Vorsöngur Villa

 

Þegar vorið byrjar snemma að berjast við veturinn í Danmörku og enginn veit hvort snjóhríð kemur í byrjun apríl, er þægilegt að njóta angurværðar hins unga vorkvölds með góðri tónlist meðan maður dreypir á sterku kvöldkaffinu.

Á undanförnum árum hef ég smám saman verið að uppgötva nýja kynslóð tónlistarmanna, sem eru eftir að gleðja mig á síðari hluta ævinnar og í ellinni. Einn þeirra er ungur Svíi sem kallar sig The Tallest Man on Earth í ungæðislegu lítillæti sínu. Hann er stuttur fyrir Svía að vera og heitir bara því ósköp venjulega sænska nafni Kristian Matsson. Drengur þessi, sem er fæddur er árið 1983, á framtíðina fyrir sér líkt og snillingurinn okkar Ásgeir Trausti og t.d. Jonas Alaska í Noregi. Ég vona að vorið fari brátt að teygja hlýja fingur sína til Íslands. Með kveðju, Vilhjálmur.

Athugasemdir

[Jón Steinar Ragnarsson, 25.2.2014 kl. 21:09]

Takk fyrir þetta. Finn kaffiilminn og heyri tifið í eldhúsklukkunni. Eitthvað á Bob Dylan í þessum drengjum öllum, heyrist mér, og ekki leiðum að líkjast. Þeir eiga þó sinn sterka, persónulegan og einlægan stíl sem er kærkomin líkn í öllu Emtywee garganinu.

[Vilhjálmur Örn Vilhjálmsson, 26.2.2014 kl. 08:33]

Já, þú lifðir þig inn í þetta Jón Steinar. Bob frá Dulúð má eiga það, hann hefur mannbætandi áhrif. Ef við getum haft þessa tónlist í heyrnartækjunum á elliheimilinu meðan diskóliðið spassar í hjólastólnum, þá er ég sáttur - ef kaffið er gott og gagnstúlkurnar eru skvísur, og og ... ég bý til lista. Það mun enginn brjóta mannréttindi mín.