Fyrsta flugeldasýningin á Íslandi

800 tonn (800.000 kg og jafnvel meira) af flugeldum og öðru púðri fúttar út í bláinn á Íslandi um áramótin að sögn alþjóðlegra fréttastofa. Það er að segja, ef veður leyfir. Ég verð fjarri góðu gamni og læt mér nægja smá stjörnuljós eins og Danir.

Á Íslandi fara þúsundir brennuvarga frekar óðslega um borg og bý og glampi frummannsins sést í augum karlpenings á öllum aldri. Fallostákn þeirra feykjast upp á himininn í öllum regnbogans litum og út sprautast gríðarlegar gusur, eldtungur, eimyrjudropar og jafnvel fossar. Hver er með stærstu kúlurnar og hver á flottasta batteríið? Sumum konum þykir skiljanlega líka mjög gaman af þessum látum í strákunum.

Ég leyfi mér að óska landsmönnum til hamingju með að brenna nokkra milljarða króna á andartaki og sumir eru ekki einu sinni í annarlegu ástandi þegar þeir fremja þann verknað. Þvílík gleði. Líkt og hálftími í Bagdað með alKætu.

Myndin er af fyrstu þekktu lofteldasýningunni á Íslandi árið 1874. Hún birtist í The Illustrated London News, 12. september það ár. Sýningin árið 1874 var auðvitað bara fyrir fína fólkið og í boði danska kóngsins. Alþýðan lét sér nægja að gleðjast yfir stjörnum, norðurljósum og ef vel áraði, þremur sólum á lofti. Svo þuldu menn rímur í stað þess að blogga.

Einhvers staðar hef ég lesið um óðan munk, sem kringum Siðbót tók svo miklum stakkaskiptum, að hann bjó til hólka úr kaþólskum bænabókum, tróð í hólkana púðri sem hann hafði búið til úr hlandi og brennisteini. Kom hann svo knallhettum sínum fyrir í pápískum líkneskjum sem hann sprengdi í tætlur fyrir utan kirkjur. Hann varð af einhverjum furðulegum ástæðum afar vinsæll  meðal kvenþjóðarinnar fyrir þetta athæfi sitt og eignaðist helmingi fleiri börn en hann hafði gert í skírlífi sínu. Undan honum eru komnir sumir af frægustu Vantrúarmönnum Íslands, svo og eldflauga- og brennusérfræðingar áramótanna.

Hvað gáfu svo Íslendingar sveltandi og þjáðum bræðrum sínum úti í hinum stóra heimi árið 2007?  800.000 kg. af púðri?

Eins og segir í stökunni gamalkunnu: Do they know it's New Year's Eve AT ALL?

GLEÐILEGT ÁR

 

 

Athugasemdir

[Ívar Pálsson, 31.12.2007 kl. 01:38]

Takk fyrir þessar upplýsingar. Sprengikrafturinn losar burt gamla árið, það er þá farið, sprungið. Það hleypir að nýjum tíma, nýju óskrifuðu blaði eins og Kínverjar hafa þekkt í þúsundir ára. Á öldum áður náðum við ekki að losna við gamla tímann, heldur drögnuðumst með hann yfir fjölda áramóta. En þá hljótum við núna að sprengja sögulegt samhengi og reynslu burt líka, ekki satt?

[Ágúst H Bjarnason, 31.12.2007 kl. 11:56]

Takk fyrir skemmtilegan pistil. Eins og hjá öðrum sönnum Íslendingum brýst frummaðurinn út hjá mér um áramót með eldglæringum og hávaða.

Gleðilegt ár!

[Albert Ómar Guðbrandsson, 31.12.2007 kl. 16:23]

Takk fyrir upplýsingarnar, og ágætan pistil. Eigum við ekki að reikna þetta ca 4 kg á skotfæran mann. þannig að ég er yfir meðaltalinu í skotgleðinni. Ég hef verið síðustu 6 Nyarsaften í Danaveldi, og held að munurinn á skotgleði þeirra og okkar sé í mestalagi nokkur grömm.

Gleðilegt ár, og farsælt komandi. 

[Sólveig Hannesdóttir, 1.1.2008 kl. 21:47]

Þetta er frekar einfalt hjá mér að skilgreina þetta syndrom okkar Íslendinga.  Þessi þjóð veit ekkert hvað sprengjuhljóð eru, hefur aldrei verið í stríði, að heitið getur síðan á sturlungaöld.   Virðist heldur ekki geta sett sig inn í þær aðstæður sem eru t.d. í Israel, Palestínu, Irak og miklu fleiri löndum.  Það væri ekki vitlaust að safna þessu fé saman svo sem eins og ein áramót og gefa það út úr landi til málefnis sem sjáanlegt væri, og þá alls ekki til þjóðar sem væri í stríði t.d. Palestína-Israel. Hljóð Nýarsnóttar okkar er daglegt brauð miljóna barna.