Hver vinnur ?

 

 

Íslenska landsliðið í handbolta keppir nú til úrslita þegar þetta er ritað. Það er annað hvort silfur eða gull í Beijing 2008, þótt að silfur sé nú líklegast. Landsliðað á hvortveggja skilið og fá það sem þeir verðskulda, "strákarnir okkar", alveg sama þótt að þeir verði burstaðir.

Hins vegar fá þeir sem sitja í fangabúðum í Kína hvorki silfur né gull. Hús 79 ára konu var rifið niður án skaðabóta svo íþróttahátíð mannsandans gæti farið fram í Beijing. Hún var sett í endurhæfingarbúðir vegna þess að hún ritaði nafn sitt á lista, þar sem hún óskaði eftir því að taka þátt í mótmálum. Gamla konan kemst ekki á verðlaunapall eins og strákarnir okkar.

Engir eðalmálmar og medalíur verða gefnir þeim sem mótmæla mannréttindabrotum í Kína. Engin silfurverðlaun fyrir það sem sitja í stofufangelsum eða þá sem ekki mega fara á Veraldavefinn. Engin verðlaun fyrir þá sem langar að hugsa frjálst í Kína. Það verður væntanlega heldur ekki silfur eða gull í kúlunum sem Kínverjar verða skotnir með í hnakkann um næstu helgi, þegar ógnarstjórnin í Beijing byrjar stórhreingerningar sínar eftir Ólympíuleikana.

Gull eða silfur til Íslands? Alveg sama, segir forseti Íslands, það verður þjóðhátíð um næstu helgi. Blóðrauðar veigar verða drukknar með grillkjötinu. Partý, partý.

En það verður engin þjóðhátíð í Tíbet eða veisla í kínverskum fangabúðunum um næstu helgi. Eru öll tárin sem felld hafa verið fyrir Tíbet á Íslandi til einskis? Brunnu kertin út um leið og samkenndin með hinum þjáða lýð í Kína?  Fá gulldraumar og silfuræði Íslendinga til að gleyma?  

Gull- eða silfurdrengirnir fá verðlaun sem eru blóði drifin. Mannrétttindabrot fengu stærstu gullpeninginn í Beijing. Silfur er svo sem ágætt. Heimsmarkaðsverð á gulli hefur líka lækkað svo mikið upp á síðkastið og mannréttindi eru víst einskis virði lengur.  15:10 það lítur illa út í hálfleik. Ætli sér kominn hálfleikur í Kína öfganna.

Til hamingju.

Athugasemdir

[Sigurður Þór Guðjónsson, 26.8.2008 kl. 21:51]

Hér ætla ég að gera athugasemd því ég sé að menn forðast að gera athugasemdir við þau fáu blogg sem eru á þessum nótum í silfvurvímunni sem nú ríkir. Þau eru bara hundsuð. Ég tek undir meginhugsunina hjá þér. 

[Vilhjálmur Örn Vilhjálmsson, 28.8.2008 kl. 10:26]

Þú vinnur eins og venjulega, Sigurður. Ég held barasta að þú sért með betri mönnum sem ég hef hitt hér á blogginu.

Mér þótti heimsóknarleysið svo hrópandi, að ég hugsaði eins og þú; Að Íslendingar væru í vímu og vildu ekki heyra neitt ljótt eða lesa, meðan þeir voru að ná sér. Ég ákvað að skoða ekki nein blogg næstu daga, kannski vikur.  

Ég samgleðst auðvitað afreksmönnunum, en ég hafði vonast til að verðlaunin myndu einmitt skerpa sjón manna og efla stuðning við baráttuna fyrir frjálsu Tíbet og mannréttindum og tjáningarfrelsi í Kína. Ég vona að ráðamenn þjóðarinnar gleymi því ekki í ræðum sínum næstu dagana.