Nakinn sannleikur

 

 

Ég hlustaði í dag á Kastljós á veltalandi unga konu, Miriam Rose, sem kom til Íslands til að bjarga landinu með því að klifra upp í krana. Hún féll sem betur fer ekki úr honum, en í stað þess fyrir einum af sonum landsins þegar hún var að mótmæla virkjunum, og svo lenti hún í fangelsi. Þegar Rose kom úr steininum hélt löggan sem fastast í vegabréf hennar, sem Miriam Rose þurfti á að halda til að ganga frá sínum málum. Lögreglan hélt ekki bara vegabréfi hennar heldur hótaði að senda hana úr landi, þar sem hún var talin hættuleg íslensku þjóðfélagi. Hún ógnaði grunngildum samfélagsins.

Þetta er nú næstum því eins og þegar löggan var að senda gyðinga úr landi fyrir tæpum 70 árum síðan. Hvers konar rugludallar eru starfandi við löggæslu á Íslandi? En nú er Útlendingastofnun líka búin að sjá hver kyns er í löggæslunni og Rose er búin að fá vegabréf og leyfi til að vera í landinu hreina.

En svo skemmtilega vill til að alnafna konunnar í krananum, hennar Miriam Rose, hefur orðið fræg fyrir það að hjóla nakin á hjólhesti um grösugar sveitir Sussex. Alnafnan í Sussex var Mrs. May Pinup á fyrsta nektaralamanaki háskólans þar í sveit árið 2005. Nafna Rose í Sussex telur að vinnan við almanakið sé hið mesta success og sagði: "It's been really, really rewarding. As a society we do a lot of serious campaigning, but this aimed to show how campaigning can be fun.".

Kannski fáum við svona fínt almanak frá nöfnu Rose í Sussex hér á Íslandi. Almanak með tólf nöktum umhverfisverndunarsinnum sem koma til dyranna eins og þeir voru klæddir í Paradís.  Miriam Rose á Íslandi, nú er ég búinn að gefa þér hugmyndina. Mundu orð nöfnu þinnar í Sussex: "Campaigning can be fun".

Kannski var löggan hrædd við að rósin í krananum væri í raun rassbera rósin á hjólinu í Sussex. Hugsið ykkur umferðahnútana. Jú, væntanlega er slík reiðmennska líka ógn við grunngildin!

Kranarósin gæti líka auðveldlega farið að hjóla nakin um miðjan vetur á Íslandi. Ég hef heyrt að það sé orðið svo heitt í heiminum. Er ekki snjallræði að mótmæla því allsber á hjóli?

A very funny woman in Iceland

Mér sýndist nú frekar hitt, að af væri húmorinn hjá blaðamönnunum sem mættir voru til að hlusta á Mr. Jones. Maðurinn var alveg greininga kominn á vegum Sáms frænda til að fá okkur aftur með í stríðið með USA. Eins og Mogginn klippir þetta, sýndist manni ekki mannskapurinn skilja neitt af því sem Jones var að segja. Hádújúlækæsland? virðist vera eina spurningin sem börnin á fjölmiðlunum geta hrist fram úr erminni. Ætli menn viti ekki svarið? "Cold, Wet and Rocky, and 300.000 souls at the Center of the Universe".

Hr. Jones trúður var greinilega búinn að sjá hve sjálfsuppteknir naflaskoðarar Íslendingar eru. Ég hlakka til að sjá sjóvið hjá honum í beinni um allan heim. Greinilegt er að einhverjir vondir menn úti í heimi eru búnir að sjá í gegnum Ingibjörgu Sólrúnu Gísladóttur. Varla finnur Jon Steward það upp hjá sjálfum sér að fara að gera grín að Íslandi.

Fréttir herma að Jason Jones sé af Vestur-Íslenskum ættum.

Osama bin Laden „hatar Björk“

Vestfjarðaræða

Bolungarvíkur beach 

Ég er búinna að vera á Vestfjörðum í síðan í september, reyndar tók ég smá frí og fór með fjölskylduna til Hollands um miðjan september. En nú er ég brátt á förum til flatlendis Danmerkur í mína ævilöngu útlegð, útrás.       

