Nasistar 0 - Kommúnistar 0

Í lok septembers á síðasta ári var mér boðið á ráðstefnu í Litháen. Ég hafði áður verið í Litháen og kunni vel við mig þar. Áður en ráðstefnan hófst, var þáttakendum boðið í litla kynnisferð um höfuðborgina Vilníus. Frá fornum kastala, sem gnæfir yfir borgina, tók ég ljósmyndir af fallegri borg. Ég tók líka mynd af þessari ljótu byggingu, skammt frá miðbænum, sem Rússar “gáfu” Litháum, þegar þeir síðastnefndu voru enn undir sovéthælnum.  

Það rann síðar upp fyrir mér, að þarna sem ljóta byggingin lá hafði verið framinn menningarglæpur, líkt og þegar nasistar lögðu legsteina gyðinga í götur og stræti og þegar Assad Sýrlandsforseti lagði veg yfir helsta grafreit gyðinga í Damaskus, sem hafi verið í nokun i 2000 ár, á landi sem hafði verið keypt til notkunar til eilífðarnóns. Þeir sem hafa keyrt frá flugvellinum í Damaskus inn í miðborgina, keyra yfir dauða gyðinga. Rússar voru engin undantekning í menningarlegum þjóðarmorðum. Tröppurnar, sem lagðar voru upp að íþróttahöllinni í Vilníus, voru lagðar með grafsteinum úr aðalgrafreit gyðinga í Vilníus. 91% gyðinga Litháens var útrýmt í Annari heimsstyrjöld. Nasistar myrtu þá og kommúnistar trömpuðu svo á minningu þeirra. Þannig er margt líkt með þessum tveimur frændhugmyndafræðum. Eitt ljótasta eðli mannsins, að kenna einstaka persónum eða fámennum hóp um allar sínar ófarir, áttu kommar og nasistar sameiginleg, og eiga enn!   

Nú hefur verið reistur minnisvarði um grafreitinn og nokkrir steinar í tröppunum á íþróttahöllinni í Vilníus hafa verið fjarlægðir, að minnsta kosti þar sem því verður komið við.

 

Athugasemdir

[Jón Steinar Ragnarsson, 25.1.2007 kl. 16:56]

Vissulega þurftu Gyðingar að líða skelfilegar ofsóknir í báðum heimstyrjöldum og glæpurinn gegn þeim, sem þjóð verður aldrei réttlættur þótt til séu öfgamenn á borð við David Duke og einnig menn úr hópi orthodox Gyðinga, sem sást af ráðstefnunni í Íran.

Mér hefur þó virst frá barnæsku að Gyðingar hafi verið þeir einu, sem hlutu þessi örlög í hildarleiknum og að þeir, séu þeir einu, sem hafa harma að hefna.  Þú fyrirgefur mér væntanlega ef ég segi að mér hefur virst, sem Gyðingar vilji einir taka "kredit" fyrir að vera fórnalömb þessara styrjalda.  Þannig hljómar það bara oft í alvöru talað.  Íbúar heimsins þjáðust allir í þessari styrjöld og báru sár svo kynslóðum skipti á eftir, rétt eins og Gyðingar. Sígaunar og aðrir óskyldir minnihlutahópar sættu ofsóknum og morðæðið einskorðaðist ekki við Nazista eina. Nefni ég Dresten, Hirosima og Nakasaki, sem dæmi.

Er ekki kominn tími til að fyrirgefa og veita sál ykkar aflausn. Hve lengi getur þessi biturð og sannfæring um óvild heimsind fylgt ykkur? Er ekki hætta á að þetta klif gæti snúist í andhverfu sína. Nazistar eru ekki aðkallandi ógn lengur. Hugmyndafræði þeirra er einungis haldið vakandi með fortíðarhyggju ykkar, að mínu mati. Fyrirgefðu hreinskilni mína. Ég vil trúa því að manneskjan vilji lifa í kærleik frið og umburðarlyndi og ala upp börn sín í öryggi.  Þær kynslóðir, sem nú lifa, hafa engin tengsl við illgjörðarmennina.  

Vissulega má harmleikur heimstyrjaldanna aldrei gleymast og vera okkur víti til varnaðar um alla framtíð. En hatur og biturð leiðir eingöngu til þess að leikurinn verður endurtekinn.  

Á þetta sér grunn í kennisetningum? Er sá refgin munur á gamla og nýja sáttmálanum, það sem undir liggur; að gjalda auga fyrir auga og tönn fyrir tönn í stað þess að fyrirgefa? 

[Vilhjálmur Örn Vilhjálmsson, 26.1.2007 kl. 14:57]

Athugasemd þín á ekkert skylt við það sem ég skrifa um í bloggfærslu minni um Íþróttahúsið í Vilníus. Þar fjallaði ég um mannfyrirlitningu, ekkert annað. En þar sem þú ert greinilega mjög upptekinn af gyðingum og velferð þeirra, ertu skyndilega kominn út í allt aðra sálma, án þess að sjáanleg séu nokkur tengsl. 

Þú veður úr einu í annað og gerir mér upp skoðanir. Það gerðir þú líka í fyrri athugasemd þinni um "gyðinginn" Carl Maier, sem reyndist vera úr lausu lofti gripinn.

Mér sýnist að þér fynnist að gyðingar ættu jafnvel að fara að biðjast afsökunar á því að hafa verið fórnarlömbin og sættast við morðingja sína. Kannski eiga þeir líka að segja afsakið við Þjóðverja nútímans vegna þess að Dresden var sprengd? 

Nei Jón Sterinar Ragnarsson. Meðan enn lifa böðlar sem frjálsir menn, ber að dæma þá. Þeir dæmdu fólk til dauða, tóku saklaus líf og fyrirlitu þá sem þeir dæmdu og tóku af lífi. Ég óska eingöngu eftir því að þeir verði dæmdir eftir settum reglum í siðmenntuðum heimi. Morð fyrnast ekki! Ekki morð á gyðingum, heldur ekki á Roma, ekki á neinni manneskju.  Það er ekki hatur eða hefnd, heldur leikreglurnar í lýðræðislegum heimi, sem ég óska að sé framfylgt.

Ef gyðingar eða önnur fórnarlömb gera undantekningar á þeim leikreglum, þá er fyrst til staðar hættan á að sagan endurtaki sig. Hér er enginn að tala um dóm yfir Þjóðverjum nútímans. Hvernig dettur þér slíkt í hug við að lesa skoðanir mína á íþróttahúsi í Litháen?

Ég leyfi mér að gefa þér hollráð. Lestu það sem þú gerir athugasemd við, áður en þú hellir þér í lausnir fyrir heilu þjóðirnar og  trúarbrögðin. Og mundu, að það er ekki hægt að alhæfa eins og þú gerir. Gyðingar eru alveg eins og Íslendingar, þar er margur misjafn sauðurinn. Og ég er líka viss um, að ef helmingi íslensku þjóðarinnar hefði verið útrýmt, þá værir þú líklega einn af mjög fáum, góðum sálum, sem værir búinn að friðþægjast við böðla ættingja þinna.