Hvalræði

Norska dagblaðið VG greinir frá því að hvalurinn Snow, sem var með kálfi, hafi verið drepinn af risafarþegaskipinu Dawn Princess. Þetta gerðist reyndar fyrir 6 árum. Í gær var eigendum skipafélagsins, sem á Dawn Princess, gert að punga út 750.000 bandaríkjadölum fyrir morðið á hnúfubaknum Snow.

Kviðdómendur voru allir sammála. Skrúfur farþegaskipsins voru alblóðugar og lögmenn O J Simpsons áttu ekki sjans í málið. Nelson Cohen, ríkissaksóknari í Alaska, skýrði dómsorðið á þá vegu að hvalir væru þjóðargersemar sem yrði að vernda fyrir komandi kynslóðir. “Við verðum að vernda þá gegn glæpsamlegum og óábyrgum verkum mannanna og stórra fyrirtækja”, sagði Nelson Cohen við Fréttastofu AP.

Það er greinilegt að Nelson dómari hefur í hyggju að eignast 10 tonna uppeldisson þarna úti í höfunum. En hvað með Sævar skjaldböku, Bobba marsvín og Tommy túnfisk, sem allir lentu í slæmum árekstri við skip á síðasta ári -  eða alla hina fiskana. Hver hugsar um þá? Hver sér um hagsmuni fjölskyldu Smára smokkfisks? Hvar er manngæskan?

Nelson Cohen fær Hvalinn, verðlaun PostDocsins, fyrir nýjan vinkil á lögfræðinni.

 

Athugasemdir

[Jón Steinar Ragnarsson, 1.2.2007 kl. 04:31]

Synti hvalurinn fyrir skipið eða sinnti skipið ekki stöðvunarskyldu eða stefnumerkjum?  Framdi hvalurinn sjálfsmorð? Virti hann umferðarreglur að vettugi?

Ég hefði ekki viljað sitja uppi með verjandann í þessu máli á ögurstundu.

[Vilhjálmur Örn Vilhjálmsson, 1.2.2007 kl. 05:21]

Það tókst ekki að sanna hver hefði verið í órétti vegna þara. En skipstjórinn og áhöfnin á Dawn Princess hafa nú keypt sér Linguaphone Whale 1-8, svo að svona lagað gerist aldrei aftur. Snow hafði reynt að ná sambandi við skipið, en áhöfnin virti það að vettugi. Sumir hlógu bara yfir pípinu í henni. Ég á ekki krónu fyrir slíka hegðun.