Álsagan er ljót

 

Þessir forljótu tjaldhælar þýska nasistahersins úr áli minna mig á söguna um Hitler og Göbbels sem fóru í útilegu. Þegar þeir fóru að tjalda sagði Göbbels:"hæl Hitler, hæl Hitler, hæl Hitler, hæl Hitler....". Ætli álið í hælunum hafi verið framleitta af fyrirtækjum sem síðar hvörfuðust inn í þann risa sem Hafnfirðingar höfnuðu í gær?

Í gær sigraði naumur meirihluti Hafnfirðinga yfir ALCAN. Ég verð að hæla Hafnfirðingum fyrir þetta afrek.

Í gær greindi ég frá viðskiptum álrisans ALCOA við nasista í Seinni Heimstyrjöld. Það virtist fara fyrir brjóstið á ýmsum.

En fleiri álrisar undu vel hag sínum í viðskiptum við Þriðja Ríkið. Mörg svissnesk fyrirtæki stofnuðu leppfyrirtæki í Þýskalandi, til að geta haldið áfram rekstri sínum þar í "hlutleysi" lands síns. Meðal þessarra fyrirtækja voru Nestlé, ABB Ltd. (Brown Boweri & Cie), og Swiss Aluminium Industrie AG (AIAG), sem síðar gekk undir nafninu Algroup/Alusuisse Group AG (ALIG), sem keypt var af kanadíska fyrirtækinu ALCAN. Verksmiðjur Alusuisse voru m.a. í Martinswerk i Bergheim, í Singen og Lonza. Álrisarnir eru búnir að "friða samviskuna" með því að lofa að borga skaðabætur, en maður heyrir sjaldan um fórnarlömb sem hafa notið góðs af því.

Árið 2001 kom út merk svissnesk skýrsla sagnfræðinganefndar undir stjórn Jean Francois Bergiers. Í henni er hægt að finna upplýsingar um að leppfyrirtæki fyrrgreindra og annarra svissneskra fyrirtækja í Þýskalandi hafi notast við þræla; Fólk sem nasistar fluttu nauðugt til að vinna í þýskum iðnaði. Sum svissnesk leppfyrirtæki notuðu meira að segja þræla frá Auschwitz.

Næst þegar þið "búið til súpu" úr MAGGI pakka, getið þið minnst þess að Maggi var leppfyrirtæki Nestlés í þýska ríkinu. Súpur þessar hituðu morðingjum nasista. Rétt áður en Bandaríkjaher nálgaðist þetta þrælasúpufyrirtæki árið 1944, var hakakrossfáninn dreginn niður og að húni var dregið svissneska flaggið, blóðrauðugt með hvítan kross.

Álsagan er því miður blóðug! munið það Hafnfirðingar! Og þótt breski herinn hafi leitað uppi og skráð nasista í bæ ykkar árið 1940, var þar afar lítið að finna af ljótum körlum á við það sem svissneskur iðnaður lumaði á.

Ég hvet nú yfirvöld í Hafnafirði til að hefja alvöru rannsókn á tíðni krabbameinstilfella og annarra alvarlegra sjúkdóma meðal starfsmanna ALCAN (ALÍS/Alusuisse). Einnig væri spennandi að fá að vita hvað sumir af þýsku frumkvöðlunum í Straumsvík voru að gera í verksmiðjunum í Bergheim og Singen í Seinni Heimsstyrjöldinni.

 

Hafnfirðingar höfnuðu stækkun álversins

Athugasemdir

[Guðmundur Ragnar Björnsson, 1.4.2007 kl. 08:13]

Vilhjálmur. Ég bíð spenntur eftir því að þú bendir fólki á hvar þessa skýrslu sé að finna. Ég er búinn að leita á netinu og finn einungis einhverja furðulega þýska síðu sem segir ekki neitt um málið enda ekki skýrslan sjálf. Nú ætla ég ekki að fullyrða neitt en notkun þrælavinnuafls við álvinnslu er erfitt vegna þess að ferlið er viðkvæmt og þá sérstaklega fyrir skemmdarverkum. Auðvelt væri að skemma framleiðsluna án þess að nokkur tæki eftir því. Þar sem áliðnaðurinn var gríðarlega mikilvægur fyrir flugvélaframleiðsluna reikna ég með að Þjóðverjar hafi viljað hafa fulla stjórn á ferlunum. En þú mátt endilega vísa í þessa skýrslu þegar þú sakar fyrirtæki um að vera blóði drifin. Reikna með að þú berir sömu tilfinningar til stálframleiðenda þannig að járnblendið á væntanlega von á sendingu frá þér.

