Geysir fylltur af grjóti og torfi

 

Ég þakka öllum þátttökuna í getrauninni (sjá hér að neðan), sem nú verður að teljast lokið. Enginn skráður bloggari svaraði öllum þremur spurningum rétt, en svörin voru skemmtileg. Ólafur Fannberg bjargaði heiðri þeirra sem þátt tóku - en gaf ekki upp áratuginn né hvað var verið að gera við Geysi. Seinni hluti 19. aldar hefði verið viðunandi svar. Ég lýsi hann því sigurvegara og má hann senda mér heimilisfangið sitt, svo ég geti sent honum verðlaunin með pósti.

Getraunin var teikning, sem birtist 10. september árið 1881 í Illustrated London News og sýnir menn bera grjót, torf og annað kraðak í Geysi til að fá hann til að gjósa. Aumingja Geysir hefur greininga þurft að þola sitt að hverju, áður en menn fóru að setja hálfar og heilar sápuverksmiðjur í hann.

Ef ég man rétt, er ekki langt síðan að Geysisnefnd, svo kölluð, var að fóðra hverinn með ýmsum óþverra, til að láta hann gutla fyrir einhvern þjóðhöfðingja eða til að skemmta fólki um Verslunarmannahelgar.

Þegar ég var á 8. ári var faðir minn túlkur og fararstjóri fyrir sjóliða af belgísku herskipi, sem annað slagið kom til Íslands. Faðir minn, í samfloti með eiganda Rammagerðarinnar, seldi dátunum minjagripi og hrossaskinn, og ég fékk belgískt súkkulaði og gosdrykki í framandi flöskum. Svo var var farið í ferð austur fyrir fjall. Meðal annar var komið að Grýlu í Hveragerði. Þar lofaði faðir minn skipverjum ókeypis þvott á vasaklútum. Allir, Aðmíralar niður til messadrengs, tróðu vasaklútnum ofan í hverinn. En þá fór Grýla í verkfall og enginn fékk hreinan vasaklút. Belgíski sjóherinn missti marga vasaklúta í þeirri ferð. Ef einhver hefur komið að Grýlu og fundið 20 vasaklúta, ca. 1968, ættu þeir að skila þeim til belgíska sjóhersins.

Athugasemdir

[Sólveig Hannesdóttir, 12.1.2008 kl. 20:01]

Heyrðu kæri Postdoc.....

   Hvenær var verzlunarmannahelgin fundin upp????

[Vilhjálmur Örn Vilhjálmsson, 12.1.2008 kl. 20:43]

Fyrsti Frídagur Verzlunarmanna var haldinn í Reykjavík 13. september árið 1894, að danskri fyrirmynd. Hér í Danmörku er ekki lengur frídagur Verslunarmanna.

Margir telja að Þjóðhátíðin í Eyjum sé af svipuðum toga, vegna þess að hún er haldin á sama tíma og verslunarmannhelgin nú á dögum. Hið rétt er að Eyjamenn komust ekki til fastlandsins þegar Kristján 9. konungur heimsótti okkur árið 1874. Eyjamenn ákváðu þess vegna að halda hátíðina í Eyjum. Hefur það haldist fyrir utan tvö skipti í seinni styrjöld. Hátíðin dó næstum því drottni sínum þegar menn heyrðu Árna Johnsen syngja í fyrsta sinn. Eyjamenn dóu þó ekki ráðalausir og þá varð til orðatiltækið "Það er vont en það venst".