Hinn bitri sannleikur um sykurinn

 

Hlustið á erindi barnalæknisins Robert H. Lustig (sem einnig er hægt að sjá hér), sérstaklega ef þið trúið því enn að þarmaskolun og stólpípur Jónínu á Krossinum séu allra meina bót eða eruð enn á Atkins kúrnum, sem er ágætur fyrir fólk sem stundar sjálfsblekkingu og sjálfsmeðaumkvun. Kolvetnisrík fæða er ekki óholl ef kolvetnið er náttúrulegt og fæðan inniheldur trefjar. Það er hins vegar vissar unnar sykurtegundir sem eru aðal skúrkurinn.

Styðjum íslenskan iðnað, en bara ekki gosdrykkja- og sykurríka framleiðslu, eða fyrirtæki sem selja svokallað heilsufæði, sem oft er fullt af hættulegri fitu, sykurefnum og öðru ólyfjan (t.d. hnetusmjör án innihaldslýsingar sem flutt er inn af einni heilsumadömmunni á Íslandi). Slíkur iðnaður drepur nefnilega á endanum fleiri Íslendinga en 10 álver. Það er auðvitað eitthvað mikið að í landi þar sem framleiðendur sushis taka upp á þeim dómadags ósóma að setja rjómaost í maki-rúllur og þar sem fólk skolar slíkum afbökunum á annars heilsusamlegu fæði niður með ógrynninu öllu af Coka Cola.

Kannski verður ekki mikið eftir að borða miðað við úrvali í íslenskum verslunum, ef menn ætla að forðast hættulegan sykur, en það er vel hægt að narta í epli, borða harðfisk, rófur og kál - nema að tennurnar séu orðnar rotnar af öllum sykrinum.

Ef yfirvöld lækkuðu toll matvöru og hráefni á matvöru sem innihéldu engan frúktósa, og þeirrar matvöru sem innihéldi ríkulegt magn trefja, myndu fituvandamálið hverfa að einhverju leiti. Það er auðvitað erfitt að lifa í landi þar sem sömu tollar eru settir á ávexti og grænmeti og á morðsykurinn í alls kyns söfum sem eru stundum jafnhættulegir og kókið og appelsínið. Ef  þið gefið börnunum ykkar páskaegg, íslenskt súkkulaði (sem ógeðslega lélegt og hættulegt gervisúkkulaði og er mest súkkulaðifita), eða bara jógúrt sem er yfirfullt að hættulegum sykri, eruð þið hægt og bítandi að gera þau að sjúklingum.

Þeir sem dæla sykri í mat, sér í lagi iðnaðarframleiddann frúktósa, eru nefnilega að myrða fólk. Hættið að drekka gos og djús, eða borða morgunkorn sem eru full þessu eitri, þó það komi sjaldnast greinilega fram á umbúðunum.

Það er sér í lagi frúktósi sem er aðalskúrkurinn. Íslendingar hafa lengi notað fæðu sem inniheldur mikinn fruktósa sem huggunarefni í skammdeginu, ef þeir hafa ekki verið á enn sterkara eitri til að slá á deyfðina eða þunglyndið. Allir megrunarkúrar hafa bara ekki virkað, því aðalskúrkurinn, sykur, var notaður til að hugga sig, þegar reynt var að skera á fituna. Inntaka D vítamíns, magnesíums og kalks minnkar strax þessa sykurþörf. Byrjið strax í dag, auðvitað með nægri líkamlegri hreyfingu.  En hugafarsbreyting er hins vegar best. Hættið að drekka gos og sykurríka fæðu í dag og látið börnin drekka vatn og hættið að kaupa endalausar dollur af "jógúrt"drullu og ís og þið munuð finna muninn eftir viku.

Jæja, nú verð ég að fara að hlaupa aka í ræktina.

Athugasemdir

[DoctorE (IP-tala skráð) 19.8.2011 kl. 08:39]

Bíddu nú hægur, eru einhverjir enn svo vitlausir að trúa því að þarmaskolun Jónínu Ben sé eitthvað vitrænt.. ha?
Hvað með blessanir frá Gunnari Á krossinum, eru virkilega einhverjir í því í dag?
Ef svo er þá hljóta það að vera vanvitar og yfirvöld verða að grýpa inn í svo þau skötuhjú féfletti nú ekki þetta vesalings fólk meira en komið er

[Vilhjálmur Örn Vilhjálmsson, 19.8.2011 kl. 09:19]

DoktorE þú ert greinilega í sykursjokki? Of mikið Cherioos í morgun? Nema að þú sért búsettur í Tælandi.

Nú fjallaði þessi færsla mín minnst um sugarbeibið hans Gunnars, hana Jónínu, (þótt hún hafi verið nefnd vegna þess að hún er ein af þeim sem er annt um heilsufar Íslendinga) En þú komst því ekki lengra en í fyrst málsgrein. Kannski áttu erfitt með að halda þig við efnið vegna sykursýki2?

Heimurinn ferst ekki þótt einhverjir sæki á Krossinn og Jónína smali nokkrum auðtrúa sálum til Póllands til að hreinsa úr þeim ímyndaðan gamlan skít.

Hvað finnst þér svo um Dr. Lustig? Heldur þú að þetta sé rétt hjá honum. Kannski vill Jónína kommentera líka?

[Carlos (IP-tala skráð) 19.8.2011 kl. 14:30]

Takk fyrir þetta!

[Kolbrún Stefánsdóttir, 20.8.2011 kl. 01:02]

Takk fyrir þetta ...deildi þessu á Facebook hjá mér... kveðja Kolla

[Vilhjálmur Örn Vilhjálmsson, 20.8.2011 kl. 07:27]

Þakka sömuleiðis. Ég ætla að reyna að fylgja þessum reglum sem Dr. Lustig er að benda á, án þess þó að hann sé að slá sjálfan sig til gúrús. En það er erfitt. "Hryðjuverk" bandarísk matvælaiðnaðar hefur leikið Íslendinga og aðra grátt.

Sykur er nefnilega eiturlyf og svo þægilegt að taka í alls kyns formi, ef eitthvað bjátar á, jafnvel þegar maður er bara örlítið svangur.

Ég mæli með hafragraut eða hafragrjónum á morgnanna og öðru hvoru Weetabix, ef það fæst í verslunum á Íslandi, eða Huski.

"Weetabix á morgnanna og Husk á kvöldin". Næg hreyfing og gulrætur í stað gotts. Í raun allt mjög auðvelt. En það eru pusherar á hverju götuhorni og stundum alveg við kassann í versluninni.

[Ragnhildur Kolka, 20.8.2011 kl. 19:43]

Það er erfitt að æsa sig upp í að hafa skoðurn á þessum þarmaskolunum hennar Jónínu. Það má fá fólk til að trúa á allan fja****n og þarmaskolun er sýnu skárri en trúin á ESB-aðild, því hún leiðir hörmungar yfir blásaklaust fólk.

[Sigurður Þór Guðjónsson, 21.8.2011 kl. 15:23]

Málið er bara að gottið er svo gott en hollur matur svo vondur. Annars hef ég ekki hundsvit á mat og borða helst aldrei neitt.