SS og Ali

 

Jú,  æsið ykkur bara strax upp, þið heilögu skarar íslenskra bloggheima. Auðvitað haldið þið að ég sé að fara að skrifa um öfgar, skapa nýja Múhameðskreppu, að stríða Þýskurum út af fortíðinni. Nei, ég er bara að fara að skrifa um pylsu- og áleggsmenningu íslensku þjóðarinnar, sem lengi hefur verið kennd við ALI og SS.

Sláturfélag Suðurlands og Ali svín Þorvalds í Síld og Fisk, eru auðvitað príma pródúkt. Fyrir utan rotturnar sem ég sá fyrir utan pylsugerðarhús SS við Skúlagötu þegar ég var ungur, og sóðaskapinn í kjötvinnslunni við hliðina á Hótel Holti í gamla daga, þá eru SS og Ali örugglega fyrirtaks afurðir í dag. Aldrei keypti ég neitt af þessu síðast þegar ég bjó á Íslandi. Allt Ali og SS-kyns í þörmum, sperðlar, bjúgu, pylsur, pulsur og skífuskorið pálegg var svo dýrt miðað við það sem ég vandist í Danaveldi á námsárunum, að ég keypti fisk eða bara lambakótilettur í staðinn. Kannski eina eða tvær pulsur á Bæjarins Bestu.

Allir þekkja þjóðsögurnar um gyðingana sem komu til Íslands og sáu SS vörur í SS-verslun Hafnarstræti og hypjuðu sig strax í burtu; eða emírinn Alí, sem sprakk á limminu þegar hann sá ALI bacon-svínsskiltið, er blasir við öllum sem keyra til höfuðborgarinnar frá Keflavík. Svo var það vingjarnlegur og vel girtur veitingamaður í Skíðaskálanum í Hveradölum, sem ekki kunni á menningarsöguna og serveraði grísakótelettur fyrir Sádía. Skálinn var lengi vel uppnefndur Uppsöluskálinn eftir það.

Sönn er sagan af Bill Clinton, sem fékk sér tvær SS-wieners á Bæjarins Bestu þegar hann gerði stopp á Íslandi árið 2004. Það snarl er skráð í mannkynssöguna, því Bill fékk hjartamein tveimur dögum síðar. Mér er sagt, að hægt sé að kaupa sér nokkuð sem kallast Clintonbanar hjá velbyrgðum pylsusölum. Það er líklega heitur hundur með miklu stráaldri.

Hvað ætlar þú verða, þegar þú ert orðinn stór? var einatt spurt fyrr á árum. Sumir urðu útrásarsvín. Eitt er víst að framleiðslan á grjúpánum og skinkum heldur áfram, og hér er verkleg kennsla í því. Bölvað svínarí.

 Viðbót: Tveimur dögum eftir að þessi færsla var skrifuð, greindi DV frá því að Íslendingar treystu SS pylsum betur en ríkisstjórninni. Næsta ríkisstjórn samanstendur þá af skinkum, hangikjöti,

pylsum og hrossabjúgum, og kannski einu sætu London Lambi. Beikon og Kosherbeib

verða áfram á Bessó

Athugasemdir

[Ragnheiður Arna Magnúsdóttir (IP-tala skráð) 6.12.2008 kl. 16:23]

Mér var nú sagt af einkaþjálfara að pylsa tæki um viku að skila sér.....

Það segir mér hverslags rusl er í þessum mat.....

En ég neita því ekki að ég fæ mér svona annarslagið rusl og bíð þá bara í viku með smá uppþembu!!!

[Vilhjálmur Örn Vilhjálmsson, 6.12.2008 kl. 17:41]

Ekki trúi ég að pulsa taki svo langan tíma á reisu sinni gegnum kerfið. Ætli hún sé í kaffi og kökum með hinum þörmunum. Einkaþjálfarinn þinn hefur kannski verið með alvarlega hægðateppu eða ekki búinn að fara í þarmaútspúlun með Jónínu Ben. Hana sá ég reyndar fyrir utan pylsuvagn við Vesturbæjarlaug í fyrra að éta SS pylsu.

En svona venjulegar SS-þjóðernispylsur eru bölvað ruslafæði með alls kyns aukagumsi.

[Sigurður Þór Guðjónsson, 7.12.2008 kl. 01:37]

[Ásgeir Kristinn Lárusson, 7.12.2008 kl. 10:34]

Það vantar allt MSG í þessa færslu...

[Vilhjálmur Örn Vilhjálmsson, 7.12.2008 kl. 10:37]

En það er hvítlaukssalt og rotvarnarefni og þetta er alíslensk framleiðsla!

[Ragnheiður Arna Magnúsdóttir (IP-tala skráð) 7.12.2008 kl. 10:48]

Er það nokkur furða að Bretar áttu heimsmet í Creutzfeldt-Jakobs sjúkdómum.......

þeir tóku allt innan úr skepnunni, heila og mænur, hökkuðu það í hamborgara og pylsur......

Skrítið miðað við hvað Íslendingar eru svaka duglegir í pylsu/hamborga áti að við séum ekki með huges hátt hlutfall í CJD!

Bon appetit!!

[Aðalbjörn Leifsson, 8.12.2008 kl. 08:29]

Þegar ég var í skinkuskólanum í Hróarskeldu þá sögðu danirnir mér að pulsur væru Guðdómlegar, því það vissi engin hvað væri í þeim nema Guð einn.