Þjóðviljinn og vilji þjóðarinnar

 

 

Mikið rit um mannlega galla og breyskleika hefur verið gert aðgengilegt fyrir almenning. Nú geta allir, sem tíma hafa og sagnfræðilegan áhuga, flett Þjóðviljanum á Timarit.is og orðið margs vísari.

Á Íslandi var til fólk sem með betri vitund vildi gera Ísland að leppríki Sovétríkjanna. Til voru Íslendingar, sem gerðu sér grein fyrir öllum skítleika nasismans, sem ekki sá hvernig "kommúnisminn" hafði verið afbakaður til að fremja verstu glæpi mannkynssögunnar. Menn urðu vitni að, og sumir tóku þátt í, þessum glæpum og flestir þegja svo þunnu hljóði í dag og skammast sín ekki einu sinni.

Ég hef brugðið mér í ferðalag aftur í tímann og flett Þjóðvilja Kaldastríðsáranna. Þetta gefur mér nýjan skilning á þeirri umræðu sem nú tröllríður samfélaginu. Margt af því fólki sem skrifaði í þetta blað og ólst upp með því, er enn á ferðinni og sjálfsálit þess er enn það sama. Það telur sig vera betra en annað fólk. Vinstri menn töldu sig þá sem og nú hafa einkarétt á ákveðnum þáttum mannlífsins. Þeir töldu sig vera réttlátari, með betri málstað, vera menningarlegri og mannúðlegri; töldu sig meiri náttúrverndarsinna en aðra og svona mætti lengi telja. Þessi fullvissa um vera boðberar hins réttláta sósíalisma var blandað saman við endalausar stælingar við "íhaldið", sem frekar einkenndust á öfund og hatri í garð þeirra sem gekk fjárhagslega betur í lífinu, en af eiginlegri stéttarbaráttu.

Ég ætla þó ekki að gera lítið úr mikilvægi Þjóðviljans fyrir stéttarbaráttu, en þeir sem börðust enduðu flestir með því að hugsa fyrst og fremst um sjálfa sig, sem er ekkert óeðlileg hegðun hjá mannverunni.

Viðhorf, sem sett eru fram í Þjóðviljanum, sverja sig oft í ætt við múgæsingu og fordómadýrkun í bland við barnalega þjóðernisrómantík. Þetta kom t.d. í ljós í umræðu um varnarmál. Úrkynjunin var samkvæmt Þjóðviljanum náttúrulega mikil á Vellinum. Kanar voru villimenn sem eitruðu fyrir Íslendingum. Kanasjónvarpið sýndi að sögn Þjóðviljans myndir sem kvikmyndaeftirlitið myndi banna börnum á Íslandi. Hætturnar voru margar. Kanar voru klámkarlar hættulegir hreinni, íslenskri náttúru.

Meðferð Kínverja á Tíbetbúum voru líka í brennidepli þá eins og nú. Þá var yfirtaka Kínverja á Tíbet fjálglega líkt við dvöl varnarliðs NATO á Íslandi. Jakobína  Sigurðardóttir skrifaði grein sem ég flokka undir andlegan fyrirhyggjufasisma íslenskrar sveitakonu. Jakobína sér Ísland í krumlum Kanans eins og Tíbet undir hæl Kína. Þvílíkt ímyndunarafl?

Allt sem rússneskt var eða frá austantjaldslandi, taldi Þjóðviljinn frábært, og á 7. áratugnum leið ekki sá dagur að ágæti Austur-þýskra skut- og versmiðjutogara, Traktora í Novosíbirsk og plasmavéla í Sovételdflaugum væri tygjað. Ef Louis Armstrong lék í Austur-Berlín, var það fyrst í frásögur færandi. Allt kommaísenkram og sósíalistabull var sagt vera vegurinn til sæluríkisins. 

