Hinn margsaga Johnny Bosnitch

 

 

Ég leyfi mér að furða mig á þessari yfirlýsingu Hr. Bosnitchs um að hann hafi verið vitni við brúðkaup Bobby Fischers og Myoko Watais.

Þegar Fischer var leystur úr haldi sagði Hr. Bosnitch aldrei annað en að Myoko Watai væri unnusta Fischers. Hann talaði um að hann ætlaði í mál við japönsk yfirvöld fyrir Bobby Fischer, þessi viðbjóðslegu yfirvöld, sem Fischer kallaði svo, um það leyti sem Bobby Fischer vildi gerast þýskur borgari.

Það var kannski ástæða til að leyna þessum hjúskap þangað til nú? Sér John Bosnitch einhverja sérstaka þörf á því að segja Íslendingum sannleikann nú?

Þegar Hr. Bosnitch talaði við umsjónarmann ástralsks útvarpsþáttar, sem ber nafnið PM kl. 18:29 þann 4. mars 2005 sagði hann þetta:

"His lawyer's not been able to visit him. He has been denied his telephone rights, which he had every day in the past. His fiancé has been not [sic] allowed to meet with him and most insultingly, the Icelandic delegation that flew around the entire globe and gave advanced written notice and fax notice that they were coming, they were refused permission to meet with him."

Þegar Bosnitch talaði við PM, virðist brúðkaupið sem talað var um árið áður enn ekki hafa átt sér stað. Hvenær giftist þá Watai Bobby Fischer?  Þegar þessi frétt Reuters var skrifuð var brúðkaupið ekki orðið að veruleika. Meira að segja þegar þetta var skrifað virðast menn ekki hafa verið í vafa um það á Íslandi að Myoko Watai væri aðeins unnusta Fischers.

Allur vafi ætti samt að vera úr sögunni á næstu dögum. Frumgögn úr japanska fangelsinu eru væntanleg til Íslands, hins hugrakka lands hins sannarlega frjálsa manns, eins og Bosnitch orðar það. Hugrakkt land (Serbía) og frjálsir menn hafa reyndar líka verið drifkrafturinn í öðrum skrifum Bosnitch um óskir alþjóðasamfélagsins um réttarhöld yfir serbneskum stríðsglæpamönnum. Bosnitch hefur í mjög tilfinningaríkum bréfum um skoðanir sínar á því að Serbía eigi að halda sig utan Evrópubandalagsins lýst þessu yfir: "Let's stay in step with people like the British UKIP (Independence Party), Switzerland, and Iceland... people who know the difference between a con and a good deal".

Gera Íslendingar það?

 

Segist hafa verið vitni að giftingu Fischers og Watai

Athugasemdir

[Sigurður Þór Guðjónsson, 28.1.2008 kl. 00:05]

Erum við báðir búnir að fá Fiskinn á heilann?

[Greta Björg Úlfsdóttir, 28.1.2008 kl. 01:37]

...og hér er þriðja manneskjan...

[Greta Björg Úlfsdóttir, 28.1.2008 kl. 01:48]

Vilhjálmur, ég las einhvers staðar um að krafan um vegabréf Bobbys til sönnunar á því hver hann væri, hvað varðar því að kvænast Myoko, hafi verið hrakin með þeirri röksemdafærslu að japönsk yfirvöld hefðu viðurkennt hans "identity" með því að hneppa hann í fangelsi, og væri þess vegna ekki stætt á að neita þeim um hjónavígslu á grundvelli þess að hann gæti ekki sýnt fram á hver hann væri. Að vígslan hafi þess vegna verið framkvæmd, hvaða ár sem það svo var. Það má vel vera, en breytir því samt ekki að ekki á að vera hægt að ganga fram hjá tilvist dóttur hans, eins og manni virðist vera gerð tilraun til að gera.

[Vilhjálmur Örn Vilhjálmsson, 28.1.2008 kl. 08:24]

Sigurður, Fischer was the King. ..... (Þetta minnir mig á kvikmyndina Fisher King og fuglinn Kingfisher sem kallaður er Ísfugl í Danaveldi, og sem ég sá í fyrsta sinn í fyrra) ... merkari maður hefur vart sest að í landinu okkar á síðari tímum.  Ég held við séum mörg sem höfum Fischer á heilanum. Það gæti verið verra.

[Greta Björg Úlfsdóttir, 28.1.2008 kl. 10:39]

Í mínu tilfelli er það samt dálítið fyndið, þar sem ég...já...hm...ég...jæja, best að upplýsa það...ég kann ekki að tefla!...ég kann rétt svo mannganginn og búið...

[Greta Björg Úlfsdóttir, 28.1.2008 kl. 10:41]

...en hefði hins vegar alveg örugglega og hæglega getað fengið skák á heilann, hefði ég lært að tefla...

[Greta Björg Úlfsdóttir, 1.2.2008 kl. 10:15]

Bosnitch er margsaga, en Miyoko Watai er tvísaga, samkvæmt fréttum Moggans, sem ég fjalla um í síðustu bloggfærslu.