Er Brynjar nú orðinn varamaður?

...og ég sem hélt að þetta væri bara í nösunum á honum eins og málfrelsið - og sér í lagi frelsið til að afneita Helförinni. Ja, batnandi manni er betra að lifa. Þú þarft ekkert að afsaka Brynjar.

Nú, þegar Binni hefur tekið þjóðina í vörina úr pontu sinni, neyðist ég hreinlega til að minna Binna á gamla en nefvísa* færslu á varabloggi mínu sjá hér. Það var á þeim tímum er hann vildi styttri fangelsisdóma fyrir íslenska dópsala í útlöndum.

Þar sem Binni er rammgöldróttur, þori ég ekki að segja neitt annað en: Áfram Binni! taktu bara í vörina, en sprittaðu vel eftir þig. Aðrir þurfa að sitja þarna þar sem þú situr. Tóbakskarlasósa og slefslettur eftir nikótínkodda eru ekki beinlínis kræsilegar. Ef ekkert má lengur, getur þú vonandi dreypt á "VSOP-handsprittinu".

 

* orðið er upphaflega danskt, næsvis, en ég fann það í Tímanum árið 1948, svo við látum það flakka.

Siginn Skattman og S-Kata eru vel kæst í rauðbláu sóssunni

Þjóðmálin eru öll í skötulíki þótt bóluefnið komi í nótt.

Blessaður fjárhaldari þjóðarinnar í Rotham City 101, hann Skaskaskaskaskaska Skatman, er algjörlega bimmelimm og frúin gengin í stokk á TikkTokk. Hvar endar þetta? Ætli þeim takist að bursta skötubragðið af tönnum sínum eða mun hin vel kæsta Sósí-Kata hjálpa þeim við tannhirðuna? Hún sér að minnsta kosti enn "engar holur" í samstarfinu.

Ég legg til að Skattmann baki stóra þjóðarköku handa öllum og skreyti hana með aukafjárveitingum - en fyrst þegar veiran er horfin á vit forfeðra sinna í Wuhan.

Neitar að hafa varið Bjarna á TikTok undir dulnefni

Finnst ykkur góð skata?

 Hér er einn með skötubragð í munni og það er svo sannarlega skítalykt af þessu máli

Læknadólgurinn og yfirvöld sem brugðust íslensku þjóðinni

Hvaða fjallmyndalega kona er þetta með þessa fallegu grímu? Þetta fer henni vel. En farið nú varlega; Flagð er undir fagurri grímu.

Þegar læknadólgurinn Elísabet Guðmundsdóttir (undir grímunni efst) braut sér nýlega leið inn í landið án andlitsgrímu, með helgrímuna beraða, og braut þar með allar tilskipanir og reglugerðir varðandi COVID-19 á Íslandi, stóðu íslenskir löggæslumenn eins og hænsn og aðhöfðust ekkert.

Íslenskt löggæslufólk, sem sumt er í amerísku kukli eins og bláum strikum og öfgamerkjasöfnun, stóð í lotningu og beygði sig og bukkaði fyrir ofbeldiskonunni sem skaust "heim" til að æsa upp nokkra vitskerta einstaklinga á Austurvelli, og þaut svo aftur út í lönd til að stækka brjóst og sprauta eitri í hrukkur á einhverri iðnaðarklíník þar sem græðgi er aðaltilgangurinn en læknishjálp aukaatriði.

Ef íslensk yfirvöld gera ekkert, þá geri ég það persónulega. Það verður að hafa samband við heilbrigðisyfirvöld í þeim löndum þar sem læknadólgurinn vinnur og vara við konunni. Hún hefur brotið lög og tilmæli á Íslandi. Hún bar grímu á Kastrupflugvelli, þar sem hún hefði verið lögð í plast og stungið í klefa án grímu, en svo þegar hún er komin á íslenskan flugvöll berar hún sitt öfgaandlit og íslensk lögregla staðfesti enn einu sinni að greind er því miður oft ábótavant við löggæslustörf á Íslandi. 

