Útrásarsvínainflúensa

Vart hefur orðið við útrásarsvínainflúensu, HINIR40. Ef maður fær hita, er best að fara úr öllu.

Svínaflensa á Íslandi

Kjölturakki Baugs

Nú er komið á daginn að Jóhanna Sigurðardóttir var bara kjölturakki útrásarsvína árið 2006. Þetta er konan sem er svo upptekin, að hún getur ekki gefið viðtöl. Hún hefur auðvitað verið að drepast úr taugaveiklun síðustu dagana.

Svei. Þar datt geislabaugurinn niður um háls hennar.

Þetta lið var næstum allt í vasanum á þeim sem settu okkur á hausinn.

615 fjölskyldur fengu 20% teknanna

 

Stundum læðist sá grunur að manni, að HÍ sé dálítið skrítin stofnun. Stefán Ólafsson félagsfræðiprófessor og Arnaldur Sölvi Kristjánsson hagfræðingur hjá Þjóðmálastofnun HÍ komast að þeirri niðurstöðu að 1% Íslendinga hafi 20% teknanna.

Þetta hefur lengi verið vitað og menn lofsungu skaffara þessa 20% í mörg ár, áður en allt hrundi. Útrásavíkingar og burgeisar hafa skaffað sínum fjölskyldum vel, enda voru eiginhagsmunir og öfgakapítalismi aðaldrifkraftur þeirra - ekki endilega þjóðarheill. Mikill hluti 80% þjóðarinnar, sem ekki meikaði það eins vel, var bara hrifinn. Margir lifðu líka ágætu sníkjulífi á sköffurum 20%anna, og hagur margra jókst vegna þeirra fáu sem tróðu 20% tekna í vasann árið 2008.

Græðgikastið, þar sem 615 fjölskyldur hafa nýverið fengið 20% í sinn hlut, er m.a. orsök hrunsins á Íslandi. Það skilur flest fólk, og þarf ekki barnalega marxíska tölfræði Stefáns og Arnaldar til þess að skilja það, svona rétt fyrir kosningar.

Það vantar frekar skýringar á því, af hverju fólk ætlar að kjósa yfir sig örvinglan í framhaldi af hruninu. Hvernig skýrir maður ósk um að flýja úr öskunni í eldinn? Núverandi ríkisstjórn mun auka á glundroðann og ójöfnuðinn í samfélaginu, þrátt fyrir yfirlýsingar um annað, því marxísk hagfræði og ofurskattar, með atvinnuleysi í ofanálag, redda ekki Íslendingum frá því að skútan sökkvi, með músum, rottum og þeim feitu köttum sem nældu sér í 20%.

Þeir síðastnefndu eru ekki öfundsverðir. Öfundsvert er heldur ekki fólkið sem kýs yfir sig Samfylkinguna og VG.

Varist frekari slys!

Íslensk útrás á 11. öld

Nú er verið sýna leikritið Auðun og Ísbjörninn. Þetta er nýtt leikrit eftir Soffíu Vagnsdóttur og það eru Komedíuleikhúsið sem frumflutti það fyrir nokkrum dögum. Sjá hér. Myndin hér að ofan er af leikurunum. Ég get því miður ekki farið og séð þetta leikrit, sem virðist hið áhugaverðasta. Góða skemmtun.

Áður en útrásasvínin eyðilögðu allt voru Íslendingar alltaf vitlausir í viðskiptum og forfaðir minn Auðun hinn vestfirski var enginn undantekning. Hann er sagður hafa heimsótt leirhausinn hér fyrir neðan og tekið með sér hvítabjörn til að gefa honum.  Leirhausinn er tilgáta um hvernig Sveinn Ástríðarson Úlfsson (1018-1074/76Ö), sem varð konungur Dana árið 1047, leit út. Er brjóstmyndin byggð á hauskúpu þeirri í Hróarskeldudómkirkju sem eignuð hefur verið einum mesta graðhesti á konungstóli í Danmörku.  

