Tvennir tónleikar á árinu

Ég hef farið á tvenna tónleika í ár. Menningarlegri en það er ég nú ekki. Ég hlusta á YouTube, kaupi tónlist á iTunes og sit í mínum eigin tónleikasal á fremsta bekk við hliðina á forsetanum - með poppkorn.

Báðir tónleikarnir sem ég sótti voru frábærir. Fyrst segir af þeim síðari. Hann var í samkunduhúsi gyðinga í Kaupmannahöfn þann 25. október. Þar spilaði King of Kletzmer, klarínettumeistarinn Giora Feidman (f. 1936). 750 manns voru í samkunduhúsinu. Það var aldrei þessu vant troðfullt. Feidman, lék guðdómlega og hafði til liðs við sig tvo frábæra, þýska hljóðfæraleikara á kontrabassa og gítar og einn tyrkneskan trymbil, Murat Coskun, sem galdraði ótrúlegustu hljóð úr trommu sinni. Það var bæði heilagleiki og óbeisluð gleði á þessum tónleikum, sem stóð í yfir þrjá klukkutíma. Og í hléinu talaði Feidmann við alla og seldi geisladiska í fordyri samkunduhússins eins og götusali í Bessarabíu. Þetta var eftirminnilegt sunnudagskvöld.

 

Hinir tónleikarnir voru í aðalsýnagógunni í Reykjavík, Háskólabíói, þann 28. maí. Góður vinur bauð mér á Listahátíð. Frábær sæti á besta stað. Maður getur ekki sagt nei við því. Tvö flaggskip rússnesks tónlistalífs, hjónin Gennadíj Rosdestvenskíj (f. 1931) og Viktoría Postnikova (f. 1944) frömdu list sína. Mikla list, vel að merkja. Postnikova lék píanókonsert nr. 24 í C-moll eftir Mozart með kadensu eftir Brahms. Hún spilaði eins og flugmóðurskip rússneska flotans, sem siglir um höfin á góðum degi án þess að bifast í ölduróti. Hún hafði ekkert fyrir þessu og enn sú innlifun! .. það þyrfti 30 japanska píanóleikara, með grettur og krampa í öllum limum, til að fá sömu innlifun í konsert Mozarts. En Postnikova sat bara þarna og spilaði eins og í hún væri að syngja börnin sín í svefn, róleg og glæsileg. Grænleitur kjóll dívunnar var aðeins of þröngur og mikill hárhnúturinn á hnakkanum lyfti þungu andlitinu og augnlokum þessarar fjallmyndalegu konu.

Postnikova leikur Prokofjef undir stjórn Gennadíjs fyrir 39 árum í Moskvu

Kallinn hennar er saga út af fyrir sig, alveg eins útlítandi og pabbi hans, Nikolaj Anosov, sem var líka mikill stjórnandi í Sovétinu. Herðabreiðari mann en Gennadíj Rosdestvenskíj er vart hægt að finna. Hann skyggði nær á sinfóníuna, þótt hún væri í útvíkkaðri hátíðaútgáfu til að get leikið sinfóníu Sjostakovítsj nr. 7 í C dúr, Leníngrad sinfóníuna. Frábært, frábært og aftur frábært! Gennadíj var eins og sigursæll hersöfðingi í Rauða Hernum, sem sagði frá stríðinu með virðingu. Pákuleikari sinfóníunnar, Eggert Pálsson, var þarna í essinu sínu. Ég veit ekki hve mörgum fallbyssuskotum hann skaut út í salinn. Þau voru mörg. Salurinn var í rúst, en hlustendur voru í sjöunda himni, fórnarlömb hinnar stóru listar, sem er svo sjaldgæf á Íslandi. Flutningurinn var allt annar en hjá t.d. meistara Leonard Bernstein, sem Hollywoodaði Leningrad-sinfóníuna (heyr). Kapítalisminn eyðileggur margt.

Jónas Sen tjáði sig um tónleikana í einhverjum fjölmiðli fáeinum dögum síðar, þegar hann, og við hin dauðlegu fórnarlömb listanna, vorum nokkurn veginn búin að jafna okkur eftir sprengingar Eggerts, sem var skólabróðir minn og góður vinur í æsku. Jónas taldi öruggt að þetta hefði líklega verið besti konsert Sinfóníunnar frá upphafi. Ég get ekki sagt til um það, en ég er enn í bombusjokki.

Ég skrökva því reyndar, að ég hafi aðeins verið á tveimur tónleikum á árinu. Sonur minn, Ruben (7 ára), lék á morguntónleikum tónlistaskólans í heimabæ okkar í síðustu viku. Hann lék "Old McDonald had a Farm, í æ í æ ó" á harmónikku með mikilli innlifun. Algjör senuþjófur drengurinn.