Eru Íslendingar ekki kristnir?

Þó ég sé ekki kristinn, þá þekki ég allt um náungakærleika kristninnar. Hún er rómuð og líta aðrir með öfundaraugum til þess hve gott fólk kristnir eru. Í umræðunni um flóttafólk sem búist er við að komi til Íslands, virðist mér fólk, sem venjulega lýsir sér sjálfu sem kristnum einstaklingum, sé farið að hugsa meira á þjóðhagslegum nótum en út frá hinum fræga og annálaða náungakærleika.

Ég veit ekki hvort 70 einstaklingar geta sekkt íslensku þjóðarskútunni, en ég er efins. Jafnvel þó þeir verði nærðir á vörum sem verslanir munu á annað borð henda, þá getur þetta ekki kosta mikið að gera aðeins meira en Íslendingar gerðu á 4. áratug síðustu aldar, en þá lokuðu Íslendingar á flesta þá gyðinga sem reyndu að flýja til Íslands. Þá hugsuðu einnig margir á þjóðhagslegu nótunum, en fjölmargir Íslendingar voru einnig nasistar.

Flest fólkið sem streymir til Evrópu nú, er að flýja öfgar trúar sem aldrei hefur verið þekkt fyrir náungakærleika og mannkærleikurinn er enginn hjá sumum deildum hennar. Íslam er vandamál og það flýr þetta fólk sem kemur til Evrópu í bland við örbyrgð vegna stríða, þar sem Íslam er einnig vandamálið. Það flýr undan Einræðisherrum og stjórnkerfum þar sem Íslam er einnig vandamálið.

Tökum á móti flóttafólki, leggjum áherslu á að minnsta kosti helmingur þeirra sé kristið fólk eða Kúrdar, og hvað varðar múslíma að þeir verði látnir skrifa undir að þeir taki ekki þátt í öfgastarfsemi á Íslandi, t.d. árásum á lýðræðisríki á fjöldasamkomum ofbeldisdýrkandi Íslendinga sem styðja öfgaíslömsk hryðjuverkasamtök eins og Hamas. Eins verður að fá undirskrift fólksins um að það fylgi íslenskum lögum og krefjist aldrei Sharíalaga á Íslandi.

Þá er ekki til setunnar boðið. Þeir sem mest vilja hjálpa, og þið ykkar sem trúlaus eruð (og því vitanlega betri en allir aðrir), getið líka leyft fólki, t.d. munaðarlausum börnum, að búa hjá ykkur og getið kennt þeim íslensk gildi og sýnt þeim þá ást og mannúð sem svo sannarlega býr í Íslendingum. Þannig gætum við hæglega tekið fleira fólk í vanda en 70 manns.

Það er náungakærleikurinn sem allt veltur á. Segið mér ekki að Össur Skarphéðinsson geti ekki tekið eins og einn palestínskan ungling. Nú, Sveinn Rúnar Hauksson og konan hans hún Björk. Þau hafa örugglega aukaherbergi handa gamalli, guðhræddri sýrlenskri konu, sem fer daglega í kirkju.

Í stað þess að styðja við nasista í Úkraínu getur svo blessuð stjórnin stutt vopnaða baráttu gegn ISIS og selt fullt af feitum makríl til Rússlands og sett eitthvað af gróðanum til að berjast gegn púkum eins og ISIS, Boko Haram, Hamas, Taliban o.s.fr.

Að lokum leikur fyrir ykkur meistari Paolo Conte af disknum SNOB. Lagið heitið Brúðurin er Afríka. Takið gleði ykkar.

Athugasemdir

[Jón Valur Jensson, 30.8.2015 kl. 18:44]

Öflugur ertu og ófeiminn við að tala býsna mikið öðruvísi en pólitíska rétttrúnaðar- og fjölmenningarliðið helzt vil óska sér. Athyglisverðar eru þínar hugmyndir og tillögur, ekki sízt að að minnsta kosti helmingur nýs flóttafólks hingað skuli vera kristið fólk eða Kúrdar (jesídum mætti svo bæta við); einnig að múslimar hingað verði að gangast undir þá skilmála sem þú nefnir! --En um mínar tillögur í málinu, sjá PS-liðinn HÉR!

 

[EINAR S. HÁLFDÁNARSON (IP-tala skráð) 31.8.2015 kl. 20:33]

Sæll vertu

"Í stað þess að styðja við nasista í Úkraínu". Hvaðan hefurðu þetta? Er þá forsætisráðherrann, gyðingurinn, Jatsenjúk, nasisti? Það er skrýtin blanda þykir mér.

[Jón Valur Jensson, 31.8.2015 kl. 21:42]

Eflaust er hann enginn nazisti, en styðst hann ekki m.a. við flokk sem er talinn hneigður til nazisma?