Kreppa, hvað?

 

 

Með hluttekningu og samúð fylgist ég með kreppunni á Íslandi, um leið og ég útfylli umsóknareyðiblöð um ríkisborgararétt í ýmsum löndum sem betur eru stödd en Ísland. Ýmis Afríkulýðveldi heilla. Green Card umsóknin til BNA er auðvitað komin í pappírstætarann.

En nú þegar allir eru líklega farnir að sjá að "útrásin" var bara árás á þjóðina í frumskógarstríði fyrirtækjagamma, langar mig að benda á að kreppa getur leitt af sér góða hluti. Í stað þess að grenja og heimta patentlausnir eins og sterkan mann (sem er ekki til), þjóðstjórn eða Evru, er miklu nær að sérhver Íslendingur sé sterkur og stjórni þjóð sinni í átt að betri tímum. Ég er ekki að tala um neitt alþýðulýðveldi Steingríms J., þar sem dansað verður á líkkistu síðasta kapítalstans með undirspili Bubba Mortensis sveitasönglara og þar sem traktorar verða aðalfararskjótarnir. Eyðsla, bruðl, græðgi og ránseðli það sem einkennt hefur Íslendinga, vinstri menn sem og hægri, síðan um 1980, verður að dempa. Ímyndunarveikina verður að lækna.´

Ísland gegnir ekki hlutverki á meðal þjóðanna og ætti strax að stöðva allt rugl um setu í Öryggisráðinu. Öryggið heima fyrir er miklu mikilvægara en stuðningur við hryðjuverkamenn í öðrum heimsálfum. Flottræflaháttur kostar 300.000 manna þjóð dágóðan skilding. Hægt væri að kaupa olíu fyrir það sem sparast og dálítinn mat fyrir afganginn. Loka ber helmingi allra sendiráða landsins. Safnast þegar saman kemur.

Gleymið ekki að mótmæla

Athugasemdir

[Kristján Sveinsson (IP-tala skráð) 2.10.2008 kl. 23:54]

Þökk fyrir ráðin góðu. Vera má að þú verðir orðinn ríkisborgari í Kongó þegar þú lest þetta. En hér höldum við sjó. Rifum seglin, beitum upp í vindinn og ausum dallinn þurran.

Auðvitað vantar okkur evru. Það sem hér er við að etja umfram vanda annarra kapítalískra efnahagskerfa er ónýtur gjaldmiðill sem brýnt er fyrir okkur að losna við. Því fyrr sem það getur tekist, því betra. Það er engin patentlausn, heldur knýjandi nauðsyn því ónýtum gjaldmiðli fylgir uppnám í fjármálum. Og það er sannarlega öryggismál. Ætti að líta á það sem slíkt og hætta hinum fáránlega og óskiljanlega rembingi við að halda brostnum gjaldmiðli sem hvorki á sér efnahagslegar né pólitískar forsendur lengur. Er orðinn spilapeningur hinna óprúttnu, ásælnu og gírugu sem engu skeyta um hagsmuni almennings. Vita skaltu að slíka fósa er bæði að finna meðal stertimanna markaðarins og í hægindum embættismanna.

Að einu leyti hefur þú rétt fyrir þér. Ógæfa frjálshyggjunnar hófst um 1980. Það er hauslaus hugmyndafræði og við súpum seyðið af því nú að henni var fylgt. Hér á landi og miklu víðar.  Hún kom ekki frá vinstri.

Og ég er öldungis sammála þér um það að það væri hið mesta lán ef Ísland verður ekki kosið inn í Öryggisráð S.Þ. Og sendiráðum örríkisins mætti sannarlega fækka. Ekki veit ég tli hvers þau eru að sendast. Eða fyrir hvern.

[Skattborgari, 3.10.2008 kl. 02:07]

Þetta er eina færslan sem þú hefur skrifað sem ég er sammála.

Stjórnmálamenn hugsa um það að sýnast stærri en þeir eru með því að reyna að komast í öryggisráðið og koma upp flottum gagnlausum sendiráðum.

Kveðja Skattborgari.

[Kjartan Pétur Sigurðsson, 3.10.2008 kl. 09:19]

Fín færsla.

[Arafat í sparifötunum, 3.10.2008 kl. 12:24]

Hjartanlega sammála þessari færslu.

[Ragnheiður Arna Magnúsdóttir (IP-tala skráð) 3.10.2008 kl. 13:18]

Vá hvað ég er heppin að vera með Svissneskan ríkisborgararétt!! Held ég fari að setja oní töskur, nenni ekki að fara út í búð og fylla búrið af hveiti, sykri, haframjöli.........