Þegar menn verða þreyttir á Hörpu

 

Nú fylgist ég úr fjarska með þeim mikla áhuga sem menn sýna Hörpu og tónleikahaldi þarna í horninu á Reykjavíkurhöfn, þar sem ég vann verkamannavinnu á menntaskólaárunum.

Eftir formlega opnun tónlistahallarinnar með alla mislitu glugga danska listamannsins Ólafur Elíasson (hans eigin beyging), keppast menn nú um að fá húsið til að syngja og leika fyrir hrjáða þjóð. Cindy Lauper boðaði síðust heimsfrægra listamanna komu sín í tónleikahöllina. Það verður brunaútsala, því Cindy leit heiftarlega út í febrúar eftir síðustu orrustu sína við Elli kerli og gleymskuna.

Cindy verður með brunaútsölu í Hörpunni

 

Hin tónelska þjóð mín heldur meira að segja upp á stórafmæli Bobs frænda í Hörpu, án Bobs og munnhörpunnar. Í gær hlustaði ég á mann í Popplandi útvarpinu, sem tekið hefur Hörpuna á leigu fyrir Dylan-veisluna, þar sem Bubbi og aðrir munu syngja lög meistarans sem eitt sinn spilaði sjálfur í Laugardalshöllinni, sem hann lét sér vel líka. Óttar Felix Hauksson laug því í þjóðina, í beinni, að bærinn Duluth, sem Dylan fæddist í, þýddi það sama og íslenska orðið dulúð, enda væri Duluth á Íslendingaslóðum þar vestra. Já, var það ekki, borgin við sundin, sem ber nafn Fransmannsins du Luth, er nú orðin vesturíslensk vagga Bob Dylans. Af hverju er Megas ekki með í veislunni fyrir Bob frænda? Dulúð .

Meðan Kjósarmaðurinn Óttar Felix Hauksson dýrkaði Dylan frá Dulúð, var bróðir hans meira gefinn fyrir Arafat, enda læknir.

Ég býst við því að skoða og heyra eitthvað í Hörpunni á uppsprengdu verði áður en ég dey, en hvað gera menn eftir næstu áramót þegar mesti æsingurinn er yfirstaðinn og gamla Harpan er ekki eins spennandi. Cindy Lauper heldur áfram að falla í gleymskunnar dá, og gluggaþvotturinn við hafnargarðinn verður óbærilegur fyrir Kötu litlu, ef hún er ekki hætt í Menntó.

Það er víst meiri dulúð yfir fjárhagsstöðu Hörpunnar en yfir fæðingarstað Dylans og rauði salurinn er bara eins og risastór bíósalur í Breiðholti. Harpa bíó? Meðan lægstu launin hjá Jóhönnu, Gunnarsstaða Móra og gíslatökumanninum SA Vélhjálmi eru max 200.000 kr., er ekki hægt að búast við öðru en að Harpan verði verðbólguvaldur fyrir skemmtanar- og ráðstefnuhaldsiðnaðinn á Íslandi. Ófaglærðir koma ekki í Hörpuna, nema til að fara á hausinn. Kannski er hægt að taka lán til að komast í Hörpuna - the Iceland way.

Athugasemdir

[Jón Steinar Ragnarsson, 7.4.2011 kl. 20:10]

Þú klikkar ekki.  Efþú ert nógu dulúðlegur, þágætir þú svindlað þér inn með að skríða fyrir aftan dyravörðinn eins og maður gerði til að komast á dollaramyndirnar forðum. Þ.e. þegar það klikkaði að bú til stofn á notaðan miða í saumavélinni hennar mömmu.

Ég á einhver trikk uppi í erminni ef þig vantar. Er með svarta beltið í að svindla mér inn. Seinna náði ég þeirri vegtyllu að verða sópari í Ísafjarðarbíó og þá var málið leyst. Ég myndi þó ekki telja það góð skipti að þurfa að sópa þetta monstrúm fyrir einn miða.

[S.H. (IP-tala skráð) 7.4.2011 kl. 21:10]

Båda bröderna verkar ha en viss faiblesse för fabulering:)

[Ásthildur Cesil Þórðardóttir, 8.4.2011 kl. 12:54]

Góður !!! Þetta kallar maður kjarnyrta íslensku.