Ég er núna í Bolungarvík sem er hinn besti bær. Mér þykir kyrrðin hér ígulfalleg. Maður getur snemma að morgni heyrt björg hrynja í fjallinu Erni og ölduna falla þungt á sandinn í fjörunni sunnan við bæinn. Hér snjóaði í fyrrinótt og enn er hvítt yfir öllu. Engin merki um heimshitnun hér.

Þetta las ég í Blaðinu í gær: "Um fjögur hundruð gestir sóttu sundlaugagarðinn í Bolungarvík um síðustu helgi. Gestafjöldi í sundlauginni hefur slegið öll fyrri aðsóknarmet síðustu daga."

Ekki vissi ég að Bolvíkingar væru svona glaðir yfir því að sjá mig í sundi, en nú veit ég að gleðin var ekki mín vegna og mannfjöldinn var vegna þess að sundlaugagarðurinn er nývígður. Þarna er forláta rennibraut sem krakkar bæjarins og einstaka fullorðinn nota grimmt. Hreinn lúxus.

Um leið og ég les Blaðið heyrði ég vitleysinga og aumingja fyrir sunnan tala um lok búsetu á Vestfjörðum. Hér er ekkert fararsnið á mönnum. Engin ástæða til þess! Hér lifðu menn af í vosbúð  verbúðanna í áratugi og aldir og þeir sterkustu eru hér enn. Menn vilja fæstir flytja í verbúð í Grafarvoginum.

Og nú kemur holskeflan, því sjaldan skrifa ég nema það stingi.

Níels A. Ársælsson heitir gæðabloggari sem oft hefur líkt "ástandinu" á Vestfjörðum við helför gyðinga. T.d. hér http://nilli.blog.is/blog/nilli/entry/231624/

Því miður get ég ekki séð helförina hér. Ekki óku gyðingar og sígaunar um í Volvo jeppum í gettóum. Reyndar er hér nokkuð af Pólverjum sem gæti gefið assósíasjón, en þeir virðast vera hið besta fólk, sem vinnur sína vinnu eins og aðrir Vestfirðingar. Og kvótinn er ekki Entlösung þótt að bloggarinn Nilli haldi því fram.

Vestfirðingar sem væla, verða farnir að lifa Bónuslífi í Reykjavík með Glitnispunkta fyrr en varir, en Vestfirðingar sem þrauka, munu erfa landið. Hér er ekkert nema framtíðin. Það er hins vegar ekki hægt að segja um loftbelgskapítalismann sem allir dýrka fyrir sunnan. Ég hef ekkert á móti kapítalisma, en það form hans sem stundað er í landnámi Ingólfs er ónáttúra og systir hennar græðgin er með í leiknum.

Kumlarask

Kuml voru rannsökuð í Hringsdal í sumar og fyrrasumar.  Alltaf þykir merkilegt þegar kuml finnast á Íslandi og vildu allir Lilju kveðið hafa, þ.e.a.s. allir fornleifafræðingar vildu hafa grafið kuml. Það langaði mig líka að gera hér um árið er ég vann sem sérfræðingur á Þjóðminjasafni Íslands. Þá var aftur kominn til starfa Þjóðminjavörður sem hafi verið í löngu fríi. Hann tjáði mér að ég mætti ekki grafa kuml, en vildi þó ólmur vita hvar kumlið var. Ég var með doktorsgráðu í greininni, en mátti ekki grafa kuml. Þjóðminjavörður þóttist verðugari til þeirrar iðju en ég.

Sem betur fer hefur verið slakað á slíkum kröfum, enda þjóðminjavörður þessi fjarri góðu gamni, og kuml hafa nú verið rannsökuð á nýjan leik og meira að segja af fornleifafræðingum sem ekki hafa neitt doktorsskírteini í farteskinu.

