Eintóm della frá Íslandi

Nú liggja Danir aftur í því. Þeir eru farnir að rífast um uppruna og "sannleiksgildi" ásatrúar á heldur ófræðilegan hátt.

Í grein í danska dagblaðinu Berlingske Tidende i dag er gerð að umtalsefni vantrú manna á ásatrú, eða þó aðallega eins sagnfræðings.  Sagnfræðingurinn, Kurt Villads Jensen (sjá mynd) við Syddansk Universitet i Odense (Óðinsvéum), er greinilega búinn að uppgötva að það séu fyrst og fremst Eddukvæði og "Snorre Sturlasson" sem sé heimild okkar, og að við séum þess vegna algjörlega úti að aka eins og Ása-Þór, sem Jensen segir að hafi einungis verið svar víkinga við kristni.

 

Krossfarinn Kurt Villads Jensen vegur að ásum, hér með tvíeggjuðu tvíhandasverði frá 13. öld. Kenningar hans eru heldur tvíeggjaðar líka og greinilega vantar honum brýni.

Kurt þessi tekur greinilega ekkert mark á íslenskum bókmenntum og álítur þær ekki heimildir frekar en fornleifar. Myndir af Þór og öðrum meintum guðum, Þórshamrar og þvíumlíkt virðist ekki skipta neinu máli í heimi þessa fræðings.

Þessi fræðimaður hefur áður gert sig breiðan um aðra hluti sem hann veit ekkert um. Hér um árið hélt hann því fram að krossferðir kristinna manna á miðöldum væru fyrirmyndir krossferðar Bush forseta í Afganistan og jihads Íslamista. Ég sel þetta ekki dýrara en ég keypti það. Hvernig svona snillingur fær vinnu við danskan háskóla er mér hulin ráðgáta. En það hefur ekki verið neitt launungamál að það þykja góð fræði og fremjandi við háskóla að hata Kana og afneita trú, nema þá helst Islam.

Kurt Villads Jensen virðist ekki hafa lært muninn á goðafræði (mythologiu), guðfræði og sagnfræði.

Þór að kljúfa kross eða rembast í tæki í Ræktinni hjá Óðni í Valhöll

Athugasemdir

[Loftur Altice Þorsteinsson, 7.10.2007 kl. 17:17]

Það er ljóst að Danirnir vita ekki mikið um Ásatrú, en það eiga þeir svo sem sameiginlegt með flestum öðrum. Þeir nefna til dæmis ekki það sem ég veit, að Ásatrú er stjörnu-trú og "Vanir" eru þeir gvuðir sem menn voru áður "vanir".

Kveðja til Udenmerkur.

[Loftur Altice Þorsteinsson, 8.10.2007 kl. 11:34]

Hér er gáta í anda ásatrúar:

• Hverjir eru þeir tveir
• er tíu hafa fætur
• augu þrjú
• ok einn hala ?

Ekki er heitið verðlaunum fyrir rétta lausn !

[Predikarinn - Cacoethes scribendi , 10.10.2007 kl. 00:20]

Góður þessi Loftur. Ætli danskurinn hafi hugmynd ?