Vér morðingjar

 

Síðastliðin ár hef ég oft rekist á fólk í öllum löndum, af öllum stéttum, sem talar og skrifar um sjálft sig sem morðingjana í Írak og sína miklu ábyrgð þar. Þetta fólk tekur að mínu mati allt of mikið á herðar sínar. Flestir aðrir eru samkvæmir mannlegu eðli og kenna bara Bush, Blair og já auðvitað Ísrael, um ástandið í Írak. Þeir sem borða hangikjöt bæta íslensku ríkisstjórninni við þuluna.

Ég er ekki með beina línu til Herrans, en ég get sagt við ykkur öll, sem hafið fínar taugar og mikla sektarkennd varðandi Írak: Þið eruð öll syndlaus, nema þegar þið akið full og þvíumlegt.

Þið eruð syndlaus, og þurfið ekki að syngja 30 Ave Maríur á leið úr skriftarstólnum, þótt nokkrir (allmargir), fleiri og fleiri læknar múslima endi læknaferil sinn með því að myrða sig í tilraun til að brjóta niður breska móral. Læknastéttin er svo sannarlega líka syndlaus, þó svo að nokkrir örvinglaðir læknar velji að eyðileggja líf sitt í eldhafi haturs og fordóma.

Blaðamenn bera alltaf mikla ábyrgð. Af Agli Helgasyni undanskildum. Þeir eru þó oftast ekki morðingjar. Sjáið Alan Johnston, hann talaði máli Hamas og hinna "kúguðu" í mörg ár. Nú er hann fangi þeirra (ekki lengur 4.7.2007). Blaðamenn eru vissulega líka saklausir. Ef til vill ekki eins saklausir og þú og ég, en saklausir samt.

Ég hef mikið skoðað fréttir í Evrópublöðunum eftir læknasprengjurnar á Bretlandseyjum. Margir blaðamenn áttu erfitt með sig. Sumir þeirra eru greinilega haldnir djúpri sektarkennd vegna veru vestrænna herja í Írak.

Blaðamaður Nyhedsavisen, sem er íslenskt blað í höndum frekar lélegra danskra blaðamanna, var greinilega enn ekki farinn að trúa því á sunndag að hryðjuverkalæknarnir væru múslimir af ýmsum uppruna. Í mánudagsblaðinu upplýsti hann: "Jagten på britiske terrorister fortsætter". Voru þetta breskir terroristar?  Daginn eftir var blaðamaður Nyhedsavisns líklega búinn að fá lesningu yfir hausamótunum, því hann skýrir á bls. 29, þ.e.a.s. aftarlega í blaðinu, að "Arabískir læknar séu grunaðir um hryðjuverkatilraun".  Og fyrirsögn fréttarinnar frá fyrri deginum um breska hryðjuverkamenn hefur verið breytt á netútgáfu Nyhedsavisens.

Óttalega er blaðamaðurinn Nis Kielgast hjá Nyhedsavisen nú einfaldur. Læknarnir voru ekki "arabískir". Það eina sem gæti verið samheiti fyrir þá eru "öfgafullir múslimir", kannski "Al Qaeda" og örugglega "Íslamistar" og það sem þeir framkvæmdu voru hryðjuverk. Þeir voru bara of lélegir í sprengjugerð. Þetta voru morðingjar, sem tókst sem betur fór ekki að drepa saklaust fólk.

Þið sem bara lesið The Guardian hafið fengið réttari mynd en oft áður. The Guardian er nokkuð laust við fordóma í garð "okkar sjálfra" í tengslum við þessi hryðjuverk. En the human ashtrey, háðfuglinn David Wilson, er með undarlega grein sem hann kallar "Medical Attention". Í henni getur hann ekki staðist mátið og verður að líkja sprengjulæknunum við morðingja í breskri læknastétt, t.d. fjöldamorðingjann Harold Shipman. Wilson kemst loks að þeirri niðurstöðu að breska heilbrigðiskerfið sé hættulegra en sprengjuóðu læknarnir. Blaðamenn eins og David Wilson eru sekir, sekir um lélega dómgreind.

Breskir háskólamenn settu nýlega Ísrael í sóttkví, (skoðið þessa stuttu kvikmynd), vilja ekkert við Ísraela saman að sælda. Greinilegt er að því er öðruvísi farið með sambandið við lækna frá múslimaríkjum, sem vilja drepa saklaust fólk á Bretlandseyjum.

Maður fær oft það sem maður biður um.