Víti á lögmann

Brynjar Níelsson hæstaréttarlögmaður var einu sinni í einhverjum bekk í einhverjum af þeim skólum sem ég gekk í. Hann þroskaðist víst mest til fótanna á þeim árum og var liðtækur fótboltamaður, m.a. Valsari, áður en hann byrjaði að stunda júrisprúdens sem er allt önnur íþrótt og vandasamari.

Ef hægt er að dæma víti á hæstaréttarlögmenn, ex popolo, tel ég ærna ástæðu að gera það hér og nú. Vítið dæmi ég á Brynjar Níelsson hdl.

 

25 ára Íslendingur var í gær dæmdur í 7 ára fangelsi í Færeyjum. Verjandi hans, fyrrnefndur Brynjar Níelsson, segir líklegt að maðurinn hefði "fengið innan við eins árs fangelsi hefði íslenskt réttarkerfi dæmt í máli hans". Brynjar undrast vinnubrögð færeyska réttarkerfisins og segir það vera "10 árum á eftir því íslenska".

Haft er eftir fótboltahetjunni fyrrverandi að færeyska réttarkerfið "hafi oftrú á refsingum og sé í dag þar sem íslenska réttarkerfið var fyrir 10 árum síðan".

Ef þetta er ekki sjálfsmark hjá Brynjari, þá veit ég ekki hvaða spark þetta er. Það fór langt yfir markið.

Ef Íslendingurinn sem dæmdur var í Færeyingum, hefur játað sekt sína og verið álpast með þvílíkt magn af kóki að hægt var að drepa heilt þorp á Íslandi með duftinu, ætti  Brynjar að fara í endurmenntun í Háskóla Íslands. Fagið sem ég mæli með að Brynjar taki upp á nýtt er refsiréttur. Einnig mæli ég með því að Lögfræðingafélag Íslands ávíti Brynjar fyrir ósæmandi umfjöllun um færeyskt réttarkerfi og réttarfar.

Ef Brynjar er hins vegar að segja satt, er ekki að undra að smyglarar og dópsalar eigi góða daga á Íslandi. 

Íslendingar eiga akkúrat engan rétt á lægri refsingu í Færeyjum. Heldur ekki annars staðar. Íslenskir aðilar sem eru í skítabissness ættu að kynna sér lagarammann í þeim löndum sem þeir stunda glæpi sína. Það á ekki að vera nein undanþága fyrir jólaveina sem stunda heildsölu á suðuramerískum jólasnjó. Jólagleðin tekur því miður oft snöggan enda fyrir ungmennin sem neyta "varningsins".

Ég hef alltaf litið á eiturlyfjasala og smyglara sem eins konar morðingja. Ég held að sjö ár í steininum komi Íslendingnum í Færeyjum í skilning um að athæfi hans veldur dauða, eyðileggingu og þjóðfélagsböli. Ef hann hefði verið frjáls maður innan eins árs (eins og á Íslandi?), væri nær öruggt að hann færi í sama sporið eftir rúmlega ár. 

Athugasemdir

[Glumur (IP-tala skráð) 12.4.2008 kl. 17:39]

Ég er ekki UNDRANDI á því að þú starfir AÐEINS sem safnvörður!!! Maður með þinar skoðanir ætti bara að halda sig nálægt miðöldum!!!!

[Ásgeir Kristinn Lárusson, 12.4.2008 kl. 18:54]

Ég tek ofan fyrir Færeyingum - hins vegar er verst, að þeir sem fjármagna „jólagleðina“, sleppa alltaf og virðast ósnertanlegir...

[haraldurhar, 12.4.2008 kl. 22:30]

   Tek fullkomlega undir sjónamiðs Brynjars Níelssonar, og tel að langar fangelsisrefsinar, séu allar af hinu illa, og ekki hvað síst þegar í hlut á 25 ára einstaklingur er á allt lífið fyrir sér,  er hefur hreina sakaskrá og framkvæmir hluti án þess að hugsa.  Gerum við ekki öll einhver mistök á lífsleiðinni.?

[Steini Briem (IP-tala skráð) 13.4.2008 kl. 00:07]

Þessi fáviti braut af sér í Færeyjum og þarf því að sætta sig við færeyskan (danskan) dóm. Hins vegar þurfa íslenskir skattgreiðendur að borga brúsann af langri fangelsisvist þessa gæðablóðs, því það verður látið afplána dóminn hérlendis. Upp með veskið!

[Steini Briem (IP-tala skráð) 13.4.2008 kl. 00:19]

Ef þessi api er orðinn 25 ára gamall hætti hann að vera barn í skilningi laganna fyrir sjö árum, árið 2001, og það er engin afsökun fyrir afbrotum að vera tvítugur, hvað þá fimm árum eldri.

[Óskar Arnórsson, 13.4.2008 kl. 02:51]

Já, og í flestum löndum í Asíu hefði hann verið hengdur, og í Malasíu hefði ekki verið farið með hann á lögreglustöð einu sinni. Hann hefði verið skotinn á staðnum.

Engar varnir til í þessu máli. Ég fékk nú heldur betur skítkast á mig fyrir að líkja saman stórum fíkniefanasmyglurum saman við hryðjuverkamenn!

Og að setja dópsala og neytendendur í sama fangelsi á Íslandi er það sama og halda uppi Ríkisrekinni "Kristjaníu".  

Ásgeir Kristinn kemur með það innlegg sem er lítið talað um. Af hverju er verið að brytja niður lögregluna, sömu menninna og voru að leita að þeim sem lagði til fjármagnið?

það er skítalykt af þessu máli sem leggur langar leiðir.. 

Allir dómarnir voru allt of langir! Við lifum við löngu úrelt og ónítt refsikerfi..Búin að sjá þetta innannfrá sem starfsmaður bæði hér og erlendis.

