Stúdentar hafa of mikið á milli handanna

Það er ávallt gott þegar háskólaborgarar sýna okkur að þeir stíga ekki í vitið og eru engu betri, og jafnvel vitlausari en hinn grásvarti almenningur sem gengur í skóla lífsins.

Hvers vegna eru menn annars að þjófstarta bæverskri þjóraveislu fyrir miðjan september á stormskeri sem kallast Ísland, þegar slíkar Þjóðverjasamkomur hefjast ekki venjulega fyrr en í lok síðustu viku september?

Eru stúdentar orðnir svona háðir öli, að drykkjumennska þeirra þrýstir á? Hafa námslánin kannski hækkað?

Eins og menn vita, féllu heilu fjölskyldurnar í ónáð í Þýskalandi eftir stríð vegna glæpa karlpeningsins í fjölskyldunum. Voru þá þýskar kerlingar og meyjar úr slíkur blóraættum sendar út um heim til að hefja nýtt líf. Sumar þeirra voru dregnar til Íslands til að gagnast einsetumönum á Íslandi og margar þeirra breyttu koti í fallegustu býli vegna heraga sem þeim var í blóð borinn. Ari Trausti Guðmundsson var svo frakkur að kalla þær flóttakonur hér um daginn í athugasemd hjá almenningsálitstilbúningsmanninum Agli Helgasyni. Mér datt eitt andartak í hug að þær hefðu verið svo frjósamar, að undan þeim og íslenskum einbúum væri runninn heil sveit arískra drykkjusvola. Varla - líklega er bara allt of kalt að sitja í Lederhosen afa gamla í Þýskalandi í október á Íslandi og hrópa sinn stuðning við flóttafólk og Hamas þegar kominn er hávetur. Íslendingar eru fyrst og fremst eftiraparar og svo tilfinningalega samhnepptir að þeir komast ekki í stuð og geta ekki stundað kynlíf nema að vera ófærir um að aka.

Íslenskir námsmenn hljóta að vita að bjórdrykkja veldur offitu og alls kyns sjúkdómum nútímans og það er ekki nema að maður drekki Carslberg, að einhverjir aurar af sullinu fara til rannsóknar í lifrarkrabba eða öðru böli sem drykkja hefur í för með sér - í Danmörku.

Ég er alveg sammála formanni Flugbjörgunarsveitarinnar í Reykjavík, þegar hann varar við að endurskapa bæverskan öl-lager á mesta vindarassgati í Reykjavík. Stúdentunum væri nær að vera heima hjá sér og lesa lexíuna og fá sér smá Maltöl eða bland eða óáfengan pilla og naga með því harðfisk og söl. Sundlaugarnar eru líka ágætur staður til samveru. Meðan Mutter Merkel og Göthe stofnunin borga ekki fyrir svona útþýska menningu, er engin ástæða að eyðileggja heilbrigði þjóðarinnar með þessari siðleysu.

Varhugavert að reisa annað tjald

Athugasemdir

[Halldór Egill Guðnason, 9.9.2015 kl. 23:30]

"Fátækir námsmenn" tapa töluverðri samúð með svona uppátækjum. Oktober fest í byrjun september, er fyrir það fyrsta, eins og síðuhöfundur bendir á, tímaskekkja ofurþyrstra námsmanna, sem virðast svo hneigðir til októberölsins, að september, janúar eða jafnvel júní væru allt eins góðir til þambsins. Varla á milli greinandi, hvort risatjald að hausti í einni best þekktu rokdæld Reykjavíkur, eða ölþambið, sé vitlausara.

Þakka góðan pistil og þarfan. 

Góðar stundir, með kveðju að sunnan.

[Ívar Pálsson, 10.9.2015 kl. 12:16]

Ósköp hefur fennt í gleðispor stúdentanna ef þeir mega ekki bræða sig saman almennilega að hausti. Þessi gleðihátíð mælist mjög vel fyrir hjá báðum kynjum. Þótt uppruninn sé þýskur þá er margur bjórinn það líka og þetta er eins saklaust fyrir sálina og það verður. Þau þurfa bara að gera ráð fyrir rokrassgatinu hér.