[Vilhjálmur Örn Vilhjálmsson, 1.4.2007 kl. 09:11]

Guðmundur, þegar ég vann á Dansk Center for Holocaust og Folkedrabstudier, lét ég panta allar skýrslur sem Bergier hafði framleitt með hópum sínum. Ég á þær ekki sjálfur, enda hef ég ekki pláss fyrir slíkt. Þær voru líkar allar til á netinu en efnahagsskýrlan er örugglega erfiðari að ná í en skýrslan um flóttamenn og gyðinga í Sviss.

Leyfi ég mér að benda þér á þetta í staðinn.

http://news.bbc.co.uk/2/hi/europe/1516430.stm

og

http://www.stockmaven.com/medrepcN.htm

Þess má einnig geta at Dr. Bergier er frekar óánægður með viðbrögð og aðgerðir Svissneskra yfirvalda eftir að skýrslur hans og ICE komu út.

http://www.swissinfo.org/eng/social_affairs/detail/Bergier_saddened_by_lack_of_political_feedback.html?siteSect=201&sid=7627781

Um störf ICE getur þú lesið hér:

http://www.uek.ch/en/index.htm

[Vilhjálmur Örn Vilhjálmsson, 1.4.2007 kl. 09:17]

Hérna Guðmundur og fólkið, hér eru skýrslurnar:

http://www.uek.ch/en/index.htm

[Vilhjálmur Örn Vilhjálmsson, 1.4.2007 kl. 09:25]

Kristinn Pétursson, fyrrv. alþingismaður er ólmur eftir að komast með mér og mér, Hitler og Göbbels í álútileguna og hefur tekið einhvern saklausna Grænfriðung með sér. 

Líklegast mun Kristinn rétta Hitler og Göbbels áleiningar í eldflaug, en ég og grænfriðungurinn neitum og endum svo í fangabúðum, umgirtum álgaddavír. Og nú er brandarinn búinn.

[Guðmundur Ragnar Björnsson, 1.4.2007 kl. 10:37]

Sæll Vilhjálmur

Gluggaði í skýrsluna og hún bendir til þess að AIAG og Singen Walzwerke hafi ekki notað starfskraft úr fangabúðum. Þeir hafi hinsvegar fengið bæði stríðsfanga, fólk í vinnuskyldu frá Vestur Evrópu og síðan "Forced Labour" frá Austur Evrópu sem voru bæði almennir borgarar og stríðsfangar. Af þessum fengu Vestur Evrópubúarnir sömu meðferð og Þýskir verkamenn en matarskammtar og aðbúnaður fyrir Austur Evrópubúana var bágborinn en þó trúlega skárri en í blýnámunum í Kolyma. Brown Boweri notaði hinsvegar fólk úr fangabúðum að einhverju leyti. 

Í þessu samhengi held ég að það verði að skoða aðstæðurnar sérstaklega. Fyrirtækin í Þýskalandi voru dótturfyrirtæki sem Svissnesku móðurfyrirtækin höfðu takmörkuð yfirráð yfir á meðan stríðinu stóð. Ef þýski hergagnaiðnaðurinn hefði talið sig vera að fá minna út úr fyrirtækjunum en þau gætu afkastað hefðu þau einfaldlega verið tekin eignarnámi. Það má síðan deila um siðferði þess að loka ekki fyrirtækjunum og láta Þjóðverjana hirða þau. Það er sama mál og þegar fólk segir afhverju Vesturveldin gátu ekki látið Hitler komast upp með neitt en Stalín fékk hinsvegar frítt spil. Nú voru þessir herramenn álíka slæmir en fengu ekki sömu meðferð. 

Annars þakka ég fyrir linkana því þeir voru fróðlegir.