Íslenska hetjan í Litháen

 

Ég fagna því að félag Litháa á Íslandi hafi verið stofnað. Slíkt félag gæti t.d. orðið öflugur aðili í að hreinsa það óorð sem komið er á þessa góðu þjóð á Íslandi vegna starfsemi fáeinna óheppilegra einstaklinga með litháískt þjóðerni og vegabréf. Glæpamennskan, sem streymir frá ráðstjórnaríkjunum fyrrverandi, er arfleifð kommúnisma og fasisma, í bland við fátækt og ofsakapítalisma. Það getur aldrei komið neitt gott út úr þeirri blöndu. Við erum heppin á Íslandi. Ljótt væri ef Íslendingar væru dæmdir vegna einhverra skíthæla sem brjóta af sér erlendis. Gæti það gerst?

Nú þegar þessum áfanga er náð af Litháum á Íslandi, er nauðsynlegt fyrir mig að minna félagsmenn á, að einn sá útlendingur sem mesta þýðingu hafði fyrir fyrstu frelsisbaráttu og sjálfstæði Litháa var af íslensku bergi brotinn. Nei, ég er ekki að tala um Jón Baldvin Hannibalsson, sem líka er vel þekktur í Litháen. Hann er engin hetja eins og hinn Íslendingurinn.

Hetjan er þessi glæsilegi maður sem prýðir færsluna. Hann var af íslenskum ættum og gyðingaættum. Ágætis blanda, ekki satt? Ég hef verið að dunda mér að skrifa dálítið um sögu hans og ætla mér að birta það hið bráðasta í einhverju tímariti sem vill borga mér vel fyrir.

Getraun dagsins er:

Hvað hét þessi ágæti maður?

Í hvaða húsi fæddist móðir hans og hvað hét eitt fallegasta skipið í Kaupmannahöfn sem var í eigu afa hans?

Hún Áslaug vinkona mín á Efstakaupstað, sem ég hef trassað að skrifa til vegna anna í nýju starfi, má ekki vera með í getrauninni.

Þeir sem geta svarað öllu rétt, ættu að gerast félagar í hinu nýja félagi Litháa.

Litháar á Íslandi stofna félag

Athugasemdir

[Vilhjálmur Örn Vilhjálmsson, 18.5.2008 kl. 20:40]

Ekki hét hann Jónas, eða Jonas. Kannski geta aðrir ráðið fram úr þessu.

[Linda, 18.5.2008 kl. 20:50]

Því miður verða ég að játa mig fáfróða þegar það kemur að þessum gæða manni.  Ég get hinsvegar óskað Litháum innilega til hamingju með þetta nýja félag og ég ætla að heimsækja þau við tækifæri og kynnast menningu þeirra. 

kv.

[Snorri Bergz, 18.5.2008 kl. 20:55]

Mig minnir að þú hafir sagt mér frá þessum, eða kannski er ég að rugla...en í öllu falli man ég ekki nafnið og "þegi því bara kjafti" eins og skáldið sagði.

[Vilhjálmur Örn Vilhjálmsson, 19.5.2008 kl. 03:37]

Já Snorri, það getur stundum verið "hoglht", eins og Helgi Sæmundsson sagði í auglýsingunni fyrir Hótel Holt. Með þessu var ég ekkert að hjálpa.

Eru ekki einhverjir Litháar sem vita þetta???

[Loftur Altice Þorsteinsson, 21.5.2008 kl. 22:45]

Vilhjálmur, á Netinu fann ég mann að nafni Ruvn Ayzland, sem ég er forvitinn um, þótt hann sé sjálfsagt ekki sá sem myndin er af.

Hann giftist  Rosu Harning Levensbaum (1887-1952), sem notaði höfundarnafnið Anna Margolin.

Ayzland er einnig ritað Eisland og Iceland.

Ruvn (Hrafn) virðist hafa fæðst í Radomyśl Wielki í Suður-Pólandi. Hann gæti hæglega hafa komið við sögu í Litháen, þótt ég hafi ekki fundið upplýsingar um það.

[Gestur Halldórsson, 25.5.2008 kl. 10:17]

Vilhjálmur, á ekki að fara að loka fyrir athugasemdarlistann og fræða okkur meira um þennan glæsilega og fagurlega innréttaða mann.

[SÖK (IP-tala skráð) 25.5.2008 kl. 19:34]

Aage Meyer Benedictsen

[Vilhjálmur Örn Vilhjálmsson, 25.5.2008 kl. 19:59]

SÖK??? hefur á réttu að standa.

[Sigurður Þór Guðjónsson, 26.5.2008 kl. 13:48]

En hvað vann hann sér til hetjuskapar maðurinn?