Athyglisverð grein í Þjóðmálum

 

Prófessor Hannes Hólmsteinn Gissurarson er með mjög athyglisverða grein í nýjasta númerinu af Þjóðmálum, sem nú er komið út.

Greinina kallar Hannes Gyðingastjarnan og Hakakrossinn; Örlög tveggja útlendinga á Íslandi.

Greinin fjallar um Henný Goldstein Ottósson og fjölskyldu hennar og nasistann og DDR-kommúnistann Bruno Kress og hvernig leiðir þeirra skárust fyrir og eftir stríð. 

Greinin er mjög góð því hún vekur á einfaldan og sanngjarnan hátt athygli á hve ólík örlög manna voru í Síðara stríði. Þetta er mjög góð greining á því hvernig menn í Þýskalöndunum tveimur, og í þessu tilfelli í DDR, gátu endurskapað líf sitt, breitt yfir syndirnar og látið sem ekkert væri. Önnur kynslóð, börn nasistanna voru stundum ekkert betri í yfirbreiðslunni.

Ég veit að greinin var boðin Skírni til birtingar og furða ég mig á því að hún hafi ekki verið birt þar. Ég hlakka til að sjá skýringu ritstjóra Skírnis á því að grein Hannesar var ekki tekin til birtingar. Eitthvað hlýtur þar að liggja að baki.

Mæli ég með því, að menn nái sér í númer af Þjóðmálum og lesi greinina um Kress og Goldstein.

Ég man vel eftir Henný Ottósson er hún vann lengi hjá Innheimtudeild Sjónvarpsins. Ég var fyrir löngu sumarsendill hjá RÚV á Skúlagötunni, en Henný vann þá inni á Laugvegi og þurfti ég oft að ná í eitthvað eða fara með til hennar. Afi minn þekkti einnig heiðursmanninn Hendrik Ottósson.

Myndin efst er frá fyrstu guðsþjónustu gyðinga á Íslandi árið 1940, sem ég skrifaði um er ljósmynd Sigurðar Guðmundssonar ljósmyndara var afhent Þjóðminjasafni á síðasta tug 20. aldar. Henný er ekki með á myndinni en þar má sjá bróður hennar Harry, mann hennar og móður. Henný átti veg og vanda að því að undirbúa athöfnina með manni sínum Hendriki Ottóssyni.

Myndin hér fyrir neðan sýnir "afrek" SS-Ahnenerbe. Myndin er frá Natzweiler fangabúðunum, þar sem bróðir Hennýar, Siegbert Rosenthal, var myrtur af einum af stofnendum Ahnenerbe, stofnunar sem Bruno Kress vann fyrir, vegna "mannfræðirannsókna" á "óæðra" fólki. Sjá hér

Athugasemdir

[Vilhjálmur Örn Vilhjálmsson, 16.3.2012 kl. 07:17]

Ég sendi Halldóri Guðmundssyni ritstjóra Skírnis eftirfarandi erindi:

Sæll Halldór,

í gær birti ég blogg, http://www.postdoc.blog.is/blog/postdoc/entry/1228963/, þar sem ég segi frá nýrri grein eftir Hannes Hólmstein Gissurarson, sem nú er komin út í Þjóðmálum. Ég sá þessa grein fyrst fyrir meira en ári síðan og skildist þá á Hannesi að hann ætlaði sér að senda hana Skírni til birtingar. Það mun hann og hafa gert en fengið synjun.

Mér leikur forvitni á að vita, af hverju ritstjóri Skírnis taldi greinina óhæfa til birtingar í tímaritinu. Hvað er það í greininni, sem veldur því, að ekki var hægt að birta hana í Skírni?

bestu kveðjur,

Vilhjálmur Örn Vilhjálmsson

[Óskar Sigurðsson, 16.3.2012 kl. 09:28]

Sæll Vilhjálmur.. Góður.

[Þorsteinn Siglaugsson, 16.3.2012 kl. 15:13]

Ætli ástæðan sé ekki sú að þeir þora ekki að hvekkja dóttur mannvinarins, mannvininn Helgu Kress.

[Vilhjálmur Örn Vilhjálmsson, 22.3.2012 kl. 12:26]

Þorsteinn, afsakaðu biðina. Helga Kress er ekki nefnd á nafn í greininni. Helga Kress ætti varla að vera ástæðan fyrir því að þeir sagnfræðingar sem Halldór Guðmundssón ritstjóri Skírnis kallaði til til að dæma grein Hannesar, höfnuðu henni. Halldór vill reyndar ekki gefa nöfn sagnfræðinganna upp eða dóm þeirra.