Flóttamaðurinn og samviskan

 

 

Hræðslan við svarta manninn er enn landlæg á Íslandi. Mál Pauls Ramses er gott dæmi um það.

Ramses er vísað af landi brott. Menn hafa ýmislegt sér til málsbóta, en ekki minnsta vott af meðkennd, sem á að vera svo rík meðal kristinna þjóða. Birni Bjarnasyni þykir fólk stjórnast af tilfinningasemi í umræðunni og telur að brottvísun Ramses styðjist við lagaleg rök og vera góða embættisfærslu. Hún styðst  að minnsta kosti ekki við neina haldbæra rannsókn á högum mannsins. Tilfinningasemi er góð, en mér finnst líka margir styðja Ramses vegna þess eins að þeir eru á móti ríkisstjórninni og nota málið eins og allt annað til að koma Birni Bjarnasyni í bobba og ríkistjórninni burt. Hvar er þá meðkenndin með manni sem líkast til er í lífshættu verði hann sendur til Kenýa?

Í þessu máli virðist ríkja tvískinngungur á báða bóga. Svo má ekki gleyma ABC barnahjálp, sem heyrist nefnd í sambandi við mál Paul Ramses. Það er stofnun/bissness sem ég vildi vita meira um en það sem ég les á vefsíðu stofnunarinnar.

Fyrir nokkrum árum sýndi mér kona myndir af dreng sem hún hélt sig styrkja í Úganda fyrir tilstuðlan ABC hjálpar. Ég benti konunni á að myndirnar frá ári til árs væru ekki af sama drengnum og það var greinilegt. Þegar konan sá það, var hún fljót að álykta: Svo styrki ég marga drengi í Úganda.

Mér þykir furðu sæta að Utanríkisráðuneytið, sem styrkti verkefni það sem Paul Ramses kom að í Kenýa með ABC Barnahjálp, geri ekkert í þessu máli.

Fáum Paul Ramsem aftur til Íslands meðan mál hans er rannsakað niður í kjölinn. Ef enginn fótur er fyrir flótta Paul Ramses, getur hann farið heim og eflt sitt land. Ef hann er í hættu getur hann orðið góður Íslendingur með öllu sem því fylgir.

Eftir stendur, að það þykir gott mál að veita kólumbískri kærustu sonar ráðherra og snældurugluðum skákmeistara dvalarleyfi og express ríkisfang á Íslandi. En Afríkumanni er hent út sí sona, þótt líf hans sé í hættu. Erfitt að skýra slíkt. En Björn Bjarnason gerir það vonandi betur en með því tuði sem hingað til hefur komið út úr honum.

- - -

Myndin efst er af gyðingastúlku sem mér þótti passa svo vel við þessa færslu. Þeldökkir Íslendingar eru sjaldséðir, og greinilega ekki eins velkomnir og þessa stúlka er í Ísrael.

Athugasemdir

[Anna Karlsdóttir, 6.7.2008 kl. 15:00]

Sæll Vilhjálmur

Það er nokkuð til í því sem þú segir. Afhverju beitir utanríkisráðuneyti og ABC sér ekki meira. Ég fór á heimasíðu ABC og þar er helsta umfjöllunarefni hjartnæmt brúðkaup sendifulltrúans og eins íbúa landsins - ekkert um Paul Ramses, enda samtökin svo sem ekki beint slíkur vettvangur. Þeirra meginhlutverk er að skapa umkomulausum börnum athvarf. En samt...

Offorsið í sambandi við afgreiðslu þessa máls tengist því að gegnum Dublinarsáttmálann geta íslendingar fríað sig ábyrgð á ákvarðanatöku um flóttamenn og sent fólk án ábyrgðar til fyrsta komulands í Evrópu. Hefurðu aldrei velt fyrir þér afhverju hlutfall flóttamanna á Íslandi miðað við innflytjendur er svona lágt?

Ég held að þó að íslenskt samfélag breytist hratt er samt margt hér gegnsýrt af xenofóbíu - ekki síst gagnvart þeldökku fólki.  Innan háskóla Íslands er til dæmis ótrúlegt hvað starfsmenn af erlendu bergi brotnir þurfa að þola af umvöndunum og ignorans íslenskra kollega sinna. Bæti þessu bara við afþví að ég hef verið að heyra hreint ótrúlegar sögur þeirra undanfarið. 

[Sigurður Þór Guðjónsson, 6.7.2008 kl. 18:02]

Mér finnst að ABC, sem sagt er að hafi sönnungargögn um það að Ramses sé á dauðalista í Keníu, ættu að birta gögnin opinberlega. Eflaust vilja þessi hjálparsamtök ekki blanda sér í deilur - en samt. Samtökin eru sögð hafa þessi gögn undir höndum. Hafa þau nokkuð birst annars? 

[Carlos Ferrer (IP-tala skráð) 6.7.2008 kl. 18:16]

Vissulega virðist embættismaðurinn hafa leyfi til að senda flóttamanninn til þess lands sem hann hafði viðkomu í áður en hann lenti hér (engin bein flug frá neinu Afríkuríki til Íslands). Jafnvel þótt þar með sé fjölskyldu hans tvístrað. Pílatus þvær sér um hendur. Vilmundur heitinn Gylfason hitti naglann á höfuðið þegar hann sagði:

Löglegt en siðlaust.

Hefur ekkert með tilfinningasemi að gera. Þetta er móralskt gjaldþrot ráðherra og embættismanna hans sem í skjóli laga brjótast inn um miðjar nætur til að fjarlægja óvelkominn útlendinginn. Á hvað minna svoleiðis aðferðir?

[Vilhjálmur Örn Vilhjálmsson, 6.7.2008 kl. 19:25]

Þakka ykkur fyrir góðar athugasemdir, Carlos, Sigurður og Anna. Kannski var ég of dómharður við ABC barnahjálpina og aðstandendur hennar hafa vonandi eitthvað í pokahorninu sem getur hjálpað Paul Ramses.

Ég skammast mín fyrir að vera Íslendingur þegar svona mál koma upp. Íslendingar, sem oftast eru svo rólegir og yfirvegaðir, gætu hafa hugsað sinn gang oftar en tvisvar í tengslum við þetta mál.

Asinn bendir á mínu mati til þess að fólk álíti Afríkumenn og aðra þeldökka annars flokks fólk, sem ekki megi blanda blóði við Íslendinga. Af hverju annars þessi flýtir að koma manninum úr landi?

[Úrsúla Jünemann, 6.7.2008 kl. 20:23]

Þetta mál er íslensku þjóðarinnar til skammar.

[Vilhjálmur Örn Vilhjálmsson, 7.7.2008 kl. 08:25]

Úrsúla, kannski ekki allri þjóðinni. Meirihlutinn vill hjálpa Paul Ramses. Þetta er embættismönnunum og embættunum til skammar.

[Carlos Ferrer (IP-tala skráð) 7.7.2008 kl. 08:57]

Eg gerdi thau mistok ad hafa ekki kynnt mer malid til hlytar, thegar eg skrifadi ad embaettismenn brutust inn og handtoku Rames Odour Paul um midjar naetur, sbr. greinagerd utlendingastofnunar. Annad stendur. Bendi a storgott blogg Atla Hardarssonar i thessu sambandi.