Kona þessi er hvorki sérfræðingur í veirufræði né í smitsjúkdómafræði. Þetta er læknir sem vinnur á stað þar sem hégómamadömmur verða að sillikonum og aðrar eru sprautaðar með eitri í andlitið vegna þess að hrukkur eru hættulegri lífsviðurværinu í þeirra hænuhaus en Covid 19.

Íslensk lögregluyfirvöld, sem telja nú orðið menn sem í erlendum fjölmiðlum tjá sig á niðrandi hátt um erlent fólk á Íslandi (sjá hér) gerðu ekkert. Þeir horfðu bara á Guddu frekju í hvíta sloppnum eins og hún væri Guð og settu hana ekki í járn, sem minni brot manna hafa oft gefið þeim átyllu til.

Læknadólgurinn Elísabet Guðmundsdóttir tilheyrir þeim leiða hluta læknastéttarinnar sem sjálfur heldur að hann sé kominn i guða tölu. En læknadólgurinn "sem kom heim" er augsjáanlega enginn gyðja. Hún er glæpon og íslensk yfirvöld verða að meðhöndla hana sem slíkan. Hún sýndi andsamfélagslegt eðli á erfiðri stund fyrir alla þjóðina. Þetta eðli grunar mig að hún hafi þróað vegna einhverrar mikilmennskukenndar vegna þess að hún lifir upp í mýtunni um að læknar séu æðra öðru fólki.  Við sjáum þessa kennd t.d. þegar læknar fara fyrstir í slag fyrir launin sín, þessi sárþjáði verkalýður. Það hefur líka sýnt sig að vera happadrjúg barátta. Kenndin er líka öllum ljós þegar annálaðir íslenskir Rómanalæknar fara frá Íslandi og setja plastbarka í fólk. þó þeir séu sérfræðingar í hjartaskurðlækningum en ekki öndunarfærasjúkdómum - og þá dreymir  alla leiðina út og heim aftur um Nóbelsverðlaun og frægð í hirð ítalsks pylsugerðarmeistara. Hvernig gátu þeir eftir 12 ára nám ímyndað sér að barki úr plastefni myndi gagnast í hálsi dýrs?

Sem löghlýðinn plebbi, sem fylgir tilmælum yfirvalda í hættuástandi fyrir almenning þegjandi og hljóðalaust þegar skynsemi og almannaheill ráða ferðinni, legg ég til að íslensk yfirvöld fjarlægi umsvifalaus rétt Elísabetar Guðmundsóttur til að stunda læknisstörf á Íslandi og vari við henni hjá systuryfirvöldum sínum erlendis. Ef það gerist ekki, er ekki heill þráður í fjasi Víðis, Kötu og Þórólfs og alls þess góða fólks sem gerir sitt besta til að koma í veg fyrir að fólk deyi af völdum græðgisveiru frá Kína og læknadólgs sem treður pyngjuna þegar hún er ekki að hrópa á torgum með brjálæðingum.

Laxness - Texas

Eitt af heitustu málunum í kuldakastinu á Íslandi er deila Ólínu Kjerúlf Þorvarðardóttur og Björns Bjarnasonar. Ég hallast helst að því að kalla þetta ljóta rimmu íslensks forréttindafólks með sérþarfir.

Rit Ólínu Þorvarðardóttur er persónulegt uppgjör afar skapmikillar konu, sem lítur á sig sem eins konar fórnarlamb og þolanda Sjálfstæðisflokksins - líkt og hún telur Laxness hafa verið líka. Rit Ólínu er til umræðu á Fornleifi nú þar sem margt í ritrýni Ólínu er leiðrétt.

Björn Bjarnason hefur vitaskuld svarað Ólínu, því hann er sonur föður síns sem var einn fremsti ráðherra Sjálfstæðismanna á 20. öld. Börn halda oftast úti vörnum um minningu nánustu ættmenna sinna. Björn svarar náttúrulega þeim ásökunum hennar að faðir hans og Sjálfstæðisflokkurinn hafi komið í veg fyrir að Atómstöðin yrði gefin út í BNA sem hafi útilokað stóra hluti fyrir Laxness í henni Ameríku. En Ólína líkir hins vegar hálfgert sínum eigin "vandræðum" við vandræði Laxness (ekki er leiðum að líkjast) og íhaldið er vitaskuld skúrkurinn.