Auðun fór til Grænlands og keypti sér þar hvítabjörn fyrir allt sitt fé. Héldu menn fyrir vestan auðvitað að hann væri vitlaus. Hélt hann þá með bjössa til útlanda, fyrst til Noregs, þar sem hann hitti Harald konung Harðráða, sem ólmur vildi kaupa björninn fyrir sama verð og Auðun hafði gefið fyrir dýrið á Grænlandi. Auðun hafði ekkert viðskiptavit og áttaði sig ekki á að segja Norsaranum að hann hafið gefið tvöfalt meira fyrir björninn en hann gaf í raun. Auðun sagðist ætla með björninn til Danmerkur og gefa Sveini Konungi, sem var einn helsti óvinur Haralds.

Þegar í flatneskjuna og ölið var komið, varð Auðun forfaðir minn fljótt auralaus og gerir díl við slímugan gaur sem Áki hét og var hirðmaður Sveins Danakonungs. Áki segist myndu gera honum bjarnargreiða, sem menn þekktu enn ekki á Íslandi og þakkað Auðun honum það. Auðun selur Áka hlut í hvítabirninum fyrir vistir og gistingu. Fara þeir svo á fund Sveins með þetta hlutafélag sitt til að reyna joint venture við konung. Átti Auðun nú 50% í dýrinu og tel ég víst að það hafi verið óæðri endinn.  

Kóngsi sagði réttast væri að drepa Auðun, þar sem hann hafði heimsótt fjandmann sinn, Harald. En Sveinn var svo sannarlegur danskur og bauð betri díl en dauðann. Hann bauðst til að taka 50% hvítabjörn fyrir ekkert og gefa Auðuni grið fyrir bjarnarrass.

Af þessu má vera ljóst, að snemma uppgötvuðu erlendir menn að Íslendingar voru hundónýtir í viðskiptum, og er enn hlegið að því þegar Íslendingurinn seldi Áka hálfbjörn fyrir ekkert og Sveinn hafði af Auðuni óæðri enda Hvítabjörns Bjarnarsonar.

Þegar Auðun var næstum búinn að eyða öllu hlutafé sínu og var kominn í kast við einhverja munka sem vildu hafa af honum síðustu aurana í Rómarferð, segir Auðun við Svein.

"Braut fýsir mig nú herra."

Konungur svarar heldur seint: "Hvað viltu þá," segir hann, "ef þú vilt eigi með oss vera?"

Hann svarar: "Suður vil eg ganga."

Konungur segir þá hin frægu orð: "Fis du bare af! "

Auðun gengur nú suður í Róm og er hann hefir þar dvalist um stund tekur hann sótt mikla. Gerir hann þá ákaflega magran. Dr. Hrafn Sveinbjarnason áleit síðar að þetta hafi verið Salmonella Romana sem hrjáði Auðun.

Gengur þá upp allt féð sem eftir var og þarf Auðun að ganga ESB, þ.e.a.s að ganga um og betla fyrir mat sínum gegnum gjörvalla Evrópu. Hann er þá orðinn kollóttur (sköllóttur og er hér komin heimild fyrir DNA í skallanum á mér) og heldur ósællegur. Loks kemst hann til Danmerkur á páskum og lætur lítið fyrir sér fara og er hræddur við að láta konung sjá sig svo sneypulegan. Sveinn konungur sér hann og Auðun leggst flatur fyrir fætur honum, og þykir Sveini greinilega þægilegt að sjá svona íslenskan höfðingjasleikjuhátt og býður Auðuni strax með sér í jakúsi og gömul föt af sér. Síðar spyr Sveinn Auðun hvort hann vilji vera við hirð sína, en það afþakkar Auðun sem vill fara heim til Íslands, og það þykir Sveini skrítið samkvæmt sögunni, enda var altalað og líka þá, að þetta Ísland væri bölvað krummaskuð og eymdarbæli, þar sem allir dæju úr hor.

Kenndi Sveinn svo mikið í brjóst um aumingja Auðun, að hann gaf honum skip til Íslandsfararinnar. En Sveinn hafði þá að vísu stórgrætt á heimsókn Auðunar, sem sagði konungi allar þær merku kjaftasögur sem hann kunni af höfðingjum og heldra fólki á Norðurlöndum. Seldi Sveinn Adam af Brimum einkaréttinn og gaf Adam sögur þessar síðan út í metsölubók og í fjölda greina í Hjemmet, Familiens Journal og Ugens Rapport. Auðun fékk ekki krónu fyrir en sló tún og þúfur á Íslandi fram í háa elli.

