Þegar íslensk lögregla varð alþjóðleg

 

 

Ég hef áður skrifað frásögn mína af óeirðum í Sundahöfn árið 1979, sem ég tók þátt í með tilheyrandi steinasöfnun/-kasti, því þá var ég svo syndlaus.

Óeirðirnar brutust út þegar herstöðvaandstæðingar mótmæltu komu herskipa til landsins. Þetta hófst allt settlega. Árni Björnsson þjóðháttafræðingur sat inni í bíl með kaffibrúsa og gjallarhorn og skemmti sjálfum sér með rímum. Það var mjög kalt og frekar hvasst, en fólk hitaði sér með því að syngja ástralskan slagara og sumir voru með þorskausa á kústasköftum, sem þeir hristu óðslega. Allt í einu kom fjöldi lögreglumanna út úr kornskemmu einni stórri á hafnarbakkanum og fór að berja sér til hita á mótmælendum. En það verður að viðurkennast að mótmælendur hófu leikinn með málningarslettum og öðrum skrílslátum. Fólk var handtekið og ég man að nokkrir MH-ingar héldu því fram á lögreglustöðunni, eftir að þeim var ekið þangað í rútu, að þau hétu Karl Marx, Rosa Luxemburg og Vladimir Lenin. Lögreglan fann ekki það fólk í þjóðskrá. Þrír herstöðvaandstæðingar voru fluttir á slysadeild. Ég var frár á fæti og náðist ekki, nema á myndavél.

Ég skoðaði nú um daginn frásagnir Þjóðviljans, sem gerði sér mjög mikinn mat úr þessu í að minnsta kosti 10-12 daga eftir að stimpingarnar áttu sér stað. En útlegging Þjóðviljans var nokkuð öðruvísi en hjá Mogganum.  Einar Karl Haraldsson, sem nú er með skæting við fjölmiðla fyrir Össur Skarphéðinsson, skrifaði fréttirnar á Þjóðviljanum og velti síðar fyrir sér  hvort lögreglan væri farinn að apa eftir aðferðir stórborgarlögreglu gegn mótmælendum.  Böðvar Guðmundsson skrifaði einnig áhugaverðan pistil um atburðinn þann 30. september. Þetta gerðist allt á skrítnum tímum. Menn geta best séð það með því að lesa Þjóðviljann frá þessum tíma. En mikið af sama ruglinu er enn í gangi hjá Þjóðviljaliðinu og afkomendum þess.

Almenningur hefur harla mikið velt fyrir sér lögreglu- og hermáladraumum Björns Bjarnasonar á síðustu árum. Árið 1979 var Steingrímur Hermannsson hins vegar dómsmálaráðherra, í hinni mannmörgu stjórn Óla Jó með allaböllum og krötum, áður en upp úr sauð.  Ætli Steingrímur muni hvaða fyrirskipanir komu að ofan frá honum, þegar lögreglan gekk til atlögu gegn þeim sem mótmæltu komu NATÓ herskipa árið 1979. Þetta er vonandi ekki NATO Classified upplýsingar sem er búið brenna í tunnu?

Athugasemdir

[Vilhjálmur Örn Vilhjálmsson, 29.6.2008 kl. 17:15]

Dönum hefur nú sumum þótt um og ó og hafa helst viljað senda mig eitthvað lengra í burtu. Eitt sinn fékk ég bréf frá gömlum manni sem þótti óhæfa að Íslendingur væri "að skrifa illa um Dani" og helstu afrek þeirra.  Það haði ég aldrei gert. Karlinn er dauður.

Ljóst er nú að Aldirnar Allar hafi allar verið ritskoðaðar. Önnur minna áreiðanleg rit, sem tekin eru saman af sérfræðingum, eru enn verri. Einn sagfræðingur hefur skrifað doktorsritgerð um vaðmál. Það er nú meiri lopinn. Mér hefur aldrei tekist að ljúka lestri á ritgerðinni.

Ég var að mestu búinn að losa mig úr viðjum stjórnmálaofstækis áður en ég setti stúdentshúfuna á kollinn. En ég sótti aldrei um sumarjobb hjá löggunni. Ég sagði skilið við allt þetta veraldlega rugl er ég flutti frá Íslandi haustið 1980. Bjó reyndar í kommúnu í Árósum í 2 mánuði haustið 1980. Þar hentu menn Jaffa appelsínum sem ég keypti í ruslið vegna þess að "blóð Palestínumanna" væri í ávöxtunum. Ég varð að leiðrétta þá og sagði þeim að í appelsínunum væri djús.

[Aðalbjörn Leifsson, 30.6.2008 kl. 18:16]

Vilhjálmur ert þú afkomandi Davíðs konungs, þess sem var svo slyngur með slöngubyssuna?

[Vilhjálmur Örn Vilhjálmsson, 30.6.2008 kl. 18:32]

ו

Waw hét afkomandi Davíðs og hann fann upp naglabyssuna.