Heimildarýni Ólínu er hins vegar með afbrigðum léleg við þetta atriði í bók hennar og Björn er heldur ekki með allt á hreinu. Ólína hefur ekki getað lesið bók Halldórs Guðmundssonar sér til gangs, enda málið varðandi Laxness og tekjur hans af Sjálfstæðu fólki í Bandaríkjunum dreifðar um bókina. Bækur HHG um Laxness koma víst að engu gagni heldur.

Mig langar að biðja þetta valdafreka fólk (því Ólína er einfaldlega ekki fórnarlamb) að fara til Bandaríkjanna, þegar það verður hægt, nánar tiltekið til Austin í Texas.

Eftir að hafa hvílt úr sér jet-laggið á góðu 5 stjörnu hóteli sem hentar ráherra- og sýslumannabörnum, langar mig að biðja þau að aka að Harry Ransom Center á University of Texas. Áður en þau koma þangað geta þau beðið um aðgang að skalasafni Alfred A. Knopfs útgáfunnar (Alfred A. Knopf Inc. Records; Manuscript Collections MS 00062), og panta skjöl úr þessum flokki sem varðar bréfaskriftir forlagsins við heimsskáldið Halldór X.Laxness, sjá hér fyrir neðan. Þið lesið rétt Halldór X. Í BNA Trumps er Laxness ekki betur þekktur en svo, að hann heitir þar Halldor X. Laxness. Minnir þetta óneitanlega á hann Malcolm, sem er ekki minna þekktur en Laxness.

Í þessum skjölum, bréfaskriftum við Laxness, er hugsanlega hægt að sjá ástæðuna fyrir því að Alfred A. Knopf vildi ekki halda áfram útgáfu á Laxness. En ef til vill var það Laxness X sjálfur sem vildi ekki láta gefa sig út í BNA?

Staðhæfingin um að Sjálfstætt Fólk / Independent People, sem Alfred A. Knopf tók að sér að gefa út í Bandaríkjunum árið 1946, með leyfi útgefanda og þýðanda á Englandi, hafi verið metsölubók eru einfaldlega staðlausir stafir. Þið getið lesið frekar um það á Fornleifi.

Hér sjáið þið, Björn og Ólína, möppur þær sem þið þurfið væntanlega að skoða í Austin. Þetta gildir líka fyrir menn sem skrifa bækur um Laxness, bæði löglegar og ólöglegar.

Svo óska ég Birni og Ólínu góðrar ferðar til Austin í Texas.

 

Leðurjakki Faralds Handriðasonar er þjóðarskömm

Það má einhver til með að segja Faraldri Handriðasyni að skítabrúnn leðurjakkinn hans er löngu kominn úr tísku, jafnvel þó hann sé þýskur.

Svo er hann bara of lítill á hann og morðljótur í ofanálag. Það er hreinlega kríminalt að menn sextugsaldri séu í svona stæljakka á almannafæri, nema að þeir eigi almennilegt vélhjól, eða kaskeit eins og Bertolt (Brecht) átti.

Bestsellertar eins og Faraldur hljóta að hafa ráð á betri jakka sem ekki lítur út fyrir að vera úr gerviskinni.

Covid-ástandið hentar ágætlega

Svínin sjá um sig sjálf - ég horfði á Sjónvarpsfréttir

Stundum hefur maður ekki mátt né krafta til að horfa á fréttatíma Sjónvarpsins í gamla heimalandinu, en í gær hafði ég það af, því danskar fréttir voru enn sorglegri, fullar af dauðum minkum og rotnum refum stjórnmálanna.

Ekki kom mér það á óvart við að horfa á Sjónvarpsfréttir, að þeir sem síst höfðu þörf fyrir mótefni gegn svínainflúensu fengu hana fyrstir á Íslandi, þeir spörkuðu öllum þurfandi til hliðar. Sumir stjórnmálamenn fengu sprautuna allrafyrstir. Það er þó vel skiljanlegt, þeir eru margir hverjir hreinræktuð svín og því í mikilli hættu. Svínin sjá alltaf um sig sjálf og enga aðra. Það er náttúra svína.

