Auschwitz-teikningar fundnar

 

Ekki held ég að til séu til margir Íslendingar sem eru í vafa um að Helförin hafi átt sér stað með gasklefum, brennsluofnum og hvaðeina. En þarna úti á meðal ykkar eru samt nokkrar sjúkar sálir, sem draga þetta allt í efa í einhverri forpúlaðri, trúarlegri andagift. Nokkrir þessa aðila eru einnig á fullu í samsæriskenningum um Twin Towers og öðru kukli. Slíku fólki er víst ekki við bjargandi.

Nú fá vantrúarmenn (nei, ég meina ekki þig Matti antikræst) eitthvað að hugsa og búa til samsæriskenningar um. Nú hafa nefnilega fundist nokkrar uppmælingar af elsta hluta búðanna í Auschwitz. Uppmælingar þessar voru teiknaðar á árunum 1941 - 1943 og sumar hverjar af föngum í búðunum eftir að viðbætur og ný hús höfðu verið byggð við gömlu herbúðirnar í Auschwitz. Sjá einnig hér.

Á sumar teikningarnar hefur hinn litli, ljóti Heinrich Himmler meira að segja skrifað nafn sitt og lagt blessun sína yfir verkið. En það sem er áhugaverðast er, er að hlutverk bygginganna er einnig ritað inn á teikningarnar. Þar kemur því greinilega fram hvaða bygging í búðunum hafi verið gasklefi (sjá mynd), hvar líkkjallarinn hafi verið, og allt auðvitað með þýskri nákvæmni.

Sérfræðingur hjá Bundesarchiv, Ríkisskjalasafni  Þýskalands, hefur þegar lýst þessum uppmælingum sem mikilvægum fundi, svo ég býst við að ekki sé þarna um hrekk eða fölsun að ræða.

Í dag eru líka 70 ár frá því að Þjóðverjar gengu berserksgang gegn gyðingum á Kristalnóttinni. Þjóðverjar minnast margir þessa svarta bletts á sögu sinni með mikilli andargift og virðingu. Ekki er hægt að segja það um aðrar þjóðir. Litháar, sem margir hverjir stunduðu gyðingamorðin grimmt, hafa hingað til ekki fengist til að draga einn einasta litháískan nasistaböðul fyrir dómara. En nú vilja þeir hins vegar ólmir draga þrjú gamalmenni fyrir dóm. Þetta eru gyðingar, sem börðust með kommúnistum gegn nasistum og skósveinum þeirra. Litháar telja þremenningana vera stríðsglæpamenn.

Mér þykir alltaf gott að koma til Litháen og þar býr margt gott fólk. En þjóðin þarf að taka sig mikið á ef taka á hana alvarlega. Lágkúrulegt gyðingahatur er enn mjög almennt í landinu. Mótmælið áformum litháískra ráðamanna hér.

Athugasemdir

[Kjartan Másson (IP-tala skráð) 9.11.2008 kl. 22:37]

Þetta er nú voða cheap hvernig þú spyrðir alla sem spyrja gagnrýnna spurninga saman í einn hóp og þeim sé ekki viðbjargandi.

 Það neitar ekki nokkur sem vill taka sig alvarlega að Helförin hafi farið fram. Þó tölur látinna séu á reiki þá voru búðirnar og flutningar skjalfestir með vísindalegri nákvæmni af nazistum sjálfum. 

Þú setur þá sem efast um skýringar stjórnvalda á 9/11 undir sama hatt og einhverja vitleysinga. Þrátt fyrir það eru ýmsir mjög virtir fræðimenn eru í fararbroddi hreyfingarinnar í BNA. http://911scholars.org/

Sjálfur er ég sagnfræðinemi og þakka fyrir einkar áhugaverðan tengil á þessi Auschwitz-skjöl. Vona að þú forðist framvegis að setja alla sem hafa öðruvísi skoðanir undir sama hatt, stundum þarf að greina kjarnann frá hisminu.

Gangi þér vel með síðuna.

[Jón Steinar Ragnarsson, 9.11.2008 kl. 23:07]

Ekkiefast ég um helförina, en finnst sjálfsagt að opið sé á skoðanaskipti um þetta skelfilega mál, svo setja megi niður íllkynjaðar þjóðsögur og þagga niður í vænisjúkum neonasistum með þeim hætti. Þ.e. fyrir opnum tjöldum. Ég held að meginorsök fyrir að samsæriskenningar eru svo lífseigar, eru höft á tjáningafrelsi varðandi þennan einangraða þátt mannkynssögunnar.

Jafnvel gyðingar sjálfir eru uggandi og efins um slíkar uppgötvanir af þessum sökum, svo tortryggning heltekur báða póla eins og þessi athugasemd sýnir.

[Marinó Óskar Gíslason, 10.11.2008 kl. 11:54]

Ég held að enginn heilvita maður með réttu ráði efist um að helförin hafi átt sér stað.

Í þeim hópi sem ég var í síðastliðið vor og heimsótti helfararsafnið í Jerúsalem, var ekki einn sem kom ósnortinn út. Myndirnar þar sýna svo ekki sé um villst hvað átti sér stað þarna.

Það þarf ekki að vera með neinar "háspekilegar" vangaveltur yfir þessum atburðum. Teikningarnar vitna um það sem gerðist.

[Guðjón Sigþór Jensson, 10.11.2008 kl. 12:26]

Dálítið ruglingslegur texti sem þú Vilhjálmur ættir endilega að endurskoða.

Allar nýframkomnar upplýsingar um all sem máli skiptir í sögulegum rannsóknum eru mjög kærkomnar. Akkur væri að fá upplýst nánar frá þessum skjalafundi.

Varðandi þessa hræðilegu atburði þá er óskandi að mannkynið geti dregið einhvern lærdóm af þessu. Er ekki því miður verið að brjóta á mannréttindum? Okkur Íslendingum finnst ansi hart að liggja undir þungum ásökunum Gordons Brown að hann hafi beitt lagaheimildum um hermdarverk gagnvart friðsamri og vopnlausri þjóð?

Eitt sinn var fursti reyndar þjóðhöfðingi heillrar þjóðar sem Ívan hét. Hann var þekktur fyrir óvenjulega grimmd og sýndi andstæðingum sínum enga minnstu miskunn. Rússar gáfu honum viðurnefnið grimmi: Ívan grimmi. Sjálfsagt mætti yfirfæra það yfir fleiri sálarlausar en mikilvægar persónur.

Mosi

[Heimir Tómasson, 11.11.2008 kl. 02:57]

BBC gerði fyrir nokkru heimildamyndaflokk um Auschwitz búðirnar. Vandaðir þættir eins og BBC er von og vísa. Það sem að kom mér á óvart voru viðtölin, ekki við fanga heldur fangaverði. Þar kom margt athyglisvert í ljós. Einn viðmælandanna var ennþá harður á því að þetta hefði allt átt bullandi rétt á sér og meira en það, þetta hefði hreinlega verið heilög skylda.

Athyglisvert viðhorf það. Svona svipað athyglisvert og að þræta fyrir þennan viðurstyggilega blett á mannkynssögunni - sem nota bene sér ekki fyrir endann á. Aðrar heimsálfur, aðrir kynþættir, aðrar aðferðir - sama niðurstaða.

Ef tekið er viðtal við menn sem voru fangaverðir í Auschwitz, dæmdir fyrir það og viðurkenna að hafa verið fangaverðir í Auschwitz þá er nú grunninum kippt undan þeim sem að halda því fram að þetta hafi aldrei átt sér stað.

Kannski ég komi með eigin pistil um þetta við tækifæri.