Ég veit ekki hvort að við kumlrannsóknir eigi að sýna meiri varúð en við aðrar fornleifarannsóknir, en þjóðminjalög eru þó mjög skýr hvað varðar frágang allra staða þar sem fornleifarannsóknir fara fram. Þar sem fornleifafræðingar stunda árstíðabundnar rannsóknir og rask, sem ekki er björgunaruppgröftur vegna yfirstandandi framkvæmda, og ætla sér að snúa aftur til frekari rannsókna, verða að skilja þokkalega við svæði þau sem þeir hafa rannsakað. Ég hélt að það væri venjan og hafði aldrei grunað kollega mína um annað, eða þangað til að ég kom í Hringsdal hér um daginn og sá frekar ljóta hluti.

Þar hefur Adolf Friðriksson hjá Fornleifastofnun Íslands, sem er einkarekið fyrirtæki, grafið merkileg kuml. Þarna er líklega kumlateigur og fleiri kuml í vændum. En svona skildi hann við fornminjarnar fyrir veturinn. Kumlin eru opin eins og gapandi augntótt í landslaginu og rúst, sem er yngri en kumlin, er óvarin. Ljóst er að hleðslur munu springa og eyðileggjast í vetrarveðrum.

Þetta þykir mér illa að verki staðið, sérstaklega ef tekið er tillit til þess að Fornleifastofnun, sem tekið hefur hefur nafn landsins okkar, svo halda mætti að þetta sé ríkisapparat en ekki sjálfseignarstofnun, hefur öll tök á því að gera betur.

Rannsóknin fór síðast fram í júlí í ár, en ekki er búið að verja rúst og kumlin á fullnægjandi hátt. Ábyrgðarmenn rannsóknarinnar í Hringsdal, sem vissulega er merkileg rannsókn, verða að fara á stað í dag og ganga frá fornleifunum fyrir veturinn. Það geta, eins og kunnugt er, verið mikil frost á Vestfjörðum. Minjarnar eru galopnar fyrir hafi og válegum veðrum. Rannsóknarmenn í Hringsdal eiga vart innistæðu fyrir áframhaldandi rannsóknum á þessum stað ef ekkert verður gert til að verja minjarnar betur en nú er gert - nema að menn vilji láta vind og veður sjá um uppgröftinn á órannsökuðum minjum á þessum stað.

Friedman, hvar ertu?

 

Hérna áður fyrr í annálum, sem skrítnir karlar með gigt skráðu í moldakofum, var oft minnst á undur: Tvær sólir á himni, tvíhöfða hunda, áttfættan kálf og framandi dýr sem rak að landi, og sem ef betur er að gáð í dag reynast vera erlendir skipshundar. En í dag er aðalviðundrið á Íslandi hið íslenska efnahagsundur.

Ef dæma má út frá grein Hannesar Hólmsteins Gissurarsonar á bls. 24 i Fréttablaðinu í dag, á hið íslenska efnahagsundur sér þó alveg eðlilegar ástæður og Hannes telur, að við getum verið hreykin af kapítalistunum okkar. Sjá grein HHG: http://www.visir.is/ExternalData/pdf/fbl/070921.pdf eða hér http://hannesgi.blog.is/blog/hannesgi/entry/317826/

Ég hef fyrir venju að hreykja mér ekki af gerðum annarra, ekki einu sinni sigrum landsliðsins í fótbolta. Ég gleðst hins vegar yfir velgengi annarra, ef hún er byggð á góðum grundvelli. Vegna ættartengsla minna við Holland og þekkingar minnar á því hvernig kapítalisminn þróaðist og þróast enn í Niðurlöndum, er ég ekki eins fjálgur í að hreykja mér af velgengi landa minna í kapítalismanum eins og Hannes Hólmsteinn.

Ég var með fjölskylduna í Hollandi í síðustu viku fram í þessa. Þar tók ég vel eftir því að Hollendingar lifa enn eftir prinsippum 17. og 18. aldar um að aðhald skuli haft í anda Kalvíns, og öryggi og framsýni sem þeir lærðu best af portúgölsku gyðingunum og öðrum flóttamönnum sem tóku kapítalismann með sér eða fullþróuðu hann. Hvergi greiðir maður með greiðslukorti í Hollandi nema vera tékkaður í bak og fyrir, ekki einu sinni þótt það sé plátínukort. Hollendingar vilja helst seðla á borðið í míkróviðskiptum og helst einnig í makróviðskiptum.