Eftir 1970, þegar raunsærri menn fóru að skrifa í blaðið um andhóf og mannréttindabrotin, var spjótunum í staðinn beint að framförum í efnahagslífi á Íslandi. Álverin áttu að sögn að eyðileggja aðalefnahag Íslendinga, fiskveiðarnar.  Menn áttu alltaf erfitt með orsakagreiningu á Þjóðviljanum.

Árið 1965 var mikil umræða um álver, eins og í dag. Lesið eftirfarandi greinar um "Álauðvaldið" og áhrif þess á Ísland. Sjá hér, hér, hér og hér.   Fer ekki hrollur um ykkur? Vinstri menn nútímans, sem eru mestmegnis mikil náttúrubörn, virðast hafa geymt árganga af Þjóðviljanum undir koddanum síðan 1965.  Árið 1965 dýrkuðu vinstrimenn ríki sem menguðu mest allra hér í heimi.

Í dag dýrka fyrrverandi Þjóðviljamenn ríki, þar sem miðaldahugsunarháttur er ríkjandi og mannfrelsi er fótum troðið. Er ekki hægt að finna eitthvað betra að hanga aftan í en einræðisherra og illa upplýstan lýð sem hefur Múhameð sem æðstan guð í stað Leníns? Af hverju er fólk, sem upp til hópa eru trúleysingjar, mestu trúarofstækismennirnir? Þau ríki og stefnur sem vinstrimenn styðja í sameiginlegu hatri á BNA og vestrænum gildum, losuðu Íslendinga við herinn.  Það voru ekki endalausar söngæfingar og kröfugöngur herstöðvanastæðinga, sem enginn missti af ef hann las Þjóðviljann, þar með talinn undirritaður.

Ýmsan mikilvægan fróðleik er þó líka að finna í Þjóðviljanum. Þetta er sagnfræðiheimild.

Minnugir menn muna líklega vel eftir erfiðleikum Flugleiða í lok 8. áratugarins og tillögum hanskasósíalistans Ólafs Ragnars til lausnar þeim. Viðtal við hann frá 1980 sýnir að það sem hann hafði til málanna að leggja þá var nærri búið að koma í veg fyrir ferðagleði hans og kammerads Ingibjargar Sólrúnar á 21 öld. Ólafur skrifaði : Hvaða vit væri í því fyrir þjóð sem stendur frammi fyrir því eftir örfá ár að sinna eingöngu Evrópu- og innanlandsflugi að ráðast í byggingu flugstöðvar á Keflavíkurflugvelli og það fyrir bandarískt fé, sem stæði kannski tóm að meginhluta?  - Svona var nú Ólafur forseti vor lélegur spámaður.

Þjóðviljinn er fyrir löngu allur.  Margir syrgja hann sárt. En vilji þjóðarinnar var annar en rausið, ruglið, afturhaldið, öfundsýkin og smámunasemin í aðstandendum Þjóðviljans.

 

Var sovétdraumurinn þvílík martröð að hann gerir vinstrimenn nútímans hrædda við 2-3 álver? Þeir voru ekki svona hræddir við ofveiðar Ráðstjórnarríkjanna sem þeir rómuðu á sínum tíma.

Athugasemdir

[Gunnar Rögnvaldsson, 30.6.2008 kl. 15:02]

Kærar þakkir fyrir þessa góðu grein Vilhjálmur

Já það fer hrollur um mann. Svo sannarlega.

Já núna eru menn að ræða hugsanlegt "verðfall" á kapítalista-áli sem "kanski" á eftir að koma einhversstaðar inni í framtíðinni. En allir virðast búnir að gleyma verðfalli hugmynda. Eða réttara sagt gjaldþroti hugmynda og skoðana. Það versta sem dunið hefur yfir mannkynið eru hugmyndir stærstu glæpastofnunar mannkyns: Sovétríkjanna.

Ennþá, eftir morðin á 40-70 milljón saklausra þegna Sovétríkjanna, eru 8 af hverjum 10 blaðamönnum kommar og hálfkommar í Evrópu. 7 af hverjum 10 svokölluðum intellectuals eru einnig kommar og hálf-kommar í Evrópu. Ennþá !!!

