Hættulegasta dýrið í skóginum

Eftir að ég heyrði landlækni lýsa skógarmítilssýkingum frekar yfirborðslega í gær í útvarpinu (RÚV), verð ég að taka undir með Erling Ólafssyni skordýrafræðingi, og spyrja hvort íslenskir læknar séu yfirleitt í stakk búnir um að greina sjúkdóminn og einkenni sem koma í ljós þegar fólk hefur verið bitið af skógarmítli og fengið borreliosis-smit.

Ég hef nokkra „reynslu" og þekkingu af þessum sjúkdómi og get staðfest, að jafnvel læknar í Danmörku, þar sem sjúkdómurinn hefur verið landlægur síðan elstu menn muna, eru ekki færir um að sjá hvers kyns er. Tengdamóðir mín var nær dauða en lífi í fyrrasumar vegna þess að sjúkdómurinn lagðist á taugakerfi hennar og hún fékk lömun í andlið og aðra kvilla og verki sem læknast mjög hægt. Læknamistök! Læknarnir sáu ekki í upphafi hvaða einkenni hún var með og meðferðin var ekki nægileg í byrjun.

Þegar sonur minn var tveggja ára var hann líka bitinn af skógarmítli. Hann fékk allt í einu rauðan flekk á lærið, sem stækkaði og varð hringlaga með blett í miðju.Við fórum til læknis og þrátt fyrir hið einkenndandi hringlaga útlit útbrotsins á lærinu taldi læknirinn að þetta væri um hringormur (sveppasýking) í húð og gaf kortísónsmyrsl. Áburðurinn gerði ekkert gagn og flekkurinn stækkaði og minnkaði á víxl. Ég fór upphaflega til læknisins með þann grun að sonur minn hefði verið bitinn af skógarmítli og að hringurinn væri Erythema migrans, hringur sem myndast út frá skógarmítilssmiti. Læknirinn hló og sagði að það væri af og frá. Konan mín og börn höfðu einmitt farið í skógarferð með öðrum síðsumars og tjaldað í skóginum. Ég hafði skoðað myndir af útbrotum á húð á netinu og komist að þeirri niðurstöðu, að útbrotið á syni mínum væri líkust útbroti vegna skógarmítilsbakteríu. En þýðir að deila við lækninn, frekar en dómarann?

Eftir tvær ferðir til heimilislæknisins og 2-3 túbur af kortisónkremi, var enga breytingu að sjá. Hringútbrotið stækkaði. Ég var á leið til Íslands í stutta vinnuferð og sonur minn var einn morgunn mjög slappur og með hita. Þá tók ég þá ákvörðun að fara til húðlæknis, sem maður þarf annars að fá tilvísun til frá heimilislækni. Fyrst vildu þeir ekki gera neitt fyrir okkur, þar sem ég var ekki með tilvísun, en þegar ég sagði að ég teldi að læknirinn minn hefði ekki kattarvit á því hvað sonur minn væri með og hótaði að kæra stofuna, þá var sóttur læknir og hún kallaði okkur inn á stofu: „Þú hefur fullkomlega á réttu að standa, þetta er engin hringormssýking, þetta er skógarmítlabit", sagði læknirinn.  Læknirinn var mjög hissa á heimilislækninum, en sagði að þetta væri ekki í fyrsta skipti sem hún sæi til lækna sem greindu hið hættulega bit skógamítla sem hringorm í húð. Sonur minn var sendur í blóðprufu (sem síðar staðfesti að hann væri með Borreliosis/Borrelia Burgdorferi) og hann var strax settur á strangan sýklalyfjakúr. Eftir stuttan tíma hvarf hringurinn af læri hans, eftir að hann var búinn að vera með hann í rúma tvo mánuði.

Skógarmítill, kvendýr, fyrir og eftir blóðbarinn. Myndin af ofan sýnir munnsvip kvendýrsins. Myndin að neðan sýnir stærð mítlu áður en hún sýgur blóð fórnarlambsins.

Ég vona að íslenskir læknar setji sig vel inn í einkenni borreliosi-sýkinga og hagi sér ekki eins og danskir læknar í þeim tilvikum sem ég þekki til í tengslum við fjölskyldu mína. Eftir eftir hálft annað ár er tengdamóðir mín enn mjög hrjáð af lömun og verkjum og þarf daglega að taka lyf.

Borreliosis er lífshættulegur sjúkdómur og verður ekki læknaður með kortísónkremi. Menn verða að athuga að bakterían þarf ekki endilega að valda hringlaga útbroti. Bakterían er lúmsk, og maður er ekki aðeins bitinn af skógarmítli í skógum. Lið- og vöðvaverkir, hiti og höfuðverkur geta líka verið einkenni sem menn ættu að taka eftir.

Þess ber að geta, að ein færasti sérfræðingur í Danmörku í skógarmítlasýkingum er auðvitað Íslendingur, dr. Sigurður Skarphéðinsson í Óðinsvéum.

Athugasemdir

[Ragnheiður Arna Magnúsdóttir (IP-tala skráð) 24.10.2009 kl. 17:36]

Ekki gleði fréttir að þessi óþverri sé farinn að þrífast hér á landi......

Gott að opna umræðuna.....

http://en.wikipedia.org/wiki/Lyme_disease

[Ragnhildur Kolka, 24.10.2009 kl. 20:43]

Kannast vel við þessa skepnu frá Flórida, en minnist ekki þessarar þungu umræðu um sýkingarhættu, þótt kvikindið væri talið hættulegt. Hundar og börn voru vanlega yfirfarin eftir skógartúra og glóandi sígarettur lagðar að kvikindinu til að losa tak þess á fórnarlambinu.

Á þeim tíma yfirgnæfði umræðan um skaðsemi sígaretta allt annað. Tick, eins og óargadýrið var kallað þar var mun neðar á listanum. 

[Ragnhildur Kolka, 24.10.2009 kl. 20:44]

"vandlega" skal það vera

[Bubbi (IP-tala skráð) 25.10.2009 kl. 08:55]

fékk svona bit þegar ég var að veiða á aðdal 2008 fékk hita og þetta bara stækkaði

fór á læknavaktina 6 dögum seinna enga hugmynd hafði Doksi en setti mig á síklalyf þannig mér fór batnandi eftir það enþá má sáj smá merki um þenna viðbjóð

[Vilhjálmur Örn Vilhjálmsson, 28.10.2009 kl. 23:58]

Þakka ykkur öllum fyrir innlit og afsakið síðbúið svar, sem verður í stuttu lagi. Útrýmum skógarmítlum á Íslandi í stað þess að vera að eltast við frjálsar fjallakindur.