Eftir að hafa skilið fjölskyldu mína eftir í kratahverfinu okkar í Danmörku, hélt ég til tímabundinnar vinnu minnar á  Íslandi. Það fór ekki fram hjá mér að margir farandverkamenn voru í flugvélinni, fyrir utan farandsveininn Bubba Morthens, sem var þó betur fataður en kollegar hans frá Póllandi. En eru pólskir lassarónar, sem raða sér fyrir utan flugstöðvarbygginguna og drekka fimm bjóra áður en einhver listrænn íslenskur "kapítalisti" kemur og sækir þá með eitt nafnnúmer fyrir 50 manns, sú "lífræna íslenska sköpun", sem Hannes Hólmsteinn skrifar um í merkri grein sinni í Fréttablaðinu í dag?

Einkavæðing er holl, en er einkavæðing á Íslandi alvöru einkavæðing? Ég leyfi mér að draga í efa að ör framsala á fyrirtækjum eða á hlut í fyrirtækum, sem bjargað hafa verið úr krumlu þjóðnýtingar, sé holl. Og þá skiptir mig engu máli hvort til hafi orði 370 milljarðar króna fyrir samfélagið.  Hreyfingar í íslenska efnahagsundrinu er býsna hraðar. Svo hraðar, að manni finnst maður vera í fjölleikahúsi þar sem einungis koma fram töframenn sem sérhæfa sig í hröðum bellibrögðum. 

Er fjármagnið orðið virkara en það var áður á Íslandi? Að sjálfsögðu. En virkt fjármagn er ekki endilega öruggt fjármagn og virkt fjármagn gæti skyndilega orðið ofvirkt, enda íslenska viðundrið aðeins lítil bóla á stærra viðundri, sem gæti lent í annálum fyrr en varir, ef einhver olíumógúll á sandhrúgu í suðurlöndum sýndist svo. Íslenskir kapítalistar eru líka greinilega fæstir í því að skapa auð í almenningsþágu. Sala á hlut í Icelandair nýlega sýnir að börn Framsóknarhyggjunnar eru söm við sig. Gamli sveitakapítalisminn lifir enn góðu lífi á Íslandi - eins og grein Lúðvíks Hermanns-Gizurarsonar undir grein Hannesar sýnir vel. Menn dreymir gamla daga.

Heavy stuff, these Icelandic economics

Sólarmegin í Auschwitz

  

Nýlega eru komnar í leitirnar myndir frá Síðari heimsstyrjöld, sem bandarískur dáti geymdi í fórum sínum þangað til í desember í fyrra. Myndirnar, sem eru 116 talsins, gaf hann nýlega U.S. Holocaust Memorial Museum i Washington. Myndirnar sýna hið ljúfa líf í útrýmingarbúðunum í Auschwitz í júnímánuði 1944, þegar útrýmingar voru flestar í búðunum.

Meðan hundruð og stundum þúsundir manna voru myrtar á hverjum degi nutu böðlarnir lífsins eins og ekkert hefði í skorist. Þarna hefur greinilega verið nóg af Mozart og Móselvíni, meðan að Felix Mendelssohn-Bartholdy var í banni. Það verður ekki skafið af germanskri menningu, hún hefur byggst upp á sterku fólki. Maður þarf að vera sterkur til að geta sýnt af sér það rólyndi sem myndin hér að ofan ljómar af, þegar maður er nýkomnir úr vinnunni þar sem þeir kæfðu nokkur hundruð gyðinga- og sígaunabörn með gasi. Ach mein lieber Augustin, sterkt fólk Þjóðverjar ....

Meðal þeirra sem sjást á myndunum sem nú eru komnar í leitirnar eru dauðalæknirinn Josef Mengele og foringinn Karl Höcker, sem andaðist í hárri elli árið 2000.