Litla býflugan Joly

Ég sá einhvern spaugarann líkja Joly við dugmikla býflugu. Líklega vegna bolsins sem hún var í á blaðamannafundinum í gær.

Býflugan fær 1,3 milljónir á mánuði í hunangskrukkuna fyrir að úðra 4 daga á mánuði í blómalausri auðninni á Íslandi og heildarkostnaður við þessa drottningarflugu verður ekki meiri né minni en 70 milljónir í ár ?? Honey! Það kallar maður aukakostnað. Fær hún frían kavíar og geitaost í gámum?

Eða eru mismunurinn laun/heildarkostnaður = 58 milljónir bara vasapeningar? Vonandi fær hún nóga heimavinnu með sér, stakka af pappír jafn háa Eiffelturninum og íslenskan garçon eða babsette, sem geta hjálpað henni að þýða allan ósómann, þar sem hún hefur það huggulegt við arininn í býkúpunni í Paris við að kafa í skít íslenska glæpagengisins og allra fíklana og gammana sem voru á spenum þess ferlíkis. Segið mér ekki að það lið eigi að sleppa, meðan Siggi Einars og svoleiðis karakterar verði settir í dýflissu?

Dómarar í Frakklandi eru þekktir fyrir að kasta ekki til höndunum. Þeir dæmdu hann Alfred Dreyfus hér um árið og sjálf hefur Joly verið að lögsækja einhvern Philippe Cohen, sem varð á að segja hana gráðuga, háværa og fjölmiðlasækna fiskiflugu.

C'est la vie Joly! Það eru ekki allir auðtrúa á Íslandi.

Grófasti gaurinn í bankanum

Ekki þarf maður að spyrja að því. Misnotkun á örlögum gyðinga og lítilsvirðing við fórnarlömb nasismans er orðið vinsælasta sportið hjá vinstrimönnum. Þegar þeir eru ekki að styðja við hryðjuverkahópa sem útrýma vilja Ísraelsríki, eru örlög gyðinga í síðari Heimsstyrjöld notuð í alls konar tækifærishjal.  Ef vinstrimenn eru ekki að líkja Gaza við gettó, sitja þeir á fundum í Landsbankanum og líkja venjulegum starfsmönnum þar við fangaverði í Auschwitz.

Ásmundur Stefánsson, nýráðinn bankastjóri, mun hafa gert það á fundi með starfsmönnum sl. fimmtudag (5.3.2009).

Að sögn starfsmanna lögfræðisvið bankans mun Ásmundur hafa sagt þeim, að þeir ættu að vera auðmjúkari í störfum sínum fyrir bankann. Þau orð lét hann falla, þegar einn þeirra sagði telja að í bankakerfinu bæru menn mismikla ábyrgð. Tók sá sem dæmi, að ekki væri hægt að kenna þeim sem seldu farmiða um borð í Titanic um hin hörmulegu endalok skipsins. Þá mun Ásmundur sagt að samlíking við fangaverði í Auschwitz væri nærtækari.

Samkvæmt visir.is svaraði Ámundur þessu: „Ég ætla ekkert að fara að rekja trúnaðarsamtöl mín við starfsfólk bankans við fjölmiðla. Eina sem ég get staðfest er að það er alrangt að ég hafi líkt starfsfólkinu við fangaverði,". Hann vildi hins vegar ekki svara því hvort hann hafi nefnt útrýmingarbúðir á einhvern hátt í máli sínu.

Ef Ásmundur hefur sagt þetta, sýnir það dómgreindarleysi og skort á mannúðlegri afstöðu. Vafalítið hefur maðurinn sem þetta segir ekki lagt í vana sinna að vera auðmjúkur í störfum sínum. Hann verður að bera ábyrgð á þessum ummælum sínum.

Samlíking bankablóka við böðla nasismans er lítilsvirðing við milljónir manna, ættingja þeirra og afkomendur. Bankahrunið á Íslandi, og afleiðingar þess fyrir Íslendinga er eins og skógarferð í Þrastarlundi í líkingu við útrýmingarherferð nasista. Venjulega starfsmenn Landsbankans á ekki að hengja fyrir afglöp Hrunadans útrásarsvína, en í honum tóku íslenskir vinstrimenn líka þátt, og ekki tel ég alólíklegt að Ásmundur Stefánsson sé örlítið samsekur í því hvernig fór á Íslandi.

