Hitti Jack Black í Kew

Ég nýkominn heim úr smá bæjarferð. Ég fór með familíuna til Lundúna sem liggur í fjandsamlegu landi. Ég reyndi að búa eins nálægt Dorrit Moussaieff og mögulegt var, en ég hafði því miður ekki tíma til að taka á hana hús. Mér sýndist ég sjá hana í Harrods. Við eru nokkur sem lánið lék við þótt engar kúlur væru í pokanum.

Á sunnudag sigldum við frá Westminster til Kew. Þar, í hinum konunglega garði heimsveldisins, sáum við tré og plöntur og aðra grósku í þungbúnu veðri.  Skyndilega var þó eins og við værum í miðri gamanmynd. Við fórum inn í hús, þar sem börnin geta leikið sér og fræðst um fræbbla og frumur.  Allt í einu stóð þarna lágvaxinn og þéttur maður í grænni treyju, sem mér fannst ég kannast við, svo ég kunni ekki við annað en að kinka kolli til hans og hann heilsaði á móti. Ég spurði sjálfan mig: Er þetta Íslendingur eða hef ég hitt manninn í Danmörku? Séra Svavar Alfreð?? Nei of lítill.

Svo segir konan mín, sem er svo mannglögg,  að þarna færi  frægur leikari úr Hollywood. Ég gat ekki annað en samþykkt það, en mikið hefur þeim farið aftur síðan Poul Newman var og hét.  Ég gat þó alls ekki komið fyrir mig nafninu á feita manninum, en hef nýlega  séð kvikmyndir þar sem hann fer á kostum sem mexíkanskur glímumaður og  aðra þar sem maður gerist kennari í einkasóla, en kennir börnunum mestmegnis rokk.

Ég dáðist að því hve lítið Bretar voru að abbast upp á kappann þarna í garðinum. Ef þetta hefði verið US of A, þá hefði verið panic á svæðinu. Ég hef séð meiri örtröð í kringum Bubba og Bo en í kringum leikarann í Kew. Ég hef líklegast verið kanalegastur þarna í Kew-garði. Mig langaði voða mikið að gerast papparass og taka mynd af manninum, en konan mín bannaði mér það harðlega. „Hvað myndir þú gera ef einhver tæki mynd af þér?", spurði hún. „Ég er ekki stjarna", sagði ég, og setti myndavélina í vasann. Black var þarna með konu sinni tveimur börnum, forljótri barnapíu og manni sem ekki leit út fyrir að vera bodyguard.

Á stjórnarfundi í sagnfræðifélagi gyðinga í Danmörku í fyrradag greindi ég svo frá þessari nálægð minni við fræga fólkið og frá tveggja metra háum manni sem ég sá á flugvellinum sem var í ballettpilsi. Og viti menn, þar kunnu allir deili á þybbna manninum. Þetta var engin annar en Jack Black og hann er leikari, söngvari og meira að segja gyðingur. Þá var það á hreinu. Shalom, I like him.

Jack Black hefur reyndar átt frekar lélegt ár í ár og þess vegna hefur hann líklega aðeins haft ráð á því að taka fjölskylduna með til London. Síðasta myndin hans Year One, sem kostaði 60 milljónir dala í framleiðslu, hefur aðeins halað inn 48 milljónum. Hún mun vera afburðarléleg. Kreppan slær víðar niður en á Íslandi.

Athugasemdir

[Kristján Sveinsson (IP-tala skráð) 1.8.2009 kl. 10:05]

Gott er að þið eruð vel heimt úr hættuför á óvinalendur.

Flott hjá ykkur að heimsækja Kew. Þar er gaman. Þarna get ég ráfað daglangt með trýnið í jörðinni að skoða rarítet jurtaríkisins. Og þá er ég svo uppnuminn að ég yrði einskis var þótt þrjátíu heimsfrægir gyðingar gengju á höndum framhjá. Sástu gamla brauðaldintréð hans Joseph Banks? Hann er nú soldið frægur á Íslandi, a.m.k. meðal nörda, þótt löngu sé dauður en margar af plöntunum sem hann lét koma fyrir í Kew dafna þar enn prýðilega. Ég er svag fyrir frægum plöntum en þekki ekki leikarastóðið hvert frá öðru frekar en rollurnar í sveitinni í gamla daga.

[Vilhjálmur Örn Vilhjálmsson, 1.8.2009 kl. 10:41]

Ævinlega sæll Kristján,

Íslendingar þekkja bara eina tegund af Banks og þeir eru allir farnir á hausinn.

Joseph heitinn, sem ég hef lesið nokkrar bækur um og eftir (enda telst ég til nörda), hefði betur látið okkur hafa brauðaldintré á Íslandi. Nú þegar Spánverjar koma og taka allan fiskinn í boði Jóku og Steina er vart neitt eftir en að naga brauðaldin og sleikja skósóla.

Ég veit þú ert mjög svag fyrir alls kyns grasi, en Black Jack er nú svo sérstakur sauður, að auðvelt er að þekkja hann úr stórri hjörð.  

En fjandakornið, ekki myndi ég missa af 30 gyðingum gangandi á höndum í Kew. Útsæði Salómons eru oft fjölbreyttar plöntur og Rósir leynast þar inn um steina. Ólafur forseti hefur víst náð í eina slíka blómarós, enda veitir rekaviðardrumbi eins og honum ekki af gangandi gyðingum.

[Vilhjálmur Örn Vilhjálmsson, 1.8.2009 kl. 11:12]

Við sáum líka aðra rassa en Jacks Blakks í Kew. Hneta coco de mer (Lodoicea maldivica) varð líka á vegi okkar:

[Kristján Sveinsson (IP-tala skráð) 1.8.2009 kl. 15:40]

Ehem.

Mér sýnist þetta nú vera einhvers konar blackass. Ertu viss um að Jack hafi tekið allt með sér þegar hann fór?

Kveðja góð í bæinn.

K.