Hér http://www.ushmm.org/research/collections/highlights/auschwitz/ getið þið skoðað albúm Karls Höckers

Danskir dagar

  

Danir eiga ekki sjö dagana sæla þessa stundina. Ef það eru ekki Íslendingar sem kaupa ættarsilfur þeirra, þá sækir Al Quaeda að þeim.

Nyhedsavisen, blað í eigu Íslendinga, greinir frá því http://avisen.dk/alqaedahjemmeside-soeger-selvmordsbombere-danmark-190907.aspx, að það séu líka danskir dagar hjá hryðjuverkamönnum, sem ku leita eftir sjálfsmorðingjum til að gera usla í nafni Allah í Danmörku.

Eins og sumir Danir líta á sögu sína árin 1940-45 er væntanlega hægt að búast við því að margir þeirra taki vel á móti þeim sem vilja brjóta allt og bramla í landi þeirra. Sumir Danir eru nefnilega á þeirri skoðun að samvinnustefna þeirra við nasista hafi verið snilldarlegasta lausn Danmerkursögunnar.

Nú geta samvinnufúsir Danir haft samvinnu við Al Qaeda og bölvað og ragnað hættulegum Íslendingum í útrás. Kannski senda þeir Íslendinga úr landi, eins og gyðinga forðum?

Skál fyrir Hermanni!

Nú hefur DNAið talað og Lúðvík Gizurarson er 99.9% Hermannson og 0,1% Gizurarson. 

99,9%. Það er náttúrulega ekki hægt að hrekja það.  Eða hvað? Var ekki einhver sem sagði Errare humanum est og annar sem leyfði sér að segja Errare machinum est!

Ég bloggaði fyrr í ár um þetta merka faðernismál og lagði þá fram þessa myndasyrpu af Gizurarbörnum, Hermannsyni (sonum) og feðrunum, og spurningar í tengslum við hana.

Nú leyfi ég mér undrandi, já 99,9% undrandi, að krefjast þess að líka verði gerð DNA rannsókn á vessum úr (hálf) systkinum Lúðvíks Giz... afsakið Hermannsonar. Hvernig geta þau "hálfsystkinin" verið svo lík hver öðru og Steingrími, en ekki föður sínum? Var móðir Lúðvíks og hennar ætt lík ætt  Hermanns Jónassonar? Fleiri spurningar hafa vaknað en þær sem svarað hefur verið.

Var konan á myndinni móðir Steingríms Hermannssonar?

 

Palestínumenn fremja skemmdaverk á fornleifum

Ég er fornleifafræðingur, og sem fornleifafræðingur fordæmi ég Palestínumenn fyrir skemmdaverk á fornminjum og vanvirðingu þeirra á heilögum stöðum annarra.

Myndu Íslendingar grafa skurði yfir þvera og endilanga Þingvelli? Palestínumenn grafa skurði á óhemjulegan hátt í helgustu borg heims.

Palestínumenn hafa umsjón með musterishæð í Jerúsalem. Gyðingar eru ekki velkomnir þar og hundruð saklausra manna hafa verið myrtar vegna æðis sem greip um sig er forsætisráðherra Ísraels leyfði sér að fara í heimsókn á Musterishæð. Fornleifavernd Ísraels þorir ekki að hvessa klærnar gegn þeim sem hafa umsjón með musterishæð.

Nú virðist sem frændi einhvers háttsetts preláta á Musterishæð hafi unnið útboðið í framkvæmdir á hæðinni. En Það er greinilega engin skipulagsstofnun til staðar og enginn áhugi á fornleifunum.

Sagt er að Musterishæð sé einn af heilögustu stöðum Íslam. En fer maður svona með heilaga staði?:

 

Eða svona?

 

Eða svona?

 

Það þurfti meira rafmagn í Al Aqsa moskuna. Þess vegna fór þessi eyðilegging fram.                                                                

Fornleifar, m.a. byggingarbrot með skreyti, gólfhellur úr marmara og öðrum aðfluttum steintegundum, og brot úr fornum gler- og leirílátum voru grafin upp án eftirlits fornleifafræðinga.

