mér þá ljóst hvers kyns var. Þetta var líklega portkona Helvítis.

Hin gatan í úthverfi Amsterdam, Hekla, sjá hér er frekar ný, og eiginlega bara lítill botnlangi með hringlaga bílastæði í hinu svo kallaða alpahverfi í vesturhluta Amsterdam, þar sem allar götur heita í höfuðið á fjöllum í ölpunum, nema gatan Hekla, sem gengur út úr Matterhorngötu.

Danir hafa auðvitað nokkrar Heklugötur. Þeir hafa vitanlega lík varðveitt Heklu í orðatiltækinu „gå du ad Heckenfeldt til" en líklega hefur danskan fengið þetta úr þýsku eða frá Hollendingum, ef dæma má hvað Jacob Grimm skrifaði um helvíti.

Heckenfeld eða Hekelveld, var auðvitað hinn versti staður, gáttir helvítis og hvaðeina, og það þykir ekki fínt að óska mönnum "að Heckenfeldt til" í Danaveldi.

Hér er mynd af Heklu í hollenskri útgáfu (frá 1706) af riti þýska lygamarðarins Didthmars Blefkeníusar (Blefken), frá 1609. Það rit taka menn enn nærri sér á Íslandi enda allt í því lygar og uppspuni. Á myndinni af Heklu í bók þessari eru menn bókstaflega að fara til helvítis. Arngrímur lærði vitnaði líka í hollenska gerð Heklunafnsins, Heckelfeldt í riti sínu gegn Blefkenslygum Brevis Commentarius de Islandia.

Hér til vinstri, getið svo þið lesið grein mína, Ved Helvedes Port, sem birtist fyrir mörgum árum í einu mest lesna tímariti í Danmörku. Greinin fjallar um Heklu og fornleifarannsóknir mínar í skugga hennar. Meira um þær síðar. Sjá einnig hér.

Ekki stórmál

Ekki stórmál, segir Jóhanna, sem var gríðarlega upptekin um helgina. Hvenær koma þá stóru málin?

Berskjaldaðir Bessastaðir berrassaðir

 

Menn ættu ekki að láta valdalausan forseta Íslands villa sér sýn. Þeir á Handelsblatt í Þýskalandi eru að minnsta kosti búnir að reikna Ólaf Ragnar út. Helmut Steuer ritstjóri Handelsblatt kemst að þessari niðurstöðu: 

"Für die betroffenen deutschen Kleinanleger heißt es in diesen Tagen also, einen kühlen Kopf zu behalten. Und sich nicht durch vage Aussagen eines politisch machtlosen Präsidenten aus der Ruhe bringen zu lassen."

Já, hættið að hluta á Ólaf og vonandi getur Ólafur slappað aðeins af.  Hann ætti að fara til London og kaupa sér haltukjaftikaramellu í Harrods.

Kannski ætti sú regla að gilda, sem lengi hefur verið nauðsynleg fyrir t.d. fornleifafræðinga sem tjá sig við fjölmiðla: Biðjið um að fréttamaðurinn lesi fyrir ykkur fréttina áður en hún birtist. Fréttamenn eru ekki alltaf greindasta fólk í heimi og eiga það til að leika skáld á kostnað lesendanna.