Svo jókst salan í söludauðanum sem Covid-19 hefur skapað um allar jarðir. Þökk sé austurlenskum uppfinningum, þá fór allt í gang í kaupkringlum Íslands. Margt getum við lært af kommúnismanum í Kína, en Kóvið hefðu þeir betur haldið heima hjá sér [nú verður þetta þýtt í þríriti í Kínverska sendiráðinu, vertu viss Villi]. Eigingjarna, einhleypa fólk á Íslandi, og kollegar þeirra um allan heim, keyptu gær í sig og á og helst leikföng sem kitlað getur það sjálft  og enga aðra. Sumir geta vitanlega ekki gert að því að þeir eru einhleypir. Þetta er allt svo sorglegt, engin fullnæging - og því er gott að geta drekkt sér í kaupæði sem fundið var upp í ekta kommúnistaríki, þar sem þeir kunna svo sannarlega að breikka rassgöt.

Svo kom Sveinn Rúnar inn í einn fréttatímann. Erindið var ekki Palestína í þetta sinn. Stundum þykir mér óréttlátt hve lítið Sveins Rúnars er minnst í Palestínu, eins mikið og hann hefur þó hjálpað þar. Nú vitum við að Sveinn var einnig mikill eldhugi á yngri árum og barðist fyrir fólkið í Arnarholti. Hækkar þar með stjarna hans hjá mörgum og mér líka. Tenglar, sella sem hann stýrði, skrifaði skýrslu á nýjustu gerð IBM ritvéla árið 1969. Upp úr því var þeim bannað af geðlækninum Kristjáni Þorvarðssyni, sem starfaði í Danmörku á stríðsárunum, að koma framvegis að heimsækja vistmenn í Arnaholti. Þótt þetta hafi verið það minnst eigingjarna í fréttum kvöldsins, þá dagaði skýrsla Sveins Rúnars uppi í skjalasöfnum Reykjavíkurborgar með 100 ára leynd og einsemd. Í stað þess að halda til streitu baráttu sinni fyrir lítilmagnana í Arnarholti, leitaði Sveinn Rúnar á önnur og stærri mið. Sárþjáðasta þjóð heims var vitaskuld mikilvægara verkefni en morðmeðferð á nokkrum íslenskum vesalingum uppi á Kjalarnesi.

Kassar Sveins Rúnars eru fyrsta skrefið út úr eigingirninni.

Mér þótti líka vænt að sjá að Sveinn Rúnar raðar lífi sínu niður í Ikea-plastkassa eins og gamalmenni með bílskúr gera nú orðið um heim allan (ef þau setja ekki heila klabbið á netið) - og að það er greinilega engin 100 ára leynd yfir kössum Sveins Rúnars eins og er með ósómann hjá Reykjavíkurborg.

Og það var eins og mér heyrðist að álftirnar syngju í kór undir gagginu í Lubba borgarstjóra í þessum einstaka fréttatíma: "Opnið skjalasafn Arnarholts og sjáið hvernig læknar myrtu fólk á Íslandi" kvökuðu álftirnar í mín eyru.

Sem betur fer var ekki minnst á Brynjar Níelsson eða utanríkisráðherrann í þessum fréttum. Þá hefði ég örugglega lagst í þunglyndi. Ég ráðlegg þeim Bakkabræðrum að flytja til Georgíu eða Monthana og fá sér nóg af byssum og sílikoni.

Það eina sem hressti mig í fréttum í gær voru rör, leiðslur og 15 stiga heitt saltvatn á Kópaskeri. Það er nýtt ævintýri í uppsiglingu. Haldið ykkur fast. Hjólin snúast áfram en fólkið á Arnarholti er dáið, en kannski ekki alveg gleymt.

Þegar íslenskur lögreglumaður tjáði sig um "útlendinga" í frönsku blaði

Fornleifur frændi er farinn að blogga heldur of mikið um nútímavandamál. T.d. um löggur með fánablæti. Ég hef sagt honum (og eiginlega fyrirskipað) að halda áfram grúskinu, annars set ég hann í járn og læt hné fylgja hálsi.

