Veislan í skíðaskálanum

Egill Helgason er greinilega orðinn alveg uppiskroppa með efni.  Áróðurstarfið fyrir ríkisstjórnina gengur greinilega ekki allt of vel.  Madame Joly hefur t.d. snúist dálítið í höndum á spunameistaranum. Nú hefur Egill brugðið á það ráð að birta myndir úr íslenskum veislum sem hann geymir í silfri sínu. Í dag dró hann upp úr hattinum algjöra partí-partí mynd úr skíðaskálaveislu Jóns Ásgeirs frá 2007, sem hann notaði sem sönnunargagn fyrir tengslum Landsbankans og Baugsveldisins. Sigurjón Kúlulán og Banka-Ella eru eins og loftbelgir þarna á meðal fallega og ríka fólksins. En ekki er ég viss um að niðurstaða Egils sé rétt. Menn geta verið í partí án þess að vera að braska eitthvað saman.

Undir áhrifum frá stóra manninum á Eyjunni birti ég einnig eina góða, hörkupartímynd, sem var tekin í febrúar 1964.  Myndina er hægt að stækka með því að smella á hana. Allir eru greinilega að djúsa. Þarna er Banka-Ella, Elín Sigfúsdóttir að þamba Sínalcó (efst fyrir miðju). Kúlulánið hefur örugglega leikið við marga á myndinni. Yfirtaka á stórri rjómaköku hefur nýlega farið fram. 

En hver annar þekktur maður, fyrir utan Banka-Ellu ætli hafi verið í þessu partí? Jú, hver annar en einn valdamesti maður Íslands, partíkóngurinn sem situr þarna neðst í tröppunum blæs í rör og er með kók og romm í flösku: Ykkar einlægur, eigandi þessa blogs. Vonandi sér Egill Helgason ekki meira út úr myndinni er siðlegt er, en Ella var nágranni. 

Myndgreining Egils í dag á Eyjunni er einhver sú skrýtnasta blaðamennsku sem ég hef séð, ef yfirleitt er hægt að kalla slíkt blaðamennsku. Ef einhver á myndir af Agli Helgasyni í partí, mega þeir birta hana hér í athugasemdum.

Partímynd Egils

 

Athugasemdir

[Kristján Sveinsson (IP-tala skráð) 18.2.2010 kl. 13:57]

Jæja, manni dettur helst í hug að veislan á tröppunum hafi verið „a moveable feast“ og hvur veit hvert hún hefur borið hana Ellu og aðra sem hana sátu. Verst hvað sínalkó er orðið sjaldfengið. Alveg er ég viss um að glaðbeitta liðið á ljósmyndinni sem var kannski tekin árið 2006 og kannski ekki og var kannski tekin í skíðaskála og kannski ekki hefur verið að fagna ámu af sínalkói.

Er ekki stúlkan til vinstri í tröppunni fyrir ofan hinn rommsötrandi og rörblásandi ungmafíós á fornmyndinni örugglega Eva Joly?

[Vilhjálmur Örn Vilhjálmsson, 18.2.2010 kl. 18:41]

Margblessaður Kristján bóndi. Sínalcósins er sárt saknað af mörgum. Það var stórt gos á Ísland, jafnvel það stærsta eftir landnám. Sjá dálítið um gos þetta hér: http://postdoc.blog.is/blog/postdoc/entry/585482/

Ekki er þetta Eva Joly. Líklegast einhver önnur Ella, kannski af dönskum ættum og lætur sig dreyma um Jolly Cola, sjá augnaráðið.

[Ragnhildur Kolka, 18.2.2010 kl. 19:36]

Já, það var sannarlega tími til kominn að afhjúpa þessi illmenni.