Arnaldur í Amsterdam

Arnaldur Indriðason ofsækir mig í löndum Evrópu. Hvert sem ég fer rekst ég á hann. Í vor var ég i Berlín og greindi frá fundum okkar þar. Sjá hér. Nýlega kom ég til Amsterdam með lest frá den Haag, þar sem ég reyndi að greiða upp Icesave skuldina, og hver ætli hafi staðið og tekið á móti mér í borg forfeðra minna? Auðvitað enginn annar en Arnaldur Indriðason - á auglýsingaskilti á besta stað á girðingu kringum síkjaframkvæmdir við Damrak.

Í auglýsingunni stóð: Wat een goede schreiver, og er það haft eftir einhverjum gagnrýnanda á dagblaðinu Het Parool. Þetta skilst, en fyrir þá sem ekki skilja esbísku, þá útleggst það nokkurn veginn svo: En hvað þetta er góður rithöfundur. Onderstroom mun vera þýðing á glæpareyfaranum Myrká, sem ég hef ekki lesið.

Óska ég Arnaldi til hamingju með að vera kominn út á einu versta hrognamáli ESB. Aldrei var Laxness svo vel auglýstur, að hann væri settur upp á girðingu í miðborg Amsterdam.

Hugmynd: Er ekki nóg að Hollendingar fái Arnald, og afskrifi síðan Icesave-skuldirnar?

Athugasemdir

[Ragnhildur Kolka, 2.8.2010 kl. 12:22]

Sendum þeim frekar Hallgrím Helgason.

Þegar þeir hafa kynnst froðunni úr honum munu þeir ekki óska eftir frekari sendingum frá Íslendingum.

[Vilhjálmur Örn Vilhjálmsson, 2.8.2010 kl. 12:45]

Ja, honum myndi nú aldeilis líka lífið þarna suður af lestarstöðinni og norðan við Oudekerk.  Þar eru menn rauðir eins og hann og margir að selja sig.

Ég er ekki frá því að ég hafi séð Halla í Amsterdam hér um árið, með sinn skrítna hatt og sérstæða höfuðlag.