Slagur, slagur, slagur

 

Hvernig hefur Ingibjörg Sólrún axlað ábyrgð á bankahruninu?  Að hennar eigin sögn með því að slíta stjórnarsambandinu við Sjálfstæðisflokkinn. Það lét hún hafa eftir sér í gær.

Þetta er sú lágkúrulegasta skýring sem ég hef séð í íslenskum stjórnmálum og líkast til hefur Jón Baldvin Hannibalsson á réttu að standa um Ingibjörgu Sólrúnu.  Hrunið átti sér stað á hennar vakt. Ég man ekki betur en að Jón hafi aðvarað um hrun árið 2007. Samfylkingarskussar sem vilja varpa ábyrgðinni á Viðeyjarstjórn Davíðs Oddssonar og Jóns Baldvins Hannibalssonar (anno 1991-1995, á síðustu öld!) eiga við trúverðugleika- vandamál að stríða.

Eyðsla Ingibjargar í Öryggisráðsdæmið er líka haldbær rök fyrir veruleikafyrringu þessarar manneskju, sem ætti nú að setjast í helgan stein (ég sagði ekki orð um sendiherrastöðu).

Jóhanna segist ekki á höttunum á eftir formannsstöðu í Samfylkingunni. Það ættum við nú að taka rétt mátulega.

Ætli Jón Baldvin fái ekki bréf, þar sem hann verður beðinn um að hætta? Hætta að segja sannleikann?

Samfylkingin er greinilega allt of upptekin í innbyrðis valdabaráttu til að geta sinnt lausn brýnustu mála á Íslandi. Menn eru í staðinn í hörkuslag. Ágætt, því vinstri stjórn getur ekki leyst þau vandamál sem íslenska þjóðin á við að stríða.

Athugasemdir

[Tómas Ibsen Halldórsson, 15.2.2009 kl. 16:57]

Sandfylkingin er búin að vera í sandkassa leik frá því hún varð til.  Í fyrstu var voða gaman og allir voru vinir í sandkassanum, en nú eru menn að verða leiðir hver á öðrum og er að fara í háaloft.  Sandfylkingin verður aldrei stór flokkur meðan á sandkassa leiknum stendur.  Ég sé nú ekki fyrir mér að það breytist.  Sandfylkingin stundar allavega ekki stjórnmál það er víst.  Þeir hafa bara eitt á stefnuskrá sinni þ.e. að ganga í ESB.

Bestu kveðjur,

[Ragnhildur Kolka, 15.2.2009 kl. 22:32]

Samfylkingin er í algeru kasti í augnablikinu. Jón Baldvin á þarna leik sem ekki var séður fyrir. Formannsfléttan var ekki tilbúin og útspil JB hefur sent allt liðið klifrandi upp veggina. Bloggsíður loga því enginn veit hvernig "línan" á að hljóða.

Þegar ráð eru dýr má alltaf níða Framsókn. Valgerður hefur fengið sinn skammt, Sigmundur Davíð er vændur um ístöðuleysi og nú; samsærið mikla "Alfreð og Davíð (hinn eini sanni) byggja brýr". Gat skéð að Davíð stæði á bak við þetta.

Það lítur út fyrir að ekki verði svefnsamt á mörgu samfylkingarheimilinu í nótt.