Nú á Ásmundur leik, hann þarf að sýna hvers konar vörður hann verður í Landsbankanum. Hann var nú einu sinni framkvæmdastjóri Íslandsbanka. Kannski er hægt að finna rót kreppunnar í störfum hans þar?

Ég leyfi mér að lokum að vitna í Jónas (8.2.2009 á www.jonas.is), sem lýst hefur Ásmundi sem „Grófasta gaurnum":

"Ásmundur er grófasti gaur gamals kerfis, sem nú er verið að afnema. Hann lítur á hlutverk sitt sem aðferð við að koma sér sem bezt fyrir við trogið. Öll nýju bankaráðin eru því miður í gamla stílnum, skipuð flokkspólitískum kommissörum. Þeirra grófastur er þó Ásmundur Stefánsson."

Er Carlos fordæmisgefandi?

Myndinni stal ég á Flickr, og hún er góð

Visir.is  veltir vöngum yfir því, hvort fordæmi séu fyrir ráðningu útlendinga í stöður á Íslandi. Þessar pælingar visis.is koma til vegna ráðningar Sveins Haralds, Norðmannsins sem fenginn var í Seðlabankann og til að redda Íslendingum frá sjálfum sér.

Bloggvinur minn Carlos Ferrer er örugglega fordæmisgefandi á ýmsum sviðum, þótt hann hafi ekki verið það í menntaskóla. Þá var hann var einn aðal Heimdellingurinn  (Leiðrétting: Carlos hefur aldrei verið í Heimdalli) í MH , og það voru sjaldséðir fálkar í þeim skóla, en þó ekki án fordæma. Carlos dýrkaði John Travolta-klæðaburð og göngulag á þeim árum, alveg eins í klipptur út úr Saturday Night Feever. Hann var alls ekki orðinn eins og þessi harðvítugi byssumaður hér á myndinni, sem sver sig meira í ætt við nafna Carloss, kenndan við Sjakalann.

Andstætt Svein Harald var síra Carlos, er hann fékk brauð austur landi meðan hann var enn útlendingur, búinn að búa lengi á Íslandi. Hann hafði gengið þar í skóla og átti, að því er ég tel víst, íslenska móður (rangt aftur, hún er þýsk), þótt hann væri með útlenskt ríkisfang. Hann  var gildur þegn í íslensku þjóðfélagi.  Það hefur Svein Harald bankastjóri hins vegar aldrei verið.

Ef menn ætla að nota Carlos sem fordæmi, verður Svein að fara að sækja um ríkisborgararétt á Íslandi og finna sér íslenska (þýska) fósturmóður. Kannski vill Jóhanna ganga honum í móður stað. Efast ég um að margir sæki þann rétt mjög stíft næstu árin og allra síst Svein Harald.

Biðst svo afsökunar á öllum ruglinu um séra Carlos, sérstaklega á því að tengja hann Heimdalli.

Hinn dularfulli bankasveinn

 

Svein Harald Øygard man ekki hvenær hann var fyrst beðinn um að taka að sér stöðu seðlabankastjóra. Var það kannski meðan hann beið einn á hótelherbergi í Reykjavík? Það er frekar alvarlegt mál, að muna svona lítið. Getum við treyst manni í svona hárri stöðu, sem ekki man eftir því sem gerðist fyrir viku? Getum við treyst honum fyrir að snúa íslenskum mínus í plús?

Ég held að Svein Harald, sem lætur ráða sig án þess að kynna sér hvað íslensk lög segja um ráðningu útlendinga í hæstu embætti þjóðarinnar, sé í vondum málum.

Svein Harald veit vel, að í Noregi er það algjörlega ómögulegt fyrir útlendinga að setjast í embætti Sentralbankdirektørs. Af hverju telur hann það eðlilegt að taka slíkt embætti á Íslandi? Svein Harald sýnir dómgreindarleysi og ábyrgðarleysi með því að láta ráða sig án þess að lagaleg hlið ráðningarinnar sé í lagi.

Norskir fjölmiðlar hafa spurt Stefán Jóhann Stefánsson upplýsingafulltrúa Seðlabankans:

- Hvordan kom dere i kontakt med Øygard?

