Alsælar fyllibyttur

 

Brátt er von á hans hátign Tom Hanks til landsins til að leika afar ómerkilegt blaðamannahró, útvarpsblók og a fucking idiot frá New York, Eric "Vino" Weiner að nafni. Eric þessi hefur komist af þeirri merku niðurstöðu að Íslendingar séu alsælar fyllibyttur. Hefur hann skrifað um þetta og annað í bók. Fyrir bragðið er hann að verða gúrú fyrir fólk sem er fátækt og vill vera ánægt. Allir vilja lesa hvernig Íslendingar liggja í ræsinu um helgar til að vera happy í amstrinu. 

Ég hef lengi verið fátækur og hamingjusamur, en ekki þarf ég að æla niður Bankastræti og eftir Lækjargötunni til að halda gleði minni. En það virðast Íslendingar víst almennt gera, ef trúa skal Eric Weiner. Er þetta satt?

Hér getið þið líka séð fréttasnápinn á Colbert Nation.

 þessi mynd náðist af Eric Weiner við vettvangsrannsóknir í Reykjavík sl. haust

Eric þessi hefur greinilega þrætt bari og búllur Reykjavíkur, þar sem hann hefur hitt fyrir fólk á sama andlega stigi og hann sjálfur, sem keppst hefur við að segja honum frá því hve kátir Íslendingar eru, bara ef þeir fái að drekka sig dauða um helgar.

Þessi Weiner er víst einn versti andskoti sem hefur rekið á fjörur Íslands síðan þýski óþverrinn Didthmar Blefken sagðist hafa komið til Íslands og skrifaði um það mikla lygasögu.

Gaman væri að heyra frá einhverjum af þeim helgardrykkjumönnum, sem logið hafa Eric Vino Wiener fullan á knæpunum, þ.e.a.s. ef menn muna eitthvað eftir því sem þeir rugluðu um í ölæði sínu og vímu helgarinnar.

Það var ekki á allan andskotann bætandi, að fá þennan karakter á eftir okkur.  Margt vont kemur frá BNA, en sumt er einfaldlega djöfuls afleitt.

Þessu verður að svara. Nú ættu menn að geta selt gleðispíra til Bandaríkjanna. Ekki veitir þeim af slíkum drykk undir leiðindapúkanum Obama. Getur svo ekki einhver haft samband við útrýmingardeild Mafíunnar í New York?

Athugasemdir

[Vilhjálmur Örn Vilhjálmsson, 18.2.2009 kl. 15:22]

P.s. Því verður að bæta við, að Eric Weiner talaði ekki við Ólaf Ragnar Grímsson né Dorrit Moussaieff Grímsson

[Kristján Sveinsson (IP-tala skráð) 18.2.2009 kl. 15:42]

Ó heillakarlinn, þú mátt nú ekki vera svona skelfing orðljótur um hann (Brenni)Víner Íslandsvin, drykkjubolta og hamingjuhrólf. Eins og þú veist ábyggilega vel eru hér allir fullir alla daga og vex hamingja vor með hverju ári. Einkanlega eftir að við losnuðum við peningana og atvinnuna sem hvorttveggja tafði okkur meinlega frá drykkjunni. Ólafur Ragnar forseti er til dæmis ávallt fullur af orðum — sum þeirra eru meira að segja útlensk máttu vita — og stundum verður hans orðabelgur svo yfirfullur að hann talar tungum í ósjálfráðu orðaflóði. Þá verða jafnan allir mjög hamingjufullir. Davíð Oddsson seðlabankastjóri er svo fleytifullur að honum verður ekki ekið úr stað án þess að yfir flói og útaf hellist. Hann hefur því setið fullkyrr á sama stað fulllengi og er fullvíst að svo verður áfram. Stafar af því fyllsta hamingja.

Hann (Brenni)Víner stórvinur okkar og drykkjubróðir getur því alls ekki látið nægja að skrifa eitt lítið bókarkver um íslenska fylli. Hann verður að minnsta kosti að ætla sér þrjár bokkur (nei bækur meina ég) í þetta. Og nær þó varla nema inn í miðja vímuna — og hamingjuna.

Þína skál. 

[Vilhjálmur Örn Vilhjálmsson, 19.2.2009 kl. 00:39]

Kristján, þú fyllir mælinn!

[Hildur Helga Sigurðardóttir, 19.2.2009 kl. 02:14]

Hefur þessi gaur aldrei komið til Finnlands ?

[LM, 26.2.2009 kl. 15:36]

Ert þú ekki vel tengdur hjá Mossad ?  Þeir eru nú alvanir aftökum um allan heim og ætti ekki að verða skotaskuld úr þessu.