Åge Meyer Benedictsen

 

 

Þegar félag Litháa var stofnað á Íslandi um síðustu helgi, langaði mig að heyra hvort einhverjir lesendur bloggsins, sem hér líta inn, vissu að sovéthrellirinn Jón Baldvin Hannibalsson væri bara núll og nix miðað við Åge Meyer Benedictsen í Litháen.  Ég spurði og það leið vika þangað til einhver Sigurður í HÍ, sem gengur undir dulnefninu SÖK, kom með hluta af réttu svari.  Sjá hér.

Åge Meyer Benedictsen var Dani af íslenskum ættum. Móðir hans var Anna Benedictsen leikkona og söngkona, sem var dóttir Jens Benediktssonar (Benedictsen) kaupmanns í Efstakaupstað, Christianshavn og Nýhöfn. Meðal fleyja hans, sem ég spurði um, var hið glæsilega skip Hekla (sjá mynd). Málverk af skipinu, sem hefði sómt sér veglega á safni á Íslandi, var nýlega selt á uppboði í Kaupmannahöfn. Merkasta húsið á Ísafirði, Faktorshúsið, var í eigu hans og þar fæddist Anna, móðir hans.

Fjölskyldan flutti til Kaupmannahafnar, vegna þess að dönsk amma Åge Meyer Benedictsen sem var mikil selskapsdama undi ekki hag sínum á Vestfjörðum. Móðir Åge Meyer Benedictsen var góðkunnug H.C. Andersen. Eitt sinn hitti Andersen hana, systur hennar og móður í Þýskalandi, þar sem þær voru í óperuferð. Faðir Åge Meyer Benedictsens var danskur gyðingur sem gat rakið ættir sýnar til Þýskalands.

Ekki ætla ég að rekja ættgarð Benedictssens og sögu hans frekar hér, en geri það líklega bráðlega í einhverri grein.

Åge Meyer Benedictsen þótti snemma mikill námsmaður og var einn fremsti þjóðfræðingur Dana í lok 19. aldar og byrjun þeirrar 20. Hann lét margar þjóðir sig varða, en hafði sérstakan áhuga á Lithaugalandi og Armenum. Hann skrifaði mörg alþýðleg fræðirit , meðal annars um Ísland, og þótti einn vinsælasti fyrirlesarinn í Danaveldi um og eftir aldamótin 1900. Þar að auki var hann mjög áhugasamur um fullveldi Íslendinga og einn stofnfélaga Dansk-íslenska félagsins (Dansk-Islandsk Samfund).

Ég er miðlimur í félagi til heiðurs Åge Meyer, sem telur félagsmenn í ýmsum löndum, en flesta í Litháen. Ég mun segja frá því nánar síðar.

Athugasemdir

[Snorri Bergz, 26.5.2008 kl. 08:27]

Sælir Villi. Jæja gott að einhver gat þetta. Ég held ég hafi einhver skjöl um "Áka" einhvers staðar; en úr því þú ert þarna með vísan í "Berlínarboogie Laxness" má geta þess, að Laxness rakst á þennan merkilega mann á unga aldri.

Kveðjur

SGB

[Faktor, 28.5.2008 kl. 11:17]

Heill og sæll Vilhjálmur!

Já ég var með öll svörin, en ég sá ekki færsluna fyrr en þú varst búinn að upplýsa okkur!

Ég er svo spennt að sjá skrifin þín og samantektina.  Vonandi er einhver sama sinnis í útgáfu og tilbúin(n) að greiða vel fyrir greinina!

Veit einhver hvar Salka Valka var skrifuð úr því að minnst var á Laxness? 

Það kom kona að máli við okkur hjónin og sagði okkur að hann hefði dvalið í húsinu sem móðir Aage fæddist í, þegar hann var að skrifa bókina.

Það er margt sem það hús gæti sagt ef það gæti mælt

Bestu kveðjur úr Hæsta!

Þín vinkona, 

ÁJJ