- Det kan jeg ikke svare på, men vi er ikke tvil om at vi har funnet rett mann.

Stefán bætti við er hann er spurður frekar: - Ja, han er rett mann på rett plass, sier Stefansson. Selv møtte han Øygard for første gang i dag.

- Vi i sentralbanken er veldig glad for å ha ham her, og jeg tror det islandske folk vil være enig med oss, sier han.

Hvernig veit Samfylkingarmaðurinn (borgarfulltrúi í leyfi) Stefán Jóhann Stefánsson það? Hvaða forsendur hefur Stefán til því að segja þetta? Síðan hann gerðist upplýsingafulltrúi Seðlabankans hefur hann aldrei svarað neinu af eða til. En nú veit hann allt um óskir þjóðarinnar. Er annars rétt að pólitíkus sé í því starfi sem Stefán er í? 

Af hverju þessi leynd kringum ráðningu Sveins Haralds? Er verið að leyna því að ákvörðunin um að ráða hann var tekin á síðustu stundu, þegar ríkisstjórnin var með buxurnar niðrum sig, á fullu að hrekja Davíð úr bankanum, án þess að hafa nokkurn annan í staðinn. Einhver hringdi svo í Stoltenberg, sem segir nú öllum sem heyra vilja að hann hafi teflt Svein Harald fram til bjargar Íslendingum.

Þjóðin verður að fá að vita hverju Svein Harald hefur verið lofað og hvað íslenskir flokksfélagar hans hafa sagt honum. Samfylkingarmaðurinn Stefán Jóhann virðist vita það. Lát heyra Stebbi! 

Vera má að Svein Harald hafi komist lítillega í kast við norsk lög. Það var ekki alvarlegt mál eins og ég hef greint frá í færslunni hér á undan. Alvarlegra er, að hann telur sér stætt á því að taka að sér stöðu seðlabankastjóra á Íslandi í trássi við lög og venjur á Íslandi.

Den nye Skrue McDuck fra Norge

 

og Dabbi frændi er farinn úr tóma tankinum við Arnarhól.

Nýi  seðlabankastjórinn „okkar", hann Svein Harald, er hátekjumaður í Noregi.

Samkvæmt áreiðanlegum heimildum voru tekjur hans árið 2007 heilar 5.151.123,00 NOK (83.736.655 ISK) Hann greiddi 2.387.595 NOK í skatta og var skráður fyrir 15.555.335 krónum í eignir. Árið áður var hann aðeins skráður fyrir 3.578.881 krónum í eignir. Aukning eigna hans frá árinu 2006 til 2007 námu um 335%, en hann greiddi aðeins 32 % meira í skatt árið 2007 en hann hafði gert árið 2006. Hvernig verða eignir manns meira en tvisvar sinnum hærri en tekjur hans? Þessa list ætti hann að leika í Seðlabankanum, þá verðum við orðin ríkari en í fyrra eftir tæpt hálft ár.

Svein Harald virðist kunna listina að ávaxta sitt eigið fé, án mikillar fyrirhafnar (enda er hann krati). En mun hann geta ávaxtað fé Íslendinga? Það hefur ávallt reynst erfitt að ávaxta neikvæðar tölur.

Nýjar sumarbúðir í Borgarfirði

Nú stendur lúxussumarhús Sigga ríka aleitt og hálfklárað í boði nístandi norðangarrans og hrollkaldra hríðanna af heiðinni. Sjálfur er Siggi bankagrís floginn úr hreysinu, og er langt fjarri íshafsvindum. Líklega er hann í læposukki í Lýbíu eða þarmahreinsun í Abu Dhabi. Hann er búinn að loka á öll tengsl nema við netbankann sinn í Karabíska hafinu.

Jóhanna freyja á TF-Stjorn ætti nú hið snarasta að taka sumarhús Sigga eignarnámi. Já, og barasta segja honum að hætta eins og Davíð. Svo væri hægt að klára þetta dæmi, þótt það sé botnlaust, og opna þarna sumarbúðir fyrir börn atvinnulausra. Börn þeirra þúsunda Íslendinga, sem Siggi Einars og 30-40 svín gerðu atvinnulausa.