Kann ekki einu sinni samningaensku

 

Allt Icesave málið verðu sífellt augljósara, sérstaklega slæleg frammistaða íslensku samninganefndarinnar undir forystu Svavars Gestssonar sendiherra (á framlengingu) í Kaupmannahöfn. Megabloggarinn Jón Valur Jensson birtir úrdrátt úr viðtali á Útvarpi Sögu við Magnús Thoroddsen hrl og fyrrverandi forseta Hæstaréttar, sem sagði:

„Það er kannski skrýtnast í sambandi við þetta, að þessi maður [Svavar Gestsson] hafði verið valinn sem formaður í nefndinni. Hann er hvorki lögfræðingur né, að því er égveit, haft nokkra reynslu í sambandi við samninga af þessu tagi. Og ég vil bara leggja áherzlu á það, að enskt lagamál, það er allt öðruvísi heldur en venjuleg enska. Og menn, sem kunna að vera góðir í enskri tungu, þeir skilja ekki samninga á ensku, alls ekki til fullnustu, að minnsta kosti, ég fullyrði það." (zeturnar er í boði Jóns Vals)

Þetta er líklega rétt hjá Magnúsi. Ekki lærði Svavar samningaensku við HÍ þau ár sem hann kallaði sig stud. jur. Á PHS, Parteihochschule Karl Marx(Rotes Kloster) am Köllnischen Park, i Berlín lögðu menn áherslu á nómenklatúru og Volkswirtschaftslehre, en ekki samningaensku. Þeir sem voru á Institut für Ausländerstudium (Ernst Thälmann Institut hjá Johnny Norden) gætu hugsanlega hafa sótt kúrsa á Lehrstuhl Politische Ökonomie des Kapitalismus, en ekki til annars en að nema þar ókosti og dekadansa Kapítalismans. Sem sagt, engin samningaenska, aðeins kommúnistískt orðagjálfur.

Á þessum síðustu og verstu tímum,  þegar fólk með potta, pönnur og nómenklatúr ringulreiðarinnar hefur sett „ómenntaðan" seðlabankastjóra af, legg ég til að búsáhaldadeildin ærist dulítið yfir manni sem kann meira í kommúnistískum nómenklatúr en samningaensku, en sem á að hafa fyrir okkur vitið í mikilvægustu ákvörðun sem þjóðin hefur þurft að taka.

Athugasemdir

[Hákon Jóhannesson (IP-tala skráð) 23.6.2009 kl. 09:25]

Ég er sleipur í ensku. Þurfti að fara undir Kanadískan dómsstól, sem mér skilst að beri keim af breskum, með einkamál. Þurfti að sjálfsögðu að ráða þarlendan lögmann.

Þurfti all-nokkrum sinnum að staldra við og fá útskýringar á hugtökum sem  ég áttaði mig ekki á. Man t.d. eftir ajournment, respondent, petitioner, affidavit, domicile, solicitor, .. Jú þessi hugtök koma ekki fyrir í daglegu máli og ekki á þeim fagsviðum sem ég hef numið.

Skyldi Svavar Gestsson hafa ráðið sér breskan lögmann sér við hlið úti ?

[Þór Ludwig Stiefel TORA, 23.6.2009 kl. 11:46]

Það er rétt sem sagt er að enska er ekki bara enska. Ég hélt mig kunna ágæta ensku þegar ég hóf nám í alþjóðaviðskiptum á ensku en fann þar að ég þurfti að temja mér algerlega nýtt málfar, fá inn breyttan orðaforða. Þetta með enskuna er þó aukaatriði. Hitt er mun veigameira að setja óreyndan, ólöglærðan, afdankaðan alþingismann í samninganefndarforstöðu. Sérstaklega í ljósi þeirra fullyrðinga að setja fagþekkingu á oddinn í ríkismálefnum (sem voru rökin fyrir því að reka Davíð Oddson).