Um daginn var Fornleifur að segja álit sitt á merkjalöggum og öðrum mótsögnum innan lögreglumannastéttarinnar.

Eins og Fornleifur, tel ég flest það fólk sem starfar innar lögreglunnar sé gott fólk sem reynir að halda innviðum samfélagsins gangandi, þó þeim hafi of oft verið beitt til að ganga erinda þeirra sem hafa fjármagnsvöldin til að troða á verkalýð og fólki sem leyfir sér að nota lýðræðislegan rétt sinn til að mótmæla óréttlæti. Sem betur fer berja lögreglumenn ekki á sjálfum sér þegar þeir sjálfir líta niður í tóm launaumslög sín og sjá hve lítils virði starf þeirra er.

Líkt og alls staðar er þó brestur á, líkt og við höfum séð varðandi fánabera merkislögreglumanna, sem ekki hafa tekið eftir í tímum í lögregluskólanum.

Einn íslenskur lögreglumaður, sem talaði um fjölþjóðakærleika Íslendinga á ráðstefnu World Muslim League i Kaupmannahfön á sl. ári, sagði Frökkum það árið 2016 „þeir [Frakkar] hefðu átt að velta fyrir sér í hvaða samfélagi þeir vildu búa í áður en þeir samþykktir komu allra þessara útlendinga. Sami lögreglumaðurinn sá ástæðu til að agnúast út af færslu hjá Fornleifi (sjá hér og athugasemdir fyrir neðan færsluna á Fornleifi).

Lokasvar mitt til lögreglumannsins sem sagði eitt við múslíma árið 2019 og annað við franskt öfgahægriblað (Valeurs) árið 2016, en sem greinilega telur Íslendinga betri en annað fólk, sem er svo sem ekki nýtt fyrirbæri á meðal Íslendinga:

 Það er álit mitt, að skoðun sú sem kemur fram hér að neðan sé ekki sæmandi lögreglumanni í lýðræðisríki. Ég vil ekki hafa löggur í mínu landi sem láta slíkt hafa eftir sér. En vandamálið er bara að þær hafa margar þessar skoðun sem kemur fram í viðtali hins hægrisinnaða vikublaðs, Valeurs, í Frakklandi. Hér getið þið lesið hvað íslenskur lögreglumaður sagði um innflytjendur/flóttafólk á Íslandi og í Frakklandi. Viðmælandi Valeurs var Gísli Jökull Gíslason, lögreglumaður sem talar um heift þeirra sem ekki vilja sitja undir hatursræðu Íslendinga þegar helfarar gyðinga er minnst á Íslandi.

En 2014, ils étaient 22 744 étrangers résidant sur le territoire islandais. « Des chiffres toujours en hausse, mais il fait trop froid ici pour qu´ils débarquent en masse », s´amuse Gísli Jökull Gíslason. À propos de la France, il déclare simplement : « Vous auriez du vous demander dans quelle société vous aviez envie de vivre avant d´accepter la venue de tous ces étrangers. » https://www.valeursactuelles.com/le-miracle-islandais-64035

Kuldinn kemur í veg fyrir margt og það er mikið um kulda og hatur á Íslandi. Ég þekki það ósköp vel sem sonur innflytjanda.

Heiftin og fordómarnir eru þitt vandamál Gísli Jökull rannsóknarlögreglumaður. Þú mælir með því að stórþjóð notist við sama xenófóbiska kerfið og alla tíð hefur ríkt á Íslandi. Hvað heldur þú eiginlega að þú sért? Þú ert eins mikill innflytjandi og allir aðrir á Íslandi.

Það er reyndar ekki frostið, Norðangarrinn eða ólögleg barmamerki lögreglumanna sem heldur útlendingum frá Íslandi. Fordómarnir hafa líka gert það í miklum mæli, og nú vitið þið "landar" að íslenskir lögreglumenn eru virkir boðberar ósómans.

Ég vonast til að íslensk yfirvöld skoði vel þá menn sem gegna löggæslu í framtíðinni. Íslendingar mega ekki við því að missa lýðræðið og sjálfstæði vegna fólks í einkennisbúningum, sem dregur fólk í dilka eftir hentugleika eins og Gísli Jökull Gíslason, eftir uppruna þess. 

