Margur verður af aurum api

 

Í dag sá ég í fyrsta sinn grín Spaugstofunnar um för Halldórs Ásgrímssonar til Palestínu árið 2002.

Alþjóðafréttastofur voru of uppteknar af því að sannfæra heiminn um ímyndað mannfall Palestínumanna og ímyndaða eyðileggingu í Jenín til þess að taka eftir einhverjum túrista frá Íslandi. Ég þakka fyrir sendinguna. Mér var konunglega skemmt

Þá minntist ég annars gríns, sem spaugmeistarinn Arafat tókst að hanka Steingrím Hermannsson forsætisráðherra á, þegar Denni heimsótti hryðjuverktakann í Túnis árið 1990. Steingrímur kom heim úr þessari "frægðarför" sinni, örugglega uppfullur af því að hann hefði sem Íslendingur gegnt mikilvægu hlutverki meðal þjóðanna með heimsókn sinni til hryðjuverktakans.

Denni var vart kominn út úr flugvélinni þann 15. maí 1990, þegar hann fór að tala við blaðamann Morgunblaðsins um ísraelskan pening, mynt sem Arafat hefði sýnt honum, og sem Arafat hefði haldið fram að sýndi óskhyggju um stórríki Ísraels.

Denni gleypti þetta allt hrátt og daginn eftir, 16. maí, þegar blaðamaður Moggans var búinn að grafa dálítið í brandarann, var Denni enn á því að þetta væri satt, enda hafði Steingrímur heyrt þetta með eigin augum og séð með eyrum sínum, eða sí sona.

Arafat var þegar byrjaður að nota þetta trikk sitt á aðra sakleysingja en Steingrím Hermannsson árið 1988, þegar hann hélt því fyrst fram að 10 agorot mynt sleginn hafði verið í Ísrael sýndi óskhyggju Ísraelmanna um Stór-Ísrael sem náði austur í Afganistan.

Skítakarakterar eins og hryðjuverktakinn sálugi nota oft málma til að villa fyrir fólki sýn. Oft hefur tekist dæmalaust vel að pretta Íslendinga með aurum og eðalmálmum.

Hér er mynd af myntinni með örlítið stílfærðri fornmynt, sem Arafat lék á Steingrím með, og fyrir neðan er brotið af hinni fornu mynt, sem prýddi 10 agorot myntir Ísraelsríkis á tímabili. Hér getið þið lesið um trikk Arfafats á Wikipedia

 

 

Athugasemdir

[Vilhjálmur Örn Vilhjálmsson, 11.6.2007 kl. 02:17]

Já, hann var góður að láta milljarðana frá vinunum hverfa á svipstundu. Stærsti sjónhverfingarmaður aldarinnar. Hann virðist hafa kennt ýmsum arftökum sínum listina og nú heyja þeir stríð um skiptingu sendinganna frá Efnahagsbandalagi Evrópu. Almúginn í Gaza og á Vesturbakkanum tapar.