Isländer auf der Reise

 

Nýlega keypti ég þetta óhrjálega blað í Hollandi vegna myndarinnar (sem er hægt að stækka með því að klikka nokkrum sinnum á hana) og textans undir henni.

Myndin er af ferðalöngum. Konu sem ríður í söðli og tveimur mönnum með barðastóra hatta.

Fólkið er allt frekar skuggalegt og ekki nóg með það, því er í textanum undir haldið fram að þarna séu Íslendingar á ferð. Kannski einhverjir í útrás? Líklega er það rétt tilgáta, þar sem þeir teyma á eftir sér fimm asna. Auðvitað hefur alltaf verið fullt af ösnum á Íslandi, en ekki fjórfættum eins og þeim sem er á myndinni. Kannski eru þetta Íslendingar á suðurgöngu, eða jafnvel Zoëga fjölskyldan á leið norður? Eða eru þetta bara myndabrengl í bókinni Europäer auf der Reise? Ítalir á ferð, og á síðunni þar sem stendur "Italiäner auf der Reise" munum við  finna Íslendingana.

Mér leikur forvitni á því að vita hvað þetta er. Allar tilgátur eru vel þegnar.

Ég veit þó svo mikið að þetta mun vera rifrildi úr einhverri þýskri skólabók frá miðbiki 19. aldar.

Athugasemdir

[Loftur Altice Þorsteinsson, 2.11.2007 kl. 11:12]

Hér er ein útgáfa af: Isländer auf der Reise.

Þessir Isländer fara hratt yfir !

Kveðja.

[Vilhjálmur Örn Vilhjálmsson, 2.11.2007 kl. 11:59]

Þessi landkynningateikning mun hafa verið gerð af Karl Paul Þemistoklesi Eckenbrecher, sem var þýskur ferðalangur og rómantísku klisjumálari og mun þetta vera frá 1874. Hann hefur sett reyndar sett færeyskan karl sem útvörð í hægra og neðra horn myndarinnar.

[Pétur Guðmundur Ingimarsson (IP-tala skráð) 3.11.2007 kl. 15:40]

Þessir hattar minna jafnvel á 16. aldar klæðnað, en mig minnir að hafa séð handritslýsingu sem sýnir fyrirmenni á þeim tíma með svo barðastóra hatta. Þeir voru hinsvegar mun hærri líka.

Klæðnaðurinn líkist engan veginn (svo ég muni) nokkrum þeim myndum sem sjást má í bókum Gaimards eða Stanleys (þó stanley kallinn sé kannski með ótraustari myndir).

Mér dettur í hug að teiknarinn hafi einfaldlega skáldað þetta frá eigin höfði. En teiknari Stanleys virðist hafa teiknað enska hesta og fyrirmenni í stað íslenskra og einbeitt sér að öðru í myndum sínum af Íslandi.

[Skúli Páls (IP-tala skráð) 5.11.2007 kl. 15:44]

Er þetta ekki asnar frekar en hestar? Mér finnst uppstillingin minna á Maríu, Jósef og flóttann til Egyptalands.

[Vilhjálmur Örn Vilhjálmsson, 5.11.2007 kl. 22:28]

Ég skrifaði asnar, þú skrifar asnar, Jose Maria Aznar.  Er þetta þá Jesús, María, Guð og asnarnir á leiðinni til Egyptalands? Mennirnir eru tveir. Kannski sagði Maja okkur ekki allan sannleikann. Nema þá að Guð sé Isländer! Jah, það er aldrei að vita........