Svona skemmdaverk eru aðeins unnin í þjóðfélagi, þar sem eitthvað mikið er að. Hvers konar trú leyfir svona helgispjöll? Hvers konar virðingarleysi er rótin að þessum skemmdaverkum?

Gamla Jerúsalem hefur síðan 1981 verið tilnefnd til World Heritage listans, sem Þingvellir eru komnir á (ég var meðhöfundur að fyrstu skýrslunni til að kynna Þingvelli fyrir UNESCO apparatinu). En enn heyrist ekkert frá World Heritage bákninu (UNESCO) um eyðileggingar Palestínumann á fornleifum. UNESCO hefur einungis verið upptekið af því að banna Ísraelsmönnum að stunda fornleifarannsóknir í hinni fornu borg.

Hér getið þið séð nýjasta glæpavídeóið frá Musterishæð.

Hér getið þið mótmælt eyðileggingunni.

PostDoc hefur áður skrifað um þetta efni: http://www.postdoc.blog.is/blog/postdoc/entry/124173/

Ekki fyrr?

   

Ekki fyrr en byssurnar hafa þagnað?  Ljósmynd Mia Farrow.

 

Íslendingar taka þátt þegar byssurnar þagna, segir talsmaður Utanríkisráðherra. Þetta eru skilaboð utanríkisráðuneytisins til Darfúr. Hundruð þúsundir manna eru fallnar í herferð sem aðeins er hægt að kalla þjóðarmorð.  Íslendingar ætla samt ekki að  lyfta litla fingri í Darfúr, fyrr en böðlar Allah í Dschumhūriyyat as-Sūdān hafa drepið enn fleiri. Fyrr þagna ekki byssurnar - verið viss um það.

Það hefur sýnt sig, að allar "munnlegar" aðgerðir gegn hryðjuverkum, sem skráðar eru hátíðlega í alþjóðasamþykktir, duga skammt til þess að stöðva morðæði Íslömsku Þjóðarfylkingarinnar í stærsta landi Afríku.  Það er verið að berjast í nafni Allah, og þegar það er gert þagna byssurnar ekki fyrr en allir andstæðingarnir liggja í valnum.

Graf sem sýnir tölu myrtra í Darfúr, sem eykst þrátt fyrir "stóra" vísifingurinn og flottu loforðin. Sjá www.reddarfur.dk

Íslendingar telja það hinn nauðsynlegasta hlut að styðja baráttu Palestínumanna, sem margir hverjir vilja koma eina lýðræðisríkinu fyrir botni Miðjarðarhafs fyrir kattarnef. Miklu nær væri fyrir valkyrjurnar í Utanríkisráðuneytinu að sparka í punginn á Frökkum,  Rússum og Kínverjum sem gera böðlunum í Súdan kleift að útrýma aðframkomnu fólki í Darfúr. Rússar selja böðlunum hátæknivopn og Frakkar kaupa olíu af Súdan (sem kann þó að breytast með Sarkozy í embætti forseta).

Þegar byssurnar þagna í Darfúr, eru stjórnvöld í Súdan væntanlega búin að ljúka ætlunarverki sínu. Pútín og pakk hans hafa grætt á tá og fingri og Frakkar aka um á blóði Darfúrbúa og Íslamska byltingin þakkar Íslendingum fyrir aðgerðarleysið.

Íslendingar bíða þangað til og gera ekki neitt. En þangað til geta menn auðvitað skeggrætt um uppáhaldsumræðuefnin sín: þvagleggi, þarmahreinsun og mikilvægi þjóðarinnar á meðal þjóðanna.

Ég leyfi mér svo að minn á, að Íslendingar gerðu heldur ekki neitt til að hjálpa gyðingum í 4. og 5. áratug síðustu aldar. Heldur ekki þegar byssurnar höfðu þagnað.

"To judge by what is happening in Darfur, our performance has not improved much since the disasters of Bosniaand Rwanda," .

"Sixty years after the liberation of the Nazi death camps, and 30 years after the Cambodian killing fields, the promise of ‘never again' is ringing hollow."

                                            Kofi Annan