Og núna á svo að sjanghæa Íslandi inní skriffinna- og áætlunargerðarveldi ESB sem nú þegar er farið að manna sig upp í að vera niðurbrjótur á frelsi og frelsishvöt þjóða og sem nú þegar ar farið að breytast í DDR-light.

Núna eru álið og verin komin á svarta listann og ESB er núna bjargvætturinn. Því þá þurfa menn aðeins að opna dósina og upp mun flæða ný hamingja í evrum framsköffuð af embættismönnum.

Og ef maður dirfist að minnast á Bandaríkin þá er svarið: "það stendur nú ekki svo vel til þar maður". Gerum eitthvað annað en það sem virkar.

Og auðvitað getur umhverfið aldrei fallið í verði. Nei það er alls ekki hugsanlegt. Alls ekki hugsanlegt eftir móðu harðindanna á malbikinu, flúoreitrunar gömlu Heklu og kalinna túna ísavetra. Þetta er allt liðin tíð, of course. Engin álver, takk, þau eru svo hættuleg maður. Það stendur þarna svart á hvítu í Þjóðviljanum.

Kærar þakkir

Kveðja

[Eiður (IP-tala skráð) 30.6.2008 kl. 15:53]

Þetta var þörf upprifjun. Nú þarf einhver að  taka  sig til og  kanna allar þær  ræður um  forseti  vor  flutti um náttúruvernd meðan hann sat á þingi. Það er líklega tiltölulega  fljótlegt.

[Snorri Bergz, 30.6.2008 kl. 17:55]

Jamm, Villi, enn og aftur erum við sammála. Ég tók mig nú til fyrir nokkrum árum og fletti Þjóðviljanum frá upphafi og nánast til enda. Ég vil halda því fram að sá lestur hafi stórskemmt persónuleika minn vegna hins yfirgengilega Torfa-nöldurs og neikvæðni (nema allt gott í Sovét). Ég hef því pottþétta afsökun fyrir því að vera svona skrítinn: Jú, ég las marga áratugi af Þjóðviljanum. Merkilegt að ég skuli ekki vera skemmdari en ég þó er!

P.S. Mbl.is menn mættu nú lesa nokkra árganga af gamla Viljanum; þeir gætu þá farið að skrifa betri íslensku!

[Aðalbjörn Leifsson, 30.6.2008 kl. 18:22]

Sæll Vilhjálmur, hugsaðu þér á Íslandi í dag eru til menn hægrisinnaðir sem vilja fá inn í landið sovézkan þungaiðnað. Álver og hver veit kjarnorkuver. (Einhverjum gæti þótt það fyndið og sniðugt að framleiða þungt vatn handa Irönum og Saudum!)

[Vilhjálmur Örn Vilhjálmsson, 30.6.2008 kl. 18:58]

Við skulum halda auga með slíkum mönnum Aðalbjörn. Þeir hljóta að hafa ljóta aurasál, en limir þeirra munu visna og limir afkomenda þeirra um alla eilífð og það alveg sama hve limalangir menn eru.

Snorri, ævinlega blessaður. Ég var farinn að halda að þú hefðir skaðast þarna á tímabili. Nú skil ég.

Ég segi eins og Hippókrítíkos. Hver nennir að lesa allar ræður Ólafs um náttúruvernd, þó þær séu fáar? Eiður fær þann heiður og lætur  okkur vita hvað hann finnur.

Sæll Gunnar Rögnvaldsson, mikið er ég alltaf sammála þér. Ég hef líka þjáðst í ESB í allmörg ár. Sé ekkert sem mælir með því að Íslendingar nálgist þann fjanda, nema að þeir sakni fjörsins á böllunum bak við járntjaldið.

[Sigurður Þór Guðjónsson, 2.7.2008 kl. 10:50]

Það getur verið að sumir skammist sín ekki en það má heldur ekki gleyma því að nokkuð marga sker alveg í hjartað.