Kanadaaðferðinn virkar best, nema fyrir þá sem eru haldnir hefnigirni, refsigleði eða blóðþorsta. www.leap.cc Góð fræðsla og mjög sannfærandi, en ekki láta blekkjast af því sem er talað um þarna.. 

[Gunnar Ásgeir Gunnarsson, 13.4.2008 kl. 12:57]

þungir refsidómar þjóna engum tilgangi og allra síst fælingarmætti. þeir auka bara hörkuna í glæpaheiminum. krafa almennings er sífellt harðari dómar og það endar með dauðarefsingum

[Steini Briem (IP-tala skráð) 13.4.2008 kl. 14:36]

Á meðan þessir afglapar og amlóðar sitja á bakvið lás og slá gera þeir ekkert af sér á meðan úti í þjóðfélaginu, ef almennilega er passað upp á þá. Þetta glæpahyski hefur engan rétt til að kveða upp dauðadóma yfir óhörðnuðum ungmennum þessa lands með því að ganga laust, selja og flytja hér inn fíkniefni. Þeir höfðu VAL til að gera aðra og skynsamlegri hluti en KUSU að gerast drullusokkar og vissu nákvæmlega hvað þeir voru að gera.

[Gústaf Níelsson (IP-tala skráð) 16.4.2008 kl. 23:16]

Smekkvísi þín er undraverð Vilhjálmur, þú ert eiginlega gull af manni. Viltu vera svo vænn að upplýsa hver sýgur svo kröftuglega í nefið á myndinni? Annars myndi ég halda að hér væri á ferðinni Geir Jón Þórissson, yfirlögregluþjónn í boði Sturlu vörubílstjóra. Kær kveðja.

[Vilhjálmur Örn Vilhjálmsson, 16.4.2008 kl. 23:33]

Gústaf, ég hef ekki hugmynd um hver maðurinn er. Ég fann myndina með því að slá inn "cocain addict" á Google. Það var tíunda myndin í röðinni og sú eina af karlmanni.

[Vilhjálmur Örn Vilhjálmsson, 17.4.2008 kl. 04:17]

Ég tek fram af gefnu tilefni, að Brynjar Níelsson er ekki verjandi Íslendingsins í Færeyjum, frekar en aðrir íslenskir lögspekingar sem tjáð sig um óhæfilega þyngd dómsins yfir íslendingnum í Færeyjum.

Brynjar hefur sjálfur bent mér á þetta og þakka ég honum vinsamlegast fyrir leiðréttinguna sem hann hefur sent mér í vinsemd og biðst ég velvirðingar á þessum misskilningi mínum.

Brynjar hefur einnig talið ástæðu til þess að benda mér á að hann sé ekki félagi í Lögfræðingafélaginu og að hann geti því því ekki móttekið nein ávítur frá þeim. Ekki ætla ég að mótmæla því. Ég er sannast sagna heldur ekki mikið fyrir slík félög og klíkur yfirleitt. Það verður þá líklega bara ég og gatan sem dæmum Brynjar fyrir skoðun sína á dóminum í Færeyjum. En þann rétt hef ég nú enn.

Í niðurlagsorði í bréfi sínu til mín, hefur Brynjar Níelsson hrl gefið mér pillu og bent mér "að  það sé ekki gott að skora sjálfsmörk og fá dæmt á sig víti. Þó er það skárra en að vera rekinn af velli". Það síðasta hefði auðvitað átt að vera "bolað af velli". Það er ekki alltaf dæmt rétt. Brynjar telur ástæðu til þess að tína til óundirbyggðar og óskýrðar ásakanir fyrrv. yfirmanns míns í 8 liðum (sem aldrei hafa verið opinberaðar), sem síðar var gripinn í og rekinn fyrir að vita ekki hvað orðið hafði af tugum milljónum króna á Ríkisstofnun, og bera það svo saman við opinbera skoðun mína á íslenskum lögmanni sem hefur tjáð sig um að nokkrir mánuðir séu hæfileg refsing fyrir þátttöku í kókaínsmygli. 

Þróunin víðast hvar í Evrópu er sú, að dómar í fíkniefnamálum verða sífellt þyngri. En á Íslandi hinu góða er talið við hæfi að menn fáið frí í nokkra mánuði. Þetta þykir mér vera sá boðskapur sem Brynjar, sem leiðbeinir í refsikódex við íslenska háskóla, mælir með, og t.d. líka einn fremsti lögspekingur landsins, Sigurður Líndal, sem líka þykir Færeyingar (Danir) of harðir í garð hins ólánsama íslendings í Færeyjum.

Ég er enginn lögspekingur, en ég tel að það sé þrátt fyrir allt verra hlutskipti af vera settur í ævarandi bann við að vinna á Þjóðminjasafni Íslands vegna fræðilegra skoðanaskipta og álits á óhæfum yfirmanni *, en að fá innan við ár í steininum fyrir að taka þátt í kókaínsmygli. Að segja sannleikann á Íslandi er greinilega verri synd en að smygla kóki.

* Af gefnu tilefni tek ég það fram að ég var settur í ævilangt atvinnubann af Þór Magnússyni á Þjóðminjasafni Íslands, en bannið og brottrekstur minn tengdist ekki skoðun minni á merkum silfursjóð sem fannst fægður og fínn í jörðu austur á landi. Ég var svo síðar dæmdur fyrir skoðanir mína varðandi þann sjóð af íslenskum dómstól. Afleiðingar þess dóms hafa verið gífurlegar fyrir mig. Vildi ég óska þess að fyrir 10 árum hefðu verið til lögmenn sem væru eins góðir og kollegar þeirra sem nú verja menn sem smygla eitri sem eyðileggur æsku landsins.