Doktor Prime Minister

Anders Fogh Rasmussen forsætisráðherra Dana var nýlega á ferð í Ísrael. Þar var hann meðal annars sæmdur heiðursdoktorsnafnbót þann 28. maí sl. við háskólann í Haifa. Ráðherranum var boðið til Ísraels í tengslum við 60 ára afmæli Ísraelsríkis og titilinn og hattinn fékk hann fyrir störf sín að sviði umhverfismála og friðar.

Ekki veit ég hvort Fogh Rasmussen hefur stuðlað meir að umhverfismálum eða friði en aðrir. Ég tel að hann hefði getað fengið nafnbótina fyrir öllu merkilegra afrek. Árið 2005 baðst hann afsökunar fyrir hönd þjóðar sinnar og fyrri ríkistjórna á þeirri meðferð sem dönsk yfirvöld gáfu flóttafólki, gyðingum og öðrum, á 4. og 5. áratug síðustu aldar. Hann bað gyðinga afsökunar á því að gyðingar höfðu verið sendir í klær nasista fyrir tilstuðlan danskra yfirvalda. Rúmri viku áður en hann kom með þessa afsökun, hafði ráðuneyti hans beðið um bók mína Medaljens Bagside, og hjólaði ég stoltur með hana og afhenti hana á skrifstofu Anders Fogh Rasmussens. 

 

                             © Jerry Bergman, Copenhagen

Danir vilja helst ekki heyra um þennan dökka kapítula í sögu sinni og dvelja frekar við, og stæra sig af, björgun gyðinga til Svíþjóðar í október 1943, þó svo að sú björgun hafi nú fyrst og fremst verið möguleg vegna þess að æðstu Þjóðverjarnir í Danmörku ákváðu að líta í aðra átt og gera minna úr aðgerðinni gegn dönskum gyðingum en upphaflega stóð til. Það gerðu þeir til að bjarga eigin skinni, því þeim var ljóst að stríðlukkan hafði snúist gegn Þjóðverjum.

Í Ísrael hafa menn enn ekki fengist til að meðtaka, að það var ekki bara giftusamleg björgun gyðinga árið 1943 sem hægt er að skrifa á sameiginlega sögu gyðinga og Dana. Sú saga inniheldur marga ljóta kapítula. 

Anders Fogh Rasmussen hefur, mér vitandi, ekki gert neitt sérstakt á sviði umhverfismála fyrir utan langtímaáætlun fram til 2025. Áætlun ríkisstjórnar hans í umhverfismálum er yfirveguð og raunsæ. Stjórnarandstaðan í Danmörku, eins og stjórnarandstöður víða annars staðra, virðist hins vegar halda  að hægt sé að frysta norðurpólinn og stöðva alheimshitnun ef vinstri menn komast til valda. Málið er ekki svo einfalt. Hér áður fyrr var þó mjög oft kalt í Gúlaginu, þar sem vinstri menn réðu öllu.

Fogh Rasmussen er einnig meðal þeirra leiðtoga sem sent hefur herlið til Írak og Afganistan. Menn geta lengi rætt hvort það er til góðs eður ei. Sjálfur tel ég það manninum til sóma. Friður kemst ekki á í þessum löndum meðan hryðjuverk eru faðirvorið.

Afsökunarbeiðni Anders Fogh Rasmussens árið 2005 var nægileg ástæða til að gefa honum doktorsnafnbót og sakna ég þess afreks í jarteiknaskrá Anders Fogh Rasmussens sem Háskólinn í Hafia hefur gefið út. Það hefði verið fullnóg ástæða til að gefa honum ferkantaða hattinn.

 

Athugasemdir

[Alexander Kristófer Gústafsson, 11.6.2008 kl. 14:17]

Danir eiga heiður skilið fyrir stöðu sína í teiknimyndamálinu og flott mál hjá Rasmussen að biðjast afsökunar á voðaverkinu gagnvart gyðingum sem Danmörk áttu þátt í.

 Mér finnst skrítið er að vinstri grænir eru með sömu óskir og nýnasistar gagnvart Ísrael.

[Vilhjálmur Örn Vilhjálmsson, 11.6.2008 kl. 23:41]

Menn leita sér gjarnan af fjandmanni. Gyðingar hafa lent illa í kirkjunni og alls kyns "ismum", m.a. vegna þess að þeir vildu hvorki fylgja keisara eða Kristi.

Nú þegar þjóðríkið Ísrael er veruleiki, er öfgamenn ósáttir, því ríkið sýnir að nútímalegt lýðræðisríki getur lifað góðu lífi þar sem allt er  annars í vitleysu vegna öfga í trú og stjórnmálum.  Ef vandinn er ekki PFLP, þá her hann Hamas eða Hizballah og Bræðralag Múslíma. Vinstri og hægri öfgamenn svæðisins gera lífið leitt fyrir Ísrael og vinir öfganna á Vesturlöndum taka þátt.

Nýnasistar hafa hins vegar frekar lítið tjáð sig um Ísrael, en heyrt hef ég um stuðningsyfirlýsingar þýskra nasista við öfgasamtök Palestínumanna.  Væntanlega telja nýnasistar gyðinga óæðra fólk en Palestínumenn. Hitler, guð þeirra, vísar veginn, enda með góð sambönd við trúarlega leiðtoga Palestínumanna á sínum tíma.