Ef franskan vefst fyrir ykkur, notið þá Google translate.

Frakkar velja kannski ekki "réttu útlendingana", en gerir Íslendingurinn á myndinni það? Mjög hægrisinnuðu blaði í Frakklandi líkaði þessi lögga...

Dísa fer í endurhæfingu í Valhöll

Sjálfstæðisflokkurinn reynir nú með öllu sínu góða siðferði að bjarga einum ráðherra sinna í Katrínarkabínettinu, sem ekki fylgdi Víði í einu og öllu.

Strangar æfingar voru í gangi við Valhöll núna snemma í morgun.

Þórdís er þó einnig farin að leita á önnur mið:

Svecia non optima est

Æi, það er ugglaust ekki gaman að vera Anders Tegnell.

En honum sjálfum er ekki einum um að kenna. Tegnell er afsprengi af stærra, sænsku vandamáli.

Svíar hafa síðan um 1960 litið á sig sem þjóð sem leyfðist signt og heilagt að vera með dómharðan vísifingurinn á lofti gagnvart öllum þjóðum; Sér í lagi beindan gegn þeim sem alþjóðlega stefna Krata leggur í einelti í misskildum stuðningi við hryðjuverkasamtök hrjáðra þjóða sem frelsa sig með morðsveitum í skugga öfgafullrar trúar sem fótumtreður öll nútímamannréttindi.

Við sjáum líka afbrigði af þessum ofmetnaði (hybris) Svía, þegar sænskir sagnfræðingar telja að Svíar hafi bjargað gyðingum á flótta frá Danmörku. Það gerðu Svíar vitaskuld ekki, og voru í raun mótfallnir til að byrja með, eða þangað til að þeir fengu bréf frá danska sendiráðinu í Washington, sem ritað var af fyrrverandi sendifulltrúa í Reykjavík, manninum sem einnig á stóran heiður af ákvörðun Bandaríkjamanna að leggja blessun sína yfir lýðveldisstofnunina á Íslandi. 

Í því bréfi C.A.C. Bruns var lofað að Danir myndu borga fyrir dvöl gyðinga sem Svíar björguðu. Sú "skuld" var vitaskuld aldrei innheimt, en sænskir stjórnmálamenn gleymdu henni þó alls ekki. Áður en bréfið, sem aldrei hefur verið nefnt í sænskum bókum,var skrifað í Washington ætluðu Svíar sér alls ekki að hjálpa gyðingum. Þeir hjálpuðu hins vegar gjarnan Þjóðverjum með hergagna og liðsflutninga til Finnlands og Rússlands.

Sjálfsánægjustefna Svía, sem smitað hefur af á Íslandi á frekar hæfileikalausu fólki sem stundaði stutt og lítilmótlegt nám við sænska háskóla, áður en það settist í ævilangar feitar ríkisstöður á Íslandi. Þessi blindstefna Svía hefur vafalítið einnig valdið dauða Palmes. 

Að ógleymdum Volvo, sem er ekki besti bíll í heiminum (þótt góður sé), og að Ikea er nasistabúlla sem lokar á mönnum munninum með kjötbollum. 

Í dag geta Svíar heldur ekki tekið á vandamálum þeim sem fjölmargir nýnasistar þeirra eru; eða á öfgahópum þeirra sem þrífast á meðal innflytjenda í landinu.

Svíþjóð er ríki sem á erfitt með að taka á vandamálum - vegna skoðanaeinokunar og sjálfsblekkingar sem leitt hefur af sér þjóðfélag, þar sem einn maður eins og Tegnell með sænsku heilkennin getur valdið óhemjumiklum usla. Sænska lýðræðið er orðið spegilmynd þar sem besserwisserinn og einræðisherrann talar við sjálfan sig og hlustar ekki á aðra en sjálfan sig. Að vera læknir með slöngusýn bætir ekki málið í landi þar sem kjánaleg pólitísk rétthugsun tröllríður öllu.

Svíþjóð er vandamálið - ekki aðeins Tegnell.

Sænski sóttvarnalæknirinn viðurkennir mistök