Skjaldarmerki Íslands, gamalt og splunkunýtt

 

Hið konunglega skjaldarmerki Íslands, fálki með kórónu á bláum grunni, var ákveðið með konunglegum úrskurði árið 1920  Þetta merki var víst aldrei notað nema við konungskomuna árið 1921.

Konungskoman árið 1921 var alltaf mjög spennandi fyrir mig þegar ég var barn á 7. áratug 20. aldar. Hann afi minn, Vilhelm Árni Ingimar Kristinsson sem var í ÍR á þeim árum, stökk yfir hest og lék listir á tvíslá fyrir Kristján konung tíunda og fékk medalíu fyrir. Nú á ég þessa medalíu og ljósmyndina af því mannavali sem sýndi konungi að Íslendingar voru enn fimir eins og Gunnar á Hlíðarenda.

Ekki var fálkinn með kórónuna notaður á Íslandi nema í tengslum við konungskomuna 1921. En merkið var notað í öðru samhengi og óhollara.

Eins og hægt er að sjá í næstu færslu, þá kom oft mikill fróðleikur út úr reykingum manna á fyrri hluta 20 aldar.  

Skjaldarmerki konungsins yfir Íslandi var stundum að finna í sígarettupökkum sem seldir voru í Hollandi og Belgíu á 4. áratugnum.

Nú finnst mér það eðlilegt, þegar evran verður kannski að gjaldmiðli Íslendinga og Imba Sólargeisli kemst í öryggisráðið hjá samtvinnuðu þjóðunum, að þá verði búið til nýtt skjaldarmerki fyrir Íslendinga.

Ég legg einfaldlega til geirfugl [eða bölvaða álku] á bláum grunni með Evrópugeislabaug yfir höfði. Ég hef þegar hannað það. Hvernig líst mönnum á, eða þeim fáu sem nú lesa þetta blogg eftir ráðstafanir Morgunblaðsbloggsins í mars 2008 [sjá skýringu á þessu hér], sem gert hefur að þetta verður örugglega ekki lesið af nema 5 sálum?

Skjaldarmerki Evrópusambandsríkisins Íslands

Athugasemdir

[Pétur Björgvin, 29.3.2008 kl. 13:59]

Sæll. Sennilegast er ég sá sjötti sem les þetta. Legg til útópíubrimbretti i viðbót á nýja skjaldarmerkið. Sé álkuna fyrir mér svífandi á hraðri ferð niður í óvissuna eins og hver annar nýríkur brimbrettagaur.

[Sigvaldi Eggertsson (IP-tala skráð) 29.3.2008 kl. 21:23]

Lesandi nr. 7 hér.

Þú týnist nú ekkert þótt að þú sért ekki að boða sama sannleika og Mogginn, ég var nefnilega búinn að setja á þig bókarmerki!

Mér hefur alltaf líkað best við útflöttu þorskana þrjá (við lifum jú ennþá á þeim og nú ættu útgerðirnar að fara að hressast með fallandi gengi) og þar sem Íslendingar eiga ekkert skjaldarmerki (skjaldbera og fána eigum við en ekkert skjaldarmerki, það er það sem skjaldberarnir eiga að halda á) þá legg ég til að þorskarnir verði endurvaktir. Þið getið svo stráð evrustjörnum yfir þá ef ykkur svo sýnist.

 Sigvaldi

[Sif Gylfadóttir, 30.3.2008 kl. 03:40]

Eg er nú ekki sátt við að Mogginn sé að flokka fólk eftir "réttum" skoðunum, og er með þig á bókamerki til að geta lesið þitt mjög svo fróðlega blogg .  Kv.Sif

[Vilhjálmur Örn Vilhjálmsson, 30.3.2008 kl. 06:06]

Góðir gestir, þakka ykkur fyrir góðar tilgátur um skjaldarmerkið!

Álka á útópíubrimbretti gæti verið góð hugmynd. Mjög nútímaleg.

Hvað með Þorskflak með Evrópustjörnum? Mér hefur líka alltaf þótt þetta svokallaða skjaldarmerki okkar og forveri þess með kórónunni dálítið hallærislegt.

Þetta með fallið niður í þriðju deild hefur verið lagað og ég er aftur kominn í "snobbhill" moggabloggara. Eitthvað tæknilegt hefur gerst, en hefur því nú verið kippt í liðinn af liðlegum stjórnendum bloggsins.